Saturday, September 29, 2007

حوارات على الفيس بوك (2) تقدر تقوللى .. ناقصك ايه ؟

ده مش تانى حوار ليا على الفيس بوك ... بس مش ممكن كل ما حقول كلمة هناك أنقلها هنا
و فيه حوارات فاشلة كتير بدخل فيها و بحس انها مش جايبة همها لأن بيبقى فيه كلام مش محتاج الرد عليه اساسا بس أنا برد عليه من الفراغ أو عشان يمكن واحد ينضحك عليه بيه ولا حاجة و ببقى مصر ان يبقى فيه أكتر من وجهة نظر فى اى حوار عشان اللى يقرا يفكر و مياخدش أى كلام على أنه مسلم بيه
ايه الرغى ده ؟؟ ,,,,,, السؤال فعلا منطقى ... احنا ناقصنا ايه ؟؟؟ و ليه بنهاجم الرئيس مبارك عمال على بطال و بنشيله كل حاجة مع انه أكيد مش ماشى ورا كل واحد بيغلط و بيصحح له غلطه !! و أكيد لو كل واحد خاف من ربنا الدنيا حتتصلح .... صح ؟؟؟؟
حنشوووووووف
Ahmed Mamdouh (no network) wrote 17 hours ago
سؤال بسيط معانيه كثيره ,
سيجد الكثيريين منا أنهم مشيوا مع هيصه معارضه اى شىء ,
ونسب كل فساد الى الرئيس
حمله الهجوم على الرئيس
حاكمنا بقالوا كتير و معملش حاجه
يا عم الفساد فى كل حته
التعذيب اه من التعذيب دا مطلع عينينا
الغاز راح اسرائيل
الاسعار بقت نار
المياه بنشربها وسخه
دكاتره الجامعات ظلمه
الداخليه بشعه شنيعه
المرتبات قليله مش مكفيه حاجه
انا عاطل يا عم و مش لاقى شغل و لو لقيت شغل بلاقيه مجانى
ااااااااااااه دى مصر بقت خلاص
الفساد فساد شعب
شعب بيعشق الفساد
بيعشق الكوسه و بيدرمغ فى التقليه
شعب اتعود لما حد يقوله كده غلط يرد عليه و يقوله انت تطلع مين حتى لو كان الغلط راكبه من ساسه لراسه
و لو حكمنا دلوقتى صلاح الدين هنبقى زى ما احنا
الفساد اللى فى كل حته بيمارسوا الشعب فى كل حته
اللى طلب منك رشوه واحد من الشعب
اللى بيركن مخالف واحد من الشعب
اللى ركب الماسوره من غير ذمه مهندس من الشعب
اللى قطعلك سلك اتليفون واحد من الشعب
اللى نصب عليك واحد من الشعب
اللى باع ارض غيره واحد من الشعب
اللى مد ايده فى جيبك واحد من الشعب
اللى بتقول ان ضربك على قفاك واحد من الشعب
ظاهره الفوطه فى بطن العيان عملها دكتور من الشعب
الدكتور الديكتاتور واحد من الشعب
المحامى اللى نصب على موكليه واحد من الشعب
المهندس اللى تخابر مع اسرائيل واحد من الشعب
كابتن العباره اللى تجاهل استغاثه الغارقين من العباره مكنش من الهند كان برضوا من الشعب
صاحب العباره كان واحد من الشعب
عامل التحويله اللى دخل قطر بتحويله غلط و كأن القطار كان محمل قطن مش بنى ادمين ممكن يكون أبنه فيهم برضوا واحد من الشعب
القاضى اللى ارتشى واحد من الشعب
المحاسب اللى اختلس و سهل تمرير فلوس كان واحد من الشعب
المهندسين اللى سافروا يفحصوا المبيدات قبل ما نستلمها و عرفوا انها مسرطنه كانوا برضوا من الشعب
ايه يا عم المجنون اللى بتقوله دا
يا سيدى انا مجنون عشان بوضحلك حاجه صغيره اوى
مؤامره الشعب على الشعب
البطون اللى عمرها ما بتشبع
كنا زمان و لو مش مصدق اتفرج على افلام زمان
ولاد البهوات فى القصور و العزب
و الشعب كله حالته ضنك كان بينور بلمبه جاز
و لا كانوا يعرفوا صرف صحى و لا حتى سافون
يادوب كانوا عايشين
و احنا دلوقتى عايشين
أغلبنا عايشين بناكل و بنشرب و بننام فى أمان
بنشتغل بس كلنا عايزين نبقى مليونيرات
طبعاما الكل بقى عنده التليفزيون نموذج الناس اللى عايشه و يقلدها
غير كده يبقى هو ميت و مش راضى بحاله و مينفعش يقول الحمد لله
يا ناس اشتغلوا و اتعبوا و ارحموا نفسكم
الغضب و الشتيمه عمرها ما هتغيركم
هتفضلوا نفس الشعب
اللى لو حكمه صلاح الدين نفسه
مش هيعرف يغير فيه حاجه
يا جماعه الموضوع كبير و عايز وقفه
كان نفسى اتكلم فى مليون حاجه بس بصراحه
أنا زهقت من دا شعب
================================================================
Peter Morris Philip replied to Ahmed's post 17 hours ago
تصدق برده فكره
الشعب دا ابن كلب يا اخى
فعلا الشعب هوه اللى ناهب خير البلد
الشعب اللى ماسك البلد بقاله 30 سنه ومعملش اى حاجه
واحنا زى ما احنا
الشعب اللى مكنش فاضى يحط خطه للتعليم
الشعب اللى محطش خطه قوميه للبلد تنهض من اللى هيه فيه
الشعب الى احتكر صناعه الحديد والصلب والاسمنت
الشعب اللى كان ماسك ورزات البلد كلها وهوه اللى كان بيسرق
الشعب فى بلدك ملهوش سلطه عشان تحاسبه على حاجه فيها .. واذا كان اللى بيسرق من الشعب ليه سعتك مجلس الشعب معالجش المواضيع دى بقوانين تنمع السرقه والنهب والاحتكار..
وليه لما واحد من الشعب اتسبب فى غرق الف بنى ادم الريس بتاع سعادتك باشاره منه كان منعه من الهرب
اى دوله فيها الفاسد والحرامى وف بلدك السلطه كلها فى ايد واحد بس
متعرفش ليه بقى كل اللى حواليه حراميه !!!... وزى ما بينسبولة الانجازات بتاعت العصر دا
يبقى اى اخفاق هوه المسؤل عنه
خاصة لو كان اخفاق سياسى جوة بلده
نسيت اقولك الشعب كمان هوه اللى هيحاكم ابراهيم عيسى ....اه يا شعب
==========================================================
Ahmed Mamdouh (no network) replied to Peter's post 17 hours ago
اه هو الشعب
اللى بيضع خطه التعليم موجهين و دكاتره جامعات
اللى بيحاكموا ابراهيم عيسى قضاه من الشعب
اللى احتكر الحديد و الأسمنت من الشعب
و اللى المفروض يحاسبه الشعب
لكن الشعب جبان
الشعب خايف
اصل القاضى ساعتها لو فكر يطلبه هيضيع عليه العربيه ام ستاير و الفيلا و العماير
انت بتاخد من هجس القضاء فى شجب اللى بيحصل
القضاء بيدافع عن قضيته
عن مشكلته مع وزير العدل
مش بيدافع لا عنى و لا عنك
هتقولى عشان النتخابات و الدوائر و الاشراف القضائى
هقولك كل دى اوهام بيضحكوا بيها عليا و عليكلو
عرفت ازاى القاضى بقى قاضى هتعرف ان النكسه من الشعب
القاضى بقى قاضى بالواسطه
يا باشا كل حاجه فى مصر بالواسطه
الريس ذات نفسه دخل الكليه الجويه بالواسطه
السادات نفسه قالها فى كتابه البحث عن الذات انه دخل الحربيه بالواسطه
جمال عبد الناصر دخل الحربيه بالواسطه
و انت مش هتتعين غير بالواسطه
و الناس بتجيب عيش بالواسطه
و الدبلوماسى دخل الخارجيه بالواسطه
و الصحفى بقى صحفى بالواسطه
الواسطه فى مصر تصنع المعجزات
و الواسطه هى الشعب
الناس
السلطه
والقانون فى مصرالواسطه
يا راجل بس حواليك هتلاقى انك اصبحت كائن فريد عن العالم
انت كمصرى تعيش بمقومات 4 غير كل البشريه
التنفس و الاكل و الشرب و الواسطه
و تقولى خطه قوميه لمش عارف ايه
و خطه تطوير
سيبك من الكلام اللى بيضحكوا به عليك و على الناس
الموضوع تحليله مش مستاهل مصطلحات غامضه
ابتكروها عشان يضحكوا علينا بيها
عولمه و ليبراليه و ملوخيه
================================================================
Peter Morris Philip replied to Ahmed's post 17 hours ago
ولا انا ليه دعوه بعولمه و ليبراليه و ملوخيه
انا ليه عنيين ومخ وبفهم
واحد ماسك الحكم بقاله 30 سنه هبب ايه؟؟
الهم اللى احنا فيه دا سببه ايه
هتقولى الناس والشعب طيب مين الى ماسك الحكم بتاع ام الشعب دا ..انا , انتا, حد من الشعب !!ء
كله فى صراع مع كله عشان مفيش اى حاجه متخططه ولا فيه اى خطط لبلد كانت ماشيه بالبركه
تعرفشى الوقتى مشروع توشكى فين؟؟
مين المسؤال عن اللى انتا قلت عليه دا انا مبنكرش ان الشعب ابن كلب جبان اه
بس الشعب حتى لو حاول يغير فى ايده ايه يهببه ؟؟
ولا حاجه
فى حاجه فى علم الاداره بتقولك على اد ما بديك سلطه على اد ما بتبقى عليك مسؤليه ومش معقوله يا اخلى تغلط 70 مليون بنى ادم وتطلعه برىء وماشى صح
==================================================================
Ahmed Mamdouh (no network) replied to Peter's post 16 hours ago
أنت عمرك سافرت توشكى ؟
و انت بتعانى من ايه؟
سؤالين محتاجين اجابه
===================================================================
لاحظ أن كووووووول الحوار ده اتعمل قبل ما أنا أشارك فيه اساسا
===================================================================
Peter Morris Philip replied to Ahmed's post 16 hours ago
هسافر اعمل فيها ايه
انا اللى بقولك بقيت بتسمع عنها
يمكن انا بس اللى معدتش بسمع عنها.. مشروع شوف اتصرف عليه كام ودا احد الامثلة البسيطه ازاى البلد دى بتدار ..بالنسبه بقى لى انا بعانى من ايه ..يمكن انا على المستوى الشخصى الحمد لله زى ما انتا قلت بنام وبا اكل وبشرب وبتفسح والحمد لله مش محتاج حاجه بس دا مش معناه انى متكلمش واقول ان فيه الف حاجه مش عجبانى فى ام البلد دى والمسؤل قدامى هوه اللى فى ايده كل حاجه ..وطبعا عارف هوه مين
سؤال بقى انا رديت عليك ردين وكل رد ولا كانى رديت عليك وبتدخلى فى موضوع تانى مش ترد
انتا بقى رد على اسئلتى فى
الردبن اللى فاتوا ولا اايه؟
وبعدين لحد الوقتى انا مش عارف انتا وجه نظرك ايه ..قلت الشعب هوه المسؤل وانا رديت عليك ...انا مش عارف انتا عاوز توصل لايه؟؟...وعاوزك تشوف الفيديوهات اللى محطوطه فى الجروب كده وقلى رايك فى الحياه الوردى اللى احنا عايشينها
==================================================================
تعبتم ؟؟ نكمل بعديييييين ؟؟؟ لا انا بقى رخم و حكمل الحوار للآخر
==================================================================
Ahmed Mamdouh (no network) replied to Peter's post 16 hours ago
يا بيتر لما انت حياتك كويسه و عايش حياه كريمه واجب عليك انك تساعد اللى انت شايفه محتاج
مش تتخانق و تغضب و تزعل نفسك و تحرق دمك و الفيديوهات اتفرجت عليها و كل فيديو ليه تعليق مختلف لكن بالاجماع
أكيد فيه تجاوزات
فى اعمال شنيعه من بعض الضباط
و فيه اعمال تأديبيه لازمه لمسجلين الخطر و السارقين بالاكراه و النشالين و اللى مستعدين يفتحوا بطن اى حد فى وسط الشارع من غير قلب و لا ضمير
و فيه اعمال طفوليه اتعاقب عليه لكن دى مش مصر
و لا عايزك تزعل نفسك
و بعدين وجهه نظرى انى مصرى , أرى ان الخطأ لا يتحمله الرئيس وحده , الخطأ يوزع بالتساوى على الشعب كله كل شخص فاسد فى موقعه سواء كان مدنى عامل او ضابط مدنى حتى الصحفيين مش شرط انه يكون معارضه و شريف فى نفس الوقت لان فى حاجات كتير انت و غيرك متعرفوش عنها حاجه تعرف ايه عن اتصالات ابراهيم عيسى مع استخبارات دول اخرى تعرف ايه عن علاقه بعض منظمات حقوق الانسان العالمه فى مصر و اتصالاتها يا بيتر احنا محتاجين نقرأ كتيرو نحسبها بالعقل زى ما قلتو منندفعش ورا عواطفنا كده مع كام قفى فى فيديو هيبطلوا الشخص دا انه يعمل اللى عمله تانى
ما فى شباب كتير فقراء يا أخى و بيشتغلوا حدادين و نجارين و سباكين تفتكر لو انت ضابط و مسكت واحد من وسط الهوجه اللى حصلت و قالوا عليها سعار جنسى هتعمل ايه و انت جايبه من عبايه واحده من الماشيين فى الشارع تفتكر لو جبت واحد من من وسط مدرج كره بيحدف طوب و فرقته كسبانه و بعدها قالك أجررررررررى يالا
و خلى الناس كلها نطط فوق بعدها و اللى راح فى الرجلين راح يا باشا اوعى تنسى اننا همجيييييييين جدا جدا جدا و لا عمرك ما شفت أجرررررررررررررررررررررررررررررى يلااااااااااااا
===================================================================
طبعا كلام مستفز و ممكن يخلينى أرد رد رخم و أطلع قليل الأدب ... بس الواحد بيحب الكوميديا فى الكلام خصوصا الحتة بتاعة اتصالات ابراهيم عيسى بالمخابرات الخارجية ..... ده ابراهيم عيسى طلع أدهم صبرى و أنا معرفش
===================================================================
Hala El-Bably wrote 5 hours ago
آه و ألف آه من تلك الجملة... تبقى أنت أكيد فى مصر
لو لقيت من كل بيت خارج مدرس خصوصى .. تبقى أنت أكيد فى مصر
لو لقيت فى بلد سنه سادسة ابتدائى و سنه خامسة ابتدائى!... تبقى أنت أكيد فى مصر
لو لقيت فى كل بيت واحد أو أتنين ماتوا من السرطان ... تبقى أنت أكيد فى مصر
لو رحت التأمين الصحى و إدوك حديد و زرنيخ ... تبقى أنت أكيد فى مصر
لو لقيت فى بلد البحث العلمى فيها تايه و لسه بيحاول يجد العلاقة بينه وبين المجتمع ... تبقى أنت أكيد فى مصر
لو لقيت آمال ما حدش عاوزها وبتسقط في الانتخابات والقناه التانيه والأولي يذيع سقوطها وبعدين تسمع صوت بيقول امسحي دموعك يا آمال احنا خلاص نجحناكي تبقى أنت أكيد فى مصر
لو لقيت فى بلد ربع سكانها ساكنين فى عاصمتها ... تبقى أنت أكيد فى مصر
لو لقيت فى بلد تعبيرات مثل "السحابة السودة" و "الشفافية" ... تبقى أنت أكيد فى مصر
لو سمعت جملة "اللى نعرفه أحسن من اللى منعرفوش" ... تبقى أنت أكيد فى مصر
لو رحت "دار الفؤاد" و جاتلك الفاتورة و نعشك فى طريقه "لدار الخلد" ... تبقى أنت أكيد فى مصر
لو رحت تطلع مخالفات عربيتك و لاقتها غير صحيحة لأن بالفعل معندكش عربية ... تبقى أنت أكيد فى مصر
لو لقيت عجوز و عجوزة ماشيين و معاهم سلم خشب لزوم طلوع الرصيف ... تبقى أنت أكيد فى مصر
لو ركبت مترو الأنفاق و ملقتشى هوا و لا تكييف ... تبقى أنت أكيد فى مصر
لو مزنوق و ملقتشى مراحيض عامة ... تبقى أنت أكيد فى مصر
لو مرة لقيت رسوم الزبالة على فاتورة الكهربا و مرة تانية على فاتورة الغاز ... تبقى أنت أكيد فى مصر
لو سمعت بودانك و شفت بعنيك رئيس نادى محترم بيشتم الكل بدون عقاب أو جزاء ... تبقى أنت أكيد فى مصر
لو فتحت التليفزيون و شفت ظرف "البيت بيتك"... تبقى أنت أكيد فى مصر
لو سألت واحد أو واحدة مين الريس فى كل الألفية الثالثة؟!
و رد و قال بدون تفكير "مبارك" ... تبقى أنت أكيد فى مصر
لو قرأت الصحف فى 2005 و فى 2016 عن توصيل الكهرباء للعشوائيات و لقيت نفس الكلام "التوصيل عملية مستمرة" ... تبقى أنت أكيد فى مصر
لو قرأت الصحف فى 2005 و فى 2050 و لقيت نفس الكلام "الأصلاح السياسى و الإجتماعى عملية مستمرة" ... تبقى أنت أكيد فى مصر
لو عرفت أن فنانة سابقة و زوجة لوزير داخلية سابق عمرها فوق التسعين مرشحة نفسها لمجلس الشعب ... تبقى أنت أكيد فى مصر
لو رحت الباجور منوفية و سألت مين رئيس الجمهورية و ردوا وقالوا كمال الشاذلى ... تبقى أنت أكيد فى مصر
لو رحت تنتخب و معاك بطاقة إنتخابية و ردوا و قالوا إنك متوفى ... تبقى أنت أكيد فى مصر
لو *مع الإعتذار لـكلمة "مصر" فالذنب مش ذنبها و الله العظيم
===================================================================
أنا جيييييييييت أهووو
==================================================================
You wrote 4 hours ago
ناقصنى أحترم القانون ... لأن اللى معاه واسطة مش بيحترمه
ناقصنى أطمن على مستقبل بلدى و أنا شايف أن كل يوم بتتدهور عن اللى قبله
ناقصنى بوليس نجدة لو اتصلت بيه حيقولك أنت مين و لو طلعت واحد مش مهم حيطنشوك
ناقصنى أتعلم حاجات كتييير جدا متعلمتهاش فى أكتر من عشر سنين تعليم
السؤال بقى ما يبقاش ناقصك ايه - لأن أصلا اللى عنده كمبيوتر و وصلة نت بيدفع فيها مبلغ كل شهر حيبقى أكيد مش عايش فى قرية مبيوصلهاش مية ولا حيكون معتقل من 10 سنين من غير تهمة
السؤال - اللى فهمته من كلامك - يبقى مييييييييين المسئول عن اللى احنا فيه ؟؟
الشعب ولا الحكومة ؟؟؟
أنا فى رأيى ده و ده مسئولين بس يا ترى ... ايه الحل ؟؟
نغير الشعب أسهل و لا نغير النظام الفاسد اللى بيزود فساد الشعب ؟؟؟؟
===================================================================
طبعا خلى بالك ان الرد ده مكنتش قريت حتة ابراهيم عيسى - عدت عليا معرفش ازاى - و اتصالاته بالمخابرات الفضائية لأنى أكيد كنت حموت على نفسى من الضحك و اقول كلام مسخرة
===================================================================
Ahmed Mamdouh (no network) replied to your post 3 hours ago
الحل أن كل الشرفاء معذبى الضمير يموتوا ويستريحوا و يسيبوا الفساد للفاسدين
لعلمكم انا مش جاى اهيس للريس و السلام بس لما نفكر هنلاقى اننا رمينا كل مشاكلنا بس عليه هو لوحده
يا جماعه المسئوليه هى مسئوليه كل مسئول
و كلنا مسئولين اما الله فى كل فعل
سواء كنت طالب او كنت دكتور او مهندس سواء كنت اب او كنتى ام مشاكلنا بدأت فى بيوتنا
بيوتنا ناقصها حاجات كتير
تربيتنا هى اللى هطلع رجاله و هطلع فاسدين
واحد بيراقب الناس فى أفعاله و طول ما الناس مش شايفاه يخرب و يسرق و يفسد
و واحد بيراقب رب العالمين و معتقدش ان دا بيعمل غلط بقصده
هى دى فعلا المشكله
مراقبه الناس و طول ما انا بعيد عن القانون يبقى انا فى السليم مع انى ناصب و قاتل و مزور و حرامى
و واحد بيراقب ربنا فى حركاته و كلماته و افعاله
و لا اللى بقوله دا كلام مجانين ؟
===================================================================
بعيدا عن ازاى حيبقى حرامى و قاتل و مزور و فى نفس ذات الوقت بعيد عن القانون فانا رحت رامى الرد التالى
===================================================================
You replied to Ahmed's post one second ago
لا طبعا مش كلام مجانين ....... بس مين اللى قال أن لما أنا أطالب بانتخابات حرة و مجلس شعب بحق و حقيقى و تعليم محترم يبقى مش بطالب - فى نفس اللحظة - الناس أنها يبقى عندها ضمير و ذوق و أخلاق و حب لربنا و رهبة منه
انا مش شايف ان فيه تعارض بين ده و ده .... بس ده مجال و ده مجال
أيوة أنا لازم اقول للمدرس خلى عندك ضمير و متدبحش العيال فى الدروس الخصوصية
بس فى نفس الوقت لازم اطلب أن تبقى فيه حكومة بتدى المدرس مرتب محترم و بتعلمه الصح من الغلط و بتراقب عليه
لازم أقول لكل مهندس و مقاول لازم تخاف من ربنا و متغشش فى مواد البنا ,,, بس ده ميتعارضش أبدا انى أطلب و انبح صوتى أن تبقى فيه حكومة بتراقب على المقاول و مش بتجبره أنه فى كل خطوة يدفع رشاوى للناس عشان يخلص شغله
أيوة لازم أطلب من الأب أنه يربى ابنه تربية صح و محترمة ... بس لازم أخلى الأب ده يؤمن بأن فيه قانون يطبق على ابنه زى ما حيتطبق على ابن الوزير و ان الدنيا مش ماشية بالدراع
الأمثلة على كدة عمرها ما حتخلص و لكن فى النهاية مينفعش أفصل بين مستويات و مجالات الاصلاح و أطلب من الناس أنهم يمشوا فى مجال و المجال التانى لأ
مجال النفس و الأسرة و مجال الحكومة و السلطة و مجال الرقابة و الدفاع عن حقوق الناس و حسنى مبارك بيمثل السلطة و لازم زى ما بطلب من أبو ضابط الشرطة انه يعلمه فى بيته أطلب من وزير الداخلية و اللى معين وزير الداخلية أنه يمنع التعذيب و أطلب أنى أقدر أنتخب ناس تراقب كل الكلام ده فى مجلس الشعب و النقابات و المحافظين و المجالس المحلية كمان
================================================================
لسة الحوار مظنهوش انتهى على كدة ........ و لو لسة فيك نفس تكمل حتلاقيه هنا

بيان عمال غزل المحلة

في هذه الظروف الصعبة التي يعيشها عمال غزل المحلة، يناشد عمال غزل المحلة المعتصمين كافة النشطاء و المراكز الحقوقية و الأحزاب السياسية سرعة التدخل لتقديم الدعم لهم في مقابل مخطط اقتحام الشركة الذي بات وشيكا، حيث تم حصار مداخل مدينة المحلة بشكل كامل بنصب العديد من الأكمنة على الطرقات، و تفتيش جميع الداخلين إلى المدينة، كما حاصرت قوات الأمن المركزي و قوات مكافحة الشغب شركة غزل المحلة من جميع الاتجاهات و تم إغلاق شارع الإنتاج الذي يمر بجوار سور الشركة، و تحويل مسار السيارات إلى طريق آخر



هذا و قد بدأ جنود الأمن المركزي و قوات مكافحة الشغب بالترجل من سياراتهم و أخذ وضع الاستعداد سواء في شارع البحر و هو الشارع الرئيسي في المحلة أو حول الشركة، كما تم إبعاد الإعلاميين من حول الشركة لمسافات بعيدة و التهديد باعتقالهم، و كانت قوات المرافق قد قامت يوم أمس بطرد الباعة الجائلين من أمام بوابات الشركة و أسوارها و إخلاء المنطقة من الباعة الجائلين، تمهيدا للاقتحام المتوقع، الملفت للنظر أن قوات مكافحة الشغب التي تحاصر حاليا مداخل المحلة الكبرى مدعومة بسيارات إسعاف و مطافئ، كما تأكد لنا من مصادر وثيقة أنه يتم إخلاء أقسام في المستشفى العام بالمحلة، و هو ما ينذر بأن الاقتحام الأمني المتوقع سيكون صداميا.



و رغم هذه التحركات الأمنية إلا أن أعداد العمال داخل الشركة قد تزايد بشكل ملحوظ بعد الإفطار حيث اتصل العمال بزملائهم و الذين لم يتأخروا في الذهاب إلى الشركة للوقوف بجانب زملائهم، و مازال قرع الطبول و الهتافات مستمرة داخل الشركة متحديا كافة أشكال الإرهاب التي يمارسها الأمن.و لهذا يناشد عمال غزل المحلة الجميع بالتدخل الفوري لمنع هذا الاقتحام و الذي قد يكون كارثيا.برجاء نشرها على أوسع نطاق و في أسرع وقت

عمال غزل المحلة المعتصمون داخل شركة مصر

=============================

يلاحظ أن عدد العمال المعتصمين فى غزل المحلة يصل الى 27000 عامل و أن مطالبهم كلها مطالب بعيدة عن السياسة و قرفها و كلها مطالب عادلة مباشرة بتحسين مستوى الأجور و نظام العمل و لم تحاول الحكومة حل أى من المشاكل سوى بالوعود التى تخلفها دائما مما يزيد من اصرار و ثورة العمال على أوضاعهم

و متأسف على التأخر فى نشر البيان لأنى مش بفتح الايميل بقالى كتيييير و فتحته بالصدفة النهاردة قبل ما انام


ياريت تنشروا البيان ده للناس يا ناااااس

Friday, September 28, 2007

فضفضة


بقالى كتيييير اوى مكتبتش هنا حاجة و فعلا حاسس انى مقصر فى حق الناس اللى حبوا المدونة و تابعوها و انشغلت عنهم بحاجات كتير ... لأنى بمر بمرحلة فاصلة بين عهدين أو حياتين - مش عارف ايه التسمية الصح - بين عالم الدراسة و الشيتات و سفر حلوان كل يوم رايح جى و احباط كره نوعية الدراسة و عالم الوظيفة و الشغل و المنافسة


مرحلة الشغل مالهاش سقف ... الكلية مهما اتأجلت ليها نهاية ... تصبر نفسك بأنك أكيد فى كل الأحوال حتنهيها ... بس مرحلة الشغل باينة أبدية ... حتى لو نوعية الشغل اتطورت مع زيادة الخبرة ... بس فى الآخر لها نفس الصفات - المسئولية و المنافسة أهم صفات المرحلة دى


كمان انشغلت فى الاختراع الجديد اللى اسمه الفيس بوك ... أنا كنت على موقع الهاى فايف من زماااااااان و كان ليا فيه صحاب كتير و أعداء أو رافضين لكلامى قليلين - قلة مندسة تعمل على اثارة الجماهير على رأى جرايد الحكومة - بس الفيس بوك يعتبر التطور بتاع الهاى فايف ... سواء فى تنظيمه أو نوعية الناس عليه


أنا مش عارف حياتى رايحة فين أو جاية منين ... مهندس مش بفهم اوى فى الهندسة و شغال فى شغل تجارى بحت و واحد بيفهم فى السياسة و الفكر السياسى كويس بس مليش أى نشاط سياسى ييجى منه اى عائد معنوى و كاتب نفسه حلو فى الكتابة و مع ذلك عمرى ما حاولت أكتب فى جرنان أو أسافيد من اللى بكتبه و انسان رومانسى عمره ما كان ليه علاقة بأى بنت


بس ... فبحاول أوصل رايى لأكبر عدد من الناس - مع أن ده مش مفيد ليا فى اى حاجة - يمكن بس عشان أحس بأن لى وجود فى الدنيا دى ... أنا لو مت دلوقتى حالا و أنا بكتب الكلام عديم المعنى ده مفيش حاجة حتتغير فى الدنيا و مفيش حاجة حتنقص ... و مفيش حد قرب منى بجد عشان يفتقدنى لما أموت غير عيلتى و شوية و حينسونى ... عادى يعنى


المهــــــــم بقالى شهر تقريبا أرجع من الشغل تعبان و مهدود أروح قاعد على النت كام ساعة لحد ما ييجى وقت النوم و أنام عشان أصحى تانى يوم ... ملل ملوش نهاية ... بس كنت فرحان لأنى معنديش وقت أفكر و أحس بالاكتئاب و الحزن تانى ... الارهاق بيخلى الواحد دماغه فاضية ... و التفكير فى الشغل بيلهيه عن التفكير فى حياة اللى مش عايشها


حروب بغلب فيها كلها تقريبا و حوارات و صد و رد على الفيس بوك أنا مقتنع أنها ممكن تجيب نتيجة تراكمية و تخلى حد يشوف الدنيا بطريقة تانية ...... مش قصدى على الاكتئاب ....... بس قصدى على طريقة التفكير يعنى


و آخر حوار حصل أن بقى واحد يكلمنى على الموبايل و يحاول يهددنى ,,, بس هو ميعرفش أن أنا لما كنت فى المدرسة و رحنا السندباد و دخلنا بيت الرعب أنا غمضت عينى عشان مخافش ... و هو ده اللى بيحصل دلوقتى ... ل ما يتصل أسيب التليفون على الترابيزة و أكمل اللى كنت بعمله و أسيبه يهوهو مع نفسه


أنا مش بتاع كلام شفوى ... اللى عاوز يناقشنى فى حاجة يكتب لى و أنا أرد عليه ... بس تليفون و الهبل ده ممكن يخليه لناس تانية ممكن يتاثروا بيه ... و على فكرة كل مرة بتيجى مكالمة من دول ببقى مبسوط جدا .... لأن معناها أن اللى بعمله عامل تاثير و ناس مش قادرة ترد عليه فبيلجاوا لنظام لما أقولك بخ تبخ ..... و أنا مش ببخ


حقيقة من الحقايق الكتير أنى مش عارف حاجة و لا هدف ممكن أوصل له بس تايه و عايش و خلاص و مش فارقة معايا بكرة يحصل ايه

Sunday, September 16, 2007

ضحايا على مذبح التوريث



أول ضحايا خطة تمديد فترة الفراغ الإنتقالية التى يمثلها مبارك عن طريق توريث الحكم لأبنه جمال كانوا – فى رأيى - أعضاء و مريدين حزب السلطة (بضم السين و فتحها) الذين ربما كانوا يحلمون يوما بالجلوس على عرش البلاد عن طريق انضمامهم لقوافل النفاق و التهليل و محاولتهم التميز و التفوق على بقية زملائهم ,, لعل و عسى ... لكن الرغبة الخديوية و المصالح العليا للصوص البلاد حالت دون أن يمتد حلمهم لأكثر من أن يكونوا ديكور و مظهر من مظاهر الديمقراطية المصطنعة او على أقصى تقدير جزء من جموع المستفيدين من فساد النظام السياسى
و قد شجعت طبيعتهم المرنة – مشيها المرنة – أن يقبلوا ما يلقى اليهم من الفتات بعيدا عن الحلم الذى أقول أنه ربما راودهم يوما بخلافة مبارك و أن يقبلوا أن يكونو مجرد درجات سلم يتمختر عليها الصاعد الجديد نحو العرش .

ثانى الضحايا و أقلهم نصيبا من التعاطف الجماهيرى و الأكثر نصيبا من الشماتة هو الدكتور سعد الدين ابراهيم الذى استطاعت الآلة الإعلامية الحكومية تشويه سمعته تماما – حتى لدى المعارضين للنظام – و تصويره على أنه ذلك الخائن المارق العميل الذى باع بلده من أجل أمريكا

أذكر جيدا أننى لم يكن لى أى اهتمام بالشئون السياسية الداخلية مثل الأغلبية العظمى من المصريين عندما ذهلت و أنا أقرأ – فى الأهرام – مقتطفات من كتابات سعد الدين ابراهيم التى ذكروا أنها تحرض ضد مصر ... قرأت وقتها سؤالا لم ينمحى من ذاكرتى من وقتها كان يسأله سعد الدين ابراهيم و زملاؤه فى مركز ابن خلدون كاستطلاع للرأى (هل تقبل بأن يحكم مصر جمال مبارك بعد والده الرئيس مبارك ؟) ..... فى ذلك الوقت – على حد علمى - لم يكن هناك أى انسان فى مصر قد تحدث عن قضية التوريث من قبل علانية و كان ذلك قبل ظهور و ذيوع الصحف الخاصة المعارضة و الفضائيات الغير تابعة بشكل فج للنظام

لقد بنى لدى يقين بأن كل ما لحق بسعد الدين ابراهيم من مهانة و اتهامات بالعمالة من الحكومة و من معارضيها الأشاوس مثل مصطفى بكرى كان نتيجة فقط لذلك السؤال الذى كان أول من يسأله للناس هو سعد الدين ابراهيم (هل تقبل بجمال مبارك رئيسا لمصر بعد والده ؟ ) ء

الضحية التالية - و لعلى لا أكون أغفلت أحدا - هو ذلك السياسى الشاب – أصغر من جمال مبارك بعامين – و الذى ظهر فجأة بقوة على الساحة الإعلامية بعد فترة حجب متعمد لجميع انشطته فى وسائل الإعلام الحكومية ... د.أيمن نور ... الرجل الذى طرح نفسه و بقوة على أنه البديل الأفضل و الأصلح من جمال و شبكة الفساد التى تحيط به و تستفيد منه

تصادف أن تكون أول محاولة جادة منى للمشاركة فى العمل السياسى هو حضور ندوة فى مكتبه – الذى حوله لمقر حزب الغد بعد ذلك – و بعيدا عن التفاصيل التى يمكن أن أستغرق فيها عن انبهارى بالرجل و أسلوبه و شجاعته التى لم أصادفها من أحد قبله الا أننى لاحظت على مدار الشهور التى اقتربت فيه منها هو اعلانه أكثر من مرة و فى أكثر من مناسبة أنه لم يأت ليكون بديلا للرئيس مبارك
فبالرغم من كل اخفاقات مبارك و وعوده الكاذبة الا أن نور كان حريصا دائما على اظهار نفسه فى صورة البديل لجمال مبارك و ليس حسنى مبارك الذى كثيرا ما كان يصفه بأنه فى سن والده و له دوره الذى لا يمكن انكاره فى تاريخ مصر

كانت المقارنة بين مبارك جونيور عديم الحس الانسانى أو الخبرة السياسية و نور السياسى البارع و الصحفى النشيط فى صالح نور باكتساح ... بينما لم تكن بنفس الوضوح عندما تقارن بين سياسى معارض تتجاهله وسائل الإعلام و رئيس دولة يجلس على قمتها لربع قرن من الزمان ولا تمر ساعة دون أن تذاع أخباره فى كل وسائل الاعلام

لكن - مع ذلك - استطاع مبارك فى حركة سياسية بارعة تماما جعل المواجهة بينه و بين نور مباشرة و اندفع نور بحماسة يمكن أن نصفها الآن بأنها خاطئة بدخول حلبة المواجهة مع مبارك الأب برغم اقتناعه بأن منافسه الحقيقى هو جمال مبارك و الذى يحاربه من خلف ستار الأب

مواجهة غير متكافئة تماما حصل فيها نور على نصف مليون صوت بعد ثلاثة أسابيع فقط من فتح باب الدعاية الإنتخابية مقابل ستة ملايين صوت لمبارك الذى وضعت أجهزة الدولة كلها فى صفه و لمؤازرته و انتهت المواجهة بتحويل نور الى بطل شعبى – عكس سعد الدين ابراهيم – و لكن مبارك أتبعها بالضربة القاضية لتدمير نور تماما و تحطيم قواه فى قضايا سخيفة و ملفقة ثم القاؤه فى سجن لم يخرج منه حتى الآن

يمكننى حكى تفاصيل كثيرة جدا عما حدث لنور و حزبه و حلمه لأنى كنت – لفترة – جزء من ذلك الحلم و لكن لننتقل الى الضحية التالية على مذبح التوريث

يمكننا أن نتجاوز عن عشرات المسحولين من شباب كفاية و المعارضون غير المنظمون لمبارك و لمشروع التوريث حيث أن ضررهم الحقيقى لم يكن كبيرا للغاية مقارنة بما تعرضوا له و وصولهم لمرحلة الإحباط المبكر التى نعيشها الآن و استمرار أغلبهم فى حياتهم السابقة لنشاطهم السياسى و تحول بعضهم – مثل كاتب هذه السطور – الى الكتابة و النقد و التدوين دون مشاركة حقيقية بعد ذلك فى معارضة حقيقية

و لكن لا يمكننا التجاوز عما حدث لمن مثلوا الخطر الحقيقى الأكبر المحتمل على مشروع التوريث ... و هم قيادات الأخوان المسلمين ... يمكننا أن نختلف معهم أو نتفق ,, لكن لا يمكننا أبدا أن ننكر ما لهم من شعبية تتجاوز شعبية مبارك و نور معا و تنظيم أقوى بمراحل من الحزب الوثنى المترهل

و لا يمكننا التجاوز عما حدث ولا يزال يحدث معهم من محاكمات عسكرية لا تخضع لقانون سوى قانون ارادة الرئيس السامية و ما حدث معهم من سرقة لأموالهم و تدمير لأعمالهم

الأخوان – كعادتهم دائما – لم يعلنوا صراحة و بوضوح وقوفهم ضد مشروع التوريث و حاولوا كعادتهم مسك العصا من النصف ... فهم يحاولون الحصول على الأمان من السلطة و فى نفس الوقت يحاولون الحصول على احترام القوى السياسية المعارضة للتوريث ... الضعيفة شعبيا و الأعلى صوتا رغم ذلك
لا أعرف حقا اذا كان العصف بالأخوان حدث لتشتيت قواهم قبل البدء فى تنفيذ الخطوات النهائية للتوريث و كان على سبيل الاحتياط أم بناء على معلومات مؤكدة بأن الأخوان يخططون لمعارضة مشروع التوريث فى مراحله الحرجة بعد ذلك

و لكن الملاحظ أن نفس الخطة التى اتبعها النظام مع نور هى التى اتبعها مع الأخوان المسلمين .... فبعد تركهم ليخوضوا معركة انتخابات شرسة و يحصلوا فيها على مكاسب لم يتوقعوها هم أنفسهم و احساسهم بالنصر و نشوته يتم طحنهم و بقوة لتدمير كل أمل و كل فرصة لتجميع الصفوف و تجاوز الصدمة و اجبارهم على اتباع اسلوب (لأبقى فى منزلى و لتزئر العاصفة ) حتى لا يفكروا فى توجيه أى ضربات موجعة لخطة التوريث الماصية قدما

الضحية الأخيرة – حتى الآن – و الأقرب لذاكرتنا قصيرة المدى هم مجموعة الأربعة رؤساء للصحف الخاصة المستقلة و المعارضة للنظام أحيانا ... و الذين فاجأنا النظام السياسى باتباع نفس منهجه معهم فى ترك الضحية تعمل اللى فى نفسها حتى تتخيل أنها حرة حقا ثم يطلق عليها كلابه لتهاجمها فى نفس اللحظة التى تظن فيها أنه قد انشغل عنها أو قرر تركها

بالطبع لم يكن المقصود هنا هو فقط حبس ابراهيم عيسى – الذى حصل على ما لم يحصل عليه نور أو الأخوان من اتفاق من جميع القوى السياسية المختلفة و وصول لعدد ضخم من بيوت المصريين – و وائل الأبراشى و عادل حمودة – الذى لم يشفع له أنه كان أول صحفى مستقل يركب طائرة الرئيس و يحاوره فيها - و عبد الحليم قنديل الذى تعرض من قبل للخطف و الضرب من يد بلطجية تابعون للحزب الوطنى فى وقت كان البلطجة يتم التستر عليها و لم تكن علنية مثلما يحدث الآن

كان المقصود هو ارهاب الصحافة غير الحكومية مثلما قصد من تدمير سمعة سعد الدين ابراهيم ارهاب المجتمع المدنى و قصد من بهدلة نور و الأخوان و طلعت السادات البطش بالقوى السياسية التى تشكل عقبة فى طريق التوريث و محاولة تأمين قافلة التوريث حتى تصل لآخر محطاتها بسلام و لو على حساب مصر فرد فرد

