مصر اتخطفت ...
الأخوان حيتبهدلوا أكتر ما هما متبهدلين ...
الأنتخابات حتبقى فى يوم واحد من غير اشراف قضائى ...
من حق أمن الدولة أنهم يلموا أى حد فى أى وقت - ممكن يبقى قريبك على فكرة - من غير ما يقدر يرفع قضية لأن الموضوع بقى دستورى و قانونى ...
ده طبعا غير التنصت على التليفونات من غير اذن نيابة ولا كلام فارغ
مفيش حد حيعرف يرشح نفسه فى انتخابات الرئاسة - ده لو حد استجرى يعنى بعد اللى حصل و بيحصل لأيمن نور - غير اللى يوافق عليه الحزب الواطى
هو ده الدستور اللى حسنى زفت بيقول أنه مستقبل مصر؟؟؟
---------
فاضل ايه طيب ؟؟؟؟؟ هما متوقعين ايه يعنى ؟؟؟؟؟
الضغط بيولد الأنفجار ... و الأنفجار مش حيبقى سهل ولا هين
دمى محروق من اللى بيحصل ... شوية أقول مفيش فايدة و لازم أكبر دماغى زى ما الناس كلها ما عاملة ... بس فعلا مينفعش ... اللى بيحصل فى البلد ده زيادة عن حده قوى
دول مش فاهمين أن اللى بيعملوه ده حيولع البلد كلها مرة واحدة ؟؟؟
طول عمرى ضد الثورة ... لأ مش بس الأنقلابات العسكرية ... الثورات الشعبية كمان .... لأنها بتدمر أكتر ما بتبنى و بتحرق الحلو مع الوحش ..... بس دلوقتى حاسس أن فعلا الضغط زاد عن حده - طبعا عم هتلر/لينين فرحان أوى بالكلمتين دول بس ما علينا -
معرفش الأخوان حيفضلوا محافظين على تماسكهم و صبرهم و نظامهم لحد امتى ؟
... و الفقرا اللى بالملايين حيتحركوا و يكتسحوا قدامهم كل حاجة امتى ؟ ...
المشكلة أن الناس عاوزة تنسى و ترجع لحياتها القديمة بس مش عارفة ...
حسنى خرا مش عاوز يهمد و يسيبهم فى حالهم ...
يخلصوا من عبّارة يدخلوا فى سرطان فى فيروس سى فى بلا أزرق و فى الآخر مش مكفيه ده كله و بيديهم على قفاهم و يقول لهم حجيب الحيوان اللى مخلفه بعديا
مش عاوز أبقى زى غراب بينوح قبل الخراب ... بس فعلا فيه أيام سودا جاية
المشكلة أن كل واحد فاكر أن الحياة حتقف عند دلوقتى و مفيش أيام جايه !!!
الغريب أن ناس كتير مش حاسة باللى بيحصل ... و لما أنصح واحد صاحبى أنه يهاجر لو جاتله الفرصة ألاقى واحد تانى يقولى بلاش لحسن مش حيعرف يعيش برة ....... آل يعنى هو كان عايش جوة أصلا
مظنش أنى ببالغ أبدا لما أقول أن فيه كارثة فى الطريق و بحس بالغرابة لما ألاقى ناس مش شايفة ده
أنا معنديش حل !!! لو كنت أعرف أهاجر كنت هاجرت لأنى مش حقدرأحمى أى حد بحبه وقت الطوفان اللى شايفه بيقرب قوى
نصيحة بس لبهايم الحزب الواطى يغيروا الجثث المعفنة اللى بيطلعوها فى التليفزيون و الجرايد عشان يتكلموا بأسمهم ..... غيروهم .. و النبى غيروا الخنازير دى
شوية المرتزقة نبيل بباوى و مجدى الدقاق و كرم جبر و جهاد عودة - الهى ما يوعى يعود - و مستفيد فوزى ....... عشان متهيألى دول حيكونوا من الأسباب الأساسية للغليان فى البلد بغباوتهم و حقارتهم اللى تحرق دم أى واحد عنده احساس و تخرجه عن شعوره
----------
ايه اللى أنا بقوله ده ؟؟؟؟؟
باين عليا أنا كمان خرفت ولا ايه #*%&8×"
أدينى بنفس عن اللى فى قلبى و خلاص بدل ما أفرقع أنا كمان
