أتذكر عندما كنت أذهب للمظاهرات فى شبابى " من كام شهر كدة " كانت الهتافات التى نقولها فى المظاهرة لها تأثير كبير على الروح المعدنية للمتظاهرين أحيانا كانت تحمسهم خصوصا السذج أمثالى و أحيانا كانت تضحك المتواجدين بعض الهتافات كانت تقال على سبيل فش الغل و بعضها على سبيل المجاملة أو أى كان…. بدون اطالة :
" بالروح بالدم نفديك يا زعيم " ربما هذا الهتاف هو الأقدم تاريخيا من أيام الفراعنة و يقال لكل حاكم أو قائد أو أى عابر سبيل يريد المتظاهرون التظاهر بحبه و الزود عنه و ساعات بيزودوها شوية مع استبدال اسم هذا الشخص بكلمة "زعيم"
هو الراجل ده قرفان مننا كده ليه ؟
و للأسف أن هذا الزعيم قد يصدق ما يقال ثم عندما يجد الجد يجد روحه لوحده و دمه مباح بدون لا روح تفديه ولا دم يحميه و عندنا المثل الحى "الزعيم" صدام حسين اللى يبدو أنه صدق نفسه ووقف فى طريق أصدقاؤه القدامى ونهايته ماثلة أمام كاميرات الجزيرة ؛ مثل آخر لابد من ذكره للأسف هو الزعيم أيمن نور الذى كان أهالى باب الشعرية " دائرته الأنتخابية " دائما ما يهتفون له هذا الهتاف و كنا " بعض أعضاء من حزب الغد " نحاول افهامهم عبثا أن هذا الهتاف مستهلك و لا يعبر عن مكانته فى قلوبهم بأى شكل … حتى حصل ما يعرفه الجميع عندما تم حبسه بتهمة واضحة وضوح الشمس بالليل و لم يجد للأسف من يدافع عنه لا بالروح و لا بالدم الا مجموعة محدودة من الأشخاص من القريبين منه أو بعض الشباب المتحمس .
" الشعب المصرى فيييييين الشعب المصرى أهو " يقال هذا الهتاف مرتين قبل الأكل و بعده مع حرص الشخص الذى يقود الهتاف على الأشارة على " الشعب المصرى " الذى يسانده و هو مجموعة لا تتعدى 200 شخص غالبا من أعضاء حركة كفاية الله يرحمها و بعض المارة الذين وقفو للسخرية من المتظاهرين " و الله الناس كانوا بيقفوا عشان يتريقو و كمان يعبروا عن وجهة نظرهم الثاقبة لمرارتى من ان مبارك زى الفل و انه اللى نعرفه أحسن من اللى منعرفوش … يا عمى ده مرة واحد لقى مراسلة أجنبية بتصور قال دول اللى فى المظاهرة أجانب … مش محتاجة تعليق دى "
" تحيا مصررررررر تحيا مصررررررر و يسقط يسقط حبيبنا مبارك " ده بقى أحلى هتاف تقريبا قلناه و لازم تقرص على الرااء أوى و محدش يقولى بتقولو يسقط حبيبنا مبارك ؟ أنا كنت بقول كدة يا أخى وانت مالك ؟ بس مش عارف ليه دايما اللى كان بيقول الهتاف ده يبقى بيضحك
" واحد اتنين … صاحب العبارة فين ؟" ده هتاف مخصوص عشان موضوع العبارة اللى مات فيها ألف واحد و طلع صاحبها عضو مجلس الشورى تعيين عن الحزب الوطنى و الصراحة احنا كنا مزودينها … الراجل مش غلطان فى حاجة خالص ده كان بيساعد فى حل مشكلة الأسكان و كمان طلع عنده جنسية انجليزى يعنى الراجل يعمل ايه ؟ يقطع نفسه ؟ مش كفاية عنده جنسية انجليزى و قاعد لكم فى البلد الخربانة دى ؟ و الصراحة أياميها كان عدد الناس فى المظاهرة بيعدى ال 5000 و مش ببالغ لأن انتخابات الرئاسة كانت خلصانة و الناس كانت قرفانة و أمريكا من حسنى زعلانة " ياعينى ع الشعر"
" لا مذاكرة بعد اليوم … لعب الكورة أهم أهم " ايه ده ؟ دى كنا بنقولها بعد الدراسة متخلص مش فى مظاهرات كفاية بس الواحد كان بيحس برضه انه فش غله فى المدرسة
" بااااااااااطل … باااااااااطل " دى بقى بنقولها على كل حاجة فى البلد " مجلس شعب … باااطل" "مجلس شورى … باااطل "جمال مبارك … بااااطل " " سوزان مبارك … بااااطل " لحد شوية شوية كنا حنقول " حركة كفاية … باااااطل "
"يا مبارك يا مفلسنا… قوللى بتعمل ايه بفلوسنا ؟ " بقى ده سؤال يتسأل يا راجل بيسدد بيها ديون مصرطبعا
" يا هانم قولى للبيه … كيلو العدس بسبعة جنيه " و ده هتاف من أيام السادات- مش الفيلم - أيام ما كانو بيقولوا "يا هانم قولى للبيه … كيلو اللحمة بقى بجنيه" طبعا مع فارق العملة دى جيهان ودى سوزان وبكرة خديجان
" عبد الناصر قالها زمان الجيش المصرى فى كل مكان " طب أنا راضى زمتكو و النبى ايه علاقة الكلام ده بمظاهرة لكفاية ؟؟؟؟ مالهاش علاقة غير ان فعلا وقتها كان جيش الأمن المركزى المصرى فى كل مكان حولينا … ده بقى مرة واحدة لقيت واحد بيهتف بالهتاف ده وسط الناس … الصراحة صعب عليا لما مالاقاش حد يرد عليه و صحابه سحبوه عشان كان منظره وحش أوى
" ياأهالينا ياأهالينا …. ضموا علينا ضموا علينا " كنت بتشائم من الهتاف ده لأن أهالينا بينقسمو ساعتها اتنين الناس اللى بتتفرج و الناس اللى قررت فعلا تضم علينا و كانوا بيقرصوا أوى فى الضم عشان كانوا بيبقو متمرنين على كدة فى معسكرات الأمن المركزى و أول ما يسمعوا الهتاف ده يروحوا ضامين من كل ناحية وفعصينا فى النص
أهو أهالينا بيضموا علينا أهو
" اللى عايز يحكم مصر … لازم يسمع شعب مصر" طب أقولهم ايه دول هما مش عارفين ان سمعه تقيييييل
كنا بقى بنختم كل مظاهرة بالنشيد الوطنى " كفاية كفاية كفاااااية … كل ظااااالم و له نهاية " بس المشكلة إن طلع كل ظالم عامل حسابه على استبن
No comments:
Post a Comment