ياترى ... مين الضحية الجاية فى طريق أمير الظلام جيمى مبارك ؟

Friday, September 14, 2007

الحوار الأول من الفيس بووك

ياجماعة أنا آسف جدا على الغياب الطويل ده - اللى طبعا بتحمدوا عليه ربنا - بس أنا بتحجج بالشغل و انى برجع مهدود مفياش دماغ أكتب حاجة
بس الحقيقة أنى زهقت من الكتابة الهادية و التعليقات اللطيفة و بقالى كام يوم كل ما أرجع من الشغل أدخل على الفيس بوك و أدخل فى معارك كتابية مع ناس بينافقوا أو بيدافعوا أو بيتهبلوا أو مصدقين كذب الحكومة و كذب حسنى مبارك
و الصراحة الردود الناشفة و الكلام اللى زى الطوب ده بيدى الواحد حيوية و بيخلى عنده احساس أنه حى و لسة ماماتش فى الشغل
طيب ,, طبعا أنتم مش حتفلتوا منى عشان مش عاملين بروفايلات على الفيس بوك و قررت أنى أنشر هنا المعارك و الردود عشان تشوفوها و تشبعوا منى و كمان كتوثيق ليها هنا بدا ما بتضيع و محدش بيقراها عير كام واحد
بسم الله نفتتح الجلسة :)
---------------
أول خناقة فى جروب اسمها اشاعات جامدة
واحد كتب بيقول أن فيه اشاعة أن حسنى مبارك مات
رديت و قلت ..... ياااااااه ده مات من ييجى عشرين سنة
Mohamed Midooooo (no network) wroteat 11:36am on September 3rd, 2007
طبعا اشاعة .. وربنا يديلوا طول العمر .. الموت طبعا الحقيقة الوحيدة فى الوجود وفى ايد ربنا سبحانة وتعالى بس ميمنعش انى اقول ربنا يديلوا طول العمر .. الازمة الى هتحصل بموتة تخلينى اقول ربنا يديلوا طول العمر .. انا واحد من الناس طول ما بشوفة بحس بالاطمئنان بعيد بقى عن اى سلبيات او سوء فى نظام حكمة .. كفيانا بقى كدب مش عيوبنا كشعب وسلبيتنا كمان نرميها علية محدش قال انة لازم الرئيس يرضى ال 80 مليون وعموما انا واحد من الناس الى راضين عنة . كفاية كلام كتير هيخالفنى فية
Ahmad Badawy wroteat 7:54pm on September 3rd, 2007
ربنا يديله طولة العمر يا عم حد قال حاجة ؟؟ بس هل فعلا احنا من التخلف و الجهل ان مستقبل بلدنا كله متعلق بمصير واحد بس ؟؟؟ هل ده يعتبر نجاح ولا فشل سياسى و ادارى لما منبقاش قادرين نحط أى تصور منطقى لانتقال السلطة بطريقة محترمة ؟؟؟؟ و هل انت مصدق فعلا أن مبارك هو اللى بيتحكم فى السلطة فى مصر ؟؟أنا شخصيا مؤمن جدا نه مجرد واجهة لنظام فاسد فاشل جلده تخين و ريحة فساده مؤرفة
Mohamed Midooooo (no network) wroteat 10:50am on September 4th, 2007
شوف التخلف الى تقصدة انت فعلا موجود فى شعبنا مش كل الشعب طبعا بس فئة كبيرة منة . الناس بقت ملهاش دعوة بالقرار السياسي اصلا ومحدش بقى يفكر فى حاجة شوية اقاويل بيقولها وهما فى القهوة او فى الاوتبيس زى (( شفت غيروا حكومة عبيد وجابوا نظيف لما نشوف هيعمل اية ،، او فين ايام الجنزورى دة منعوة يظهر اصلا فى اى مكان ،، الريس مات ياعم دية اشاعة دة بيصيف فى جمصة عندة شقة هناك ههههههه ،،، الخ من الكلام الى الناس بتقولة ومش فاهمة حاجة
Mohamed Midooooo (no network) wroteat 10:55am on September 4th, 2007
و للاسف الناس بقت تجرى وراء غريزة الاكل والجنس وطالما اتوفروا الاتنين خلاص شكرا .. عرفت بقى التخلف والعيب مين السبب فية .. اما بقى عن انتقال السلطة وخوف الناس منها طبعا هنتكلم عن الناس الى بيهما القرار السياسى المصرى والمتابعين وهما قليلين هقولك بقى وانا بعتبر نفسى واحد منهم . انا مش خايف من انتقال السلطة ابدا انا بس شايف ان الرئيس مبارك بجد رمز من رموز مصر مها ساء نظام حكمة وبشوف كمان ان هرم رابع من اهراامات مصر ومفيش تغير فى رائي دة مهما اختلفت معايا
Mohamed Midooooo (no network) wroteat 11:00am on September 4th, 2007
واخيرا بقى عن انتقال السلطة ياريت نلاقى حد يبقى احسن من الرئيس مبارك خارجيا ودة صعب شوية وداخليا وبشوف ان دة هيكون اسهل .. بس ياريت يظهر حد بجد ومن دلوقتى ونتابع كل حركاتة ونقولة اهلا بيك ونعملوا كام اغنية يمكن نفسة فيهم زى اغانى مبارك ههههه .. بس ياريت بقى يبقى حد مش كداب زى ايمن نور ولا عجوز بلطجى زى نعمان جمعة ولا حد قرارة ميت زى عمرو موسي ... الخ بقى
Mohamed Midooooo (no network) wroteat 11:05am on September 4th, 2007
واخيرا وبعيد عن مبدء التوريث بجد انا هقول نعم لجمال مبارك بعد الرئيس مبارك لان انتقال السلطة لية هيبقى سهل جدا وبالانتخاب مش التوريث .. حضرت لية اكتر من مؤتمر وبصراحة حسيت انة حد فاهم كويس اوى بعيد انة نجل الرئيس انا شفت انة رئيس بجد شاب قرارة وكلامة فى الجون فكرنى بلارئيس مبارك وهو هيبقى اميز منة بحكم صغر سنة شوية واحنا الشباب هنلاقى نفسنا معاة كتير ..
Ahmad Badawy wroteat 5:36pm on September 4th, 2007
ههههههههههههههههههههههههههههههههههههههههههههههههههههههههههههطيب اشبع بجيمى يا ميدو ... ده مش توريث ده ت****
Ahmad Badawy wroteat 5:41pm on September 4th, 2007
جمال مبارك ... اللى حمار اصلا مخرجش من بيته قبل كدة من غير حراسة و أتحداك أنه يعرف اسم 10 شوارع فى مصرجمال مبارك اللى ملوش أى مؤهلات غير أنه ابن حسنى مباركجمال مبارك اللى عمره ما وقف فى محطة أتوبيس أو حضر محاضرة فى جامعة حكومية أو اتعالج فى مستشفى حكومىجمال مبارك اللى قضى الخدمة العسكرية فى الحرس الجمهورى ... يعنى من منازلهمجمال مبارك اللى عمره ما كتب كلمة ولا قال وجهة نظر - فضلا عن أنها تكون وجهة نظر محترمة - و اللى مبيعرفش يقول كلمتين على بعض من غير ما الأمن يبقى مضبطهم له
Ahmad Badawy wroteat 5:45pm on September 4th, 2007
جمال مبارك اللى اتعلم على ايد أكلب كلاب السلطة صفوت الشريف و كمال الشاذلى و فتحى سرورجمال مبارك اللى قال مش حنمشى ورا كلام رجل الشارع العادى ... طب فى ميتين أمه هو مين أصلا عشان يمشى ولا ميمشيش ... هل حد انتخبه عشان يتكلم كدةأيمن نور اللى بتقول عليه دخل انتخابات أكتر من عشرة خمستاشر مرة فى أماكن مختلفة و لما كانوا بيخسروه بالتزوير و بالبلطجة كان بيبقى التانى على طولو جمال اللى عمره ما دخل انتخابات - ده حتى خاف يدخل انتخابات مجلس الشعب اللى جنب بيتهم
Ahmad Badawy wroteat 5:48pm on September 4th, 2007
جمال مبارك اللى مش عارفين بيجيب فلوسه منين و بيصرف على الحراسات اللى حواليه منين ؟؟؟ يا ترى فلوسنا حلال أوى أنه يصرف بيها على نفسه ؟؟؟جمال مبارك اللى مفتحش بقه فى ولا كلمة عن البلطجة بتاعة وزارة الداخلية على القضاة و الأخوان و الصحفيين و مين بقى اللى كداب ؟؟؟ اللى بيقول ويوعد كل يوم برفع مستوى الدخل وبيرفع الأسعار و لا اللى اتسجن ظلم عشان قال رايه و فضح الموالسين ؟
Ahmad Badawy wroteat 5:50pm on September 4th, 2007
أنت و لا عشرة زى جمال مبارك لو كانوا مكان أيمن نور كان أسهل حاجة يعملوها أنهم يشكروا الحرامى الكبير و كان حيعفو عنهم و يشيل التهمة اللى لفقها لهم .. بس عشان ما طاطاش راسه و منافقش زى بقية الحيوانات اللى بينافقوا اتسجن و بيدفع تمن كلمة حق قالها و بيدفع تمن أنه أول واحد يدى فعلا بديل محترم للفساد الموجود
Ahmad Badawy wroteat 5:53pm on September 4th, 2007
