Tuesday, September 26, 2006

الحياة علمتنى


يالهوى مكملتش 23 سنة و بقول الحياة علمتنى ؟ … أمال لما أكمل 50 سنة حقول ايه بقى؟ الموضوع إنى بكتب الكلام ده دروس ليا أنا عشان أبقى أفتكرها بعدين .
1) تعلمت ألا أفقد ثقتى بالآخرين …… لأننى من الأساس يجب ألا أمنحها لهم كهدية غالية إلا بعد أن يستحقوها بالفعل .
2) تعلمت أننى لكى أظل طفلا  كما أحب و كما يجب أن أكون فليس كل الناس مؤهلين لرؤية هذا الجانب من شخصيتى و التعامل معه و أحيانا يجب أن أخفى شخصيتى الحقيقية  الطفولية لأحميها من الصدمات من التعامل مع من لن يفهمها .
3) تعلمت أن البنى آدم   الذى يقول " تجوع الحرة و لا تأكل بثديها " يبقى لازم بيصرف فى اليوم ما يكفى لأشباع عشرة على الأقل من الأحرار الجوعى ولن يكون جرب الجوع من قبل و غالبا ما لن يكون مسئولا عن آخرين ليطعمهم و يحميهم .
4) تعلمت أن الكفر و الإلحاد و العمالة و الخيانة و العلمانية و الشيوعية و السعادة و الفشل و النجاح و الثورة والأنتصارو الهزيمة  ………………….. كلها وجهات نظر .
5) تعلمت أن الدرجات العلمية يجب أن ترتبط - إلى حد ما - أحيانا - بالذكاء و بالعلم الذى يملكه حاملها  ……….. و إن لم يتم اثبات هذه النظرية فى مصر لسة للأسف  .
6) تعلمت أننى غالبا على خطأ و الآخرون على صواب …. من وجهة نظرهم على الأقل.
7) تعلمت عن يقين أن كلمة سبحان الله أو الحمد لله واحدة تخرج عن ايمان و اقتناع من القلب أعظم و أجمل من كل تلك الأدعية المحفوظة التى نرددها كالببغاوات و لا نفقه منها شيئا .
8) تعلمت أننى أحيانا قد أضطر لأن أقسو على شخص يحبنى و قد أجعله يكرهنى لو أن فى هذا مصلحته حتى لو كان على حساب علاقتى به .
9) تعلمت و بالطريقة المؤلمة أن كلمة " خلينا صحاب أحسن " قد تكون أصعب على انسان أكثر من أى كلمة أخرى .
10) تعلمت أن المقاومة ليست كلمة رخيصة يقولها المثقفين على المقاهى و يقصدون بها التنبلة و ادعاء البطولة المزيفة و تبرير الفشل فى كل مجالات الحياة الطبيعية الذى نعانيه …….. أحيانا ما نرى رجالا حقيقيون يعلمون ما معنى المقاومة و ما معنى أن تكون فعلا شجاعا و مدروسا و مبادرا  و ليس مجرد كلام أغانى و رد فعل فاشل لا فائدة منه .
يعنى عشان بحب ابقى صريح : شوفو الفرق بين اللبنانيين اللى قاوموا بالعقل و العلم و الدراسة الأسترتيجية ودفعوا تمن الحرية و الأستقلال و قدروا انهم يذلوا اسرائيل و بين شوية المثقفين اليساريين المرضى اللى ماليين البلد و كل البلاد العربية و بيدعوا لمحاربة الأمبريالية - اللى أنا مش عارف يعنى ايه الكلمة دى أساسا - و الوقوف ف وجه أمريكا و بتاع        بينما هم كل انتاجهم من العلم البشرى و التراث الإنسانى مجرد كلام فارغ أجوف لا يغنى و لا يشبع من جوع " مش كل اليساريين طبعا … فيه عشرة تقريبا مش كدة ".
أهم حاجةاتعلمتها بقى إن ممارسة السياسة بالنسبة للشعوب زى دخول الحمام كدة بالنسبة للبنى آدم مليئة بالنجاسة و الروائح الكريهة   لكن هل تتخيل انسان يقرر عدم دخول الحمام تأففا و حفاظا على الطهارة ؟؟؟؟
يمكنك أن ترى النتيجة نفسها فى حياة الشعوب عندما ترى شعب امتنع عن ممارسة السياسة خوفا و خضوعا غالبا و احتقارا فى قليل من الأحيان و  عندما ترى ما وصل اليه حال مصر بعد خمسين سنة من عدم دخول الحمام … أقصد من عدم ممارسة السياسة
11) تعلمت أن مقراش حاجة كاتبها أحمد بدوى لأنها غالبا مش مفيدة و مش بتقدم جديد ….. بس ياريت أنت متكونش اتعلمت الدرس ده لسه .

Sunday, September 24, 2006

وحوى يا وحوى


كل سنة و كل الناس بسعادة و حب و أمل و حرية
النهاردة أول يوم فى رمضان و انتو طبعا عارفين ان الشياطين  بتتحبس فى رمضان عشان كدة حتوحشونى أوى  يا ريت تبقى تزورونى بعيش وحلاوة ……. نكتة بايخة معلش
عموما أنا بس بستسمح الناس اللى زى العسل اللى بينورولى المدونة بتعليقاتهم أنهم مايزعلوش لو الفترة الجاية ماعرفتش أرد على التعليقات أول بأول عشان حكون مشغول حبتين … لأ مش بالأكل … أنا ححاول انى أذاكر عشان أخلص السنة البطيئة دى و أشوف مستقبلى المتأجل بقاله سنتين ده
متفرحوش أوى كدة انا مش حريحكم و أبطل كتابة فى  رمضان بس مش حيبقى زى الأول كل يوم رغى رغى !! ححاول أنظم وقتى و أوزعه وأبعتره على كل حاجة شوية مذاكرة و شوية صلاة و شوية مدونة و شوية أروح الحزب .
إدعولى بس انتو كدة وقت الفطار- إوعوا تدعوا عليا  - انى أخلص السنة دى على خير و إن ربنا يوفقنى وأشتغل و أتجوز بقى وربنا يتوب على الواحد من السياسة و بلاويها و اللى بيجرى فيها
فانوس لوحده


فانوس مش لوحده 

Thursday, September 21, 2006

بدوى و كساب… بهدلتى فى الدستور


الموضوع ببساطة ان أنا غلطت غلطة كبيرة و كنت فاكر ان خالد كساب ممكن يساعدنى بس طلعت غلطان …….ولولا ان الموضوع خلص خلاص من أساسه وراسه و رجله مكنتش كتبته

  أول رسالة للدستور:  Fri, 1 Sep 2006 12:24:05
(((((إلحقنييييييييييييييييى
يا خالد يا أخويا حبيبك (اللى هوا أنا ) واقع  فى مشكلة عاطفية مش عارف أقولك ايه ؟عشان مش طالباها تريقة بس -باختصار- اللى حصل ان فى بنت قابلتها على النت من اسبوعين تقريبا و لقيت فيها كل المواصفات اللى نفسى فيها - طبعا حتقول ده عيل مراهق - بس أنا بنى آدم عقله كبير و بعرف أميز مش حقولك حبيتها بس شخصيتها شديتنى ليها و فى حاجات كتيرة مشتركة بيننا … هى رفضت تقابلنى و رفضت تدينى رقم موبايلها قلت مش مشكلة مسيرنا برضه نتقابل و آدينى بكلمها على المسنجر و خلاص …عارف حتسأل فين المشكلة؟ المشكلة  جاية أهى ركز معايا : من خمس ست أيام بطلت تدخل على المسنجر بعت ليها خمس ميت ايميل ما ردتش و أنا قلقان عليها ليكون حصلها حاجة … طبعا حتسألنى و أنا مال أهلى بالدوشة دى أقولك يا سيدى هى وأنا بنحب نقرا الدستور و هى وأنا برضه بنحب نقرا الصفحة بتاعتك ((تخيل!!)) و من ساعة ما اختفت لقيت الحل الوحيد انى  أوصلها عن طريقك (( ويا بخت مين وفق راسين فى الحلال )) كل اللى أنا طالبه منك تكتبلى كلمتين بس تقولها<<< يا م .س. أحمد بدوى قلقان عليكى موت كلميه طمنيه عليكى لحسن دا آرفنا فى الجرنال و بيهدد بالإنتحار عن طريق مشاهدة القناة التالتة و الامتناع عن قراية الدستور >>>                    
يا خالد يا عسل والنبى متنفضليش لأن دى البنت اللى طول عمرى بحلم بيها و أوعدك لو ربنا كتب لنا نتجوز أسمى أول واد أجيبه خالد و التانى أسميه كساب )))))))))))))
—————————————————————————————–
 
طبعا الكلام ده كان من فترة قريبة و أنا عارف انه تسرع منى و غباء بس معلش … دفعت تمنه و اتعلمت منه برضه
 
 ————————————————————————————
 
ماتم نشره فى الدستور بتاريخ الأربع 6 -sep-2006 :
يا خالد يا أخويا حبيبك (اللى هوا أنا ) واقع  فى مشكلة عاطفية - باختصار - اللى حصل إن فيه بنت قابلتها على النت من أسبوعين تقريبا و لقيت فيها كل المواصفات اللى نفسى فيها - و شخصيتها شدتنى ليها و فيه حاجات كتير مشتركة بيننا .. و أدينى بكلنها ع المسنجر وخلاص .. من خمس ست أيام بطلت تدخل على المسنجر بعت خمس ميت إميل ما ردتش و أنا قلقان عليها ليكون حصلها حاجة .. طبعا حتسألنى وأنا مال أهلى بالدوشة دى أقولك يا سيدى هى وأنا بنحب نقرأ الدستور و هى و أنا برضه بنحب نقرا الصفحة بتاعتك " تخيل !!" كل اللى أنا طالبه منك تكتبلى كلمتين كلمتين بس تقولها يا م . س . أحمد بدوى قلقان عليكى موت كلميه طمنيه عليكى لحسن داآرفنا فى الجرنال .
يا خالد يا عسل والنبى متنفضليش لأن دى البنت اللى طول عمرى بحلم بيها و أوعدك لو ربنا كتب لنا نتجوز أسمى أول واد أجيبه خالد و التانى أسميه كساب )))))))))))))
  ————————————————————
رد خالد باشا :
————————————————————
عودى يا هاميس بدوى فى انتظارك
 
- بص ياعم (أحمد) مبدئيا كون إن ولد يحب بنت .. فدى أجمل حاجة فى الدنيا كلها .. ولكن .. أخشى إنك تكون محدوف لأكثر من سبب .. إزاى الواحد يحب بنت مش بيبص فى عينيها و هى بتكلمه .. مش .. بيتابع انقباضات شفايفها فى المرحلة التى تسبق البوسة مباشرة .. إزاى تقضوها إنتو الاتنين ع المسنجر .. و فى الآخر تقولى عايزين تتجوزوا .. بص ياعم أحمد .. عايزين تتجوزوا من ع الماسنجر .. إشطاط .. بس ماتعيطوش لو خلفتوا فى الآخر "لاب توب" صغير .. ساعتها بقى ممكن أعرف حتسمى اللاب توب "خالد" ازاى ؟!
————————————————————————————-
مش حقول تأثير الكلام ده كان ايه سواء عليا - أنا استاهل - أوعلى البنية المسكينة اللى مكانتش بتحبنى ولا حاجة و فوجئت بالكلام السخيف ده و حست بالاهانة بسببى و اللى زود الموضوع بالنسبة لى لما لقيت واحد المفروض انه صاحبى … صاحبى اوى … بيتصل بيا من مرسى مطروح مخصوص عشان يشمت فيا و يتريأ ………… المهم رديت على الكاتب الكبير خالد كساب :
——————————————————————————-
 تانى رسالة للدستور         wed, 6 Sep 2006 01:13:54
 
