Friday, June 13, 2008

الطبيعى

عارف لما تفضل تدور على حاجة طول عمرك ؟؟ و تفضل تحلم بيها ليل ونهار ؟؟ و تدعى ربنا أنك تلاقيها ؟؟

تخيل بقى لما تلاقيها قدامك زى ما اتمنيتها بالضبط .. فى الوقت اللى يناسبك بالضبط ... بس تخيل بقى لما تلاقى بينك و بينها حاجز ....... حاجز خفى ....... يخليك عاجز و مشلول أنك توصل لها ........

عارف لما تسمع كلمة تبقى فى بقك و تقسم لغيرك ؟؟ ..... اهو لما تضيع منك من غير ما حتى تقسم لغيرك بتبقى أصعب قوى ....

و عارف لما تبقى متأكد أن الحاجة دى و الاحساس ده مش ممكن يتكرر تانى ؟؟ و أنك لو سبته يضيع فأنت حتضيع معاه بس لازم تسيبه ؟؟

لما تحس ان الكون ضدك فى اللحظة دى مش بيبقى فيه مفر غير أنك تخضع للطبيعة ... تركع قدام القدر و تبكى من غير دموع ........ لما تقرر أنك ما تبكيش و أنك تعمل نفسك مش موجوع بيبقى وضع غريب

لما تتأكد أن نصيبك مش انت اللى بتحدده فتقرر أنك تنفض لنفسك و تعمل أنك مش بتحس بحاجة و أن مفيش حاجة فارقة معاك

العمر طويل زى ما بيقولوا دايما ..... الوجع جوة القلب بيقصره .... خلى وجعك فى قلبك عشان اصلا طولة العمر مش ظريفة ....... اعمل نفسك مطنش و أنت حتلاقى مش نفسك فى حاجة ابدا

عيش جوة التابوت بدل ما تقابل أمل تانى و ألم تانى بعده ....... خليك عادى عشان وجعك يبقى عادى ... عشان كل ما بتحس أكتر وجعك بيزيد اكتر

خليك طبيعى ........ مش انا قلت قبل كدة أن أمنية حياتى ابقى طبيعى ؟؟

No comments: