Tuesday, July 27, 2010

أخطاء فى فيلم عسل أسود


شفت فلم عسل أسود وشفت الأخطاء التالية من غير ترتيب:

-لما هما كانوا في العيد قام ادي لمنصف مفتاح شقته , إيه الذكاء ده? طب ماشقة العيلة أصلا كانت فاضية لأنهم كلهم بيعيدوا وكان الأولي يروح شقتهم وهما برة

-لما قال لسعيد روح كلم ميرفت وتقريبا نسيوا يصوروا مشهد أما راح يكلمها وماشفناش رضيت ولا لأ, أو يمكن أنا سرحت فالمشهد ده

-الواد لما بيقول له علم أمريكا كان بيرفرف فوق القمر ازاي, ده دليل واضح أن نظرية الخدعة مسيطرة علي صناع الفلم وبدون أمانة لأن أي بحث في موضوع الإشاعة بأن الأمريكان مطلعوش علي القمر حتظهرلك ردود علمية تفصيلية من ناسا وفيديو النزول علي سطح القمر باين فيه أن العلم ثابت مش بيرفرف ,لكنه بيتهز في لحظة مارائد الفضاء بيثبته في الأرض

والهدف من رمي الكلمة دي وسط الفيلم وكمان موافقة أحمد حلمي عليها بدون بحث عن صحتها بيدي رسالة أن التفوق الأمريكي خدعة وأننا ميت فل وعشرة وده نوع رخيص من تخدير الوعي

وبالمناسبة كل الشكوك عن صحة رحلة الأمريكان للقمر ظهرت من الستينات وتم تفنيدها علميا وبشكل معلن

-هل فيه واحد حيسافر بلد من غير مايسأل عن سعر عملتها?

-هل كون أنه يدي مفتاح شقته لأم سعيد عشان منصف ومراته يسكنوا فيها بعد سفره يعتبر حل? طب ماهو مسيره يرجع

-الفلم لعب برده علي تيمة المقارنة بين شهامة وإيمان المصريين ومادية الأمريكيين إللي عبر عنها عم هلال المصوراتي في محاضرته الحمضانة إل سمعناها في كل الأفلام اللي بتتناول نفس الموضوع وكأن الرضا بفساد الأمر الواقع بيعوض عن عدم البحث عن أسباب فساده ومحاولة حل المشاكل

وده أمر ساذج جدا لكذا سبب أبسطهم أن مش أمريكا بس اللي متفوقة علينا , العالم كله متفوق علينا بمراحل ومش حل أبدا عشان نبان مش وحشين أننا نشتم غيرنا ونشوه صورته ونتهمه بالكذب

-قصة أنه راح عمل ورق الباسبور والبطاقة وشهادة التجنيد والمؤهل الدراسي قبل رمضان مايخلص أمر في منتهي السذاجة لأن كل ورقة من دول عاوزة اجراءات طويلة جدا ماينفعش تتعمل في رمضان إللي أصلا محدش بيشتغل فيه

-كونه يلغي سفره لأمريكا ده شئ غريب جدا لأنه مفترض عنده شغل وأملاك في أمريكا كان لازم علي الأقل يروح يصفيهم قبل مايرجع بتمثيل موضوع المغص

2 comments:

Mahmoud Kefaya Punk said...

ألف إخس و إخس على بتوع النت, اللى مافيش حد منهم عمل كومينت على النوت الممتازة بتاعتك. بجد ممتازة. إنتا دماغ يا بدوى. و بجد شوية غلطات من اللى إنتا خدت بالك منهم, انا لاحظتهم و انا بشوف الفيلم و كانت حاجة مستفذة جدا. بالذات بتاعة رفرفة علم أمريكا.

ألف تحية منى ليك يا بدوى و لكل البلوجرز و النشطا الشرفا فى مصر

MoSalah.tech said...

تمام الله ينور لكن دي وجهة نظرك في الفيلم مش نقد ولا علم و وجهة نظر تفتقر الي العلم لكن احسنت