شايف أمل فى مستقبل مصر
مصر حرة متقدمة أهلها و شبابها بالذات محترمين مثقفين مبدعين أحرار مشاركين فى تقدم و رقى البشرية من غير كره ولا عنف ولا تخلف
أمل فى شعب محترم متسامح مادد ايده بالخير لكل الناس جواه و براه
امل فى شباب بيفكر و بيتعلم و بيبنى و بيختار و بيغلط و بيصحح غلطاته و بيتقدم من غير ما واعظ يبقى رقيب على ضميره و لا ضابط يبقى رقيب على كلامه و أفعاله
أمل فى مستقبل من غير حروب ولا دمار ولا قتل
مستقبل من غير نفاق ولا عبودية ولا فساد ولا نهب ولا احتكار ولا استقطاع
لسة عندى أمل فى مصر بتحترم حقوق ولادها و بناتها و مش بتفرق بينهم ولا بتعاملهم على حسب دينهم ولا جنسهم ولا فلوسهم
مصر بتحترم تاريخها كله و بتتعلم من تاريخها كله و بتنتقد تاريخها كله من غير تشويه ولا تهويل ولا كذب
مصر دولة مدنية أهلها مؤمنين من غير دروشة ولا نصب ولا اجبار
مصر دولة عظمى ثقافياً و حضارياً و علمياً من غير شوفينية ولا استعلاء ... دولة غنية من غير غزو ولا نهب ... دولة آمنة من غير قمع ولا قهر و لا استبداد
لسة عندى امل فى شباب مصر اللى لسة بيبدأوا حياتهم ( و أنا منهم ) أنهم يقدروا يبنوا مصر جديدة غير اللى كاتمة على نفسهم دلوقتى
يعنى ... لسة بحبك يا مصر
No comments:
Post a Comment