Friday, March 9, 2012

نقول تاني : ليه ليبرالي يدعم أبوالفتوح؟

وعشان التكرار يعلم الشطار وممكن يهزم الحمار نقول تاني 

نقول تاني : الثورة لازم توصل للسلطة وإلا حتموت - نفس الناس اللي بيفتتوا مجهودنا دلوقتي بدعوات غير منطقية للمقاطعة أو دعوات غير واقعية لترشيح مرشحين غير موجودين على خريطة الناس هما نفسهم اللي قادوا الفشل الثوري المنظم طول السنة اللي فاتت



نقول تاني: عبد المنعم أبوالفتوح أكتر شخصية محسوبة على الثورة ونقدر نجمع حواليها الشعب المصري لإن عبدالمنعم أبوالفتوح متوافق مع قيم الشعب المصري وثقافته ومقبول جماهيريا ولازم الثورة تنتصر من خلاله

نقول تاني: الناس تعبت من الثورة ...  ده حقيقي ... لكن برده الناس كارهة الفساد والفاسدين والفاشلين وعاوزين حد يثقوا فيه ويقفوا معاه ومفيش أنسب من‏ عبد المنعم أبوالفتوح كمرشح شريف تاريخه محترم والناس تختاره
الناس سقطت الفلول ودوروا على حد شريف ومحترم وملقوش غير الإسلاميين ولو كان شباب الثورة ليهم دور وسط الناس كانوا أنتخبوهم والأمثلة الواقعية كتير ... متحملش الناس مسئولية كسلك وفشلك في الوصول إليهم

نقول تاني: لو قدرنا - وحنقدر - نجمع المصريين حوالين‏ أبوالفتوح والإنتخابات أتزورت ضده ساعتها يبقى النظام ضرب نفسه رصاصة الرحمة وانتحر

نقول تاني : أى مساهمة منك في تفتيت الأصوات بتخدم اللي عاوز يزور وبتسهل له مهمة التزوير

نقول تاني: اختلافاتنا الفكرية رفاهية دلوقتي- اختلافاتنا الفكرية قبل اسقاط النظام القديم بالكامل خيانة أصلا للثورة اللي وحدتنا في التحرير


 نقول تاني: نخلص من مبارك وأبناء مبارك ووزراء مبارك وبعد كدة كل واحد يشيل أيديولوجيته على كتفه سيف يقطع بيه في الباقي محدش حيقول له عيب

نقول تاني: الأفورة في الحلم تضيع الحلم .. الأفورة في الإنهزامية تكسر معنوياتنا - خير الأمور الوسط - عشان الثورة ومستقبلنا وبلدنا - نتوحد ننتصر

نقول تاني: أنا نيلة ليبرالي علماني وعاوز حكومة تحقق مبادئي ورئيس يمثلني ويمثل أفكاري - لكن قبلها عاوز أى حد ينقذ مصر من الاستبداد والفساد والفشل اللي خاربها من سنين , أبوالفتوح في الظروف الطبيعية مش حيكون مرشحي المفضل - لكن احنا مش في ظروف طبيعية - احنا قصاد ثورة يا تنتصر يا تنهزم ملهاش حل تاني
 ابنك بعد عشرين سنة ممكن يسألك أنت ازاى متعاونتش مع الناس اللي مختلف معاهم عشان تنجح الثورة ؟ للدرجة دي مبادئك النظرية كانت أهم عندك من انقاذ البلد ؟



نقول عاشر: عاوز تسقط حكم العسكر سقط مرشحين العسكر في الرئاسة - أى حاجة تعملها قبل كدة تبقى تهريج 

نقول تاني : مصر في خطر - مصر أهم من الثورة ميت مرة على فكرة - لو جه رئيس فلول حندخل في دوامة انتقام وعنف مش حتنتهي - مش وقت تجارب
Post a Comment