حزب الغد
ايه هو حزب الغد ؟
حزب الغد بالنسبة لى هو المدرسة اللى اتعلمت فيها تقريبا كل حاجة عن الحياة .
اتعلمت فيه ازاى أحب مصر
وازاى أكرهها
((هذه الصورة منقولة عن جريدة الوعى المصرى الألكترونية
www.misrdigital.com وألف شكر لوائل عباس))
اتعلمت فيه معنى انك تدفع تمن حريتك وحرية غيرك
اتعلمت فيه يعنى ايه حرية أصلا.
أقولك ايه ؟ هوأول مكان أبات فيه برة بيتى مع ناس غريبة عنى عشان أرتب شوية ورق وبالرغم التعب ألاقى نفسى فرحان كأنى عملت حاجة كبيرة… فاكر ياحسام لما سهرناللصبح فى مكتب موسى موسى عشان نرتب أسامى الناس والبطاقات
للى حيحضروا أول جمعية عمومية وفى الآخر مخلصناش من كترهم ؟
هو أول مكان ألاقى نفسى فيه بعمل حاجات صغيرة وألاقى الناس مستكبراها … أيوة ياحضرة الضابط أنا اللى لزقت ستيكر الحزب على عربيتك من سنتين أدام مجلس الدولة و صحابى قالولى يابنى انت أهبل ؟ ده لو شافك حيعلقك وأنا استغربت أوى من كلامهم ياترى لسة نفسك تعرف مين اللى لزقلك البوستر؟ أنا بعترف أهو.
حزب الغد ؟ ياااااه ده المكان الوحيد اللى حسيت فيه ان أنا انسان له رأى و ممكن يعمل تأثير
دايما أمى بتكدرنى : خدنا ايه من النيلة الحزب بتاعك ده ؟
طب أقولها ايه ؟ … ده تقريبا أغلب صحابى عرفتهم من الحزب شريف و هانى وسامح ومرام وايهاب و عماد … متعدش
هو المكان اللى قابلت فيه نماذج من البشر مستحيل كنت أقابلهم فى أى مكان تانى
ناس ممكن تضحى بنفسها من غير ما حد يعرف ودايما واقفين فى الكواليس
وناس تضحى بأى حد عشان مصلحتها
.
ناس مينفعش أقول عنهم غير انهم ناس عظيمة ممكن الواحد يحارب عشانهم حتى من غير ما يعرفوا
و ناس مينفعش أقول غير أنهم ناس حقيرة دنيئة ممكن الواحد يموتهم أو يؤذيهم من غير أى تأنيب ضمير
.
ناس كنت فاكرهم يا ما هنا وياما هناك وطلعوا ولا حاجة و ناس كنت فاكرهم وحشينلاقيتنى غلطان فى حقهم
حزب الغد هو اللى خلانى أعمل e-mail مخصوص عشان أعرف أكلم الناس على النت وأشرحلهم يعنى ايه حزب الغد واسمى ارتبط باسمه من ساعتها
كان شريف فاهد دايما يقولى يا بدوى انت كنت راكب أتوبيس 500 طلع 500 بشرطة لقيت نفسك أدام الحزب دخلت و أديك مقضيها والله شكله عنده حق و ايهاب طلعت الطويل ده
دايما يقولى انت مش فاهم حاجة ودلوقت بقول عنده حق
هو اللى مصور أغلب الصوردى كلها على فكرة فى 9 – 11 -2004
حزب الغد هو أول مكان أكون فيه انسان وهو المكان اللى مقبلش أبدا انى أهجره يمكن أسيبه فترة بس عارف انى لازم أرجع له تانى .
حكايتى مع الغد طويلة و لسة منتهتش
No comments:
Post a Comment