نكتة أمير الجمعة

في زيارة عائلية لأحدي قري بني سويف صادفت يوم الجمعة
قرر صديقي الشاب أحمد رفعت خريج التعليم الأزهري أن يحضر خطبة الجمعة في أحد مساجد القرية

تحدث امام المسجد ذو اللحية الكثيفة عن غزوة أحد

و هي الغزوة التي اختلف في روايتها الرواة و في تعلم دروسها المسلمون
حيث أجزم البعض أنها كانت هزيمة ثقيلة للمسلمين بسبب تناسيهم لأوامر النبي و عصيانها
بينما ذهب البعض الآخر الي أنها بدأت بهزيمة و انتهت بنصر للرسول

و لكن كان لامام المسجد الخطيب ذو اللحية العظيمة رأي آخر يعد اجتهادا غير مسبوق

حيث روي في حماس كيف أنه عندما لاحت بوادر الهزيمة فأن النبي وقف وسط ميدان المعركة صارخا : " عنترة .. أين أنت يا عنترة؟" ثم أكمل بعنترية و تقمص أكبر " و فجأة قام عنترة بن شداد من الموت منفضا التراب عن ملابسه و مشهرا سيفه البتار ليعمل التقتيل في رقاب الكفار و يردهم علي أعقابهم مدحورين

و بينما امتلأ المسجد بصيحات التكبير و التهليل كان صديقي يهرش في رأسه في بلاهة و هذا لأنه بحكم ما درسه في المرحلة الاعدادية كان يعلم أن هذا المشهد من أفلام الزومبي لم يرد في أي رواية عن النبي أو عن الصحابة

و هنا مال صديقي علي مجاوره في المسجد و سأل فى براءة :" هو مش عنترة ده مات من قبل النبوة بزمان ؟"

وقد كان الرد المفحم الصارم مع تقطيب الجبين و الاستنكار :" اسكت يا حمار .. أنت حتعرف أكتر من الأمير؟"

=================

نكت سابقة .. اضحك و ادعيلى


اضحك فى سجن المرج
http://www.facebook.com/note.php?note_id=18675388033

الحرب على مقدساتنا \ الاعجاز فى الفلتر
http://www.facebook.com/note.php?note_id=31527243033

Why "Electricity" isn't mentioned in Qur'an?
http://www.facebook.com/note.php?note_id=31591383033

كوميديا سحرية فى السعودية
http://www.facebook.com/note.php?note_id=38701518033

اضحك مع الحاج داروين الشيعى
http://www.facebook.com/note.php?note_id=55946728033

دارى جمالك دارى
http://www.facebook.com/note.php?note_id=59668133033

ملف المستقبل فى واقعنا المعاصر
http://www.facebook.com/note.php?note_id=64964148033

و انه ليبعث منتصبا
http://www.facebook.com/note.php?note_id=70332023033

احنا اللى صهيننا ع الصهاينة
http://www.facebook.com/note.php?note_id=72506883033

عناوين الأخبار بعد خطاب أوباما بن لادن
http://www.facebook.com/note.php?note_id=83902663033

*******
لسهولة التواصل أرجو الانضمام للجروب
http://www.facebook.com/groups.php?id=512682065&gv=12#/group.php?gid=19793548417

رب عاهرة

هل يستحق الحب تضحية ؟
لا
و لكن المحبوب يستحق ألف تضحية

=======

رب عاهرة أشرف من ألف عذراء و ألف ألف حاكم عربى

=======

هل يكون الوقوع فى الخطيئة - حقا - خطأ ؟

ملحوظة للتوضيح .:. القول بدوران الأرض حول الشمس كان خطيئة لفترة بسيطة مضت
فهل قولنا هذا الآن يعد خطأ ؟

احذر أخى المواطن .. فالعلمانية فيها سم قاتل

أخى الفاض\شل أختى الفاض\شلة
أما بعد .. فهذا بيان للناس حتى لا يقعوا فى شراك العلمانية الكافرة الفاجرة المنحلة الصهيونية الشيوعية الليبرالية ... الخ

اذا كنت يا أخى الفاضل توافق على الحياة و المساهمة فى كيان دولة تساوى فى قوانينها بين جميع مواطنيها دون تمييز على أساس العقيدة أو الطائفة و لا فضل فيها لمواطن على مواطن الا بتقوى القانون فأنت فى خطر الوقوع فى شرك تأييد الدولة العلمانية

و اذا كنت تؤمن بأن المناصب فى الدولة - أى منصب - ليس حكرا على أهل دين بعينهم وانما يصل اليها الانسان بعلمه و اجتهاده و تخصصه أو باختيار الناس له دون التفتيش فى ضميره و عقيدته أو جنسه فأنت فى خطر الوقوف فى صف الدولة العلمانية

و اما اذا كنت تؤمن بأن المؤسسات الدينية يجب أن تكون مستقلة تماما عن الدولة ولا سلطان للسياسيين عليها فوجب عليك الحذر فهذه من الصفات الخبيثة للعلمانيين و من والاهم

و اذا كنت تؤمن بأن قوانين و دستور الدولة - أى دولة - يجب أن يتماشى مع المواثيق الدولية لحقوق الانسان فأنت فى غفلة و يجب عليك الحذر فهذه المواثيق تقيد حق الدولة فى التعذيب و التنكيل بمواطنيها ( فلا حد زنا فى مثل هاته الدولة ولا يحزنون )

و اذا صدقت يا مسكين أن الدولة لا شأن لها بمراقبة الأفراد لتتأكد من قيامهم بفروض دينهم و أن الدولة لا حق لها فى فرض سلوك معين على مواطنيها فأنت من أهل العلمانية لا محالة

و اذا آمنت - لا سمح الله - بوجوب اطلاق حرية الابداع و الفن و بأهمية رفع يد الدولة عن حرية الرأى و التعبير و الاعتقاد و التفكير و النقد و أيدت - و لو بقلبك - ألا تساند الدولة رأيا ضد رأى أو مذهب ضد مذهب فأنت آثم قلبك فانقذ نفسك قبل فوات الأوان يا جبان

وأن الاقتصاد يسأل فيه رجال الاقتصاد و أن الشأن العام ليس حكرا على أحد دون أحد أو أهل دين دون أهل دين أو حتى أهل "لادين" فأنت متورط حتى أذنيك فى مستنقع العلمانية الضالة المشلة

أما اذا آمنت بأن النظريات و التطبيقات العلمية ( آل يعنى عندنا علوم ولا تطبيقات ) يثبتها و ينفيها العلم عن طريق التحليل و التجربة و الخطأ و البرهان

و أما لو قلت بأن الطب و التاريخ و الجيولوجيا و الفلك و الهندسة و و ,, هى مجالات علمية متخصصة و ليس مجال البحث فيها هو النصوص المقدسة لأى دين فأنت قد تعديت على حق رجال الدين المقدس فى التحدث باسم الله فى كل شئون الأرض و السماء و الفضاء و جيت على لقمة عيشهم .. روح يا شيخ منك لله .. حتروح من ربنا فين

أما لو آمنت بأن الله يرزق الجميع بدون أن يميًّز و يستجيب لدعاء الجميع بدون أن يفرق فأنت علمانى علمانى علمانى .. روح اتوضى و تعالى صلى لك ركعتين يمكن ربنا يهديك

عالم علمانيين بصحيح

لمتابعتنا على الفيس بوك
http://www.facebook.com/groups.php?id=512682065&gv=12#/group.php?gid=19793548417

هذا أنا .. هذا دينى

لا أدخن
لا أسكر
لا أمارس الحب دون حب
لا أخون
لا أكذب الا نادرا مضطرا
لا أؤذي غيري
لا أخاف
لا أتكبر
لا أتذلل
لا أؤمن بالمعجزات
لا أسرف
لا أبخل
لا أذل أو أذل
لا أخدع و أحاول كل جهدي ألا أبات مخدوعا
لا أسب الا مستحقا
لا أحترم متعصبا أو كاذبا أو منافقا
لا أحفظ نصا
لا أقدس سلفا
لا أعبد صنما
لا أؤله بشرا
لا أقنع باجابة معلبة محفوظة محنطة

أساعد من أستطيع
أطارد الحكمة ما حييت
أعلم الجاهلين و أحتقر المتجاهلين
أحن علي من يحتاج حناني فحضني دافئ
أعرض عن المتأدلجين و المصلحجيين
أتسامح مع المغيبين
أفرح بالمحبين
أطرب للطرب
أهفو للبراءة
أحترم الانسان
أحب المرأة
أكره الظلم و الجهل و الكبت والخوف
أعشق العشق و الحرية
أتعطش للابداع
أقتحم ما بلغ عقلي من شواطئ الأسئلة

أغضب أخطأ أقسو أثور أبكي ابتسم أحب أكره أنسي أشتهي أمرض أموت أرحل ... أترك أثرا

أحمد بدوي
أعسطس 2009

الصادق المستنير في رفض مبارك الصغير

فرضا مرة قابلت واحد من اياهم
و قال لك : ده سرق و شبع و لو حد جه مكانه حيسرق من أول و جديد
قل له : اللي يتسعر في بيت أبوه عمره مايشبع من لحم اللي سحلهم و سرقهم و خصاهم أبوه و ان كانوا هما سكتوا لأبوه فأنت قول و ما تخافش .. خليك شجاع .. ملعون أبو الجبن لأبو أبوه

و اسأله : لو عصابة دخلت بيتك بالغصب و أنت سكت و سرقت فلوسك و أنت سكت و سكتك علي قفاك و أنت سكت .. تفتكر ممكن كدة من نفسهم من طيبة قلبهم يتوبوا فيزهدوا في بناتك و بالمرة أمهم ؟

ولو اتزنقوا في تمن سيجارة تعميرة أو قزازة بيرة تفتكر يا ساكت و فرحان بسكوتك أنهم حيرفضوا تقطيعك و بيع أعضاءك و كفنك و يوزعوا تمنها بالعدل بينهم كلهم ؟

لو قال لك : اللي نعرفه أحسن مالي منعرفوش
قل له : ده لا نعرفه ولا يعرفنا
لا شفناه بيكبر وسطنا ولا شاف تعبنا و قدر قيمة عرقنا
قل له ده لا نعرف تاريخه ولا حسابه ولا دينه ولامنطقه ولا لغاته ولا هو يعرف شكل مدارسنا ولاشهاداتنا

اسأله : هل ده عمره ركب تاكسي ولا تكتك ولا أتوبيس من أتوبيساتنا ؟
أو حتي عدي بالغلط علي محطة من محطاتنا؟ طب كان فيها ناس مالكحيانين ولا عساكر و ضبابيط و مخبرين مترصصين ؟
اسأله و السؤال أمانة يا شيخ أصلي اتمنعت مالسؤال .. هل عمره آمن لنا و ساب حراسته و مشي وسطنا و كأنه واحد مننا؟
هل عمره دخل قسم من بتوعه أبوه الي بيقولوا عليهم موجودين لأمننا ؟
يبقي منين نعرفه و منين يعرفنا ؟ ولا هي تلاقيح و بتتحدف علي جتتنا ؟

لو قال لك ده بتاع اصلاح و تنمية و تطوير
قل له أنت يا طور يا طرطور .. بقى بتصدق الكذبة بتاعة التطوير ؟؟ ياخى دحنا شربنا وأكلنا من الفسا .. د ده كتير

وهو اللي حيقف علي كتف حبيبه الفاسد اليمين و كتف مملوكه الضابط الشمال حتجيله الجرأة في يوم يقول للفاسد فسدت ليه أو يقول للضابط ضبطت حالك بإيه ؟
طب بأمارة ايه ؟ ده حتي يقع و مايلاقيش حد يسمي عليه

لو قال لك ده كبير و بن كبير وحيكسب من غير تزوير
قل له : طيب لما هو كبير و مش غاوي تزوير محتاج ليه صحفيين محاقير و لجنة طراطير و أمن مركزي شبه الصراصير ؟ لأ معلش أنت .. طير

طيب ما نشوفه مع نور في مناظرة و لا مع زويل في محاضرة و لا مع مني الشاذلي في محاورة ؟
ولا هو الموضوع حسب و نسب و عصير قصب ؟

لو لسة كان عنده كلام و بيقاوح قل له ما خلاص خلص الكلام من أول أول امبارح و دي مش أحلام .... مش
حيركبنا ابن أبو جمال و ده منى وعد .. منى أنا مش من أي حد

أحمد بدوى
20-8-2009

ذكرياتى عن يوم 6 أبريل

يوم 6 أبريل 2008 فرق فى حياة ناس كنير اوى فى مصر و من ضمنهم أنا
هنا ححاول أعمل أرشيف لكل ما له علاقة بيا و باليوم ده

*********************

كان أحمد ماهر قبلها طلب منى أشارك فى الدعوة للاضراب بس أنا رفضت على أساس أن القعدة فى البيت دى لعب عيال

بس اللى خلانى اتحمست للموضوع هو ولد أصغر منى ب 6 سنين و ملوش فى السياسة خالص صاحب أخويا جه سألنى فى صلاة الجمعة أنتم حتعملوا ايه فى 6 أبريل ؟ سألته هو فيه ايه فى 6 أبريل ؟؟؟ قال لى بيقولوا فيه اضراب كبير اوى و أنا عارف أنك بتاع سياسة فقلت أسألك

استغربت أن الموضوع مسمع للدرجة دى .. دخلت على الجروب و لقيت العدد ضخم جدا و الناس متحمسة أوى و أنا كمان اتحمست معاهم و ساعتها اتعرفت على أحمد نصار على أنه محامى من اسكندرية و ناشط أوى على الجروب و معرفتش أنه فى حزب الغد غير بعدين

المهم .. أول نوتة أكتبها عن الموضوع

حىَّ على الفَلاح .. حىَّ على الحرية
29 مارس 2008
http://www.facebook.com/note.php?note_id=10661148033

تانى نوتة .. كنت ناقلها من الجروب
الحقوه قبل ما يهرب
29 مارس 2008
http://www.facebook.com/note.php?note_id=10694208033

دى اللى كانت مسخرة بجد ..
من الشعب المصرى الى الأمن المصرى
29 مارس 2008
http://www.facebook.com/note.php?note_id=10724983033

فى النيابة يوم 6 أبريل مساءا

و دى نوتة بشتم فيها الليبراليين اللى وقفوا ضد الاضراب
الليبراليين اللى بجد
31 مارس 2008
http://www.facebook.com/note.php?note_id=10807748033

أقصر نوتة كتبتها فى حياتى
4 me 2 remember
Thursday, April 3, 2008 at 9:41am
u r not z center f z Universe & no 1 is

و دى حتة عاتشفية مش فاكر ايه اللى خلانى أكتبها قبل الاضراب بيومين
she
3 أبريل 2008
http://www.facebook.com/note.php?note_id=11097603033

أكِّلنا يا ريس
3 أبريل 2008
http://www.facebook.com/note.php?note_id=11107993033

تحليل لوذعى خزعبلى لموقف الاخوان اللى متوقعه من الاضراب
السياسة و اضراب بعد بكرة
4 أبريل 2008
http://www.facebook.com/note.php?note_id=11147038033

My Masterpiece
كتبتها بالليل و أنا بشاور عقلى أروح ولا مروحش
أيوة بدافع عن نفسى
Sunday, April 6, 2008 at 2:19am
http://www.facebook.com/note.php?note_id=11255328033

والدتى فى القاهرة اليوم مع عمرو أديب و مفيد فوزى
http://www.youtube.com/watch?v=eQBx2ytNUOk

ماما فى برنامج القاهرة اليوم أيام ما كنت أنا فى سجن المرج بعد 6 أبريل 2008

http://www.youtube.com/watch?v=eQBx2ytNUOk

فيديو يوم ما طلعت من السجن و كنت دايخ جدا و تعبان
http://www.youtube.com/watch?v=Mh9tYiqW41Y

أول حاجة اكتبها بعد السجن
ya msafer
7 مايو 2008
http://www.facebook.com/note.php?note_id=14160548033

محاولة لرد الجميل للناس اللى وقفوا معايا و أنا محبوس .. و كلهم اتخانقت معاهم بعد كدة
عن البطولة و الأبطال الحقيقيون
13 مايو 2008
http://www.facebook.com/note.php?note_id=14670558033

اعتزلت الغرام
14 مايو 2008
http://www.facebook.com/note.php?note_id=14776433033

يا حضرة الضابط
22 مايو 2008
http://www.facebook.com/note.php?note_id=15472333033

من ذكرياتى داخل السجن
اضحك مع مزيكا فى سجن المرج
27 يونيو 2008
http://www.facebook.com/note.php?note_id=18675388033

كلنا فى القمع شرق - ذكريات من المرج
21 سبتمبر 2008
http://www.facebook.com/note.php?note_id=28447083033

شمس

عندى طاقة كتيييير اوى عاوز أكتب لحد ما صوابعى توجعنى و الكيبورد تبوظ لحد ما كل المواضيع تخلص و كل الأفكار تتناقش .. عاوز أحب لحد ما كل المشاعر تخلص و كل القلوب تدق عاوز أغير كل حاجة حواليا للأحسن بس مش عندى صبر

لاحظت ان نابليون و هتلر كانوا قصيرين زيى تمام ... و كمان بيجمعنى بيهم وجود صفات امبراطورية وقحة تدعو لتدمير كل قديم و تغيير كل شئ و اقتحام كل الأسئلة

*********************

السؤال ده بيلح عليا من زمان و مش عارف أوصل له لاجابة محددة

امتى يحق للانسان أنه يخترق القانون ؟

مش احنا بندعو لدولة القانون ؟ ... افرض الدولة طلعت قانون مجحف فى حق مواطنيها ... هل من حقهم ساعتها أنهم يخرقوا القانون و ما يطيعوهوش ؟

لو مثلا الأخوان حكموا مصر و طلعوا قانون بيلزم الستات بارتداء الحجاب ... هل من حق المعارضين أنهم يرفضوا تنفيذ القانون ده لأنه بيحقر من المرأة ؟

طيب لو ادينا لنفسنا الحق ده لأسباب من وجهة نظرنا موضوعية يبقى من حق أى حد أنه يخترق القانون لأسباب تانية كمان هو شايفها من وجهة نظره موضوعية

**********************

تعريفات بدوية أول عشرية

واحد فيسبوكاوى حب يعاكس واحدة فيسبوكاوية قام قالها : ما تجيبى بووكة

=========

حديث غير شريف غير صحيح : عن العلامة أحمد بن عز الحديدى عن الوصلة بن نظيف عن الكفتة بن عبدالله بن كمال رضى مبارك عنهم أجمعين قال : قال الوريث المنتظر : "انما هذه تركة أبويا و مش حفرط فيها" .. كذب وريث الزور تف الشعب عليه و طرطر

صححه العادلى و قال : من رواته مختل عقليا

=========

الطريقة الجمالية : من الطرق "الحريرية" الجديدة التى تهدف الى الوصول لحالة السلام النفسى و الأنتخة الوجدانية عن طريق الاستهبال و الطرمخة و النظر بعين زجاجية لكل شئ فى مصر حتى يتسنى لك قبول استمرار تدهور الواقع من سئ لأسوأ فى سنوات ما بعد مبارك

=========

المناظرة على طريقة الوطنى : ليه ندخل فى مناظرات لما ممكن نزور الانتخابات ؟

=========

على عهدة سيد أبو حفيظة ... كابتن ماجد يوقع للأهلى فى ثلاث حلقات .. كلبشة جريندايزر بعد ركنه صف تانى .. عم دهب يحتكر صناعة المعادن و يرشح محظوظ ابن اخيه لرئاسة مدينة البط و حبس بطوط بتهمة تزوير مجلدات ميكى

امشى عوج توصل بسرعة

تيسيرا على رجال أمن الدولة

ده توثيق و رصد لأهم الحاجات اللى عملتها الفترة اللى فاتت عشان أقدر أفتكرها فى المستقبل

الأول كنت فى أسيوط من ييجى أسبوعين عملت ندوة عن التغيير فى مصر من 2005 و دور الشباب فى المستقبل و كان المكان اللى استضافنى هو مقر حزب الجبهة الديمقراطية بأسيوط اللى شايله كله على دماغه السياسى الجامد جدا مايكل نبيل سند

أنا و ميكى و محمود الفرعونى

الندوة كانت بمستوى متوسط و الناس قالوا أنهم استفادوا من الكلام اللى أنا قلته لأنى حكيت اللى حصل من 2003 لحد 2009 و توقعاتى ل 2011 لكن عدد الحضور كان محدود بس أنبسطت جدا باليوم ده لأنى اعتبرته بداية مرحلة جديدة للنزول للواقع برة الانترنت

الندوة كانت يوم الخميس 30- يوليو و الأكونت بتاعى كان تم وقفه الأربع 29 يوليو الصبح
بعد كدة و أنا مروح على القاهرة ببص عند بتاع الجرايد لقيت عدد الدستور الأسبوعى فى الصفحة الأولى كاتب مانشيت كبير عن جروب مش عاوزين جمال مبارك

التانى : سجلت حلقة مع راديو المحروسة عنى و عن كتاباتى و برده عن رؤيتى للتغيير فى مصر

التالت : حضرت فى مركز بن خلدون حلقة نقاشية ختامية عن مشروع وثيقة المصالحة الوطنية اللى اشتغل عليها المركز بالتعاون مع القوى السياسية بقاله كذا شهر و سبب دعوتى للحضور هو انى كنت مشارك بورقة كاتبها عن مستقبل مصر اللى بتمناه
http://www.facebook.com/note.php?note_id=73049318033

الرابع : صورت مع قناة أو تى فى عن مشكلة النت المحدود

صدقتنى يا مونتى ؟

http://www.youtube.com/watch?v=dfXVt1uapsc

الخامس : امبارح 14 أغسطس كان اجتماع لتنشيط حركة شباب 6 أبريل فى مركز نور الثقافى بعد رحيل مجموعة عساكر مرور لأعاقة التغيير و هما شوية ناس أعضاء فى الحركة بيدعو أن معاهم الشرعية و يطردوا الناشطين الحقيقيين صوريا و يحرقوا شكل الحركة قصاد الناس اللى مش متابعة التفاصيل

اللى مش غريب خالص أن ده نفس السيناريو اللى تم استخدامه قبل كدة ضد حزب الغد بنفس التفاصيل المملة و بنفس شكل الدقون و كان فاضل بس يزوروا لأحمد ماهر كام تذكرة اتوبيس و يلزقوها فيه و يحبسوه كام سنة كدة

الاجتماع - حسب خبرتى السابقة - كان ناجح

السادس : انهاردة نزلت مع شباب 6 أبريل فى حملة "واسطتك مصريتك" رحنا منطقة اسمها الخصوص .. سألنا الناس عن مشاكلهم تمهيدا لعمل شكوى جماعية و لقينا الناس عندهم مشاكل بالهبل

مياة شرب مختلطة بمية مجارى و ريحتها وحشة
مستشفى واحدة للمنطقة كلها مفيهاش لا أدوية و لا أدوات
فدان بحاله مزروع زبالة و بينبت أمراض من كل شكل و لون

لفينا من 11:30 لحد 4:00 تقريبا و الناس كانت متجاوبة معانا جدا و ادونا تليفوناتهم و وافقوا أنهم يتحركوا معانا للمحافظ أو عند رئيس الحى عشان يغيروا الوضع الموجود

السابع : بكرة 16 أغسطس حطلع على الهوا للكلام عن السيد جمال مبارك فى مناظرة مع مؤسس جروب نعم لجمال مبارك فى قناة أو تى فى الساعة 9:00

الحكم باعدام وهم

فى محكمة العقل وقفنا أنا و هو وجها لوجه

قال له القاضى بأفكاره المتنامية .. أنت متهم بكونك وهما
و اما أن تدافع عن نفسك أو يحكم عليك بالموت أو النفى الأبدى لمتاهات الذاكرة و غيابات النسيان

في البداية توسلت له - للمتهم - : أنقذني سيدي و دافع عن وجودك المقدس .. فعقلي بدأ يلفظ الكثير من حججك و يرفض حل الكثير من أحاجيك التى طالما أسرته بها

نظر الي بثقة و صرامة وتعالي مغرور .. قال : أيها الأحمق لن يمكنك أن تتركني ما حييت فحياتك كلها ملكي و ما وجودك الا رهن بوجودى و مشيئتى

أخبرته ساخطا أنني أشعر بأن حياتي بالفعل بها الكثير والكثير من دونه و أن وجوده في حياتي يصير أكثر فأكثر خفوتا و أقل و أقل فائدةً

أخبره القاضى - عقلى - أن الأدلة تتراكم ضده بالعشرات و أن عليه أن يخرج دليل براءته - دليل وجوده كحقيقة - و الا فليستعد للنهاية المحتومة

صرخ مغاضبا و محذرا سوف تتألم في كل لحظة تتناسي فيها سلطاني عليك أيها العاق فطالما فوضت أمرك الى و ظننت أننى أحميك

رددت الغضب بغضب أشد .. لا تأمرني بما لا أطيق فاما أن توجد بذاتك و اما لاتوجد .. لكن لا تأمرني بالكذب علي القاضى العادل لأحافظ علي وجودك الذى لم يكن يوما عادلا

لمعت عينى و أنا أسأل : أم انك أعجز من أن توجد بذاتك خارج حدودي؟

بدا لي مرتبكا ثم حاول أن بجرب المنطق والاقناع دون تهديد هذه المرة

قال لى : أنت تحتاجنى حتى ان لم أكن حقيقة حقيقية ذاتية ... حتى ان كنت أنا مجرد فكرة فى عقلك أنت ... فأنت لازلت فى حاجة الى .. أنظر للآخرين .. لكل منهم وهمه الخاص .. أفلا يدل هذا على حاجتهم الى الأوهام ؟

قلت مندهشا من اعترافه : أنت لست اذا حقيقة أنتسب اليها ؟ .. بل أنت صنيعتي تنتسب الى ؟

اذا عذرا سيدى السابق .. فلم أعد فى حاجة الى المزيد من الأوهام .. سوف ترحل غير مأسوف عليك

بدا الذعر و الفزع عليه .. حاول أن يشككني فيما ذهبت اليه من قرار اعدامه رميا بحقيقة وجوده المحدود بحدود عقلي .. حاول أن يستعطفني .. أن يذكرني بالأيام الخوالي التى تناجينا فيها لأزمنة غير معلومة

ولكن القاضي كان قد أصدر حكما نهائيا باحالته علي معاش أفكار الطفولة الساذجة

==========

أحمد بدوى
15 أغسطس 2009

لما مصر تبتدى تفوق

بعد ما طلعت من السجن بشوية و بصيت على حركة "شباب 6 أبريل" و لقيت الدقون اياها معششة فيها (دقن سى السيد و دقن سى جيفارا ) توقعت النهاية المعتادة اللى شفتها قبل كدة فى شباب من اجل التغيير و فى حزب العمل عمل ربنا

و لأن العقليات المبرمجة لا تصلح للابداع و لأن التغيير الحقيقى محتاج ابداع و الابداع محتاج حرية مش نظريات محفوظة و لا أوامر عسكرية طفولية فأنا توقعت فشل الحركة فى عمل أى شئ على ارض الواقع

و ده فعلا حصل بشكل طبيعى بعد كدة لما جت أوامر افشال الحركة و تم زيادة عدد أعضاء حزب العمل من عشرة أعضاء لعشرين عضو بحالهم ( ده كلام مرسل مش عليه أى دليل مادى ولا ميتافيزيقى عشان تريح دماغك بس كل الناس عارفاه)
*********************************************************************
ده الجزء السلبى فى الموضوع
لكن الجزء الايجابى

أن الطبيعى جدا ما دام فيه ناس داقوا طعم الحرية مرة فهما - أو غالبيتهم - بيدمنوا الحرية و بيفضلوا أحرار على طول و مهما حصلت محاولات لمحاصرتهم و تكسير مجاديفهم و ارهابهم كمان فمصير المحاولات دى الفشل على المدى البعيد دايما حتى لو حققت انتصارات عبيطة على المدى القريب

و طبيعة فيروس الحرية أنه بينتقل من شخص لأكثر من شخص و يحقق انتصارات متوالية مهما كانت قوة التطعيم بالجهل و الارهاب و الطاعة ( اللى هى من النطاعة ) منتشرة فى المجتمع

من غير رغى كتير أستمتعوا بنفسكم بالجزء الايجابى


كتبت أسماء محفوظ
http://www.facebook.com/note.php?note_id=112590319442


الناس اللي قابلتهم بقى
كل واحد فيهم بيسال انتي محامية طب انتي مين
فقلتلهم على اسمي وشاورتلهم على العمارة اللي ساكنة فيها
فاطمنوا انهم يتكلموا
قلتلهم بقى احنا شباب 6 ابريل واحنا مش شباب فاضي انا بشتغل 11 ساعة في اليوم وبدرس كمان بس انا مش قادرة اسكت على ظلم الحكومة لينا
وكلمتهم على الضرائب اللي بيدفعوها ومش بيستفيدوا بيها
فالناس تواجبت جداا والكلام ابتدى يتفتح بقى
ورئيس الحي اللي مش بنشوف وشه الا لما يجي يعمل اشغال طريق فياخد فلوس ويمشي
والشرطة اللي بتيجي تبلطج على الناس وتاخد فلوس وتمشي
وكلام بقى ايه وكانوا شافوا الكائنات الفضائية اللي بيسمعوا عنهم في الجرايد بيعتقلوا كل يوم ناس زيهم عاديين

