مرشح الثورة - عبد المنعم أبوالفتوح

لو عاوز مشروع ثوري يجمع المختلفين فكريا وعقائديا زى ما الميدان جمعنا - لو عاوز الثورة تبقى جزء من الارادة الشعبية مش خاضعة لإرادة النخبة المنعزلة على تويتر والفضائيات - لو عاوز الثورة يبقى ليها كيان شرعي بيعبر عنها بعد أكتر من سنة من التشرذم والخلاف غير البناء - لو عاوز الثورة تمشي في المسار السياسي اللي الشعب أرتضاه بحكم المنطق والظروف والطبيعة البشرية --- ماتنتخبش أبو الفتوح ما تستناش لحد يوم التصويت -- أشتغل في حملته وحولها من حملة انتخابية لمرشح رئاسي لحملة شعبية لبناء وطن متقدم وحر وعصري -- ما تستناش لحد يوم الانتخابات وخد المبادرة من دلوقتي وأعلن دعمك لأبو الفتوح ودعمك للتوافق الوطني والثوري

الرد المتين على حجة المادة 89

فيه ناس بيقولوا انهم مش حيشاركوا في انتخابات الرئاسة الجاية بسبب المادة تسعة وتمانين ... تسأل ببراءة ايه المادة تسعة وتممانين يقولوا دي مادة بتدي حصانة لقرارات اللجنة العيا للانتخبات بحيث انها لو زورت النتيجة لا يجوز الطعن عليها 

مش حسألك لو المادة اتعدلت حتشارك ولا لأ لإني عارف من الاول انها غالبا حجة بتقولها عشان تبرر عدم مشاركتك  .. طب عرفت منين انها حجة؟

حقوللك بعدين

المهم دلوقتي خلينا ماشيين مع المادة 89 ... هل انت متوقع ان لو الانتخابات حصل فيها تزوير - وركز على كلمة تزوير مش تجاوزات - تزوير يعني الناس تختار شخص نلاقي النتيجة رايحة لشخص تاني

هل لو ده حصل والناس أنتخبت مثلا حازم أبو اسماعيل أو عبد المنعم ابو الفتوح او حتى أحمد بدوي بأغلبية الأصوات

والنتيجة طلعت لصالح واحد تاني - غالبا الحد اللي المجلس عاوزه حسب الاتفاق بين الاخوان والمجلس

هل تفتكر ان الطعن حيغير حاجة ؟؟

ييعني افرض المادة 89 مش موجودة وقرارات اللجنة مش محصنة ورحت تطعن على النتيجة... هل اللي زور ارادة ملايين الناس حيبقى صعب عليه يخلي الطعن ميتقبلش؟

طيب تخيل لو المادة موجودة متعدلتش ... واحنا انتخبنا فلان وسقطوه بالتزوير ... هل متوقع ان الشعب المصري يفضل ساكت .. يعني انا حختار فلان اللي وقفت معاه شهرين وسمعته وقررت انه يبقى رئيس مصر وألاقيه يسقط بالتزوير واتفرج عادي كدة واروح البيت ؟؟ طيب هو نفسه حيسكت ؟؟ ولا حيعلن ان حصل تزوير ؟؟ طيب لو أعلن انه حصل تزوير هل الناس حتقف معاه ضد التزوير ولا حيسيبوه ويمشوا؟

تخيل لو الرئيس اللي أخد ثقة المصريين لكن اتزورت ضده الانتخابات طلع أعلن ده في مؤتمر صحفي ... هل المصريين اللي صوتوله مش حيقدروا ينزلوا التحرير ؟؟ هل مش حيبقى ساعتها بداية الثورة من اول وجديد لكن بقيادة شرعية منتخبة ؟

الخلاصة  (1) المادة لو موجودة مش حتمنع الناس من اختيار اللي يتفقوا عليه ولو مش موجودة مش حتفرق حاجة لإن اللي حيقبل الطعن هو نفس الجهة اللي زورت الانتخابات .. ولو كانت المواد القانونية بتحمي شرعية كان زماننا بنستعد لجمال مبارك رئيسا

طيب حتعرف منين ان حيبقى فيه تزوير؟ .. حضرتك احنا - المصريين - الناخبين والمرشحين حنبقى متابعين العملية الانتخابية في كل لحظة .. كل مرشح حيبقى له مندوبين في كل لجنة وليه أنصار في كل مكان وحيبقى معروف مين صوت لمين بنسبة كبيرة

أى لعب في الأصوات حيبان خصوصا اننا بنتكلم في خمسين مليون صوت تقريبا .. لو حد عاوز ينجح مرشح خسران مش حيزور صندوق ولا لجنة .. ده لازم يعمل تزوير كبير جدا عشان يقدر يعدل النتيجة والتزوير الكبير حيجبره يتفضح

الخلاصة (2) لو ماشاركناش في الانتخابات حينجحوا اللي عاوزينه ومش حيحتاجوا تزوير أصلا ولو زوروا حنقف لهم في الميدان مش في طابور الطعون... ولو نزلت وشاركت وطلعت انتخابات نزيهة يبقى نجحنا مهما كان المرشح الكسبان .. كون ان مرشحك بيقول عيلتي اولى بيا وبيخاف يدخل في مواجهات فده مش مبرر انك تسيب البلد في لحظة مفصلية زي دي

انزل وماتتلككش وانتخب ابو الفتوح

ليبراليين مع أبو الفتوح

مين أحمد بدوي؟ مرشحكم للرئاسة رمز المسخرة

في هوجة أن كل واحد يرشح نفسه للرئاسة أو حتى يرشح واحد صاحبه فكرت أنا ليه أنا كمان مرشحش نفسي؟ أنا مش أقل من كل اللي نازلين الإنتخابات ,,, وعشان الناس لسة مش عارفينني كويس فأنا عملت النوت دي عشان التمانين مليون مصري يشوفوها ويرشحوني للرئاسة

مين أحمد بدوي؟ ,,,, مواطن مصري

مين احمد بدوي؟ شخص مش معروف ،، فأكيد متمسكش في قضايا مخلة بالآداب قبل كدة

مين أحمد بدوي؟ فيه ناس بيقولوا سنه لسة مكملش ٤٠ سنة ومش حينفع يترشح ،، مش مهم ،، احنا معملناش ثورة عشان يبقى فيه مستحيلات ... ادعم احمد بدوي وملكش دعوة بالحاجات الصغيرة دي

مين أحمد بدوي؟ حول خمسة جنيه على رقم تليفونه وأنا أقول لك

مين أحمد بدوي؟ حد له صحاب كتير ولو كل واحد استجدع معاه ولمينا من بعض ممكن يشتري العربية اللي طول عمره نفسه يشتريها

مين أحمد بدوي؟ سافر عشرة حداشر دول وده معناه أن علاقاته الخارجية متشعبة وله تقل دولي

مين أحمد بدوي؟ حل السودوكو كتير أوي وأكيد لو محبين السودوكو كلهم صوتوله حيبقى عنده فرصة

مين أحمد بدوي ؟ طلع مع ماما نجوى في التلفزيون وهو صغير وأكيد كل اللي شاف الحلقة حيدوله أصواتهم (محصلش لكن لزوم الدعاية)

مين أحمد بدوي؟ مش معنى انك متعرفوش أنك مش حتديله صوتك ،، عادي محدش عرف اوباما غير بعد مانجح

 طبعا بعد نشر التعريفات السريعة دي لقينا تأييد دولي ومحلي كبير لترشيح أحمد بدوي للرئاسة

@sarah_elaasser
أيوة وأنا كلمت البواب بتاعنا وقال انه مقتنع بأحمد بدوي ... الثورة مستمرة

 @Jouadel
أنا لسة راجع من عند الحلاق ولما شاف قصة شعرك أقتنع بيك وحلف هينتخبك يا بدوى هوه وكل زمايلة الحلاقين 
 

@SamirX_
مين احمد بدوي .. واحد كان بيشرب معانا سحلب ع القهوه من نص ساعه

@Roxyman77
النهارده في مترو الإنفاق اقنعت سواق المترو انه يديك صوته ويديني انا ابونيه

@mohamedessam09
احمد بدوي واحد من الشعب ويعرف كبايه السحلب بكام ننتخبه ليه لأ

@AhHsn
بدوى مننا و حاسس بهمنا بياكل من عربيات الفول و بيشرب بيرة مضروبة .. انتخب بدوى من اجل وضع البيرة على التموين

خبر عاجل : وفاة أحد الناخبين بالأزمة القلبية في أحد اللجان الإنتخابية بعد أن فوجئ بعدم وجود اسم أحمدي بدوي في ورق التصويت بعد أن أمضى العديد من الليالي في دعوة الناخبين لإختياره

================

ملحوظة : الموضوع يقصد به وبشكل واضح السخرية من الموقف السياسي لبعض الأصدقاء الأعزاء الذين قد يظنون أن الوقت هو وقت مناسب للهزل وخوض التجارب الفاشلة التي لا أرى فيها سوى مساهمة في المجهود المحموم الذي يقوم به أعضاء النظام السابق للعودة إلى مقاعدهم في السلطة بأى شكل بينما يتفرق مجهود الشباب الثوري بين أسماء كثيرة يخفض بعضها فرص بعض لصالح مرشحين الفلول

أحب أن أشدد على أن السخرية ليست تجريح ولا سباب .. السخرية وسيلة من أهم وسائل التعبير عن الرأى - خاصة في مجال العمل السياسي .. وأن استخدامها يهدف للفت النظر بشكل صارخ وصادم كما أحب أن اعتذر لكل من شعر بإهانة غير مقصودة بسبب المكتوب

جولة في بعض العقليات الثورية

الأيام اللي فاتت قابلت على تويتر بعض العقليات الثورية الجبارة اللي لما تسمع كلامها تقول ان لا الجيش ولا الأخوان هما اللي حموا الثورة .. ربنا هو اللي حمى الثورة لأننا لو كنا أعتمدنا على الثورجية في قيادة الثورة او الميدان كان زمان مبارك بيكرم شهداء الشرطة في 25 يناير

هنا انا بسجل بعض الآراء اللي سمعتها ... مش بغير مضمون الكلام لكن بشيل منه الديباجات والتفخيمات وبعرضه عريان 
 

ثوري 1 : أنا ضد حكم العسكر ومادام العسكر ليهم مرشح فأنا مش حقف ضد مرشح العسكر عشان أنا عاوز أسقط حكم العسكر بس الثورة مينفعش تشتغل سياسة

ثوري 2 : أنا ضد حكم العسكر ، العسكر موتوا أخواتي ، أنا حأيد مرشح ضعيف عشان مرشح العسكر يكسب بسهولة ، دي مؤامرة عليا على فكرة لإن مش معنى ان مرشحي محدش يعرفه انه ضروري يسقط .. هو أكيد سقط بسبب المؤامرة

ثوري 3 : أنا ضد حكم العسكر، العسكر ليهم مرشح ، أنا مش حشتغل ضد مرشح العسكر لإن الانتخابات تمثيلية ، أنا حشتغل على المحليات . هي المحليات مش انتخابات ومش تحت حكم العسكر؟ لأ اصل البرادعي انسحب ... آه قول كدة بقى

 ثوري 4 : أناضد حكم العسكر وثائر ودمي فاير وبشتم وبتضرب بالخرطوش، لكن مش ضروري أسقط مرشح العسكر .. اصل لما يبقى مرشح من بتوع مبارك أحسن ما يكون مرشح اسلامي .. خلينا نركز على الانتخابات ال بعديها

ثوري 5 : أنا ضد حكم العسكر، بهري نفسي برقيات لدعم زياد العليمي، وبهتف ضد بديع اللي باع الثورة ، حتقف ضد مرشح العسكر؟ ............ إيه؟؟؟ 

ثوري 6 : الأخوان باعوا الثوراااااة ،، خيااااناااة مؤامرااااات ، الثورة بتضييييع ،، طيب العسكر ليهم مرشح حتعمل معاه إيه؟ ,, ألو؟ ألو ؟،، الخط قطع!

