عندما تكلمت عشتار

قالت عشتار : لو بس نبطل نرفع يفط و شعارات و نبتدى نبص و نركز فى الحقيقة المستخبية تحت الشعارات و اليفط دى ... ياااه ده احنا كنا حنتعب أوى لأن الحقيقة مرة أوى

تقريبا كل واحد رافع يافطة و ماشى بيها بيغطى بيها حقيقة مخالفة للى مكتوب عليها

اللى رافع يافطة اسلامية و هو معدوم الأخلاق تماما
اللى رافع يافطة ليبرالية و هو ديكتاتور - زى اللى بينقل لكم كلامها دلوقتى - بشكل بشع
اللى رافع يافطة التحرر من الدين و العادات و هو حياته كلها مش بتدور - سبع أشواط - غير حوالين الدين و العادات
و اللى بيفتخر جدا أنه ضد تعدد الزوجات و هو بيتمنى أو بيفتخر بتعدد العشيقات
و اللى بتصرخ ليل و نهار دفاعا عن حقوق المرأة و هى بتحلم براجل يديها على دماغها عشان تعبده

للأسف كل ما الحقايق بتبان أكتر كل ما الوجع و العزلة بيزيدوا و كل ما بتحاول تبقى نفسك و تبقى صادق و حقيقى كل ما الدنيا بتوجعك أكتر

قلت : المشكلة الأكبر بتبقى مع اللى رافع يافطة و مصدقها و بيتوصم عشان حواليه كدابين كتير
الاسلامى اللى عنده أخلاق بجد
الليبرالى اللى حر بجد
الانسان اللى انسان بجد .. هو أكتر واحد مظلوم فى الفوضى دى

**************************

**

سألنى : أنت ليه بتكتب ؟ ... أنا شايف أن مفيش تغيير ... و الكلام الكبير ممكن تكدب بيه على أى حد الا نفسك ... واجه الحقيقة .. كل ده وهم كبير عايشين فيه

قلت : أنا بكتب عشان ألاقيك
ممكن أقول مليون سبب أنا بكتب عشانه .. بس جزء من الحقيقة انى بكتب عشان حاسس بالوحدة ... و محتاج أقابل ناس صادقة و حقيقية و معنديش صبر أستنى لما أقابلهم فى الواقع .. يمكن لو استنيت عمرى ما حقابلهم ,,,, أنا كنت بكتب فى البداية عشان ألاقى نفسى ... بقيت بكتب عشان ألاقيك و ألاقى صحابى التانيين الحقيقيين و لو بس حنتقابل فى عالم خيالى

التغيير بيحصل بيحصل .. حتى لو متنا حيفضل يحصل .. بس أجمل بكتير و احساس حقيقى أنك تبقى جزء من التغيير ده .. الانسان بيتحرك عشان مصلحته - حتى المتدينين بيتحركوا عشان مصلحة مؤجلة فى الآخرة ... و مفيش مصلحة أكتر من احساس لذيذ حقيقى أن وجودك عامل فرق و أنك كيان انسان

*****************************

قالوا : يوم القيامة كمان سنتين
قلت : و ايه يعنى ؟ ... يعنى أنت ضامن أنك حتعيش السنتين دول بحالهم يا أخى ؟

****************************

سألت نفسى : هو أنا ليه كدة ؟ ... ياريت كنت بمثل
فرحان انى مش بمثل و أنى ما اتوسختش لسة زى ما قال مايكل لكن خايف لييجى يوم أتحول لتمثال معمول فى قالب من فخار .. يا خوفى يا بدران