ترمب قفل الحكومة
يعني ايه؟
عشان الولايات المتحدة دولة قانون فميزانية الحكومة لازم يحطها البرلمان ويوقع عليها الرئيس، ولو رفض التوقيع - ودي حصلت أكتر من مرة قبل كدة في عهود مختلفة - الميزانية مش بتقر وبالتالي بيتم وقف صرف مرتبات العاملين بالحكومة لحد ما الرئيس والبرلمان يتفقوا على ميزانية جديدة،
طب وده تأثيره العملي ايه؟
فيه مؤسسات حكومية بتقفل والعاملين فيها بيقعدوا في بيتهم - زي الحدائق العامة مثلا ، وفيه مؤسسات تانية مينفعش توقف عملها زي الاسعاف والمطافي فالقانون بيلزم العاملين فيها بالاستمرار في العمل من غير مرتب، والنتيجة ان اكتر من 380 ألف موظف حكومي حيدخلوا سنة 2019 من غير مرتبات، ده غير آلاف المقاولين المتعاقدين مع الحكومة برده مش حيصرفوا مستحقاتهم.
طب ليه ترمب قرر يرفض التوقيع على الميزانية رغم أنها خرجت من البرلمان بأغلبية بتضم الحزبين؟
لإنهم محطوش فيها مبلغ 5 مليار دولار هو طالبهم عشان يبني سور مابين أمريكا والمكسيك. والسور ده كان من أهم وعوده الانتخابية اللي حمست متطرفين اليمين الأمريكي ومهاويس الانعزالية أنهم يأيدوه ، ترمب لما شاف ان رموز التيار ده في الاعلام بيهاجموه عشان وعد الحزب الجمهوري بأنه يوقع رغم أن السور مش موجود في الميزانية عرف أن شعبيته وسط الفئة الوحيدة اللي بتأيده بشكل أعمى (لدرجة أنه وسط الانتخابات قال أنا لو ضربت حد بالنار في وسط الشارع حيفضلوا يأيدوني برده) في خطر فقرر يقلب الترابيزة ويرفض التوقيع.
طب وده متوقع يستمر لحد امتى؟
محدش عارف بالضبط، ترمب شايف ان توقيعه عالميزانية بشكلها الحالي حيدمره سياسيا والديمقراطيين شايفين انهم مش محتاجين يقدموا أى تنازل لترمب خصوصا بعد ما قال بلسانه أنه حيبقى "فخور" بقفل الحكومة عشان يوصل لتأمين الحدود وده في اجتماع علني بينه وبين قيادات الديمقراطيين في الكونجرس.
وايه خلفيات الأحداث دي كلها؟
أولا الحزب الديمقراطي (الممثل لليسار الأمريكي) فاز بإكتساح في انتخابات مجلس النواب ومفروض يستلم السلطة جوة المجلس في يناير، ودي من أكتر الحاجات اللي جننت المتطرفين المؤيدين لترمب ودفعتهم لمهاجمته عشان عارفين أن دي آخر ميزانية حيبقى للجمهوريين الأغلبية وقت وضعها وبالتالي لو لم يتم اقرار المبلغ المطلوب للسور فعمره ماحيتبني،
ثانيا لأول مرة في تاريخ أمريكا وزير دفاع يستقيل احتجاجا على قرارات رئيس ، واستقال بسبب قرار ترمب الفردي بسحب القوات الامريكية من سوريا واللي معناه ببساطة تسليم ملف سوريا لروسيا بالكامل ، روسيا اللي ترمب أصلا متهم بالتعاون معاها للتلاعب في انتخابات 2016 اللي جابته رئيس،
ثالثا التحقيقات المفتوحة ضد ترمب وعيلته وحملته الانتخابية ( 17 تحقيق مختلف) بدأت تجيب نتايج وتحبس ناس مهمة كانوا حواليه ومتوقع أنها توصل لاتهامه شخصيا في 2019.
المصادر:
CNN - MSNBC - Social Media
وغيرهم
No comments:
Post a Comment