Saturday, February 1, 2014

السيسي والحرب الأهلية

ناس كتير شايفين أن النهضة مش حتحصل في مصر غير بعد نهاية الحرب الأهلية، رأيي ان احنا نقدر نوقفها لو قررنا ده. حنقرر وقوفها حتقف

لكن قرار وقف الحرب الأهلية قرار جماعي، مشروع أهلي لازم كل المصريين يشاركوا فيه زى مشاريع كتير في تاريخنا

قصص نجاح كتير أصلها الشغل المجتمعي ، النادي الأهلي ،البنك الأهلي , جامعة القاهرة ،،،، محتاجين وقف الحرب يكون مشروع المجتمع المصري

السيسي يقدر يكون عبدالناصر جديد, بس لو عبدالناصر كان موجود دلوقتي وحاول يستخدم نفس أساليب الخمسينات كان دخل مستشفى المجانين

لو حاول يعيد قصة عبدالناصر حينتهي بيه الحال زى القذافي ، شخصية كوميدية محدش قادر يعارضها والشعب حيقلب عليه أقرب مما نتخيل

لكن يقدر برده يكون علامة في تاريخ مصر لو أستلهمنا كلنا روح مينا موحد ، دلوقتي محتاجين نتوحد على أساس لا الوطنية

المواطنة هى كونك شريك ليك حقوق شراكة لمجرد كونك مواطن، بغض النظر عن أى انتماء أصغر, سياسي أو عقائدي أو جنسي أوفئوي او طبقي

الوطنية هى الانتماء للوطن, مشاعر بينتج عنها طريقة تفكير معينة بنسميها القومية، القومية جاية من "قوم" يعني أهل وعشيرة

بشكل عام مبنية على المشاعر, بيأججها الغضب ويقويها الخوف, عشان كدة الإتجاه ناحية القومية في وقت الأزمات أمر طبيعي

القومية بتعبر عن تكاتف المجتمع. وفي المجتمعات المنهارة بتتحول لتكاتف حوالين زعيم سياسي منقذ, بيعبر عن رغبة المجتمع في الخلاص

لكن زى أى حاجة في الدنيا ينطبق عليها قاعدة كونية ثابتة "اللي بيزيد عن حده بيتقلب لضده" حب الزعيم بشكل مبالغ فيه بيحرقه

تحويل انسان لإله أو نصف إله هو جريمة في حق الانسان ده قبل ماتكون جريمة منه "يامشير إيه فرعنك؟ قال عملوا حملة عايزينك"

حب وطنك على قد ماتقدر بس متخليش حب الوطن ينسيك حق شريكك في الوطن، متخليش الغضب يحرق الوطن وأنت فاكر أنك بتنضفه

لو كلنا ألتزمنا نقول كلمة الحق, الصدق , ساعتها حنتوحد ومش حنخاف من بعض, دي حاجة بتيجي بالتدريب والتدريج

لو أنت بس لوحدك قلت كلمة الحق وألتزمت بيها فأنت جندي من جنوده, الحق ,والحق بينصر صاحبه, قولها وحتلاقي غيرك معاك كتير .

أنك تنصر الحق معناها أنك تلاقيه, تدور عليه، توزن كل كلمة قبل ماتقولها لإنها شهادة عليك، لسانك حصانك, عقلك عقالك, قلبك دليلك .كدة يعني

لو وقفت مع الحق مش حتخاف من حد, لا السيسي ولا دولته ولا المجتمع ولا الأخوان ولا مجتمعهم, كن نفسك وأجعل نفسك طاهرة. فالطهر معدي

الحق فوق القوة , كمفهوم هو أكبر من مفهوم الدولة وأكبر من قدراتها أيا كانت, هو الصح, والصح لا ينتصر عليه خطأ

صناعة الفراعنة, فخر الصناعات المصرية
Post a Comment