حياتي

الموضوع على فيس بوك والتعليقات

موضوع خاص مش عام

حياتى عاوزها تبقى كالآتى

1 - أسيب الهندسة و أشتغل فى مجال أستفيد فيه بمواهبى فى الكتابة و المعرفة السياسية و أتعلم منه و أكبر معاه

الهندسة بعد سنة ولا اتنين مش حتأكلنى عيش لأنى مش طايقها كمجال حياة ولا بتعلم منها اى حاجة جديدة حقيقية و لما ححب أترقى حلاقى أن خبرتى الهندسية مازادتش كتير عن ساعة مااتخرجت من الكلية

كمان عاوز أشتغل فى مكان مش محتاج أبرر فيه كل شوية أنا ليه بدافع عن حقوق المصريين البهائيين ولا ليه أنا مش باخد كلام الشيوخ على أنه جد

فكرت فى الأندلس بس سميح رافض و فعلا أنا فاهم وجهة نظره لأن أنا بحالتى الحالية مفيد أكتر مما لو تفرغت للشغل بتاع حقوق الانسان .. أنا مرتبى كبير من شغلى برة مجال حقوق الانسان و ده بيدينى مصداقية و بيخلى أى حاجة بعملها لله و الوطن - و ده حقيقى فعلا .. و أنا معترف أنى مبسوط بنفسى أنى مستقل و متطوع لكن الازدواجية دى تعبانى

طول الوقت بقول أن الشغل هو المجال اللى بيشغلك مش المجال اللى بتمتهنه عشان تكسب - يعنى نجيب محفوظ كان شغال كاتب حتى لما مهنته كانت موظف أرشيف - و أنا مشغول بالسياسة و المجال الحقوقى و مش مشغول بمهنة الهندسة نهائى ..... يعنى الناس كلها ممكن تبقى مستفيدة و مبسوطة من وضعى الحالى ماعدا انا

مش عارف أعمل ايه - او مكسل آخد خطوة واضحة ضرورية - بس أهى الأيام حتضطرنى للخطوة دى مع الوقت

2 - يبقى ليا بيت مستقل - شقة صغيرة فى وسط البلد أو فى أى حتة .. شقة فيها بس مكتبة احط فيها كتبى و الكمبيوتر و اوضة نوم كويسة

يكون مرتبى كويس - حسب شغلى - و أقدر أصرف على نفسى و أعيش فى حالى بعيد عن الدوشة و العيلة و يكون مكان أقدر أقعد فيه مع نفسى أو مع أصحابى براحتنا من غير تدخل من حد

3 - موضوع الجواز ده فقدت الأمل فيه .. و لو حصل غالبا مش حيستمر كتير .. صحيح لسة أحيانا بتجيلى أحلام زمان بأنى ألاقى شريكة حياتى اللى أعيش معاها طول العمر و يبقى بيننا تفاهم و صداقة و حب و نكبر و نعجز سوا .. لكن عمليا ده مش حيتحقق .. و مشكلتى الوحيدة مع الدخول فى علاقات حب أنها مش موجودة فى أرض الواقع

4 - بعد 10 - 15 سنة مصر حيبقى شكلها مختلف تماما ... جيل مواليد التمانينات و التسعينات هو اللى حيبقى بارز فى كل المجالات خصوصا السياسة ... عشان كدة فكرت أن الشباب الليبراليين الموجودين دلوقتى حيقدروا يعملوا حزب مدنى ليبرالى قوى و مؤثر لأن حيكون اتكونت عندهم الخبرة و الجرأة و حتكون التيارات الاسلامية ضمرت من عدم الاستخدام أو فشلت و حيكون عدد الكوادر السياسية الموجودة على الساحة بالآلاف ... صحيح أنا مليش طموح سياسى حاليا .. بس مين عارف بعد عشر سنين حيبقى ايه الوضع

أنا عاوز ساعتها يبقى ليا دور محترم فى الشأن العام حتى لو مش كسياسى ممارس للسياسة .. بس ككاتب و مفكر له علاقات بالأطياف السياسية المختلفة

5 - عاوز أكتب كتاب و ينجح و ناس كتير تقراه .. منتصر بيقول أنى لو عملته مش حيوزع كتير .. طيب ما فيه ناس كتير مدونين و عملوا كتب و وزعت .. اشمعنى أنا ؟ .. عاوز أخوض التجربة و أشوف .. الموضوع عاوز شوية اثارة و كتابة ساخرة و دعاية عشان الكتاب يتعرف

و كدة كدة المواضيع موجودة مش حألف حاجة جديدة مخصوص

و لو عملت له عنوان من عناوين المقالات بتاعتى العجيبة حيشد انتباه الناس

ممكن حتى أعمل مقلب .. يعنى مثلا أخلى العنوان ( لماذا أنا ملحد ) و مكتبش أى حاجة ليها علاقة بالالحاد ولا بتاع .. يبقى مقلب جامد

6 - عاوز أعرف أنا بتعب ليه وأتعالج .. مش بثق فى الدكاترة المصريين و مش عاوز أعمل كشف بس التعب و الدوخة بتزيد كل فترة عن اللى قبلها و ساعات بحس أنى حموت و الاحساس ده بيخوفنى و بيريحنى فى نفس الوقت .. مش مشكلة الموت قد ماهى مشكلة الألم

عاوز أعمل عملية ليزك و أرمى النضارة و مكسل

غالبا حيبقى عندى 50 سنة و مش حكون عملت ولا حاجة من دول

The Punisher