دايما فيه احنا وهما ... فى كل مناقشة و كل موضوع بتلاقى التقسيمة دى
احنا الناس اللى عندهم قيم و مثل عالية مستمدة من رقى البشرية و تهذيب الثقافة و التجارب و بيحترموا الانسان كانسان من غير الدخول فى تفاصيله و خلفياته و البحث جوة ضميره
و هما اللى دايما عندهم انفلات اخلاقى و قيمهم مهزوزة ... بيسموا الغلاسة استلطاف و التناحة ظرف و طول الوقت بيدعوا أنهم هما الصح ............ الحقيقة احنا و هما طول الوقت بندعى اننا الصح
بس هما دايما عندهم حتة الضمير دى واقعة منهم و طول الوقت بيعملوا حاجات و هما عارفين انها غلط و بيدوروا على طريقة او حد يقول لهم انها صح ... حد يتحمل الذنب بدالهم
و احنا اللى دايما بيبقى ضميرهم و أخلاقهم بتمنعهم من التعدى على حقوق الغير و لو بكلمة او نظرة و دايما بيحاسبوا نفسهم و صعب عليهم يغلطوا و لو غلطوا بيبقوا ندمانين اوى اوى
هما مش بيحاسبوا نفسهم عشان كدة دايما بيحتاجوا يحسوا ان فيه حد بيحاسبهم و يقول لهم الصح من الغلط حد يفكر بدالهم و يمشوا وراه
ممكن تقلب بمرض ما يفهموش ابدا ان فيه ناس كتير مختلفة عنهم و ممكن ضميرهم يمنعهم من الغلط مش زيهم محتاجين حد يرسم لهم الطريق من قبل ما يفكروا يمشوه
هى دى نقطة الخلاف .... هما عاوزين طول الوقت حبل يتسحبوا منه زى البهايم و احنا رافضين الحبل ده عشان بنحس اننا مش محتاجينه و اننا من غيره حنقدر نعرف طريقنا كويس و حتى لو غلطنا او مشينا فى طريق غلط فالغلط مردود ما دامت النية سليمة
طبعا مش كل احنا مننا و مش كل هما منهم ...... بس نعمل ايه اذا كانوا فى كل مكان زى الجراد ؟؟
حد فاهم حاجة يا انتم ؟؟
1 comment:
رائعة يا بدوي
اعتدت ان اقول جملا تشابه ما ورد فيها لوالدي حين يتشعب حواري معه ويصل الى مسالة الحبل الذي نرفضه (نحن)ويحتاجونه (هم)لنفس الاسباب التي ذكرتها تحديدا
لك كل مودتي وخالص احترامي
Post a Comment