معلش رجعت فى كلامى

الصراحة كدة يا جماعة مش نافع انى أبطل كتابة لحد يوم الأتنين زى ما وعدتكو قبل كدة .

أولا : كل شوية تحصل حاجة جديدة تبقى صوابعى بتاكلنى عايزة تكتب عنها و ثانيا : الدراسة قربت و مش حعرف أكتب ف أيام الدراسة عشان انتو عارفين طبعا ان الواحد بيحب الدراسة مووت …و ثالثا : متهيألى كل اللى زاروا المدونة قروا اعلان الأعتصام … مش حكاية بقى

و رابعا :أهم حاجة انتو وحشتووووووووووونى

كل اللى بيزور المدونة و لو بالصدفة بحس انه بقى فيه بينى و بينه علاقة معينة مش عارف هى ايه!! بس ببقى عايز أفضل معاه أكتر وقت ممكن و أقوله كل الكلام اللى عندى و ببقى فرحان لما حد معرفوش بيقولى رأيه فى كلامى بحس فعلا بأن أنا ليا لازمة فى الدنيا و ليا تأثير مش معدى كدة و خلاص

ايه بقى الأحداث الكتيراللى حصلت فى الأسبوع ده "مكملش اسبوع"؟

1) عدد زوار المدونة عدا الألف و أنا كنت ناوى أحتفل بالموضوع ده بادراج جديد يبقى جامد بس خلاص بقة المرة الجاية لما يعدو عشرة تلاف

 

تورتة بمناسبة الألف زائر … اتفضلوا معانا

و طبعا اسلام حيخلصها لوحده

2) والدى دخل انتخابات فى نادى فى القاهرة الجديدة و بالرغم من ان النادى لسة تحت الأنشاء و عدد الأعضاء مكملوش 2000 عضو و مفيش مرشحين غير تلاتة بس زيادة عن العدد المطلوب لمجلس الأدارة " بابايا و مامتى وواحد تانى "… إلا ان زى كل حاجة ف مصر … الأنتخابات اتطبخت وواحد من التلاتة المرشحين " اللى هو التانى " شطبوه عشان عضو فى الأخوان برغم انه دكتور فى التربية الرياضية ف جامعة الأزهر و جابوا عشر عساكر و ضابط من القسم وقفوهم أدام اللجنة و منعوه يعلق يافطة يتيمة كانت معاه و طفشوا الناس عشان العدد ميكملش و فى الآخر فضل مجلس الأدارة القديم زى ماهو و كلهم قرايب أصلا ….حاجة تكسف … تحس ان الموضوع كان نسخة طبق الأصل من انتخابات مجلس الشعب بس على صغير 

بركاتك يا حاج سرور

3) على المستوى العاطفى … احم احم … حصلت حاجات كتيرة يمكن تكون مالهاش معنى لو حصلت لحد غيرى بس أنتو عارفين أنا بعمل دايما من الحبة قبة و كل حاجة بتأثر فيا …… طفل فعلا على رأى هانى

4) الحاجة اللى غاظتنى امبارح كلمة بابا الفاتيكان اللى مالهاش أى لازمة و جاية فى وقت غبى غبى غبى … مش عارف هو كان عايز ايه بالضبط ؟ هو الموضوع ناقص فتن طائفية ؟ معقولة بيقول الكلام من غير ما يفكر حيبقى تأثيره ايه على الناس و لاَّ نرجع تانى لنظرية المؤامرة و نقول ده هو كان قاصد يولعها حريقة عشان يبرر كلام جورج بوش النصاب اللى باع للأمريكان الهوا فى قزايز ؟

5) الدراسة بكرة …صحيح يعنى أول شهر ده كله على بعضه بيضيع من غير فايدة و بعد كدة كمان رمضان و مفيش مذاكرة ف رمضان بس " متقولوش لحد " احنا طلاب الغد و كفاية و الاشتركيين الثوريين و طبعا الأخوان ناويين نعمل شغل جامد فى الجامعة … لأ مش ناويين نعمل انقلاب ولا حاجة بس حنحاول على قد مانقدر نفوق الطلبة اللى القناة الأولى مسحت دماغاتهم و نحاول نخليهم يحسوا بان البلد بلدهم ليهم فيها حقوق المفروض يدافعوا عنها أنا عارف طبعا ان الكلام ده محتاج سنين شغل و محتاج صبر عقبال منشيل حيطة المبايعة و سور (أنامالى خلينى ف حالى) و سلاسل الخوف من أى حاجة ليها علاقة بالسياسة و شغل تانى أصعب ان الناس بتوع السياسة الأول يستحقوا و يفهموا أنهم كلهم فى مركب واحدة مش كل واحد بيحارب عشان التيار بتاعه وخلاص

لازم الواحد يحب التعليم برضه

6) سادس حاجة بقى الإعلان الرائع الجميل الفز اللى سمعته على قناة نجوم اخص ام امبارح برضه و ده يستحق مدونة لوحده عشان تشرح أبعاده الجهنمية و الأبداع العبقرى و المجهود المبذول فيه :

الإعلان عبارة عن مذيع بيسأل الشباب ( كنت عاوز أقول كلمة توصفهم بس عيب برضة احنا ف مكان محترم ) أهم شباب وطنيين ديمقراطيين و خلاص

المذيع الجميل بيسألهم يا ترى فيه فرص شغل فى البلد ولا لأ ؟

فيروح الشاب المصرى الصميم رادد بكل غباء و شلل " قصدى إباء و شمم" فيه شغل طبعا بس الشباب مش بيدوروا كويس 

طبعا الشباب هما الغلطانين هما اللى قاعدين ع القهاوى غاويين بطالة و مش عاوزين يشتغلوا و لا يكسبوا ولا يتجوزوا و عاجبهم انهم عالة على أهاليهم و طبعا فى ظليلة القيادة الحكيمة المحتاجة لضبط زوايا و اتزان و تغيير زيت و مفاصل لازم نحمد ربنا ع اللى الشباب فيه

الصراحة معرفش ازاى صاحب فكرة البرنامج ده مخدش الأوسكار ؟ أو جايزة الدولة التقديرية عشان تقدير قدراته الفزة اللى محصلتش فى الإستهبال و ال……… (برضه عيب أوصف الموضوع بالأسم الصحيح كل واحد يلاقى وصف من عنده و ميحملنيش ذنب )

و النبى لو حد له علاقة بالقناة دى يتصل بيهم و يبلغهم ان شباب مصر لما سمعوا الإعلان حسوا بغلطهم و قرروا يرموا نفسهم فى البحر تخفيفا عن كاهل الحكومة المكسور {{ 40 شاب مصرى غرقوا من أقل من أسبوعين فى محاولة فاشلة للهرب لإيطاليا بدون أى وسيلة انقاذ و لا مشاعدة }}

الهى ياللى اشترك فى الأعلان ده ينسخط عضو فى الحزب الوطنى… قولوا آمييييييين