خالد كساب - حكلمك من غير ألقاب عشان انت دماغك أكبر من كدة - الكلام ده ليك انت مش للجرنال .
أولا ألف شكر يا معلم انك نشرت الموضوع بتاعى بتاع المرة اللى فاتت " يا هاميس عودى بدوى ف انتظارك "
بس كان عندى ملحوظة : أنا الصراحة ارتبكت لما قريته لأن الموضوع كان خلاص اتصلح و رجعنا نكلم بعض تانى - على المسنجر برضه - أنا عارف انك مش أسامة منير بس ياريت تسمع للآخر و الإيميلات بتاعة البنات مش حتطير استنى شوية .
كنا بنقول ايه ؟ آه المشكلة مش فى الموضوع خالص دلوقت المشكلة بقت فى الcomment اللى انت كتبته ….  حضرتك بتتريأ عشان بقولك بكلم بنت على المسنجر و معجب بيها و بتاع و بتقولى لما تتجوزوا تجيبو لاب توب …. الكلام ده انت قصدك بيه تهزر أو تتريئ أو بتنصح عامة الشعب انهم ميحبوش بالطريقة دى ……. براحتك ده جرنالك أو مش جرنالك لأ ده رأيك  و انت حر فيه بس أنا عايز أقولك ان مش كل الناس زيك … بيتعرفو على دى و يحبو دى و يسيبو دى … مش كل الناس عايشة حياتها على مزاجها
فيه ناس زيى كتير و يمكن أغلبية كمان عايشين الحياة من برة .. فرجة بس … عليييييك  نووووور زى بتوع فيلم ثقافى كدة مش عارفين يعملوا حاجة بجد و لا يحبوا بجد و لا يعيشوا بجد فبالراحة عليهم شوية مش حتبقى الدنيا خانقاهم و انت بتتريا عليهم و عمال تديهم فى نصايح صدقنى كتير منهم حيكرهوك أو يكرهو عيشتهم
على فكرة أنا مش بتكلم عن نفسى أنا شخصيا متقبل ان يبقى فيه ناس عايشة دور البطولة و ناس كومبارس و ناس متفرجين .
أنا ميهمنيش دور البطولة بس مش عايز أبقى من المتفرجين و بحاول أحشر نفسى بين الكومبارس و بحاول كمان أخد انشالله دور صامت فى المسرحية المملة اللى عايشينها دى .
أنا مقلتش ان احنا - أنا والبنت دى - حنتجوز على المسنجر … أكيد كنا حنتقابل و أبص فى عنيها و أمسك ايديها و اشم البارفان اللى حطاه … سيبك من موضوع البوس ده خالص … بس أكيد برضة انى مكنتش حقدر أقابل انسانة زى دى فى الواقع قبل ما أقابلها على المسنجر على الأقل أبقى عارف شخصيتها عاملة ازاى و أعرف لما أقابلها ايه اللى حيخليها مبسوطة… بتقرا ايه و تسمع مين ……. عارف ليه لأنى زى أغلب صحابى و صحاب أخويا و أغلب الولاد اللى أعرفهم معرفوش بنات قبل كدة … عارف بيبقى الحل انه يفضل طول عمره كدة لحد ميتجوز جواز صالونات و يقولك الحب ييجى بعد الجواز و يرضى بقسمته و ده النوع الموظف زى أغلب الأبهات  أو الحل التانى انه يقضيها صياعة و حريم ( كلمة أنا بكرهها ) و  الحب بيبقى حاجة عبيطة بالنسبة للعالم دى  اللى بيدور ف الآخر على واحدة ممشيتش معاه عشان يتجوزها .
بس انا بحاول أكون مختلف أنا بدور على حب يكون بجد مش الحب بتاع بعد الجواز ده - أنا عارفك زمانك بتقول و أنا مالى بالعالم المعقدة دى بس اهمد شوية قربت اخلص الكلمتين المحشورين فى زورى - أنا بحاول ألاقيه و احتمال أعيش طول عمرى من غير ما أوصله بس فيه احتمال يسيط انى ألاقيه . على المسنجر .. فى المدونة اللى عاملها - على فكرة حزعل منك أوى لو مدخلتش عليها و كتبتلى تعليق رخم من بتوعك -.. فى اى حتة بس المهم انى بدور على الحب و بدور على انسانة أرتبط بيها عن حب و عن تناسب
و مدام الموضوع دخل فى ارتباط زى ماأنا عايز يبقى مينفعش  الحب بس لازم يبقى فيه تناسب كمان مش حقدر أستحمل أحب واحدة بعدين تطلع بتكره القراية أو مخها صغير
لازم قبل ما أحب عينيها و صوتها أحب شخصيتها و أنا عارف ان الشخصية فى الواقع بتختلف كتير عن النت بس مهما كان الأختلاف فالأساس بيبقى موجود الأساس اللى مش ممكن أوصله فى الحقيقة غير بالصدفة .
 
يا ريت يا خالد متبقاش قاسى أوى على الناس
وأنا مش زعلان منك و بجد مستني رأيك فى المدونة بتاعتى :
عشان يمكن هى دى تكون وسيلتى الوحيدة انى مبقاش متفرج
 
 
سلااااااام
—————————————————————————————
و هو طبعا معبرنيش خالص ولا فى المدونة ولا فى الجرنان……. ده حقه طبعا
طبعا بعد كدة الموضوع اتهد من أساسه و م . س. بالرغم من اننا اتفقنا نبقى صحاب بعد ماأعتذرتلها على الهبل اللى عملته مشفتهاش تانى تقريبا من يوميها و الموضوع اتقفل بالضبة و المفتاح
اتعلمت ايه ؟
حاجات كتييير … مينفعش أبقى متسرع و أى انسانة أكلمها يبقى ده حب الحب محتاج حاجات كتير تانية … اتعلمت ان خالد كساب ميعرفش حاجة عن الناس و عايش ف دنيا لوحده و ياويل اللى يقع تحت ايده و مش حسمى واحد من ولادى خالد ولا التانى كساب … اتعلمت ان الصاحب ممكن ينصحك زى ماهانى عمل أو يواسيك زى ما اسلام عمل بس ميشمتش فيك … دى متبقاش صحوبية دى تبقى مهلبية أو عقدة و شنيطة و الله الغنى ياعم
اتعلمت الصبر لو كنت استنيت يومين بس كنا رجعنا نتكلم تانى و لو كنت من الأول عندى صبر كنت وصلت للى أنا فيه دلوقت من غير وجع قلب
المهم ان كلام خالد كساب مطلعش صح فى الآخر بس مش حينفع أقول ليه دلوقت مش عايز أبقى متسرع لازم كل حاجة تستقر الأول
طب ايه اللى خلانى أكتب ده كله و أفضح نفسى تانى ؟
اولا : درس للى حيموتوا و يحبوا زيى انهم ميتسرعوش و يبقى عندهم صبروربنا كرييييييييم 
ثانيا : عشان صحابى يعرفوا اللى حصل و أصعب عليهم شوية
ثالثا : عشان عمنا خالد و القراء بقوا بيضربوا بيا المثل فى العلاقات العاطفية الفاشلة و ابقوا اقروا الدستور بتاعة امبارح 21 sep 2006 
رابعا : عشان هى لازم تعرف و مينفعش حاجة زى دى تتحكى فلو خلتها تقرا البلوج تانى هى مش بتحب تيجى فى مكتوب كتير تبقى تقرا الكلام ده و تعرف الحقيقة المرة

برج الحوت ………….. البرج بتاعى



Pisces or Meena (February 19 - March 20)
Ruled by Neptune, Pisces is feminine negative mutable water sign. Pisceans have strong intuitive powers and are considerate and empathic taking on other’s pain without bothering for themselves. With a gentle, patient and malleable nature, they respond very readily to suggestions, good or bad. Pisces rules the feet, the toes and the fibrin of the blood. It’s this kind of self-sacrifice which keeps them going.
Ascendants of this signs are of a negative nature very much fond of luxuries that too often leads them to seek a life of ease. The Pisces people respond very readily to suggestions, whether they are good or evil. Feelings define Pisceans, and they not only feel their own burdens and joys but those of others as well. They have superb observation, concentration while listening and good grasping power. They have greater than average instinct for nature, beauty, traveling, luxury and pleasure. Pisceans are good in subordinate positions or a heads of small business. Their spiritual qualities can also develop their inclination towards a careers in the church or as mediums and mystics. Aquarians are the best match for Pisceans and two tend to bond romantically
برج الحوت أحلى الأبراج   :
 طول عمرى بسمع ان الأبراج حرام … بس بعد كدة عرفت ان فيه فرق بين التنبؤات حسب البرج و النجوم و بتاع … ده بيبقى تخريف غالبا و بين صفات الأبراج الثابتة و مالهاش علاقة بالتنبؤات
يعنى أنا برج الحوت و أغلب الناس اللى أعرفهم برج الحوت بيبقى فينا الصفات اللى مكتوبة فوق دى : اسمع يا سيدى "الترجمة مش بالنص بس مفيهاش حاجة زيادة "
مواليد برج  لديهم قدرة حدسية " مش عدسية" قوية و يهتمون بالآخرين ويتعرضون لآلامهم و يتعاطفون معهم بدون الأهتمام بأنفسهم
مع طبيعة نبيلة (ده هو اللى بيقول ) طيعة صبورة " يا عينى على الصبر"
يتلقون الاقتراحات باهتمام سواء جيدة أو سيئة " هو أنا مودينى ف داهية غير سمعان كلام هانى و اسلام ؟ " الكلام اللى بالأحمر مش فاهمه هذا النوع من التضحية بالنفس هو الذى يساعدهم على الإستمرار " آه والله يا بييه  "
مواليد هذا البرج لديهم طبيعة سلبية " حنبتدى نخبط بأه "  مولعين بالكماليات مما يجعلهم غالبا يسعون لحياة من الرفاهية " لا والله أبدا حتى اسألوا اسلام …"
الأحاسيس و المشاعر تقود الحوتيين < كلمة جامدة دى > و ليس فقط مشاعرهم الخاصة من فرح و حزن بل مشاعر المحيطين بهم أيضا .
لديهم قدرة عالية على الملاحظة و التركيز عند الأستماع " أمال أنا رغاى ليه ؟"
لديهم ميل غريزى أكبر من المتوسط نحو الطبيعة و الجمال  و السفر و الرفاهية و المتعة .
الحوتيين جيدين فى مواقع القيادة الفرعية أو على رأس المشروعات الصغيرة .
جودتهم الروحية قد تقودهم الى مجالات عمل لها علاقة بالروحانيات مثل العمل الدينى و الدعوى  .
الدلويين " بتوع برج الدلو " هم أفضل تماثل للحوتيين و يميل الإثنان للترابط تلقائيا .

Tuesday, September 19, 2006

كيف تحارب الإحباط…. باليأس



مقدمة مملة كالعادة و موضوع طويل بدون اختصار :
الإحباط هو الشعور بخيبة الأمل و يأتى عندما يتعلق أمل الإنسان بموضوع ما ثم يفشل هذا الموضوع ربما يكون هذا الموضوع مشروع تجارى أو قصة حب  أو حتى تجربة علمية  "ده لو برة مصر يعنى " و الإحباط هو شعور قاسى للغاية قد يدفع الإنسان للغضب أو الحزن أو - لو هو انسان متفائل أوى - قد يدفعه لمزيد من العمل و الإصرار على النجاح … على فكرة لا يلزم الفشل التام  للإحباط فقد يكون الأنسان ناجحا بمقاييس الآخرين و لكنه من داخله لا يرى قيمة هذا النجاح و لا يشعر بأنه حقق ما يريد فيصيبه الإحباط
كثرة الأحباطات أو شدتها أو تتاليها وراء بعضها قد تؤدى لليأس الذى تختلف درجاته و عمقه
و اليأس الذى أتحدث عنه لأستخدامه لمحاربة الإحباط  ليس هو اليأس من رحمة الله كما قد يظن البعض … فقد ييأس الأنسان من اتمام موضوع ما ( زواج مثلا ) ولكنه لا ييأس من أن الله قادر على تعويضه عن هذا الزواج بزواج أفضل … بمعنى أن اليأس الذى أتحدث عنه هو مرحلة من مراحل اليأس التام الكلى الذى يؤدى بالإنسان الى فقد كل احساس بأى متعة فى الحياة و فى الآخر يموت نفسه و يريحنا … لكننى أظن أن الوصول لهذه المرحلة الرائعة من اليأس لا يصل اليها أى انسان … محتاجة مجهود شوية و شخصية مرهفة حساسة لا تتوفر كثيرا
ما علينا …… الفكرة العبقرية التى توصلت اليها بعد معايشة الإحباط تلو الإحباط و الفشل تلو الفشل ثم دخولى مراحل اليأس بأشكاله و تنويعاته المختلفة " تقولشى بأتكلم عن ديزنى لاند " أنه يمكن استخدام اليأس الخفيف المزمن فى مواجهة الإحباط المتكررالقاسى بحيث يفقد الإحباط قوته و تأثيره و يتحول الى شئ عادى غير مضر فى حياة الإنسان و يستطيع الإنسان تجاوزه ببساطة …
الكلام النظرى يحتاج دائما لإثبات أو أمثلة :
أقولك ياسيدى المثل الأول هو التغيير و الحرية فى مصر بعد أن استمررت لعامين فى محاولات قليلة التأثيركثيرة المجهود  للتغيير و كانت النتيجة دائما الفشل المتكرر
سواء فى كل الانتخابات التى خاضها حزب الغد و خسرها بجدارة و التى كلفتنى أخراها فى مجلس الشعب سنة دراسية كاملة و علقة مهينة فى الشارع على يد أحد بلطجية"على أبو النجا" أحد المنشقين على الحزب لصالح الحكومة و الذى كنت لفترة ما ساعده الأيمن قبل أن يقرر الظهورعلى حقيقته والإنضمام للمجموعة المدسوسة من أمن الدولة لتبويظ الحزب و كل ماقمت به أن دافعت عن الحزب فى اجتماع عقد خصيصا للم توقيعات الأعضاء للأنشقاق مما أدى لأنقلاب الأعضاء ضده فما كان منه الا أن منعنى من دخول المقر بمدينة نصر ثم أرسل احد بلطجيته المخلصين ليقوم بسبى و سب د.أيمن نور فى الشارع و عندما قمت بالرد كان نصيبى اهانة من شخص مستنضفش أشغله عندى أصلا و لم أجد بنى آدم ليساعدنى أو يحمينى ……. أذكر هذا المثل بالرغم مما فيه من مرارة شخصية لأنه عندما حدث و سبب لى وقتها ما أظن أنه أزمة قلبية حقيقية لم أيأس و أكملت الأنتخابات لآخرها حتى كانت نهايتها بلا أى نتيجة يمكن أن تعوضنى عما حدث و الإحباط الذى أصابنى بعدها أقسى على من كل ما حدث فى الإنتخابات