أيمن نور كان واخد جايزة أحسن عضو برلمان فى دول حوض البحر المتوسط ... يا ترى ايه هو مشروع جمال مبارك ؟؟؟ ايه هى العقلية اللى بيفكر بيها انسان محبوس جوة قصور الدولة و بين كبار المنافقين فيها ؟؟ايه الابداع اللى ممكن يطلع بيه واحد مش بيسلم على حد من غير موافقة الأمن ؟؟
Ahmad Badawy wroteat 5:57pm on September 4th, 2007
و الرئيس مبارك اللى فرحان بيه آخره بيبعتوله موظف يستقبله فى المطار لما بيروح فرنسا ولا أمريكا و ياريته حتى موظف بدرجة كبيرة ... و جمال بيه يا ترى رأيه ايه فى ممدوح اسماعيل و يوسف والى ؟؟ولا يا ترى مش بيكلمكوا عن الحاجات الوحشة دى فى مؤتمراته عشان بيخاف عليكوا يا عينى من الأكتئاب ؟؟؟
Mohamed Midooooo (no network) wroteat 2:19am on September 7th, 2007
هههههههه طبعا لازم اضحك مش على كلامك لانى مقدرش استهزء بواحد زيك لانى عارف او حاسس انك على قدر كبير من الوعى ولكدة بحترمك .. اما عن ان الحوار ياخد شكل المقارنة والدفاع من ناحيتك عن الراجل الى اسمة ايمن نور ومن ناحيتى عن كلامى عن الرئيس مبارك .. مع ان طبعا مفيش وجهة مقارنة مهما كانت مساوء الرئيس ونظامة هو مينفعش يتقارن بالراجل الى انت بتتكلم عن دة فانا بجد محبش ان دة يبقى الحوار ..
Mohamed Midooooo (no network) wroteat 2:24am on September 7th, 2007
اما عن كلامك عن ايمن نور سواء انة التانى فى الانتخابات او انة شريف او انة حس بالناس والشارع ....... الخ من كل الكلام الى قلتة عنة .. بحيك وبرافوا عليك بس فى نفس الوقت مش معنى ذلك انة يبقى رئيس مصر هو اخرة نعملة جريدة يبقى رئيسها بردة اههههههههههههههو بقى رئيس .. ومتخفش لو بقى رئيس ودة مش هيحصل غصب عنة هيروح يستقبل الناس فى المطار
Mohamed Midooooo (no network) wroteat 2:26am on September 7th, 2007
اما بقى قصدى الى انت مفهمتوش وانا كنت فاكرك لماح وبتقراء الى بين السطورر انا لما اتكلمت عن الرئيس مبارك وبعيدة عن جمال مش بتكلم من خلال حبى ليهم مع انى بحب الريس جدا .. انما يا سيدى انا عايز اقول انى مش شايف حد غيرة .. ونظرى مش ضعيف متخفش . انا لابس نظارة وكويسة وبشوف كويس .. واوعدك لو شفت حد احسن من الرئيس مبارك هبقى اقولك على طول
Mohamed Midooooo (no network) wroteat 2:28am on September 7th, 2007
اما عن جمال بقى كلامك كلة عنة لو اعتبرتوا انا صح دة مش مانع ابدا من انة يبقى راجل ذكى زى ما انا شايفة واناة ينفع للمنصب دة مهما كانت المساوء زى ما قلت حتى لو اتربى على ايد كمال الشاذلى وصفوت الشريف ونسيت كمان تقول زكريا عزمى دة من زمان هو كمان
Mohamed Midooooo (no network) wroteat 2:29am on September 7th, 2007
وعلشان اقصر علىيك الكلام انا بجد مبسوط انى بجادلك اوى وبجد انت حد فاهم كويس ورغم كدة ابدا عمرى ما هيتغير رائي وحبى للرئيس مبارك مهما حصل وانت اقتناعك بايمن نور بردة مش هيتغير .. وبكدة يبقى كفاية جدال ونشوف الايام الى جاية هيحصل اية
Mohamed Midooooo (no network) wroteat 2:33am on September 7th, 2007
ايمن نور ... او غيرة او حتى مبارك او جمال او انا او انت .. او اى حد .. اهم حاجة والى نفسى تحصل ان مصر تبقى مصر البلد الحلوة بناسها الطيبين الى غابوا خلاص .. مصر الى تستاهل النجاح اكتر من كدةة .. مصر الى مكانتها لازم تبقى ارفع من كدة .. مصر بلدى الى بجد بحبها جدا ومش انا ولحدى يا اخى دة ال 80 مليون مصرى بيحبوها جدا جدا .. اى حد بقى يا سيدى هيحبنا ويحب مصر وهيعمل لينا خير اهلا بية .. (( بس بردة عمرة ما هيبقى ايمن نور )) هههههههه
Ahmad Badawy wroteat 10:41am on September 7th, 2007
اللى أنا مش فاهمه لحد دلوقتى يا ميدو أنت على اى أساس بتكره أيمن أوى كدة و أنت أصلا متعرفش حاجة عنه !!ءعلى فكرة انا مش بدخل فى حوار غير لو عندى استعداد أغير وجهة نظرى لو اتضح أنها غلط و مش بثبت على حاجة لو اقتنعت أنها مش مفيدة ... فياريت تقول لى ايه هى مساوئ أيمن نور الفظيعة اللى مخلياك مش عاوز حتى تقارنه بحسنى مبارك يمكن أقتنع أنه لا يصلح كبديل أفضل من جمال – اللى هو مفروض علينا بالقوة ؟هو ولا سرق ولا نهب ولا قتل ولا زور انتخابات ولا عذب حد ولا حمى مفسدين ولا هرب مجرمين فى حماية الشرطة ولا جاب سرطان للناس ولا بياخد كل رئيس وزرا لأسرائيل بالحضن
Ahmad Badawy wroteat 10:44am on September 7th, 2007
بيصرف على نفسه و بيته من فلوسه اللى تعب فيها أو ورثها من عيلته و مش بيصرف من فلوس البلد على حراسات ولا أمن لولاده ولا يملك أى منصب ممكن ياخد منه رشاوىطول عمره راجل بتاع سياسة و فكر و صحافة من أيام ما كان فى الجامعة و حزب الوفد و مجلس الشعب و نقابة المحامين و الصحفيينحتى ابوه - اللى مات من الحزن عليه الله يرحمه - كان عضو مجلس امة و عضو اللجنة اللى حطت الدستور اللى غيره السادات و خلاه حكم أبدى
Ahmad Badawy wroteat 10:47am on September 7th, 2007
طبعا له عيوب و أكبرها أنه بيحب الزعامة و الظهور الاعلامى ... بس كل السياسيين - سعد زغلول مصطفى كامل عبد الناصر حتى السادات - كانوا بيحبوا الزعامة و الظهور الاعلامىيا ريت بجد تفهمنى اشمعنى أيمن لأ يمكن أكون مخدوع فيه ولا حاجة و أنت تعرفه أكتر منىو مش حقول لك يا سيدى ايه هو تاريخ جمال مبارك السياسى ولا جاب فلوسه منين ما دام أنت مش عاوز تقارن بين الأتنين (و فعلا مفيش وجه مقارنة خالص)ء
Ahmad Badawy wroteat 10:52am on September 7th, 2007
بعدين أكبر مصيبة فى كلامك أنك بتقول أن مش شايف بديل ... ده على اساس أن حسنى مبارك نبى بيعمل معجزات ؟؟ و محدش حيقدر يعملها غير لو واخد جيناته ؟؟الأخوان بديل - ايمن نور بديل - الجنزورى بديل - سامح عاشور بديل - عمرو خالد بديل - و فيه مليون غيرهم يصلحوا ... صحيح أن أنا مش موافق على كل دول .. بس كل واحد منهم و له حيثياته و شعبيته و برنامجهيبقى مش من حقنا أننا بس اللى نختار ... نعمل يا سيدى انتخابات و الناس هى اللى تختار اللى هى عاوزاه ......... و حتى بفرض أن مفيش بديل فده عشان بقالنا 55 سنة النظام الفاشل اللى بيحكمنا بيدمر سمعة و صورة أى بديل ده لو سابوا حى اصلا
Mohamed Midooooo (no network) wroteat 11:19am on September 7th, 2007
شوف انا الاول بقولك انت فعلا حد من الناس الى فاهمين كويس جدا ولكدة انا بحب ادردش معاك ونتكلم ونتختلف ، دية حقيقة بجد انت من الناس الى عندها وعى والى بقوا قليلين ،، اما بالنسبة لكلامك اولا لا تعليق عن كلامك عن ايمن نور لانى قلت الى عندى ومعنديش حاجة اقولها تانى ، اما باقى كلامك بصراحة حلو جدا بس حاجتين تفتكر لو نزل الانتخابات مرشحين كتير مش مهم هما مين ، السؤال هنا تفتكر دور الشعب بسلبية الى انت عارفها هيكون اية ؟؟ اكيد انت فاهم انا عايز اقول اية
Mohamed Midooooo (no network) wroteat 11:22am on September 7th, 2007
اما عن الاسماء الى قلتها بصراحة سمعت عن الجنزورى الى يخلينى اقول ةانة كويس وطبعا عمرو خالد من اكتر الناس الى انا بحبها فى حياتى مع انى مش شايفة رئيس بردة ، اما بقى الاخوان فشوف انا لو بختار بين الاخوان وايمن نور هختار ايمن نور رغم انى مش عايزة بس بجد الاخوان المسلمين ههههههه حلوة كلمة المسلمين دول بقى اكتر ناس لازم الشارع المصرى يرفضهم وانا برفضهم جدا بردة

Mohamed Midooooo (no network) wroteat 11:29am on September 7th, 2007
وهقولك حاجة انا عايز مصلحة بلدى فوق انى عايز شخص بعينة .. انت عارف انا نفسى اقترح تشكيل وزراة جديدة يبقى الجنزورى رئيسها وعمرو خالد وزير الشباب وسامح فهمى يفضل وزير بترول وزاهى حواس يبقى وزير ثقافة وعمرو موسي يبقى وزير خارجية وابو غزالة لو صحتة كويسة يرجع وزير للدفاعمع ان المشير طنطاوى كويس بس اهوة تغير بردة (( وهيفاء وهبى تمسك الاعلام اصلها متفرقش عن الى مسكوة وزراة الاعلام حاجة )) هههه بضحك طبعا ، ... الخ طبعا من الاسماء الى فى دماغى لباقى الوزرات
Mohamed Midooooo (no network) wroteat 11:32am on September 7th, 2007
يعنى مش مهم مين الرئيس المهم الحكومة الى هتتشغل يعنى ياريت بقى نشوف حكومة ميبقاش عيوبها اكتر من مميزاتها راح عبيد جية نظيف .. والخ دة الى بييقولوا الناس محدش فاهم حاجة .. بس لازم نفهم بقى .. لو للرئيس مبارك احسن اختيار الحكومة الجديدة بجد هيعدى مرحلة كويسة تغير رائ كل الناس الى بتختلف علية فية .. وفكرة والله حلوة لية منعملش استفتاء قبل تحديد الوزراء واللناس تقول رائيها حى على الانترنت والمسئول بقى وهو بيحدد الوزراء ياخد فى الاعتبار رائ الناس .. فكرة والله
Ahmad Badawy wroteat 7:00pm on September 7th, 2007
و كأن مبارك قدرنا اللى مش بايدنا نغيره و كأن كل اللى مسموح لنا أننا نحلم بيه أنه يتعطف علينا و يجيب لنا وزرا يرضوه و ميبهدلوناش اوى ... لا يا عم أنا مش لاعب

Mohamed Midooooo (no network) wroteat 2:32am on September 8th, 2007
بس هى مش لعبة ولو كلامنا او رائي لعبة فانت صاحب اللعبة .. ولا تعلييق
Ahmad Badawy wroteat 7:17pm on September 8th, 2007
أنا مش قصدى على رأيك أنه لعبة ... أنا قصدى على البلد كلها مستقبلها بقى لعبة فى ايد كام واحد و احنا يا دوبك بنحاول نقنع نفسنا أن لينا دور
==========================================
الصراحة ميدو انسان محترم جدا و برغم أن أنا كنت بتعمد استفزه عشان بحس أن كلامه مش بيقنعنى و بيخلينى مستغرب و متغاظ بس هو مردش على الإساءة باساءة و دى حاجة ححترمها فيه على طول حتى لو فضل رأينا مختلف

Monday, September 10, 2007

عشر اسئلة عن جمال مبارك

ايه هى مؤهلات جمال مبارك الدراسية و الثقافية و تاريخه السياسى ؟؟
ابن الريس و موظف فى بنك انجليزى و شكرا على كدة ... اللى بيقولوا ده مش توريث و خلونا نتكلم بالعقل بكرة ييجوا يقولوا أن تامر جمال مبارك حيحكم البلد برده من غير توريث و خلونا - برده - نتكلم بالعقل

حد يعرف الأخ جيمى بيجيب فلوسه منين و بيصرف على نفسه و مراته بنت الملياردير من فلوس مين ؟؟؟
أظن من فلوسنا احنا - اللى هما الشعب - لأنى مظنش مرتبه فى البنك مكفى كل مصاريفه
مين اللى حوالين جمال مبارك ؟
أحمد عز - كمال الشاذلى - صفوت الشريف - زكريا عزمى - فتحى سرور - هانى سرور - ممدوح اسماعيل - البيج بوس حبيب العادلى
و أسيب التعليق لسيادتك على الشخصيات العظيمة دى كلها

هل يقدر فى يوم من الأيام يعترض على قرار هما ياخدوه ؟؟

كام انتخابات دخلها جمال مبارك عشان يوصل للمنصب اللى هو فيه فى الحزب الوطنى؟؟؟
الأجابة فقط لأعضاء الحزب الوطنى الأشاوس

راح فين أيمن نور و نعمان جمعة و الأخوان و فين عمرو خالد و أحمد زويل و الجنزورى ؟؟مين المسئول عن تدمير و ابعاد و اخفاء أى بديل و لمصلحة مين ان ميبقاش فيه بديل ؟؟

حد قرا كتاب أو مقال كتبه جمال مبارك بيدعى فيه - لا سمح الله - أن عنده وجهة نظر أو رؤية فكرية ؟؟ياريت بس محدش يتحجج بأننا عايشين كل السنين دى من بعد السادات من غير رؤية سياسية و لا وجهة نظر معينة ... ده اللى مخلينا مش عارفين احنا عاوزين ايه ولا هدفنا ايه ... تسليك الأمور و خلاص يصلح لمركز شباب السمبلاوين بس لا يصلح لدولة فيها كام مليون بنى آدم

حد سمع الأخ جمال مرة واحدة بينتقد أو بيعترض على التعذيب فى الأقسام و السجون ؟؟

حد يفسر ليه و بصفة ايه بيسافر لأمريكا و بيتفاوض معاهم مفاوضات سرية ؟

حد يقول لى لما أنا يبقى عندى انتخابات فيها مرشح واحد يبقى بعملها ليه اساسا و بعد كدة أرجع أتهم الشعب بأنه سلبى !! ما هو سلبى عشان عارف النتيجة مسبقا

حد يقول لى شفنا ايه عدل فى حكم السيد الوالد عشان يطلب مننا نستنى لحد ما نشوف الخديو جمال حيعمل ايه و ادينا بنجرب ؟؟