الحلو بقى سمعت تعليق حلو اوووي
جمعت صحاب كام محل كده جمب بعض وقعدت اتكلمت معاهم وصوتي طبعا كان عالي فناس تانية جت تشوف في ايه
صوتي مش عالي بزعق بس التون كانت عالية
فواحد بيقولي انا خايف يتقبض عليا انا مالي ومال الحكومة
واحد قاله مش عيب عليك تشوف بنت زي دي صغيرة ونازلة بنفسها تتكلم مع الناس ومش خايفة
وانت ياراجل ياالي بشنبات خايف
قالي لا انا مش خايف انا بس كفاية مشاكلي
قلتله بزمتك اتخنقتوا كام مرة مع بعض عشان الزبالة كل واحد يرميها قصدا المحل التاني
قالي كتيير كل يومين نتخانق ونتصالح
ووصلت للضرب كمان
قلتله مش عيب طيب لما تضرب اخوك وحبيبك وانتوا الاتنين اصلا ملكومش ذنب
وسايبيين في اللي سارقينكوا
انت عارف انك هتتحاسب على حقوقك الضايعة دنيا واخرة
الرجال وزن الكلام وقالي طيب انا همضي وهشوف ايه اللي خيحصل
وسيبيني افكر شوية

لقيت اللي معاه اخدوا الورق ومضوا باسمهم وكتبوا اسامي اخواتهم اللي ساكنين معاهم
واسامي مراتتهم
وكانوا فرحانين اووي
قالولي ربنا يباركلك وبتاع وايه بقى شباب 6 ابريل دي
احنا بنسمع عنها في الجرايد
فضلت احكيلهم بقى هدفنا ومشوارنا فرحوا بينا اوووي

اما البنات بقى ياعيني على البنات
ادولي ارقامهم وعايزين ينزلوا معايا المرة الجاية
وواحدة متجوزة قالتلي ده اسم جوزي وشغلته اهي
حاولي تخلوه معاكو بدل ما هو مكبر من الدنيا كده

وقابلت واحدة وجوزها اتخنقت مع جوزها وقالتلوا انا همضي انا انسانة وليا حقوق
وهو عمال يشدها ويقولها خلينا في حالنا قالتوا ياراجل بطل سلبيتك دي هنجوز بنتنا ازاي بالزبالة دي


ركز على دى أوى أوى :

وجودي في وسط الناس دي احسن مييت مرة مع التعامل مع السياسين
الناس المصرية بجد جميلة

كده عين شمس والخصوص
هاا ميين هينزل تاني منطقته يشوف اكبر مشكلة ويجمع الناس عليها عشان تحلها؟؟؟

أنا عاوز أنزل أوزع الورقة دى على الجوامع فى رمضان

أربط شغل 6 أبريل بشغل غد البحيرة بشغل مركز الأندلس بشغل حملة صوتى مطلبى بشغل حملة قيمة صوتك بشغل حملة الغاز بالمجهودات الفردية اللى بتزيد يوم عن يوم فى كل مكان

و قيس التطور و الفرق ما بين حملة رفض الانترنت المحدود لما حاولوا يطبقوه المرة اللى فاتت و حملة الرفض المرة دى عشان تعرف أنا ليه متفاءل جدا جدا جدا

الأندلس و حريتنا .. التنوير على الهادى

غد البحيرة .. رجالة بميت حزب

جمال مبارك اليوم

الصبح دخلت على موقع المصرى اليوم عادى جدا .. قريت عنوان لخبر عن اجتماع للسيد جمال مبارك مع شباب مصريين قلت عادى و ايجابي كمان .. صحيح هما بيبقى الأمن منقيهم بس مش مشكلة ما هو الأمن كان بينقي الطلبة اللي بيقعدوا مع نظيف و مع ذلك ردوا عليه أكتر من مرة

و لأنى طبعا زى ما كلكم عارفين بشجع اللعبة الحلوة و بأيد مسرح العرائس كفن هادف دخلت أقرا الخبر هنا
http://www.almasry-alyoum.com/article2.aspx?ArticleID=221974

المشكلة تتكعبل فى الآتى

أولا : الخبر بيقول "أرسل الحزب الوطنى عدداً من الرسائل الإلكترونية للشباب عن طريق موقع وزارة الاتصالات"

أول القصيدة كفر يعنى دى كدة يا معلم استغلال لموارد الدولة و امكانيات وزارة الاتصالات لصالح مرشح حزب من الأحزاب وملوش أي منصب في الدولة ولا الوزارة
وده بيدينا مؤشر واضح عن اللي حيحصل لما يبقي فيه انتخابات بحق وحقيقي و أنا من هذه الحوداية التاريخية أرجو من السادة بتوع وزارة الاتصالات أنهم يتيحوا لبقية الأحزاب نفس الفرصة فى التواصل مع الناس عن طريق موقع الوزارة لأنها مش عزبة ابوهم يسخروها للى هما عاوزينه

ثانيا : الخبر تضمن - و لأول مرة و حصريا كسبق للمصرى اليوم - لينك لجروب على الفيس بوك
اللى هى مؤيدى جمال مبارك اللى فيها 3000 واحد أغلبهم مايعرفش من السياسة غير نعم و حاضر

يا جدعان دى ما حصلتش مع جروب 6 أبريل اللى كان عليها 70000 بنى آدم
ولا حصلت مع جروب "مش عاوزين جمال مبارك" اللى عليها 8700 بنى آدم

برغم أن أخبارهم اتنشرت فى جرايد كتير بس عمر ما جرنان نشر لهم لينك زى ما المصرى ما عملت

و المشكلة هنا أن ده اعلان صريح فى صورة خبر - حسب أقوال بعض الصحفيين من أصدقائى - يعد اعتداء على ميثاق الشرف الصحفى ... ده غير انه استهزاء بعقل القارئ بنظام الاعلام الموجه بتاع زمان أوى ده

للي ملوش في النت و مش فاهم ايه المشكلة في نشر لينك لجروب فيس بوك جوة الخبر ... الموضوع ده بالضبط زي ما تلاقي جرنان ناشر خبر عن دكتور شاطر و حاطط عنوانه و رقم تليفونه في وسط الخبر
!!!
ثالثا : أنا دخلت على موقع الجريدة و علقت على الخبر بكلمتين بس : ( هو ده خبر ولا اعلان ) و الغريب أن فيه 70
تعليق ملقيتش تعليقى من بينهم

�ع أنى بعدها بدقيقة علقت على موضوع تانى
http://www.almasry-alyoum.com/article2.aspx?ArticleID=221957&IssueID=1492
و تعليقى لسة �نشور هناك ... يعنى الغلطة مش من عندى لو قلنا الاحتمال ده

طب اشمعنى التعليق ده بالذات ما اتنشرش ؟

رابعا : أنا مع نزول الأخ جمال للشباب .. يعنى حتى لو نجح فى الاستيلاء على كرسى السلطة بشكل رسمى بعد كدة يبقى اسمه سمع مشاكل الشباب كام مرة فى حياته
مش معقول يبقى زى الدكتور نظيف اللى طلع يقول أن مصر بلد البطاطس و القرية الذكية
ولا يبقي زي الدكطور عز اللي بيقول أن المصريين أغنيا عشان كلهم عندهم عربيات و موبايلات !!!
و أنا مع أن المصرى اليوم تقوم بشغلها و تنشر كل الأخبار

�كن انا ضد الضحك على عقول الناس بتبديل الاعلان بالاعلام و ضد استغلال موارد الدولة للدعاية لمرشح بعينه حتى لو كان أيمن نور و ضد حاجات كتير أوى مش وقتها دلوقتى

نصيحة أخيرة للأخوة بتوع جمال مبارك .. بلاش استهانة بعقولنا لأن ده شئ مستفز و كفاية عليه أصوات الميتين و شنط رمضان و الأمن المركزى على اللجان عشان تنجحه بالعافية

و تحياتى

حياتي

الموضوع على فيس بوك والتعليقات

موضوع خاص مش عام

حياتى عاوزها تبقى كالآتى

1 - أسيب الهندسة و أشتغل فى مجال أستفيد فيه بمواهبى فى الكتابة و المعرفة السياسية و أتعلم منه و أكبر معاه

الهندسة بعد سنة ولا اتنين مش حتأكلنى عيش لأنى مش طايقها كمجال حياة ولا بتعلم منها اى حاجة جديدة حقيقية و لما ححب أترقى حلاقى أن خبرتى الهندسية مازادتش كتير عن ساعة مااتخرجت من الكلية

كمان عاوز أشتغل فى مكان مش محتاج أبرر فيه كل شوية أنا ليه بدافع عن حقوق المصريين البهائيين ولا ليه أنا مش باخد كلام الشيوخ على أنه جد

فكرت فى الأندلس بس سميح رافض و فعلا أنا فاهم وجهة نظره لأن أنا بحالتى الحالية مفيد أكتر مما لو تفرغت للشغل بتاع حقوق الانسان .. أنا مرتبى كبير من شغلى برة مجال حقوق الانسان و ده بيدينى مصداقية و بيخلى أى حاجة بعملها لله و الوطن - و ده حقيقى فعلا .. و أنا معترف أنى مبسوط بنفسى أنى مستقل و متطوع لكن الازدواجية دى تعبانى

طول الوقت بقول أن الشغل هو المجال اللى بيشغلك مش المجال اللى بتمتهنه عشان تكسب - يعنى نجيب محفوظ كان شغال كاتب حتى لما مهنته كانت موظف أرشيف - و أنا مشغول بالسياسة و المجال الحقوقى و مش مشغول بمهنة الهندسة نهائى ..... يعنى الناس كلها ممكن تبقى مستفيدة و مبسوطة من وضعى الحالى ماعدا انا

مش عارف أعمل ايه - او مكسل آخد خطوة واضحة ضرورية - بس أهى الأيام حتضطرنى للخطوة دى مع الوقت

2 - يبقى ليا بيت مستقل - شقة صغيرة فى وسط البلد أو فى أى حتة .. شقة فيها بس مكتبة احط فيها كتبى و الكمبيوتر و اوضة نوم كويسة

يكون مرتبى كويس - حسب شغلى - و أقدر أصرف على نفسى و أعيش فى حالى بعيد عن الدوشة و العيلة و يكون مكان أقدر أقعد فيه مع نفسى أو مع أصحابى براحتنا من غير تدخل من حد

3 - موضوع الجواز ده فقدت الأمل فيه .. و لو حصل غالبا مش حيستمر كتير .. صحيح لسة أحيانا بتجيلى أحلام زمان بأنى ألاقى شريكة حياتى اللى أعيش معاها طول العمر و يبقى بيننا تفاهم و صداقة و حب و نكبر و نعجز سوا .. لكن عمليا ده مش حيتحقق .. و مشكلتى الوحيدة مع الدخول فى علاقات حب أنها مش موجودة فى أرض الواقع

4 - بعد 10 - 15 سنة مصر حيبقى شكلها مختلف تماما ... جيل مواليد التمانينات و التسعينات هو اللى حيبقى بارز فى كل المجالات خصوصا السياسة ... عشان كدة فكرت أن الشباب الليبراليين الموجودين دلوقتى حيقدروا يعملوا حزب مدنى ليبرالى قوى و مؤثر لأن حيكون اتكونت عندهم الخبرة و الجرأة و حتكون التيارات الاسلامية ضمرت من عدم الاستخدام أو فشلت و حيكون عدد الكوادر السياسية الموجودة على الساحة بالآلاف ... صحيح أنا مليش طموح سياسى حاليا .. بس مين عارف بعد عشر سنين حيبقى ايه الوضع

أنا عاوز ساعتها يبقى ليا دور محترم فى الشأن العام حتى لو مش كسياسى ممارس للسياسة .. بس ككاتب و مفكر له علاقات بالأطياف السياسية المختلفة

