Thursday, July 23, 2015

حل أزمة الشرعية في عودة الملكية

تعالوا نسرح بالخيال شوية
أفرض فعلًا رجعنا الملكية وجبنا ابن الملك فاروق رجعناه لعرشه كملك لمصر من أسرة محمد علي بشروط محددة منها أنه مايتدخلش في السلطة السياسية وأن شئون الحكم تكون بالكامل في إيد حكومة برلمانية منتخبة؟
مقابل ده حيرجع الجيش لثكناته ويركز في جبهات القتال ضد الأخطار الخارجية ، ويتم فتح الفضاء العام بالكامل ولكن بضوابط أخلاقية تتوافق عليها النخب المصرية بالكامل لبناء الثقة والتعاون بين الجميع
(ده مش سيناريو خيالي من تأليفي ، ده حدث بالفعل في أسبانيا بعد رحيل فرانكو ، ونتيجة لكدة أسبانيا في خلال تلاتين سنة من رحيل فرانكو استقرت كدولة حديثة وتغلبت على أكتر من انقلاب عسكري فاشل
أزمتنا - لو بنتكلم عن شئون الحكم في مصر - هى أزمة شرعية ، في حالة وفاة أو اغتيال الرئيس المتنازع على شرعيته وهو مسجون مش بس حيبيح دم الديكتاتور بالنسبة لناس كتير ملتزمة السلمية لحد دلوقتي لكن حيقفل باب تقديم التنازلات على الديكتاتور وبالتالي اعدامه حيبقى مفتاح حرب لا تبقي ولا تذر ، حرب حيموت فيها ألوف المصريين بدون داعي حقيقي ولا هدف محدد
الوحيد اللي محدد هدفه هو اللانظام الحاكم ، هدفه الاستمرار والتوغل والسيطرة والتفرقة بيننا لإننا كلنا بالنسبة له أعداء بنحاول نقضي عليه ، واللانظام الحاكم هو الوحيد اللي مؤكد أن هدفه مش حيتحقق لإنه ببساطة بيموت بالشيخوخة وتسارع الزمن حوالينا ، نظام الستينات ملوش مكان في مصر بعد كدة وده واقع مش تمنيات مني أو من غيري ، السؤال هو ايه اللي حيسيطر على ملايين الجوعى والمشردين ويقدر يديهم أمل أخير بالسلام والأمان؟ مين يقدر يبني مصر من أول وجديد ومحدش يقدر يتهمه بأنه كان شريك في المسئولية عن وضعنا الحالي ؟ ،، أعتقد مفيش غير ملك أبوه تخلى عن حكم البلاد عشان يحقن الدم وملوش أى أطماع في السلطة وحكومة منتخبة من الشعب وللشعب بيحكمهم دستور مرن وحديث يقسم جميع المصريين على تطبيقه و الحفاظ عليه
انا نفسي كنت لما اشوف حد بيتكلم عن رجوع مصر للملكية أعتبره مخرف ،،، لكن شوية تأمل صغيرين في الأزمة الحالية وتاريخ مصر الطويل يقولوا أنها محتاجة تغيير شامل وأن رجوعها لوضعها الطبيعي كمملكة دستورية برلمانية ممكن يكون الحل الحقيقي لمشاكل كتير جدا مش أقلها الفراغ اللي حيصنعه السيسي برحيله عن المشهد في أى وقت كان

No comments: