Monday, March 9, 2009

ليه أنا ليبرالى ؟


أنا ليه ليبرالى ؟

أنا ليبرالى لأن الليبرالية معناها الحرية و انا بعشق الحرية و اكتر حاجة أكرهها فى حياتى ان حد يحط قيود على أفكارى بأى اسم كان

أنا ليبرالى لأن الليبرالية معناها التسامح مع كل الآراء و أنا متسامح بطبعى و ان كانت الحياة علمتنى ان التسامح المطلق مع كل الآراء مستحيل لكن يظل التسامح واحد من اعظم و اجمل القيم اللى بتسعى ليها البشرية

أنا ليبرالى لأن الليبرالية مش أيديولوجيا .. مش نظرية عقيمة بتجبر الانسان أنه يغير طبيعته عشان يتماشى معاها و بتكون نتيجة أى أيديولوجيا دايما الفشل فى الاستمرار لأن طبيعة الانسان واحدة فى كل مكان و زمان و لو غيرها لمدة معينة عشان خاطر نظرية معينة طبيعته بتغلبه و النظرية بتسقط لوحدها

الليبرالية بتقبل الانسان زى هو بعيوبه و مش بتطلب منه يتغير علشانها

أنا ليبرالى لأنى مواطن مصرى بعشق مصر و شايف أن كل دول العالم اتقدمت و اترقت بالديمقراطية و بحرية الرأى و التعبير و بحكم دولة القانون اللى هى جوهر الليبرالية

أنا ليبرالى لأن عندى أفكار عن العدل (بيسموها اشتراكية) و أفكار عن الأخلاق ( بيسموها اسلامية) و أفكار عن الحرية و التقدم و حرية السوق (بيسموها رأسمالية) و أفكار عن الانسانية (بيسموها عولمة)

و مع ذلك كونى ليبرالى مش بحس أنى مطالب أنى أتخلى عن أى جزء من افكارى ... بالعكس كونى ليبرالى بيحتم عليا أهضم كل الأفكار و أطورها و أخرج كل يوم و كل دقيقة بأفكار جديدة و حلول جديدة طازة تستفيد من كل الانتاج البشرى فى مجال الفكر و فى مجال السياسة و فى مجال الاقتصاد - زى النحلة لما تمتص الرحيق و تطلع منه عسل - من غير ما أبقى مضطر لاقصاء أى فكر لمخالفته للنظرية

أنا ليبرالى لأن كل الأفكار و الاتجاهات و الكتابات اللى ساهمت فى تطوير المجتمع المصرى و خلت له الريادة الثقافية و الحضارية كلها كان مصادرها عقول مستنيرة خلعت سلطة التخلف عن ضمايرها و تحررت من قيود الماضى و الخرافات فى زمن يوصف بأنه العصر الليبرالى المصرى

أنا ليبرالى لأن الليبرالية خرجت لنا مفكرين زى نجيب محفوظ و قاسم أمين و محمد عبده و احمد لطفى السيد و سعد الدين ابراهيم و وائل نوارة و سياسيين زى سعد زغلول و مصطفى النحاس و أيمن نور و رجال اقتصاد زى طلعت حرب و عثمان احمد عثمان و بتقدم لنا فى الوقت الحاضر و فى المستقبل - و هو ده الأهم - شباب ناشطين زى أحمد سميح و أحمد ماهر و أحمد نصار و بلال دياب و يوسف محمد و محمود صابر و محمدوأحمد عيد و مايكل نبيل و اسراء عبد الفاتح و مريم مراد و غيرهم و غيرهم كتير ليهم بصمة واضحة فى تغيير و تطوير الوضع فى مصر للأفضل

الخلاصة : أنا ليبرالى عشان بعشق الحرية و بعشق مصر و بعشق الانسانية

No comments: