Thursday, May 8, 2008

عن اسراء

ازيك يا حفصة ؟؟
أولا : ألف شكر على ذكرى فى البوست :)ء

ثانيا : أنا قبل ما أتكلم عن اسراء بشخصها عاوز أرد على اللى بيقول أنها ضعيفة لأنها بنت و انها كان لازم تنكسر .... ده منتهى التخلف و الجهل لأن رجالة بشنبات ما بيستحملوش شخطة من ضابط فى قسم و رجالة بشنبات ما بيستحملوش اغراءات بالفلوس و المناصب و مش بيقاوموا ... ده غير أن فيه بنات كتير جدا بيقدموا لمصر أكتر من اللى يحلم بيه اى واحد فرحان بنفسه أنه دكر و كفاية اللى عملته واحدة زى نادية مبروك زميلة اسراء فى الحبس و اللى كل الاعلام تجاهلها و شبه اضطهدها و اللى عملته و بتعمله جميلة اسماعيل برغم التهديد و الترغيب و غيرهم كتير فى كل حتة

ثالثا : اللى بيقول أن اسراء مالهاش فى السياسة يبقى ميعرفش اسراء خالص ... أنا أعرف اسراء من سنتين تقريبا و هى حد نشيط جدا فى حزب الغد و ليها بصمات فى الحزب من قبل ما تتحبس و تشتهر بفترة طويييلة جدا و هى حد اصلاحى سلمى بيدور على الحرية و الحياة الكريمة لنفسه و للمصريين و مش ثورجى ولا جهادى عشان نطلب منها أنها تركب الموجة و تعيش دور زعامة هى مش مختاراه لنفسها

رابعا : اسراء مش مطلوب منها أنها تكدب و تقول أنها اتعذبت و اتهانت زى ما ناس كانوا محبوسين معايا فى نفس الزنزانة قالوا عشان تشوه صورة الحكومة ..... كلنا عارفين أن فيه تعذيب فى السجون و اهدار للآدمية .... بس ده ما يدينيش الحق أنى أدعيه لو ما حصلش ليا أو قدامى

احنا فى أول يوم حبس فى حجز القسم بلاعة مجارى اتسدت و طفحت و بعديها بعتوا واحد مسجون عشان يصلحها و فوجئت أن اتكتب فى الجرايد أنهم بيعذبونا بالمجارى .... و كل اللى كانوا معايا فى الحبس عارفين أن ده كدب

كان ممكن نقول أن اجبار مسجون على تصليح المجارى بالشكل المهين اللى حصل ده انتهاك لحقه ... بس ادعاء البطولة بالكدب أمر فى منتهى السفالة

خامسا : لا يكلف الله نفسا الا وسعها ... لو أى حد من الرجالة الأشاوس اللى بيشتم على اسراء و بيتهمها بالتخاذل اتعرض للضغوط اللى اتعرضت ليها من أهلها و كان اتحبس لوحده و المحامين بتوعه طلبوا منه أنه يقول كدة عشان يخرج مكانش حد حيرفض ده غير قلة قليلة زى مثلا ضياء الصاوى و ده لأنه حد اسلامى داخل يجاهد فى سبيل الله و مجرب الحبس و الاعتقال ميت مرة قبل كدة

سادسا : زى ما قلتى بالضبط يا حفصة ... مفيش اهانة أكبر من حبس الحرية و ما ينفعش أنى أشكر الداخلية أنها ردت لى حقى اللى سلبته منى فى الأساس ... بس لازم الانسان اللى بيحترم نفسه يكون صادق مع نفسه و مع الناس اللى حواليه ... و ما يدعيش حاجة ما حصلتش عشان الناس ترضى عنه و تقول عليه بطل

الناس و الاعلام هما اللى عملوا اسراء بطلة غصب عنها - و لكل واحد غرضه الخاص - و هما اللى يتحملوا مسئولية رفضها للدور ده ...... ممكن تكون دى حاجة مقصودة من الحكومة زى ما قلتى ... خصوصا أن نادية كانت محبوسة بنفس تهمة اسراء و فى نفس الزنزانة و ما حدش نجمها عشان عارفين انها مش حتقول كلمة واحدة فى صالح الداخلية و مش بعيد لو طلعت فى التلفزيون أنها تشتم مبارك على الهوا و مش حيهمها حد

بس فى النهاية أتمنى بدل ما نقع فى نفس الخطأ و نخلى اسراء و تصرفاتها هى محور كلامنا و ننقدها أو ننجمِّها لازم نبتدى نفكر حنعمل ايه الفترة اللى جاية - فيه ناس لسة معتقلين و ناس لسة ما خدوش افراج - و فيه حاجات كتير ممكن تتعمل عشانهم و عشان مصر اللى شكلها على وشك الانهيار دلوقتى
Post a Comment