5 - عاوز أكتب كتاب و ينجح و ناس كتير تقراه .. منتصر بيقول أنى لو عملته مش حيوزع كتير .. طيب ما فيه ناس كتير مدونين و عملوا كتب و وزعت .. اشمعنى أنا ؟ .. عاوز أخوض التجربة و أشوف .. الموضوع عاوز شوية اثارة و كتابة ساخرة و دعاية عشان الكتاب يتعرف

و كدة كدة المواضيع موجودة مش حألف حاجة جديدة مخصوص

و لو عملت له عنوان من عناوين المقالات بتاعتى العجيبة حيشد انتباه الناس

ممكن حتى أعمل مقلب .. يعنى مثلا أخلى العنوان ( لماذا أنا ملحد ) و مكتبش أى حاجة ليها علاقة بالالحاد ولا بتاع .. يبقى مقلب جامد

6 - عاوز أعرف أنا بتعب ليه وأتعالج .. مش بثق فى الدكاترة المصريين و مش عاوز أعمل كشف بس التعب و الدوخة بتزيد كل فترة عن اللى قبلها و ساعات بحس أنى حموت و الاحساس ده بيخوفنى و بيريحنى فى نفس الوقت .. مش مشكلة الموت قد ماهى مشكلة الألم

عاوز أعمل عملية ليزك و أرمى النضارة و مكسل

غالبا حيبقى عندى 50 سنة و مش حكون عملت ولا حاجة من دول

The Punisher

عندما تكلمت عشتار

قالت عشتار : لو بس نبطل نرفع يفط و شعارات و نبتدى نبص و نركز فى الحقيقة المستخبية تحت الشعارات و اليفط دى ... ياااه ده احنا كنا حنتعب أوى لأن الحقيقة مرة أوى

تقريبا كل واحد رافع يافطة و ماشى بيها بيغطى بيها حقيقة مخالفة للى مكتوب عليها

اللى رافع يافطة اسلامية و هو معدوم الأخلاق تماما
اللى رافع يافطة ليبرالية و هو ديكتاتور - زى اللى بينقل لكم كلامها دلوقتى - بشكل بشع
اللى رافع يافطة التحرر من الدين و العادات و هو حياته كلها مش بتدور - سبع أشواط - غير حوالين الدين و العادات
و اللى بيفتخر جدا أنه ضد تعدد الزوجات و هو بيتمنى أو بيفتخر بتعدد العشيقات
و اللى بتصرخ ليل و نهار دفاعا عن حقوق المرأة و هى بتحلم براجل يديها على دماغها عشان تعبده

للأسف كل ما الحقايق بتبان أكتر كل ما الوجع و العزلة بيزيدوا و كل ما بتحاول تبقى نفسك و تبقى صادق و حقيقى كل ما الدنيا بتوجعك أكتر

قلت : المشكلة الأكبر بتبقى مع اللى رافع يافطة و مصدقها و بيتوصم عشان حواليه كدابين كتير
الاسلامى اللى عنده أخلاق بجد
الليبرالى اللى حر بجد
الانسان اللى انسان بجد .. هو أكتر واحد مظلوم فى الفوضى دى

**************************

**

سألنى : أنت ليه بتكتب ؟ ... أنا شايف أن مفيش تغيير ... و الكلام الكبير ممكن تكدب بيه على أى حد الا نفسك ... واجه الحقيقة .. كل ده وهم كبير عايشين فيه

قلت : أنا بكتب عشان ألاقيك
ممكن أقول مليون سبب أنا بكتب عشانه .. بس جزء من الحقيقة انى بكتب عشان حاسس بالوحدة ... و محتاج أقابل ناس صادقة و حقيقية و معنديش صبر أستنى لما أقابلهم فى الواقع .. يمكن لو استنيت عمرى ما حقابلهم ,,,, أنا كنت بكتب فى البداية عشان ألاقى نفسى ... بقيت بكتب عشان ألاقيك و ألاقى صحابى التانيين الحقيقيين و لو بس حنتقابل فى عالم خيالى

التغيير بيحصل بيحصل .. حتى لو متنا حيفضل يحصل .. بس أجمل بكتير و احساس حقيقى أنك تبقى جزء من التغيير ده .. الانسان بيتحرك عشان مصلحته - حتى المتدينين بيتحركوا عشان مصلحة مؤجلة فى الآخرة ... و مفيش مصلحة أكتر من احساس لذيذ حقيقى أن وجودك عامل فرق و أنك كيان انسان

*****************************

قالوا : يوم القيامة كمان سنتين
قلت : و ايه يعنى ؟ ... يعنى أنت ضامن أنك حتعيش السنتين دول بحالهم يا أخى ؟

****************************

سألت نفسى : هو أنا ليه كدة ؟ ... ياريت كنت بمثل
فرحان انى مش بمثل و أنى ما اتوسختش لسة زى ما قال مايكل لكن خايف لييجى يوم أتحول لتمثال معمول فى قالب من فخار .. يا خوفى يا بدران

حلم قديم متحققش

عاوز أجيلك تحضنيني تاخدي مني وجع السنين وتدفنيه
عاوز أسمعك تكلميني تحكيلي حكايتي وحكايتك مع الحياة
عاوز قلبي يدق مع قلبك
عاوزعيني تبص جوةعينك
عاوز ايدي تمشي علي جبينك بين خصلات شعرك الجميل
نفسى أتنفس أنفاسك وأدوق طعم السكرعلي شفايفك
عاوزك تحبيني عاوزك تضميني وتخافي علياوأخاف عليكي
عاوز تحبيني قد مابحبك أكترمابتحبيني
تغفري غلطاتي بضحكتك
تمسحي ذنوبي ببسمتك
تطهريني من نجاسة الدنيا بلمسة من طراطيف صوابعك
تخرجيني من وحدتي و تدخليني ف وحدتك عشان نبقي سوا لوحدنا_عشان نبقي سوالبعضنا