Saturday, April 5, 2008

أيوة بدافع عن نفسى

أيوة بدافع عن نفسى
2:19am Saturday, Apr 5

عندى مشكلة رخمة اوى بكرة .... أنا ياما نزلت مظاهرات فى التحرير و اسكندرية و الشرقية فى الغد قبل و بعد التأسيس و قبل و بعد تلفيق قضية الدكتور أيمن و اعتصمت قبل كدة قدام مكتب النائب العام مع شباب من أجل التغيير

و فى مشكلة القضاة شفت الأخوان و هما بيتطحنوا قدامى و ما قدرتش اساعدهم و انضربت فى الشارع أيام النتخابات مجلس الشعب

بس كل ده كوم و بكرة كوم تانى

بكرة يوم مختلف ... حاسس أن مصر كلها حتنزل التحرير ... عندى الأمل ده ... أن يبقى عدد الناس لأول مرة أكتر من عدد عساكر الأمن المركزى ... أنى أشوف بعينى كل الناس اللى مش بتحب السياسة و بتخاف منها نازلة بنفسها تشارك فى عمل سياسى عشان مصلحة مصر لأول مرة و ان شاء الله مش لآخر مرة

مشكلتى الوحيدة مش أنى أتحبس ولا أنضرب فى اليوم ده ... أنا كبرت على الحاجات دى و ما بقتش تفرق معايا ... مشكلتى فى الشغل !!!! ....... أنا استلمت الشغل يوم الحد اللى فات و رسمى أنا بدأت التلات يعنى ما كملتش اسبوع لسة

عارف أنى حنزل من نظر ناس كتير لو ما نزلتش التحرير زى ما بحرض الناس على النزول و عشان كدة كتبت النوت دى بدافع فيها عن نفسى و بحاول أعرض لك الحيرة اللى أنا واقع فيها

صاحب الشركة مأكد على الناس ان ماحدش يغيب ... أكيد حتحصل لى مشكلة لو نزلت التحرير أو حتى قعدت فى بيتنا و ما رحتش الشركة يومها ... و أكيد حتتحط حواليا علامات استفهام جوة الشركة من زمايلى و من الادارة

مش ده كله المهم .... بس كمان لو حصل انى اتحبست يوم ولا اتنين يبقى أحسن أسيب الشركة نهائى بقى ... ده غير أنى مجرب تعب المظاهرات و عارف أن تانى يوم لو لقيت جويا نفس أنزل من بيتنا و أروح الشغل حيبقى جسمى كله متكسر و مش حنفع بتلاتة تعريفة

جبان .. مش كدة ؟؟ ... ما خفتش من شدة أمن الدولة ولا خوف أبويا و أمى عليا ولا غشومية الأمن المركزى فى الشارع ولا تهديدات التليفون و خايف على مرتبى و سمعتى اللى لسة ما بدأتش أبنيها فى الشركة ؟؟

ناس قالوا روح عادى دى شركة خاصة و مالهاش دعوة بالاضراب ... و أنا فكرت اغيب و ما أنزلش التحرير فيبقى عملت جزء من اللى مفروض أعمله ( فرضه عليا ضميرى ) بس حيفوتنى لحظة من اهم لحظات التاريخ

و غالبا لو ما رحتش الشغل مش حقدر أمنع نفسى أنى أنزل من بيتنا و أروح عدل على التحرير ... و فكرت أروح نص يوم و أطلع من الشركة على التحرير و لو حتى مشى بس حتفضل نفس المشكلة ..... لو اتحبست أو حتى تعبت من المظاهرة تانى يوم حعمل ايه فى الشغل

طبعا أكيد لو أنت متحمس زى ما أنا كنت زمان حتقول ايه الهبل ده ؟؟ ... الناس مش خايفة تضحى بنفسها و ده خايف يضحى بمرتب يوم و عامل فيها محرض الثورة !!! ....... الحقيقة أنى ضحيت عشان مصر بسنتين فى الكلية و دست على كرامتى كتير قبل كدة و استحملت كتير ... و فعلا ما صدقت ألاقى شغل فى شركة محترمة بمرتب محترم و بين ناس كويسين و فى سنى و ليا فيها مستقبل كويس لو بذلت شوية مجهود

و خايف كل ده يضيع بسبب حماسة لحظة بعد ما تخلص ألاقى نفسى فى الشارع تانى بس لوحدى و أبدأ قصة البحث عن شغل من أول و جديد

لو نزلت التحرير فحيبقى من باب أن العمر واحد و الرب واحد و الرزق مش على حد غير ربنا

و لو ما نزلتش و ضاع عليا اليوم و سجلت نفسى فى سجل مناضلين النت فحيبقى من باب أن مستقبلى لازم يبقى أهم عندى و لو لمرة واحدة من أنانيتى و اشباعى لرغبة التغيير و تحدى الكون

يمكن ضميرى حيأنبنى كتير لو ما نزلتش التحرير و حندم على ضياع اللحظة دى اللى مستنيها من زمان من قدام عينى .... بس بعد كدة أكيد حقول الحمد لله أنى ما ضيعتش مستقبلى لتانى ولا تالت مرة من غير فايدة شخصية ليا

بجد فعلا لحد دلوقتى ما قررتش حعمل ايه ..... بس فى كل الحالات و من أى موقع

تحيااااااا مصر تحياااااااااااا مصر و يسقط يسقط حسنى مبارك
منقول من صفحتى على الفيس بوك