ثوري 7 : أنتو شعب رعاع أساسا ماتستهلوش المرشح الفشيخ بتاعنا لإن لو انتو محترمين كنتوا عرفتوه واللي حيتكلم حياخد بالجزمة يا كلاب

نشرة 2020

دي بعض من مقتطفات أخبار ممكن تتحقق وممكن متتحققش ... لكن أهم حاجة تفتكر أن تحققها أو عدم تحققها في المستقبل أنت مسئول عنه بتصرفاتك وإختياراتك انهاردة

قام اليوم السيد الرئيس الشيخ حازم أبا اسماعيل بإفتتاح أول مركز للعلاج ببول الإبل في الشرق الأوسط مع الشيخ زغلول النجار وزير البحث العلمي والصحة والثروة المعدنية

أعلن الدكتور محمد البرادعي انسحابه من انتخابات رئاسة الجمهورية للمرة السادسة نتيجة ظروفه الصحية

بعد عشرين عام من توليه السلطة السيد رئيس الوزراء يعلن عن قرب الإنتهاء من البرنامج الإنتخابي للسيد الرئيس خالد علي و نائبه جمال عيد يعلن أن مؤامرة سعودية تسببت في ذلك التأخير البسيط

المجلس العسكري يعلن عن اضطراره لمد الفترة الإنتقالية لست شهور فقط بعد وفاة الرئيس التوافقي الثالث في ظروف غامضة

 السيد الرئيس أحمد شفشق يعلن عن وصول ٥٠‏ طن من البونبون ماركة هوولز لتوزيعها على الثوار الشرفاء في القاهرة الجديدة

عاجل جدا :‏ الإشتباه في إصابة الرئيس مبارك بالإكتئاب نظرا لوفاة القاضي وفريد الديب والعادلي وبقية المتهمين والشهود بالشيخوخة

السيد الرئيس أحمد شفيق يفتتح معرض بلوفرات حريمي بمبى مسخسخ في حضور المشير طنطاوي

السيد الرئيس أحمد شفيق يعلن تنازله عن السلطة وتفويض سيدة مصر الأولى فايزة أبو النجا في تسيير شئون البلاد بالنيابة عن سيادته بعد احتجاجات عاتية في ميدان التحرير

عاجل :‏ اشتباكات بالأيدى بين العاملين في قسم الطرف التالت والعاملين في قسم الملثمين بعد أنباء عن عدم صرف العلاوة السنوية

عاجل وخطير :‏ تفجير خط الغاز للمرة الثالثة بعد المائة ‏،،‏ والقناة الأولى تستضيف أحد الملثمين في الذكرى الأولى للتفجيرات

لجنة رعاية الشهداء والمصابين تدرس بدء صرف تعويضات شهداء موقعة التجمع الخامس وموقعة طريق مصر اسكندرية وتعويضات مفقودين مظاهرات الوادي الجديد قريبا

الدكتور محمد البرادعي في حوار ينشر لأول مرة :‏ الدستور أولا

الأهرام في حوار حصري : الطرف التالت يعلن أعتزاله وتسليم الراية للطرف الرابع والخامس

دفاع الرئيس السابق عمرو موسى يعرض تسليم حساباته السرية بسويسرا مقابل الإفراج الصحي عنه

عائلة أحمد شفيق تنفي الأنباء التي تناقلتها مواقع الإنترنت عن تعرضه لحادثة إغتصاب في زنزانته في طرة وتؤكد أنه مسجون شريف ولايعطل أبدا عجلة الإنتاج

