لما يجيلى سرطان و أموت

لما يجيلى سرطان و أبدأ أموت لوحدى و محدش جنبى حبقى أطلب كام قصة من بتوع أحمد خالد توفيق و أشغل كام أغنية من فيروز على ام تى ام على حاجات تانية كتير و مش ححس بحاجة و مش حبقى زعلان انى حسيب الدنيا دى غير عشان الحاجات اللى كان نفسى أغيرها و مقدرتش

امبارح رحت معرض الكتاب و هانى خلانا نلف كتير قوى أنا و هو و راجى ..... بجد جاتلى فكرة غريبة .... بقى كل كميات الكتب دى و الناس اللى درسوا و فهموا و حللوا و وضحوا و كتبوا و فى الآخر مفيش حاجة اتغيرت !!! و الناس العادية تفكيرها زى ما هو و بيبوظ زيادة يبقى أنا اللى حقدر أغير ؟؟

بحاول أتخيل كام واحد قرا اللى بكتبه ... و كام واحد من اللى قروا أتأثر بحاجة كتبتها ... و كام واحد التأثير اللى اتأثره خلاه يغير حاجة فى حياته أو تفكيره ؟؟ و قلت فكك من التأثير ف الناس و خليك فى نفسك

فكرت كمان ازاى أنا تناقضاتى دى حتخلينى دايما وحيد و بعيد عن الناس ... بخاف أقرب من حد اوى عشان مخسروش عشان فعلا كل ما بقرب من حد بخسره .... لأنى فعلا مش قادر أبقى متسق مع نفسى .... و فعلا مكنتش شايف ان ده عيب

هى حاجة كويسة أنى أبقى بفكر كتير و فى نفس الوقت طفل و بحب الحب و زاهد فى الحياة و مؤمن بربنا و بدور على الحقيقة من غير قيود و شخصيتى ضعيفة و مش قيادية ؟؟ ....... كنت فاكر ان كل ده على بعضه كويس بس كل ما أفكر أنى فى المستقبل غالبا حبقى لوحدى بتخنق و بتمنى لو أعيش من غير تفكير ... لو أعيش عادى تفكيرى على قد احتياجاتى و جوة أسوار عقلى ... بس مش بارادتى أكون زى ما أنا

فكرت كمان ازاى أنا بغوص فى طريق العقل و ببعد عن ربنا لأن كل ما أفكر أكتر ايمانى يضعف أكتر ... خايف فى يوم من الأيام أنسى انى فى يوم تانى من الأيام كنت لما بدعى ربنا كان دايما بيستجيب ليا أو بحس براحة أنى دعيته .... خايف أقتنع بكلام واحد زى سيد القمنى أو نوال السعداوى وأنسى اللى كنت بحس بيه زمان لما كنت بصلى

المشكلة أنى بدور على الحقيقة ... عقلى مش راضى يبطل تفكير أو مش راضى يتحبس جوة قيود معينة ... و المشكلة كمان ان كلامهم منطقى بنسبة كبيرة جدا جدا

فاكر مرة لما قريت أن خالد بن الوليد قتل عشرين ألف أسير رومانى فى معركة واحدة ؟؟ ... قطع راسهم واحد واحد عشان أقسم قبل المعركة أنه حيخلى لون النهر اللى احتموا بيه أحمر و حب يبر بقسمه بدل ما يدعوهم للأسلام ؟؟

فاكر لما توقعت أن رد فعل الخليفة أبو بكرحيكون عنيف ضده ؟؟و فاكر لما اكتشفت و ذهلت أن سيدنا أبو بكر كان مبسوط جدا من اللى حصل ده و قال أن خالد مجابتوش ولادة ؟؟ ............ المشكلة أنى مقريتش الكلام ده فى كتاب لواحد من الناس اللى دايما بتتوصف بأنها ضد الاسلام ...... المشكلة انى قريته فى كتاب من كتب السيرة و الكاتب نفسه بيحتفى و يمجد فى ده و كنت ساعتها فى عز ايمانى ... كنت بدعى أن كل حرف اقراه آخد عليه ثواب ..... فاكر ؟

و فاكر ازاى القصة دى صدمتك ؟؟ و فاكر الحاجات التانية الكتير اللى كل ما كنت تقراها تحس أن فيه حاجة غلط و ان فعلا الدين مش خالص لله و ان ألوف الناس كسبوا منه فى الدنيا ؟؟ فاكر لما قريت أن أبو هريرة مكانش من أصحاب النبى او على الأقل مش ملازم ليه و أن ناس كتير فى أيامه اتهموه أنه بيقول أحاديث بمزاجه و أنه كان بيكره الكلاب و حط أحاديث ضدها عشان كدة بقت الكلاب نجسة ... و ان مفيش أحاديث للسيدة فاطمة بنت النبى عليه الصلاة والسلام موثقة عندنا ؟؟.

فاكر كل ما تقرا فى كتب التفسير و تلاقى كل واحد بيحط أكتر من تفسير لكل آية و ان فى الآخر زى بالضبط ما قالت نوارة نجم ... الله أعلم مين صح و مين غلط و مين بيجتهد و مين بينصب ؟؟

...... ادينى عقلك .. ولا أقول لك بلاش تدينى عقلك عشان متتجننش زيى و كفاية عليا ذنبى أنا بس ... مش عاوز ابقى زى الشيطان اللى شال ذنبه و ذنب غيره عشان فكر بالمنطق بدل ما يطيع الأوامر اللى جاتله من ربنا

يا ترى لما يجيلى سرطان و أموت لوحدى حتحاسب على التفكير ولا مش حتحاسب ؟؟