و نفس الكلام يقال بالنسبة لحركة كفاية التى انتهت الى مجموعة محدودة من السياسيين الذين لم يتفقوا على شئ سوى الإختلاف فيما بينهم  و الظهور أمام وسائل الإعلام بمظهر الأبطال الفاتحين  و شبابها العاطلين المعقدين سياسيا و الذين يتقاتلون فيما بينهم لأتفه الأسباب  و كل منهم مقتنع تماما أنه جيفارا أو غاندى هذا العصر بينما لا أستطيع أن أجد لما يفعلوه - و أنا منهم - أى أثر على الناس العاديين و التى كنت كلما حضرت أحد فعالياتها أو أنشطتها أو اجتماعاتها أصيب بإرتفاع ضغط الدم و الحزن الشديد لو أن هؤلاء هم أمل مصر فى التغيير 
المهم بدون تفاصيل تحبطك أنت شخصيا ربما تتسائل أو ربما لاتهتم أصلا لماذا أستمر فى العمل السياسى بفرض أن ما أفعله ينتمى للسياسة أصلا ؟ …….. السبب السحرى يا سيدى هو اليأس لقد يأست تماما من أى تغيير أو تحسين للأحوال أو منع التوريث فى مصرو لكننى بكل بساطة لا أجد وسيلة أخرى لمقاومة ما يحدث سوى الإستمرارفى ما أفعله من محاولة توعية الناس و نشر ما يحدث من مآسى و مهازل و الإتصال بمن قد يكون مهتما بمعرفة الحقيقة من زملائى أو أصدقائى أو حتى أشخاص لا أعرفهم .
و هنا تظهرقيمة اليأس فأنا أفعل ما أفعله بدون حماس شديد و بدون اهتمام بالنتائج بحيث لا أتعرض أبدا للإحباط كلما قابلت من يدافع عن الزعيم  مبارك أو من يقول أن العيب فى الشباب الذى لا يحاول الحصول على عمل و يفضل أن يظل عاطلا و أبتسم ساخرا  كلما قابلت شابا يقول ان الحل فى أن يصلح كل منا من نفسه  و البلد حتنصلح لوحدها بأمر ربنا و كأن الله سيكافئنا على السلبية و الجبن و الخضوع للفاسدين و الظالمين
و عندما أجد أحيانا ان ما أفعله له تأثير و لو بسيط أفرح بشدة لأننى من الأساس لا أتوقع أى تأثير
مثل ما حدث عندما قابلت أحد الناشطين المتحمسين بالحزب منذ فترة و اسمه كريم و أخبرنى أن سبب انضمامه للحزب عندما قابلته مرة فى الشارع و كنت أقوم باجراء لأستطلاع الآراء تبع لجنة الإعلام و كان هو شديد الكراهية للحزب ولأيمن نور نتيجة لما يسمعه عنه فى وسائل الأعلام وبالرغم أن الموضوع وقتها بالنسبة لى كان روتينيا أن أقابل أشخاص لا يعلمون أى شئ عن الحزب الا من الإعلام و لم أكن أعول كثيرا أن يقتنعوا بما أقول ….. لذلك تخيل مدى سعادتى أن أجد أثرا لما فعلته بعدها بما يقرب من العام دون أى توقع أو إنتظار
المثل الآخر هو موضوع شخصى فكلما أظن أننى وقعت فى الحب  " و أنا أعترف أننى دائما ما أتسرع فى هذا الظن" أصاب بالإحباط  بسبب الرفض الذى يكون كل مرة أشد وطئا من الذى قبله  لدرجة أننى وصلت لمرحلة اليأس من الحب و قررت ان تكون حياتى مثل كل الناس الذين يتبعون المبدأ البيهيمى  " راجع إدراج النظرية البيهيمية و الأنسان البيهيمى " فى الحياة بدون حب و عدو الإهتمام أصلا بالحب و العجيب أننى ما أن اقتنعت بهذا حتى حدث لى حادث سعيد لن أخبركم به طبعا  لأن الموضوع كله يأس و أحباط من الأول
الخلاصة اذا كنت تحاول القيام بعمل عظيم أو كبير أو صعب للغاية و يحتاج للمجهود و احتمالات نجاحه محدودة أو تخشى من الفشل تسلح باليأس من النتائج
اعمل ما بوسعك و انت تضع فى نيتك إنك بتعمل اللى عليك و الباقى على ربنا أو انك بتعمل الخير و ترميه فى البحرأو أى حاجة بس المهم ألا تتفائل و تنتظر النتائج بسرعة و ستجد النتيجة فى حالة الفشل أنك توقعت الفشل من الأصل فلم يصبك الإحباط و فى حالة النجاح أن النجاح يكون طعمه أجمل بكثير اذا ما أتى بدون انتظار
متشائم مكتئب مخنوق
أحمد بدوى