Thursday, August 31, 2006

هل تعلمين ؟؟


هل تعلمين ما الذى فعلتيه بى ؟

هل تعلمين ما أقاسيه ؟
تختفين فجأة كأنك لم تكونى ؟
كأنك سراب مر من أمام عيونى ؟

لا أدرى ماالذى أغضبك ؟

بل لا أدرى أهو الغضب أم شئ لا أدريه؟

هل تشعرين بقلقى عليكى ؟

أم قلبك أقسى من أن يهتم بشخص قابلتيه فتعلق بك فتركتيه ؟

أفكر أن أنساك و لكن كيف أنسى من كانت كلماتها تبهجنى و تسعدنى حتى دون قصد منها ؟
بل دون قصد التقينا ...

صدفة جعلت عقلى يشل عن نصائحى التى طالما وجهتها للمنتصحين ...

أقول ربما مكروه لها قد حدث فيخفق بالقلق قلبى ... قلبى الذى رفضتيه فلم ييأس لأنه أبله يتعلق بالأوهام دوما فى زمن العاقل فيه هو من بدون قلب ...

لماذا أكتب ؟


لربما تقرئين .. لربما تشعرين فتشفقين على قلبى المسكين ...

قلبى الذى تقطع يوم قلتى "فلنصبح أصدقاء" و قلت و هل كنا يوما أعداء ؟

أخبرتك أننى لم أبغى تسلية أو مغازلة بل أردت لقلبى أن يستكين ... و لكننى قبلت أن نصبح أصدقاء ... من يعلم لربما يرق قلبك و يشعر بالحنين ... قلت أواسى قلبى إذا خسرتها حبيبة فلا تخسرها صديقة ...و أنا عندى الأصدقاء مكرمين .....

ولكن أى درس تعلميه لى ؟

هل تعلميننى قسوة القلب بكثرة الأنين؟

لم تفلح بذلك كل أحزانى و احباطاتى -على كثرتها - فلا أظنك تفلحين ... لا أكتب انا الشعر ولا النثر المبين.

كل ما أردت قوله... يامن تعلمين ... انت فيـيييييييييييييييييييييييـن؟

عن الحب نحلم و نتكلم


لم أجد صورة معبرة عما أتكلم عنه مثل هذه
شخصين "رجل وامرأة " من أعظم البشر الذين عرفتهم
و أعتقد أن كل منهما يستمد عظمته و صموده من الآخر
د.أيمن نور و مدام.جميلة اسماعيل
ألف تحية عطرة لحب يتحدى المستحيل ويفجر طاقات الحرية فى جيل بأكمله
هل حلمت من قبل بالحب ؟ الحب الذى بلا حدود ؟ الحب الذى لا تقف امامه الحواجز ؟ الحب الذى يفجر طاقتك و ابداعك؟

هل حلمت بتلك الإنسانة أوحلمتى بذلك الإنسان الذى يملأ عليك حياتك ولا تحتاجى لأحد بعده لأنه كل ما تمنيته بالفعل ؟

هل تخيلت الشريك الذى يشاركك كل أحلامك و طموحاتك و احباطاتك أيضا ولا تشعر معه أبدا أنك عبأ عليه ؟

ذلك الشريك الذى ليس فقط تتشارك معه فى الإهتمامات المشتركة بل تشاركه فيما يحبه ولا تحبه فقط لأنه يحبه و تشعر بالسعادة لسعادته أنه يحب ما تعمل ؟

ذلك الإنسان الذى تعلم أنكما تختلفان فى قليل أو كثير من الصفات و لكنك وهو أيضا تنظران لهذا الإختلاف على أنه الاستثناء الذى يؤكد القاعدة وعلى أن هذا الفارق مكمل لشخصيتك و ليس منقص لها

ذلك الإنسان الذى تعلم أنه مثل بقية البشر به عيوب كثيرة لكن مايجعله مختلفا عن بقية البشر أنك تحبه كما هو بعيوبه و مميزاته , بأمله و يأسه و بتواضعه وغروره بكبرياؤه و انكساره وتعلم أنه يشعر نحوك نفس الشعور و يكن لك نفس المشاعر

هل حلمت بذلك الإنسان الذى تتشارك معه فى الأفكاروالأسرار؟ تتحاوران بالساعات و لا يشبع كل منكما من الآخر و ينظر كل منكما فى عين الآخر فلا يريد أن يبتعد عنها؟

هل فكرت يوما فى ذلك الصدر الحنون الذى تعلم يقينا أنه سوف يكون ملاذك الآمن عندما تضيق الدنيا عليك وتعلم أنك ستحميه لآخر نفس فى حياتك ؟

هل تبتسم عندما تتذكر دعابة قالها عندما كنتما معا برغم كآبة الجو حولك؟

هل تتلذذ بأن تشعر بخوفه و غيرته عليك و حاجته لوجودك ؟

هل تتعجب عندما تعلم بخيانة أحد أصدقائك لزوجته و تتسائل لماذا؟
لماذا لم يحظى كل إنسان بما تحظى به من نعيم الحب ؟ و تدعو الله و أنت سعيد وراضى أن يديم نعمتك وأن يعطى كل انسان كما أعطاك ولكنك تتسائل هل يوجدمن النساءأوالرجال فى الأرض مثل شريك حياتك ؟

هل تشعر بالثقة فى نفسك تتزايد كلما فكرت فى مدى ثقتك فى حب شريكك لك ؟

ألا تتخاصمان أبدا ؟ بل وتتعاركان أحيانا... ولكن فى النهاية لا يطيق كل منكما البعاد عن الآخر وترجعان دوما دامعى الأعين حزنا على ما فات من فراق ومن وقت لن يعوض

هل تخشى الموت ؟ أبدا لأنك تثق بالله و تعلم أنه سيجمعك مع من تحب بالجنة كما جمعكما بالدنيا. تعلم ذلك لأنكما تدعوانه معا و تحبانه معا و تصليان له معا
هل حلمت بمثل هذا الحب الذى يكون بالعقل والقلب... بالأفكاروالمشاعروالأحاسيس.. بالجسد و الروح ؟

هل تتخيل لمسة حانية على وجهك من يد زوجتك بعد يوم مرهق فى العمل و هل تتخيل شعورك عندما تشعر هى بالسعادة عندما تعطيها أنت هذه اللمسة و القبلة الهادئة بعد يوم متعب ؟

هل تشعر بالإشفاق على كل من هم مثلى لا يجدون من يشاركهم حياتهم واحلامهم وأفكارهم و سخافاتهم ؟

لا تشعر بالإشفاق على الآخرين بل تمتع بما تملك من نعمة و احرص عليها كل الحرص فقد تجد نفسك يوما فى مثل موقفى ولكنك لن تجد من يشفق عليك أو يكون بجانبك إذا لم يكن من تحبه بجانبك

إلى صديقى المناضل عبيد


يا عبيد عامل ايه ؟آخر مرة قابلتك و قعدنا كتير قوى على القهوة و فى الآخر طلعت ندل وسيبتنى أروح لوحدى بس أنا مسامحك ماهى ذنوب ناس بيخلصها ناس وأنا ياما طلعت ندل مع ناس كتير قبل كده


أنا بكتبلك دلوقت عن موضوع معرفتش اكلمك فيه و احنا على القهوة مش عارف اتكسفت أكلمك فى الموضوع ده لحسن تقول عليا عبيط أو تقول حشرى بس هى دى بقى ميزة الكتابة لواحد جبان زيى انا اكتب و انت تفهم اللى تفهمه او تنفض خالص انت حر وأنا حريص ان محدش غيرك يفهم أنا بتكلم عن ايه بس على الله انت بس تفهم


الموضوع ببساطة يا عبيد ياخويا إن أنا كنت كل ما بشوفك كان دايما بيبقى معاك وردة فى جيبك الشمال وكنت ببقى فرحان عشانكم ... عشانك عشان لقيت وردة وعشان الوردة عشان انا عارف إنك تقدر تحافظ عليها


بس آخر مرة قابلتك لقيت جيبك باين عليه فاضى واللى فهمته من كلامك انك بتتعب أوى اليومين دول عشان الشغل و السياسة والبلد و مشاكل و مؤامرات و مش عايز الوردة تتبهدل معاك


بس اسمع نصيحة واحد أصغر منك مش لاقى وردة تفرحه : ضحى زى مانت عايز عشان البلد ..ضحى بسنة فى الكلية اتخانق مع ابوك اتحبس و اتبهدل بس بلاش تضحى بالوردة لأن فى الآخر مش حتلاقى البلد جمبك و لا صحابك ولا الفلوس مش حتلاقى غير الوردة اللى فى جيبك الشمال


بلاش ترميهاوتقول دى بتاعتى مش ممكن حد ياخدهاغيرى لأن محدش ضامن حاجة و لو الوقت سرقك و وردتك ضاعت البلد مش حتنفعك والنضال مش حيعوضك


اسمع كلامى و اهتم بوردتك شوية بلاش غرور البنى آدم يخليك تفتكر ان كل حاجة فى ايدك
كفاية كدة عليك النهاردة بس يا رب تكون فاهمنى و الكلام ده ينفعك

فات اسبوع


عدى أول أسبوع ليا فى مكتوب و فكرت أعمل زى تقرير صغير كده عشان أفتكره بعد سنة مثلا اللى حصل فى أول اسبوع و أقارن
عدد الإدراجات : بدون هذا التقرير 18 إدراج  , ادراج فى المسودة : " حزبى حبيبى الحزب الأكبر "
أطول ادراج : البوصلة الإنسانية السياسية " جزئين "
عدد الزوار :           353
عدد التعليقات :       66
نسبة التعليقات : لو أعتبرنا أن نصف التعليقات هى ردود منى فيكون تقريبا 35 ادراج فتكون نسبة التعليقات لعدد الزوار : 10 %
الدول التى تأتى منها التعليقات : مصر, الأردن , لبنان , الجزائر , المغرب , العراق , السعودية , الامارات العربية المتحدة , سوريا 
الأكثر تعليقا : جوجو من مصر 8 تعليقات ,الأستاذ مؤيد الشيخ من الأردن 4 , مجهول 4
أكبر ادراج فى التعليقات :  "يا جماعة قولوا حاجة "  24 تعليق (تم وضعه على واجهة مكتوب)
ادراج لم يتم التعليق عليه : " استكمال درس السياسة للمبتدئين الخصوصى " , " لا تقرأها أرجوك " , " على الشاشة "
المعلقين : أ. أحمد الصعيدى  1, سامح  1 , Gogo  8 , مؤيد الشيخ  4, 1 Romel4ever   , رؤى 1, 1 Ismet  alosmany , أحمد فهمى  1,الواثق بالله  1, هبة خطاب 1,Baby lady 1 , بنت الشرق 1 , مجهول 6
التعليقات التى أرسلنها ليس باستطاعتى أن أعدها لكنها لن تقل عن 15 تعليق تقريبا " مش بقولكو رغاى "
بالطبع قد يكون هناك بعض الأخطاء حيث أن الإحصاء تم بالنظر و ليس بدقة كاملة لكنه يظل مؤشر جيد على مدى التفاعل مع المدونة فى أول أسبوع و لن أشكر الجميع على زيارتهم بل سأطلب منهم أن يداوموا عليها و على تنوير طريقى دائما بآرائهم

Wednesday, August 30, 2006

عمرو سليم ... شكرا جزيلا

الأربعاء,آب 30, 2006
تم ارسال هذا الموضوع لجريدة الدستور فى 17/أبريل / 2006
طلب ذلك الرجل غريب الأطوار محرر صفحة الرأي بالدستور أن يختار القراء 3 يصلحون أن يكونوا بديلا عن مبارك و ابنه .
و أنا من جهتي تعجبت جدا من هذا الطلب قليل الأدب يعني بعد العشرة المستديمة دي حد يجيلوا قلب يفكر يغير الريس الكبير مبارك الأول و الريس الصغير مبارك التاني ؟ " يجيلو قلب كناية عن أن العشرة ماتهونش غير علي ولاد الحرام مش كناية عن خوفه من أمن الدولة لا سمح الله "

لأ و شوف البجاحة دا طالب 3 شخصيات مرة واحدة بالرغم من ان الريس نفسه قال انه مش لاقي ولا واحد ممكن يختاره مكانه "بعد عمر بعيد " يبقي احنا "اللي هما الشعب يعني " ممكن نلاقي ونخرج عن طوع الريس ؟؟؟؟
عموما أنا قلت أساهم برأيي و رزقي علي الله
بص ياسيدي أول شخصية تنفع للمنصب دا علشان تكمل علي الشعب "تكمل انجازات يعني " تبقي ماما سوزان مبارك هانم ... حييجي واحد غلس و مش فاهم سياسة يقولي هوا احنا نخلص من الراجل و ابنه تجيبلنا مراته ؟ فأرد علي هؤلاء المشككين في المسيرة ان دا بس من باب الأصلاح التدريجي و التغيير

لو مش عاجبكم نخش علي اللي الشعب اختاره ف انتخابات الرئاسة اللي فاتت و احنا مش حنختار مبارك ود\أيمن نورحيموت (قضاء و قدر) ف السجن ود\ نعمان مشغول ف فتوحاته الحربية في الوفد يبقي مش فاضل غيرالمرشح الرابع (بس اوعى حد يسألنى عن اسمه عشان مش فاكره دلوقتى )

لولسه بتقول ماينفعش فكمان ما ينفعشي الأخوان لأنهم زي مابيقول التلفزيون و الجرائد الكومية "مش نسبة للسبعة الكومي " ليل ونهار جماعة محظورة و مخالفة للدستورو معادية المجتمع ... يبقي بقي يا حلو مش فاضل غيري يمسك البلد و يضبطها وأوعدكم يا اخواني مش حمسكها غيرمدة واحدة مدفوعة مقدما أو لغاية بس لما أكون نفسي وألم مبلغ ابدأ بيه حياتي مليار بس مش أكتر و بعدين صدقوني مش حتشوفوا وشي تاني

وبرنامجي الأنتخابي واضح ... أ\ممدوح اسماعيل نمسكه وزارة الأسكان والنقل والصحة بحيث نقضي علي السكان بمشاكلهم خلال كام سنة و كله عشان خاطر مصر ... و د\نعمان جمعة يمسك وزارة الحربية والداخلية علشان نحتل اسرائيل و"المعلم " حسن شحاتة نمسكه وزارة التعليم ... و المذيع الرخم بتاع البيت بيتك نمسكه مفتى عشان يفتى براحته
أهم واحد بقي علشان العشرة ... الأستاذ جمال مبارك حمسكه وزارة السياسات المشرفة علي مجلس السياسات المنبثق من لجنة السياسات المكون من أعضاء أمانة السياسات بحزب السياسات الحاكم بالقطعة مع التمسك بالثوابت و الرواسي

متهيألي مفيش بعد كدة وربنا يجعله عامر ,,,,,


أحمد بدوي

هندسة حلوان قسم قوي
---------------------------------------------------------------------------------------------------------
وكان الرد الذى أعتز به من الأستاذ عمرو سليم كالآتى :
والله بتتمتع باسلوب ساخر يا استاذ احمد
بس انا برضه عاتب عليك..كده برضه يا راجل ما تفتكرنيش ولو بوزاره؟؟؟
فيها ايه يعنى لو تعمل وزاره للكاريكاتير وتمسكها للعبد لله؟
ماليش نفس يعنى؟؟؟

هايل يا احمد..بالتوفيق ان شاء الله
مع خالص الشكر والتقدير
عمرو سليم

و الله ياأستاذ عمرو مش حتصدق رسالتك دى قد ايه بسطتنى و حسستنى بالفخر و خليتنى أفكر أكتب بجد و ألف ألف شكر "

كتبها أحمد بدوى في 11:00 مساءً ::

أقوال مأثورة و تعليقات مكسورة

"العين بالعين تجعل العالم أعمى " غاندى
أنا : وهل لدينا عيون لتقرأ هذا الكلام ؟
"من يخشى حفيف الأشجار لا يدخل الغابة " د.أيمن نور
أنا : ومن لا يخاف الظالمين يقهرهم أو يدخل السجن أو الجنة

"لو لم أكن مصريا لوددت أن أكون مصريا " مصطفى كامل
أنا : لو لم اكن مصريا لوددت أن أكون أمريكيا أو أوروبيا أو يابانيا أو ماليزيا أو سنغافوريا

"مفيش فايدة غطينى و صوتى يا صفية " سعد زغلول
أنا : ياااه الراجل ده كان هارش الفولة من زمان أوى كده؟
"فترتين كفاية أوى" الزعيم مبارك
وعد فأوفى

" لقد خلقنا الله أحرارا و لن نورث بعد اليوم " أحمد عرابى
أنا : مظنش
" عاشر عاشر مسيرك تفارق " مثل شعبى
أنا : واضح ان المثل ده مبيتقالش فى المنوفية

"يا بتاع الشباشب هات شبشب بصباع أو شبشب بفيونكة بدل الحبيب اللى ضاع " أغنية عاطفية
أنا : ياريت أعرف أقول كدة .. بس مش قادر

" فكك يابنى من التعقيد طول مبنتنفس فى جديد " M T M
أنا : خدو الحكم من أغانى الراب و أهديها للمثقفين

" ارفع رأسك ياأخى انتهى عهد الإستبداد" جمال عبد الناصر
أنا: هو انتهى بس بنلعب فى الوقت بدل الضايع

" احنا مش حنمشى ورا كلام المواطن العادى " جمال مبارك
أنا : طب اتفضل حضرتك خليك قاعد متمشيش

" حب ايه اللى انت جى تقول عليه " ام كلثوم
أنا : ياه الكلمة دى مش عارف اتقالتلى فين قبل كده ؟

"مش مهم تفهم دلوقت احفظ الأول بعدين افهم " الشيخ اللى كان بيحفظنى قرآن و أنا صغير
أنا : أدينى ولا حفظت ولا فهمت يامولانا عجبك كدة ؟

" حب العقل أقوى و أعمق وأبقى من حب القلب " د.أحمد زويل
أنا : سامعة ياللى فى بالى ؟

" خليك فى مذاكرتك أحسن " القول المأثور المحفوظ لأى حد أكلمه فى السياسة
أنا : ياريتنى كنت سمعت الكلام

Monday, August 28, 2006

لماذا أكتب اسمى


نصحنى كل من سألتهم " ودول كتير أوى " قبل البدأ فى كتابة هذه المدونة باستخدام اسم مستعار ...


" بشكاش مثلا" لكى أبتعد عن السباب و النقد القاسى من أشخاص كثيرين يهمهم فقط الشعور بمتعة الحرية عن طريق ايذاء الآخرين أو الشعور بالراحة عن طريق تفريغ الكبت الذى نعيشه جميعا عن طريق صب اللعنات و الشتائم على من يعارضهم .


ولكننى تسائلت لو أن شخصا اختار أن يسب ما أقول و بالمرة يدينى من الحب جانب " دا يعنى لو حد عبرنى أصلا " و شتم اسمى المستعار هل سيكون شعورى أفضل حالا ؟


يعنى أنا مش حكتأب لو حد شتمنى بس برضه الواحد مش طالباها معاه يتهزأ من الى يعرفه و اللى ميعرفوش " كفاية اللى يعرفه "


الصراحة ان ما أكتبه يعبر بصورة واضحة و صريحة - زى توجيهات الريس كدة - عن ما أشعر به لذلك من يعترض على ما أكتب فهو يعترض على رأيى - متخافوش مش حعلقه من رجله ولاحاجة - و أسلوب ابداؤه لرأيه لو كان مهذبا فهو يضيف لى و اذا كان " لا مؤاخذة " يبقى أقراه و أتعلم معملش زيه


بس sorry يا جماعة مش حنشر تعليقات غبية زى :
" يابن ال.... المفروض تقول كذا "
قريت التعليقات دى ف مدونات كتيرة و مش عايزها هنا يا ريت يعنى


"الطريقة دى بتنرفز أجمل انسانة عرفتها لما أستخدمها ف الشات "---->
سؤال :
هل ما قلته من منع التعليقات ال " ياى " وحشة يتعارض مع مبدأ الحرية الذى أعتبرها أسمى شىء فى الوجود بعد الحب ؟


حغيظكوا ومش حجاوب دلوقت دا موضوع الحلقة الجاية فى عالم سمسم " قصدى المدونة بتاعتى"

كتبها أحمد بدوى في 02:25 مساءً ::

البوصلة السياسية الإنسانية

البوصلة السياسية الإنسانية
 
طلبت منى صديقة عزيزة أن تشارك معى فى أنشطة حركة كفاية المصرية من مظاهرات و خلافه " ده على أساس انى راجل مظاهراتى قديم " وبينما هى كان يراودها الخوف الطبيعى الذى يراود أى انسان عند المشاركة فى عمل مجهول العواقب - ولوإن العواقب كلكم بتشوفوها بتحصل فينا على الفضائيات -
 
كان يراودنى خوف من نوع آخر فأنا بخبرتى فى ما يحدث خلال أى عمل جماهيرى تنظمه "كفاية" أو "شباب من أجل التغيير " لا يرضى ضميرى أن أدع شخصا آخر- فمابالك بشخص عزيز أيضا - يتعرض لعمليات القرصنة و غسيل المخ و تلقيح الجتت من مختلف التيارات السياسية التى لا تجد وسيلة لإجتذاب أعضاء وأنصار سوى اصطيادهم أثناء مشاركتهم فى الإحتجاج من أجل قضية عامة و خصوصا الأشخاص الطبيعيون الذين لم تتلوث عقولهم بالقمامة الفكرية التى تملأ عقول غالبية السياسيين – وأعترف اننى منهم طبعا – لن اتحدث عن وسائل الإستقطاب المخابراتية التى ترجع لأيام التنظيمات السرية أو ما سمعت عنه - ولم أره للأسف عشان حظى وحش حتى ف السياسة - من تركيز ناشطات من اللاتى يؤمن بحرية الجسد على الأعضاء الجدد حتى يتعلقوا بهم شوية بشوية تلاقى اللى كان جى عشان مصر جى عشان صاحبته " … " الناشطة فى تيار معين و يقوم بكل مجهوده من أجل ذلك التيار عشان يكبر ف عينيها .
طبعا السطرين اللى فاتوا حشبع عليهم شتيمة للصبح بس ابقوا اسألوا محمد عيد .
المهم فكرت انى زى ماأكتر من مرة كنت بشرح الإتجاهات السياسية لزمايلى فى الكلية " مناضل قديم بقى " انى أكتب كتاب مبسط لشرح عام و سريع لكل تيار وأفكاره و مبادؤه وربما أيضا رموزه و شعاراته فى صورة سلسة بحيث اللى يقراه يبقى خد انطباع أولى احاول أخليه محايد عن مجموع التيارات السياسية والفكرية فى مصر.
ملحوظة : أظن انه لابد و أن الكثيرون راودتهم هذه الفكرة و ربما نفذوها بصورة أفضل منى و لكننى شخصيا لم أطلع على مثل هذا العمل من قبل وكل ماأكتبه هنا ناتج من قراءات متنوعة و متباينة والأهم خبرة عملية مع أفراد و مجموعات مختلفة الانتماءات { يعنى من الآخر مش حأعد أضيع كل الوقت دا فى الكتابة و التفكير عشان يطلعلى واحد يقولى ما هو الكلام دا موجود ف كتاب كذا يا سيدى ابقى هاتلى الكتاب ده أقراه و أزود معلوماتى }
ملحوظة تانية : من الأول كدة أنا مش حضحك على حد أنا ممكن لهواة تصنيف البشر أصنف ليبرالى معتدل وعشان أنا ليبرالى ححاول أكون محايد قدر الإمكان
دا كان الموجز و اليكم الأنباء بالتفصيل :
تحذير: الكلام اللى جى بقى كله بهاريز و مش حتقدر تغمض ودانك ... عشان ماينفعش حد يقفل ودانه أصلا ايه الذكاء دا ؟!
أنا بعتبر كيان الأنسان متكون من أربع عناصر اساسية :
    1) العقل           2) القلب           3)الروح                 4) الجسد
(1) العقل : و أعنى به الأفكار والمنطق و التمييز و اتخاذ القرار…. الخ
(2) القلب : وهو المشاعر بتنوعها من الفخر للحب للاحتقار للحسد …الخ برضه
(3) الروح : هى ما تربط بين الانسان والسماء و ما يسمو به فوق بقية البشر وهى تشتمل على الضمير والأخلاق أيضا
(4) الجسد : هو الجسم المادى الذى يتشكل فيه كل ما سبق
و كل عنصر من هذه العناصر له خصائصه و احتياجاته و طريقه و قد يتصارع عنصر مع عنصر آخر"مثل الصراع الأبدى بين الجسد و الروح " أو قد يتكامل عنصران أو أكثر لتوصيل الانسان لهدف ما " فمثلا يفكر العقل كيف يلبى حاجات الجسد التى تنشأ عن طريق القلب و تقوم الروح بتهذيب هذه التلبية حتى لا ينجرف لها الانسان " و الهدف الأسمى الذى يحاول الانسان الوصول اليه فى النهاية هو السعادة
{ حاسس كدة زى مايكون فيه واحد بيقول ايه علاقة كل ده بالسياسة و بتاع؟
أقول لهؤلاء المغرضين المندسين ما تصبر شوية يابنى يعنى انت وراك الديوان؟
اقرا و انت ساكت }
احنا كنا وصلنا لحد فين ؟ آه السعادة … السعادة دى طبعا معضلة كبيرة يمكن تاخد كتب لوحديها بس ببساطة كدة كل انسان يشعر بالسعادة بطريقة تختلف عن الآخر قد يجد شخص سعادته فى تسييد عنصر الروح على بقية العناصر فيرى السعادة فى التصوف و الزهد , آخر يجد متعة حياته فى ان يشبع رغبات جسده كما يحلو له من أكل و شرب و نوم و جنس " رأيى الشخصى أن هذا أقرب للحيوانات " ونجد انسان آخر عقله هو سعادته فيتعمق فى الفلسفة أو الإختراع وقمة سعادته فى التامل و التفكير ودا بيبقى فنان أو عالم .
 
حتقولى انت بقى رأيك ايه يابو حميد ؟ حاقولك يا سيدى وانت مالك ؟ وا أنا قلت من الأول كل واحد بيدور على سعادته و زى مايلاقيها بقى 
 
طبعا ده تبسيط للأمور لأن الانسان مركب … من ايه ؟ لأ فوق معايا من الأربع عناصر اللى خلصت عليهم حبر المطبعة من الصبح عشان كدة الطبيعى الانسان يجد سعادته عن طريق مزج اشباع كل العناصر مع بعضها يعنى قد يمارس الانسان الجنس "عنصر الجسد "ولكنه قد لا يصل الى السعادة الا عندما يتحول الجنس الى غرام مع من يشعر نحوه بالحب " عنصر القلب " و قد تظل سعادته غير تامة الا عندما يشعر أنه يمارس الغرام بدون خوف من الله أو تأنيب لضميره " وهو عنصر الروح " أؤكد على كلمة " قد "لأن مقياس السعادة يختلف من انسان لآخر تبعا لصفاته و تربيته و مجتمعه و زمانه و ادراكه
ايه بقى علاقة كل الكلام الفلسفى النظرى دا بالسياسة ؟
 
السياسة لها من التعريفات مالا ينتهى ولكن يمكن أن نأخذ تعريف بسيط لربطها بموضوعنا " السياسة هى وسيلة لاشباع رغبات ممارسيها " تعريف غريب أوى أنا نفسى أول مرة اسمعه … معناه يا سيدى ان الهدف من ان واحد يمارس السياسة بمعناها الشامل للأنشطة المختلفة من مظاهرات و اضرابات و الكتابات و الإنتخابات و المناظرات " فى مصر طبعا لازم نزود الاعتقالات و البهدلات" و أى حاجة آخرها تات
الهدف هو اشباع رغبة الفرد أو المجموعة فى الوصول اما للحكم للشعور بالسيادة أو القوة "عنصر المشاعر غالبا "أو تطبيق نظرية أو مبدأ تعتنقه المجموعة" عنصر العقل" أو من أجل ارضاء الله " عنصر الروح "
أو من أجل أهداف سامية أخرى مثل العدالة والمساواة والحرية و الكلام الكبير ده
وغالبا ما يكون الهدف الأساسى للقيادات فى أى تنظيم هو اشباع رغبات ذاتية من شهرة أو سطوة أو نفوذ و تأخذ بأهداف و مجهودات الأفراد التابعين كسلم للوصول
هذا الكلام مش كلامى يا خوالنا دا التاريخ هوا اللى بيقول كدة و الأمثلة لا تعد و لا تحصى وحنجيلها بعدين .
و مادام السعادة بتتحق عن طريق الأربع عناصر و السياسة هدفها السعادة يبقى عبقريتى اللى محصلتش بتقول ان السياسة هى رخرا بتتكون من أربع عناصر اساسية
زى ماأى لون بيتكون من الأحمر و الأخضر و الأصفر وحسب درجة كل واحد و تركيزه و شفافيته يتكون مالا يعد 
من الألوان فالفكر السياسى بيتكون من :
 
1) العقل           2) القلب           3)الروح                 4) الجسد
حتقولى ياه دى نفس العناصراللى قلتها قبل كدة الواد ده باين عليه بيشتغلنا !!
أقولك أولا عيب تقول عليا واد , ثانيا ركز معايا كدة :
 
1) الإتجاه الليبرالى : اللى أنا بشرف بالأنتماء اليه هو اتجاه العقل : حرية العقل والتفكير ,الفردية وأنتج فكريا : حقوق الانسان, الرأسمالية ,الديمقراطية و مبدأه الأساسى ان كل فرد له معاييره الذاتية فى البحث عن السعادة وكل فرد يأخذ فرصته فى تحقيقها
 
