أخويا بيقول لي انتم بتوع خلقنا لنعترض. بتعترضوا وبس ومبتقولوش جديد
وده بمناسبة اني كنت بقول عالسيسي حمار مش فاهم لا اقتصاد ولا سياسة
الحقيقة ان المشكلة مش في خطاب السيسي
المشكلة في العقلية اللي ورا الخطاب ده . عقلية الموظف صاحب السلطة اللي رافض ان حد يحاسبه
داء الموظف المستبد مش داء يختص بيه المصريين
ده وباء عالمي . الدول الحديثة بتلاقيله علاجات مختلفة والمتخلفة بتمرض بيه وبيبان اعراضه
العقلية اللي بتشوف المواطن كائن طفيلي بيعيش على قفا الدولة وبيستهلك مواردها هى اللي تخلي السيسي يقول محتاجين ميت مليار عشان نشغل مليون مواطن
السيسي زى اى موظف قراري شايف المواطن اللي مش شغال عند الحكومة عايش في خيرها واللي شغال فيها مستعبد عندها
والنظرة دي سبب فشل اقتصادي وسياسي عميق وقديم
شخصية الكبير أوي 👳 تمثيل عبقري لحالة الموظف صاحب السلطة . اللي فاهم نفسه فاهم كل حاجة وصاحب الفضل على الناس عشان بيخدمهم
السيسي بيتكلم عن التعليم على أنه "مصاريف" وبالتالي بيطالب القوى السياسية تبني معاهد عشان تخفف العبأ عن الحكومة
حاجة في منتهى البؤس الصراحة
الحقيقة ان التعليم عملية استثمارية
التعامل معاها بمنطق انه منحة من الحكومة وفضل من الدولة فشل مستمر من الستينات لحد انهاردة
فشل منتج للفشل . فشل الدولة في تخطيط التعليم - وهو الأمر الطبيعي تماما بسبب تسرطنها بالفساد - يؤدي لفشل في انتاج أجيال جديدة أكثر قدرة على النجاح المنظم ...
في حالة السيولة الشديدة في المفاهيم والقوانين والقواعد يصبح لكل منا طريقه للبقاء ويغدو البقاء للأكثر قدرة على الاستفادة من الفساد والتعايش معه
التعليم عملية استثمارية بمعنى أنه مجال كثيف العمالة وتحديثه وتثويره يعني خلق فرص عمل بالملايين للعاملين في خدمات التعليم وفي نفس الوقت استثماري لإن كل مواطن بيتعلم صح هو استثمار في المستقبل القريب العاجل
أعتقد الدشليون مليار اللي خدهم السيسي لو كانوا أتصرفوا على بناء مدارس و جامعات ومعاهد جديدة وتحديث القديم من مناهج لمعامل لدورات تدريبية كنا زماننا بنشوف بدايات نتايج ملهمة لثورة علمية في مصر تشع في المنطقة كلها ... لكن للأسف ... كان عندك ثورة وراحت
