تحية للرئيس أوباما

فيه واحد\ة من وهو صغير بيتعلم ان البوابين والفلاحين والزبالين كائنات مخلوقة عشان تخدمه وملهاش أى شخصية أو حقوق وبالتالي اللي بيحصل لهم من معاناة وألم ده أمر طبيعي بيحصل لإن ربنا عاوزه يحصل لإنهم كائنات درجة تانية أو تالتة وربنا خلق الدنيا درجات

وفيه واحد\ة من وهو صغير بيتعلم أن المثليين واليهود وغيرهم كائنات حقيرة ملعونة، أقل من البشر ووجودهم ضد الطبيعة وملهمش حق في الحياة وبالتالي أى ذكر ليهم على أساس الندية كفر وشعوذة وتخريب للقيم الأصيلة (من وجهة نظره)

الحقيقة أن الحرية والمساواة والعدل خصائص لازمة للبشر أيا كان جنسهم أو لونهم أو مستواهم الاجتماعي والمادي ... الحقيقة أن كل النزعات التمييزية والنزاعات العرقية المذهبية مآلها للإنتهاء والنسيان وحتبقى ذكرى اللي ساهموا في الارتقاء بالبشرية من مرحلة اجرام البشر في حق البشر لمرحلة تكامل وتعاون وتلاحم كل البشر من أجل رفاهية ونهضة البشرية وحييجي يوم اللي أتعلم الكراهية من صغره ولاده يعلموه الحب  في كبره

تحية للرئيس أوباما وللنظام القانوني الأمريكي على خطوتهم الجبارة في سبيل التغيير والتحرر . وتحية للشعب الأمريكي اللي لايزال في قلب القوى الحية الحرة في العالم

الخطة السرية لمواجهة الويكيليكس

دليل الأخواني الشاطر في الدفاع عن الشيخ خيرت الشاطر

خطة مواجهة التسريبات


١- شكك في صحة الوثائق

٢- شكك في صحة ماتوضحه الوثائق مع الاستمرار
في التشكيك في صحة الوثائق

٣- التسليم بصحة الوثائق جزئيا مع نفى الجزء اللي فيه الفضيحة (في حال فشل ١،٢)

٤- اللطم لإن الوثائق دي بيستخدمها أعداء الدين وأعداء الثورة ... مع التشكيك في صحتها وصحة المفهوم منها والتذكير بالألاعيب المخابراتية والخطط الشريرة التي تقف وراء نشر التسريبات في هذا التوقيت بالذات

٥- شتيمة اللي يتكلم عن الوثائق دي بالأهل لإنه غير محايد ومتصيد للأخطاء ومش فاهم سياسة ويخون القائد الشرعي المنتخب للبلاد

٦- سب الدين ليه وللي بينشروا كلامه لإنه غير مهتم بالقضايا الأهم وبالمجرم الحقيقي وبيتكلم في قضية عدت ومبقتش ملحة بغرض خبيث هو تشتيت الصفوف وشغلنا عن المعركة

٧- تهديد من يشير للوثائق في كتاباته بالأثر اللاحق المدمر لإعطاء أهمية لوثائق غير رسمية ومجهلة المصدر (مع التناسي التام لإحتفاءك السابق بتسريبات مماثلة أستغللتها أفضل استخدام للنيل من سمعة عدوك ومعنويات صفوفه)

٨- انكار ان كان فيه وثائق اصلا والتمترس حوالين انها وثائق وهمية مفبركة ومن صنع خيال اللي كتبوا عنها ( وده بعد مايكون عدا على الموضوع سنين وبقى تاريخ)

٩- تأييد القائد والزعيم في كل ماأثبتته ضده الوثائق واظهار حسن نيته وسلامة موقفه رغم المكتوب ..

تذكر دائمًا أن الأخ الأكبر يعرف أكتر من الأخ الأصغر

رسالة إلى الوالي

رسالة إلى الوالي
سعد باشا زغلول

غباء أنك تعادي شريحة من المجتمع وتبقى كل أوهام انجازاتك هى في أوهام الإنتصار عليهم ! الخطف والإعتقال والإعدام كلها عوامل ضغط والضغط بيولد الإنفجار . مش بس أنت خسرت ثقة المتدينين بشكل عام لأ أنت عاديت شريحة أيدتك في لحظة من اللحظات

شريحة عندها القدرة على والخبرة في العمل الفوضوي - اللي هى الثورة في نظرك - وكل يوم بتكتسب عداء طايفة جديدة من المجتمع ليس كرها في شخصك أو استسخافا لقناع الأب الحنون الذي لا تجيد ارتداؤه أو حبا في مرسي أو حتى رغبة في عودة العمل بالدستور أو أدنى اهتمام بقضية الشرعية . فقط تخسرهم لإنك فاشل ومدعي . كانت زيارة رئيس وزراءك التمثيلية للمرافق الطبية مسار سخرية من طائفة العاملين بالطب . أتسائل جديًا هل تم إلغاء إدارات التفتيش في وزارة الصحة؟؟
ألا يقوم مسئول حكومي واحد في أى مرفق طبي برفع شكاوى لسوء ظروف العمل ؟ هل يعم الفساد لهذه الدرجة ؟! ألا يوجد من يستطيع رفع تقارير وافية وشاملة لسيادة رئيس وزارتك عن الأوضاع في المراكز الطبية الحكومية وأحوال العاملين بها ومستوى الخدمة الذي تقدمه لأهلنا في شمال مصر وعرضها!!

ياراجل ده لو أستنينا سيادته يلف على البلد كلها مرفق مرفق وحى حى ممكن نقعد جنبكم عشر سنين وهو لسة مشافش نص مرافق القاهرة! مش حقوللك راح بنها ولا أسوان ! المسئول مش بزياراته وبدلته . المسئول بتحمله المسئولية والإستقالة عند مواجهة سياساته فشل تلو الفشل .
انجازات مثل فضيحة زيارة ألمانيا لن يمحيها مليارات الدولارات تدفع كرشوة للاقتصاد الألماني . فحتى لو خانت الحكومة الألمانية إلتزامها بالديمقراطية كمبدأ أساسي من مبادئ التعامل بين الشعوب . فلن ننسى ولن تنسى الأجيال القادمة ولا الأحرار من أهل عالمنا مثل تلك المشاهد المخجلة لسفراء يتصفون بالعنجهية والجليطة وفقرهم في كل المواهب اللهم إلا كونهم من المقربين من الفرعون ! ومنهم المحكوم عليهم بأحكام من القضاء المصري اللي بتأمر شعبك بإطاعته والخضوع لأحكامه في صمت وخشوع


 فجأة أفلست وزارة الخارجية المصرية من القيادات الدبلوماسية التي كان يمكنها الدفاع عن اللانظام الحاكم والخروج بالزيارة بشكل متقن .. يعني حتى نتسرق بشياكة مش لازم نتجرس .. انا بقيت خايف أسافر برة يعايرونني اني مصري مع اني أيام الوحشة الثورة كان مجرد أن يتقال مصري في أى حتة في العالم تكسبك الاحترام ... ماعدا طبعا كوريا الشمالية إللي انا متأكد ان جرايدها واعلامها مش بيقول ان مبارك أصلا ساب السلطة ده لو يعرفوه هناك اصلا

ما انت عارف . احنا أحسن من كوريا الشمالية .. هناك الحكومة بتأجر السكان كعمال في الدول الأجنبية وبتاخد ربحهم لصالح الدولة .. الحمد لله أننا مش في كوريا .. صحيح ان المؤشرات بتقول اننا لا كوريا ولا سوريا وانما ليبيا

 ،، هل تحولنا فعلا إلى ليبيا القذافي وأصبح مصير ٩٠ مليون نفس رهن اشارة قيصر وفرقة السيرك المرافقة لفخامته ؟

اللي بيتخنقوا بسرعة من النحنحة واللي بيزهقوا من متابعة مسلسل ذئاب الجبل لو أتعرض دلوقتي واللي مرعوبين لدرجة الجنون على عيالهم والمفقوعين من الفساد اللي مش عارفين يستفيدوا منه كلهم مش مستنيين حد يستفزهم صدقني ! الناس دي كتييير وجايبين آخرهم . الناس بتقلب رأيها في ثانية . مرة واحدة تعمل حركة واحدة وحشة من حركاتك بتفقد قصادها عشرات من المؤيدين الغير متعصبين والمتعصبين على حد سواء

الغير متعصب ده متفرج . مع الرايجة حبك لدرجة العبادة لما لقى الناااس كلها بتحبك لدرجة العبادة .. واحد سمع عن نبي جديد فراح مبهور ورجع م*ضون . ببساطة ده لما يشوفك بتغلط مرة والتانية ويسمع مرة لده ومرة لده ويستوعب قواعد اللعبة ويعرف انك زيك زيه لايص ومش عارف تعمل ايه . حيقلب عليك . بس ده قلبته مش وحشة لإنه في الأصل مكنش حاسم موقفه. ده حيهاجمك شوية بس حيدافع عنك برده ... ما انت الدولة . معقولة نهد الدولة اللي ب .. ب .. هى الدولة عندنا بتعمل ايه؟

بتعلم ؟ أعوذ بالله من الكذب .. بتعالج ؟ طب بتحمي؟ أنت حاسس نفسك محمي؟ حاسس أنك عارف تخطط حياتك في الخمس سنين اللي جايين ؟ حاسس انك كمواطن فيه مؤسسة بتحميك وبتحمي أولادك اسمها الوطن ؟
نرجع لمكتوبنا
المتعصب ده حيف*خك لما يستوعب أنك برده زيك زيه محدود القدرة ومش إله زى ما فهموه ... تأمر بالقتل تتعلق المشانق لأبرياء وتقصف الطيارات بيوت مصريين من أصحاب الأرض المصرية ! بس في الآخر برده مش عارف تحميه . هو مهدد بجد عشان كدة متعصب . عاوز حد يحل له مشكلته . عاوز حد يحنو عليه فعلا .. فعلا مش قولا وتلفزيونا واعلاما واهراما وأخبارا وجمهورية
قدم أوي الأسلوب ده والله ياتاح . دلوقتي انا بدرس للطلبة ان فيه علم جديد اسمه الالكترونكس عشان المنهج بيقول كدة. بس الحقيقة هما فاهمين ان مش العلم هو اللي جديد وانما تأخرنا احنا اللي كارثي

مش مهم المنهج بيقول إيه. مش مهم حكم المحاكم بتاعتكم بيقول ايه .. الحقيقة في الآخر بتتعرف . كلنا في الآخر محكوم علينا بالإعدام عاجلا أو آجلا واللي جايين بعدنا أقوى مننا وأكتر بكتير . مسيرهم في يوم يتجمعوا ويصلحوا البلد .. عارف حتى لو اتضربت بالنووي او وقع عليها نيزك زى الدعاء العجيب اللي بقيت بسمعه يوميا ومن ناس كتير بشكل يخض

هل ده كفر بقدرة ربنا أنه يفجر القاهرة كلها بالنووي؟ هل ده تحدي ليه؟ لأ أبدا .. ده دعاء صادق من ناس يمكن فعلا بتردده دون تفكر في عواقبه لو حصل لكنه فعلا بيعبر عن رغبتها في الخلاص

فعلا احنا وصلنا لإن فيه مصريين بيعلنوا طول الوقت وبكل الوسائل رغبتهم في الهجرة والخروج من الحدود المصرية لاى جهة كانت كأننا صراصير مابتصدق تلاقي أى فتحة تخرج منها من البلاعة !! كمية الشتيمة اللي جاتلي لما رجعت من السويد عشان مقدمتش على لجوء سياسي مرعبة .. أنت عارف يعني إيه يبقى الأصل أن الهروب هو الحل .. يعني ان حدودك أصبحت حدود سجن لحبس ٩٠ مليون نفس لا بوابات لخدمتهم عند السفر وعند الرجوع

يعني أن تلك التي تدعي قيادتك لها بإرادة إلهية هى في الحقيقة سفينة غارقة لا تزيدها أنت إلا اشتعالا
أرحل يا بشار .. حيرحل بشار .. رحل بشار وانهارت القواعد القديمة . لم يعد من مجال للتفاوض مع الدولة الاسلامية فأستمرت الحرب الأهلية عشرة أعوام بعد رحيل بشار . وأستمرت آثارها بعد ذلك لسنوات وسنوات قام الشعب فيها بالنهوض تحت قيادة سياسية شابة علمانية على النمط التركي ... كل مايحتاجه الأمر هو الوقت

ولا أعتقد أن هناك المزيد من الوقت لتضييعه .. فلتصحبكم السلامة