Sunday, May 25, 2014

مصر : جواب نهائي

مصر : جواب نهائي

قررت بعد تفكير وتردد كبير المخاطرة بالرجوع لمصر
ان شاء الله مش حيحصل حاجة وحعدي من المطار عادي

لكن لو لا قدر الله تم القبض عليا فحبقى متوقع منكم انكم تبقوا جدعان معايا ومتسيبونيش أروح فطيس

أنا مجرب السجن قبل كدة وبقول لكم ان كل يوم بيعدي على المسجون ظلم بيبقى عذاب واذلال ملوش حدود وفي نفس الوقت خطوة للحرية ،، وأنا محبوس في سجن المرج في ٢٠٠٨ كنت كل يوم بتخيل ان الثورة قامت وان الناس جايين يخرجونا من السجن ، ولما ده محصلش فهمت أن لسة شوية كمان

أنا محكوم عليا بسبب رفضي للقبض على الرافضين لدستور السيسي رغم اني كنت - وياللسخرية - حصوت بنعم لو لم يتم القبض عليا وحجزي في القسم

لو شرطة السيسي قبضت عليا فحبقى مستني منكم حملة للدفاع عني بصفتي أخوكم ، زميلكم ، صاحبكم ، مواطن مصري حلم بمصر حرة وعادلة وكريمة وبيكافح عشان يخلي حلمه حقيقة ،،، انسى اني ناشط سياسي وانسى اختلافاتنا في الرأى وأفتكر بس أن جريمتي هى الدفاع عن حقك في التعبير عن رأيك وحق المصريين في دستور بيعبر عنهم وعن احلامهم

راجع مصر عشان الناس اللي ملاها اليأس والاستسلام تشوف أن لسة الثورة منتهتش وان كلمة الحق بتقوي وأن الاستسلام لغير الله كفر

السويد جميلة مفيش كلام ،،، مصر خربانة مفيش كلام ،،، لكن مصر بلدنا مهما كان العالم جميل فمسئوليتنا نخليها أجمل ،، وتحمل المسئولية له تبعاته اللي لازم ندفعها عن طيب خاطر عشان مستقبلنا ومستقبل ولادنا

راجع وعارف أن معظم الناس شايفينني مجنون بس بدعي من قلبي ان حتى اللي شايفينني مجنون يتحركوا عشان يرفضوا ان واحد بيحب بلده بجنون يتبهدل وهما ساكتين

احتمال مايتقبضش عليا ولا أتحبس ، ساعتها البوست ده حيبقى كلام حلو نفتكره ونضحك عليه ،،، بس لحد ماده يحصل عاوزكم تفكروا في كل كلمة فيه وتفكروا ازاى الثورة ممكن تنجح وتغير البلد واحنا كلنا بنفكر نهرب من المواجهة ونستسلم للاستبداد

لا استسلام ، الديمقراطية حقنا كلنا وحنستمر في الكفاح عشانها داخل أو خارج السجن ،، في حكم مبارك أو مرسي أو السيسي ، كفاحنا مستمر وحنوصل سوا في النهاية

No comments: