Wednesday, August 29, 2007

زهقانة طهقانة

من نفسي زهقانه
ومن الدنيا قرفانه
عندي حاله ملل ونفسيتي تعبانه
دايما بكلم في نفسي وبليل سهرانه
حتى نجوم السما من عدها بقيت خبلانه
هموم الدنيا شايله وفي دماغي اردغانه
مش لاقيه حاجه اعملها ولا اي شغلانه
تعبت من التفكير دماغي خلاص بقت خرفانه
طب احكي لماما ؟ مش هتبقى لدماغي فهمانه
هتقوللي انتي احسن من غيرك روحي روقي الشقه واشغلي نفسك باي شغلانه
طب احكي لاختي هتسبقني وتقوللي انا خلاص بقيت طهقانه
من جوزي للبت لحماتي وياختي شقيانه
هتشيلني هم على همي وانا مش ناقصه بالامانه
احكي لصحبتي بس هي بنقوللي نصايح مش بقبلها احيانا
وبعدين حرام ليه اشيلها همي هي يعني ناقصه الحكاوي بتاعتي الخرفانه
اطب احكي لمين اللي جوايا انا بجد حيرانه
قلبي واجعني واعصابي فلتانه
اروح لدكتور نفسي يمكن يديني روشته واصرفها من الاجزخانه
انا اصلي مش نفسيا بس تعبانه نفسيا بوظلي عضويا وبقيت خلاص خلصانه
انا دايما بسمع وبس وده طبع فيه وعمري منه مكنت زهقانه
مش بحب الكلام بس كل حد وليه طاقه لازم يفضيها لما تبقى مليانه
نفسي اتكلم وبس بقول يمكن ده يريحني ويظبط النفسيه الهمدانه
اه يا ربي نفسي اموت بس يا ترى الموت هيخليني فرحانه ؟
معملتش حاجه اقابله بيها ولا تتحطلي يوم القيامه في الميزانه
مش جايز اللي انا فيه ده علشان بعدت عن ربنا اوي وحتى الصلا بتكون وانا سرحانه؟
بس هو كبيييييير اوي وانا فيه عشمانه
ليه ادور على غيره احكيله وهو اقربلي من وريدي هو قال كده في قرآنه
اكيد لما الجأ له مش هكون كده زهقانه
وهدعيله واقول يا رب اهديلي نفسي وريح كل اللي نفسيته تعبااااااانه
من قلبي والله ... والله بالامانه
أسدق متسدقش

6 comments:

Unknown said...

دمك خفيف موووووووت يا أسدق :)

Unknown said...

ده الكلام ده حاسة انه عنى

مصطفى محمود said...

ممممممم


مش مسدق حاجة

اية يعم مش فاهم

Unknown said...

يابنى مش أنا اللى كاتب البوست ده ... دى صديقة عزيزة و مش عاوزة تكتب اسمها

Anonymous said...

تسدق ان انا حاسه ان القصيده دي مصدر نحس للمكان
من يوم ما حطيتها وانت محتطش حاجه جديده عالاقل علشان تخفيها بيها اخفيها باه انا مش مسؤوووووله عدد الزوار بيقل سدقني
اخفيها باه

Unknown said...

يابنتى أنا اللى بقيت بروح الشغل الساعة تسعة أرجع ستة و مش بيبقى عندى طاقة أكتب حاجة

طب تصدقى؟ - بالصاد - أنى كتبت موضوع كبير و مهم و فيه حاجات عملية ممكن لو حد اقتنع بيها ينفذها
بس كتبته على الورق و مش جايلى نفس انقله تانى هنا

أكتبى أنتى بقى بدالى لحد ما اتعود على نظام الشغل