2) الاتجاه القومى : هو قائم على مشاعر التميز لدى جنس من الأجناس و الترابط الذى يجمع قومية ما " نقدر نقول عنصر القلب يغلب عليه " ودائما ما ترتبط مشاعر التميز لهذا الجنس بمشاعر نفور و احتقار لبقية الأجناس
 
3) الاتجاه الدينى : دا مش محتاج أقول انه اتجاه الروح و دا مش بيختلف كتير من دين لدين و من مذهب لمذهب لكن هدفه الأسمى هو الخلاص من عذاب الآخرة و مشاكل الدنيا بالتسليم للإله أو الرب أو من ينوب عنه فى ادارة شئون عبيده فى الأرض 
 
4) الاتجاه اليسارى : دا اتجاه الجسد " مش بس حرية الجسد " لأ ده اتجاه الحقوق المادية للانسان و ينتج بالتالى :الدفاع عن الفقراء, الاشتراكية, و المساواة فى فرص التعليم و العلاج و المواصلات , الإقتصاد الموجه
طبعا كل اتجاه من دول ممكن ياخد سنين فى مناقشة أفكاره و اتجاهاته من جوة ورموزه و تاريخ المنتمين اليه و مؤسسيه وشعاراته و انجازاته و اخفاقاته .
 
دا غير ان مستحيل يوجد مجموعة من اليشر تتبع تيار فكرى أو تيار سياسى معين من غير ما تتاثر ببقية التيارات
بس ممكن ندى شوية أمثلة و نرغى شوية فى كل تيار من باب ان انتو تتعلموا منى مش اكتر " طبعا الكلمة دى بالذات هزار لأن أنا عارف ان ممكن أى حد من اللى حظه وحش و قراالكلام ده يكون أحسن منى ميت مرة وعارف حاجات عمرى ماأعرفها. بس حبيت أوضح لحسن حد يزعل من نقطة مش قاصدها العملية مش ناقصةهية "
عندنا مثلا التيار القومى أنا شخصيا لا أرى أى عقلانية فيه … هو الذى اتبعه "هتلر"  
حبيب قلبى ومزجه بالرأسمالية عشان يقنع 70 مليون ألمانى ان ألمانيا فوق الجميع ويضطهد أغلب الأجناس الأخرى من غجر و يهود و سوفييت وعرب هو الذى اتبعه الصرب كمبدأ للتطهير العرقى ضد المسلمين فى البوسنة وكوسوفو
 
و خلط الأتجاه القومى مع الأتجاه الدينى يدينا حاجة فل أوى زى الحروب الصليبية وزى اضطهاد اليابانيين لباقى الأسيويين قبل الحرب العالمية التانية
 
والأتجاه القومى العروبى لما نتكلم عن مصر بقى هو الأتجاه الناصرى اللى أوجد زعيم فى حجم جمال عبد الناصر
 
زعيم الأمة العربية و مؤسس حلم الوحدة العربية و لكنه لإرتباطه بفكر احتقار الآخر الخارجى ارتبط أيضا بتخوين الآخر الداخلى فنرى أن الليبراليين فى نظر القوميين عملاء و الإسلاميين متاجرين بالدين و الشيوعيين خطر على الأمن القومى و هلم جرا
 
بقى أن نقول أن التيار القومى ارتبط فى مصر بالاشتراكية لما تمثله من أحلام المساواة و العدالة الأجتماعية و أظن أن هذا بجانب الكاريزما السحرية لعبد الناصر هو سبب اقتناع الناس به لفترة طويلة < < طبعا مش السبب ان الزعيم كان بيقول ارفع رأسك ياأخى و بعد ما يمشى ييجى حبايبنا يشوفو مين رفع راسه و يلزئوه على قفاه عشان يساووه بغيره من اللى مرفعوش راسهم لا لا خالص و الله يا اخوالنا
 
قشطة آخر سطر دا حيخلى بتوع الكرامة يهرونى تنظير بقى و كتابة على النت بحب الحاجات دى موت.
بقى أن نقول –تانى- ان التيار القومى الآن فى مصر انهارت شعبيته تماما تقريبا و لم يعد يمثله –على حد علمى المتواضع- غير الحزب الناصرى وحزب الكرامة و بعض الشخصيات العامة مثل عزيز صدقى وجريدة المعارضة الحكومية "الأسبوع"
  
 لسة و الله يا جماعة مخلصتش ….صبركو عليا

Sunday, August 27, 2006

لا تقرأها أرجوك



" منقولة من أجندة مذكراتى بدون تعديل "
النهاردة التلات 22/8/2006


لسة برضه بفكر فى "م" بس دلوقت حاسس انها كبيرة أوى فى نظرى وأنا فى نظر نفسـى حقير
مش عارف حاسس انى لوارتبطت بيها – عشم ابليس فى الجنة – أبقى بظلمها ...


انسانة – باختصار – فيها كل المميزات اللى ممكن اتمناها . . . ليه أربطها بانسان فاشل زيى ؟ - سيبك من حوار انك حتكسر الدنيا لو حبيت أو اتحبيت - أنا ولا حاجة وحفضل ولا حاجة أنا عامل زى صفيحة الزبالة – sorry فى التعبير – كل اللى ييجى ينضفها يتوسخ


كل ماأعرفها أكتر أحس انها أنانية منى انى أحاول أخليها تحبنى أنا مستحقش واحدة زى دى
أنا نموذج للإنسان الولا حاجة لا هو ناجح و لا فاشل لاشرير و لا ايجابى .... واحد جى يتفرج على الدنيا و يمشى
بينما هى انسانة حية بمعنى الكلمة .


أنا من كتر الصدمات اللى حصلتلى قبل كدة خايف أبقى متسرع لو قلت انى بحبها .. برغم انى بعشق كلامها و بحس بفرحة و راحة و لذة و أنا بكلمها و بحس بفراغ ووحدة وهى مش موجودة
بس خايف عليها من نفسى أنا مش ممكن آذيها بس ممكن قربى منها يكون ضد مصلحتها


الحب؟

انت عارف ان كلام اسلام صح بس بتكابر
الحب مش كل حاجة ومش اهم حاجة
انت مين عشان تحب انسانة زى دى تستحق واحدأفضل منك بمليون مرة؟؟؟

بس سؤالين هنا :
هل فى دليل انها ممكن تحبك أصلا ؟

مش يمكن تفضل أنت تحبها وهى متحبكش ؟
ساعتها يحصل اللى اتعودت عليه "ألم و احباط وحزن بس على الأقل ما أذيتهاش و ربطتها بانسان فاشل

سؤال (2)
مش يمكن سعادتها – لو حبتك يعنى –معاك أنت ؟


مش يمكن أغنى وأذكى وأقوى انسان ف العالم ميخلوهاش سعيدة وانت اللى ربنا كاتب سعادتها على ايدك ؟
سيبك من دور الشهيد اللى عايز يضحى بنفسه عشان تبعد عنه حبيبته و تعيش فى سعادة
انت من جواك بتتمنى انها -هى بالذات – تحبك


و انك تتقدم لها وتطلب ايدها وتتخطبوا و تتجوزوا ويبقى اسمك عملت حاجة فى حياتك تعوض كل الفشل اللى فشلته انت نفسك تكون قريب منها وعارف انها حتحب الحاجات الصغيرة اللى حتقدمها لها


انت أنانى مش خايف عليها انها ترتبط بواحد فاشل زيك قد ما انت خايف أنها ترفضك ... و خايف من اللحظة اللى بيقولوا عليها لحظة الحقيقة لما تحطك أدام حقيقتك و تسيبك مع نفسك

نفسك تفضل فى عينيها البطل المناضل الشهيد ... مش مستحمل ان الأنسانة الوحيدة المناسبة ليك وحبيتها تشوفك صغير و فاشل
{من برة الأجندة :

لحظة كتابة هذا الكلام انهمرت العبرات من عينى بدون صوت أو مقدمة }

الدموع دى دليل على صدق الكلام ... اعترف


ياترى عندك الشجاعة تسيبها و تبعد عنها ؟


أو عندك الشجاعة انك تفضل قريب منها من غير ماتخليها تحس بحبك ليها ؟


هل ممكن تستحمل يوم تقولك فيه انها اتخطبت ؟

هل ممكن تعيش بقية حياتك ندمان عليها ؟


ولا انت عايزها ترضى بيك على عيوبك وبعدين لما تبقى تعيسة معاك متبقاش انت المسئول . . . تبقى هى اللى اختارت ؟
{دموع تانى أشد من المرة الأولى }
بتعيط تاانى . . . مش عايزها تبقى تعيسة معاك ؟


ايه الحل ؟ يا إما تسيبها و تكمل الدور لوحدك لحد ما يتكتب game over أو تحاول تحسن نفسك – تحارب عشان الحب اللى مالوش حدود اللى جواك


تحارب عشان تخليها تحبك وتتعلق بيك و تحارب عشان تخليها لما تحبك تبقى فخورة بيك ... تحارب عشان تكون مسئول عن اسرة وحياة وشغل


هذا الكلام قطع جزء من قلبى لكثرة المكاشفة و المواجهة مع أفكار عمرى ما فكرت فيها قبل كدة و عند انتهائى من الكتابة كنت مرهق كالجندى المهزوم وهذه أول مرة على ما أذكر أن يبكينى الكلام الذى أكتبه " كنت أبكى لحدث ما أو مشكلة ما ثم أكتب لكنها المرة الأولى التى يجرحنى فيها ما أكتبه لدرجة البكاء

Saturday, August 26, 2006

end of love story

السبت,آب 26, 2006



I wanted 2 skip this part …

The part when she steps on my heart

I just wanted my life 2 b easy & my heart 2 rest at last

But every thing turned 2 b crazy & the dream vanished really fast

I felt anger or I felt pain? No… I felt the feeling of NOTHING again

As I always did b4, I laid down 2 cry … but this time I didn’t wish 2 die.

Its not hope its not despair it's just set, see & whisper

I didn’t want life or death but I didn’t know how 2 stop my breath

I will do nothing but stay & watch the play

Will my life go on? Or sadness will b upon?

Who cares any way? Not me, not in this day.