في خطاب ألقاه من شرفة قصر عابدين أمام الآلاف من مؤيديه السيد الرئيس خيرت الشاطر يعلن أن الدعوات للخروج إلى الشوارع وتعطيل المرور سوف تقابل بمنتهى الحزم والشدة بما لا يخالف شرع الله

أحمد موسى يكتب للحرية والعدالة:‏ وثائق تدين التنظيم الشيوعي المصري بمحاولة انقلاب عسكري

السيد الرئيس عمرو موسى يكرم اليوم الدفعة الأخيرة من الضباط الأبطال الذين بذلوا الغالي والنفيس للدفاع عن مواقعهم الشرطية ضد المخربين والقتلة ابان أحداث ٢٥‏ يناير ‏2011

 الشيخ محمد أبوحامد يشهر اسلامه على يد الشيخ خيري رمضان

المنتج أبو حفصة السبكي يفتتح العرض الأول لفيلم "حسن و بس" ‏،،‏ والذي يحكي عن قصة اضطهاد شاب سلفي فقير على يد أحد قيادات جماعة الأخوان الحاكمة

السيد الرئيس عصام العريان يطاب رسميا من مجلس الأمن القومي - الذي يرأسه السيد المشير الرويني- بالسماح له للسفر لزيارة أحفاده في الولايات المتحدة

السيد الرئيس عمرو موسى يرد على ماتردد عن أعتقال عدد من رموز المعارضة قائلا : مش كل حاجة في البلد حقعد أفصصها، ياراجل كبر مخك

السيد الرئيس عمرو موسى يفتتح مستشفى الشهيد صفوت الشريف الدولي

ونختم بالخبر الذي أنتظرناه لسنوات : وقف اليوم فضيلة الشيخ الرئيس حازم أبا اسماعيل في مطار قاهرة المعز الدولي مودعا آخر أسرة نصرانية تغادر البلاد بعد رحيلهم بالتراضي عن أرض الإسلام

يحدث في مصر فقط

في مصر فقط يخرج 500 شخص في مظاهرة فيعتبروا نفسهم الثورة ويتكلموا بإسم الشعب واللي يخالفهم يبقى بيخالف الإرادة الشعبية

 في مصر فقط يجمع شخص مشهور خمسين شخص من أصدقائه في ميدان التحرير ليعلن عن حكومة إنقاذ وطني خاصة به

في مصر فقط يقعد عشر أصحاب على القهوة يقرروا يعملوا حزب ويقعد خمسة يقرروا يرشحوا واحد منهم للرئاسة

في مصر فقط يطلع شخص غير معروف في التلفزيون مرتين تلاقي كل الناس بتطالب بأنه يبقى رئيس جمهورية

في مصر فقط تجد ملايين الأفراد من الجنسين فوق التلاتين سنة بدون الدخول في علاقات عاطفية بسبب العادات والتقاليد والدين

في مصر يسعى ملايين الأفراد للزواج فقط من أجل ممارسة الجنس بدلا من العادة السرية

 في مصر فقط بنلم فلوس للحكومة لكن مش بنحاسب الحكومة بتصرف الفلوس في إيه ده الانجليز أخترعوا البرلمان عشان يراقبوا انفاق الضرايب يا ظلمة

في مصر فقط يحب الإنسان مجال فيدرس مجال آخر لا يحبه ويعمل في مجال ثالث لايحبه ولم يقم بدراسته

في مصر فقط حياتنا العاطفية عشوائية وحياتنا العملية عشوائية وحياتنا الصحية عشوائية ثم تواتينا الجرأة للحديث عن مؤامرات خارجية!

 في مصر فقط يكون شخص كمصطفى بكري مستشار سياسي لرأس الدولة وشخص كتوفيق عكاشة الإعلامي المفضل للنظام وأشخاص كنوارة نجم وأحمد دومة هم العقول المفكرة للثورة