يعنى ايه جمال مبارك ؟

السؤال ده سألته البنت اللى بألف راجل اللى اسمها أسماء محفوظ

خضنى شوية لأنه بسيط جدا و عميق جدا فى نفس الوقت و يحتمل مليون اجابة
بس أنا حاولت أجاوب على قد فهمى

جمال مبارك مش كشخص قد نحترمه - أو لأ - على المستوى الشخصى .. لكن جمال مبارك كرمز لعصر و طريقة تفكير و لأسلوب حياة

يعنى ايه جمال مبارك ؟


يعنى الواسطة و المحسوبية فى أنقى - عفوا أقذر - صورها

يعنى لما ابن طبيب يتعين طبيب من غير ما يكون مجتهد ولا شاطر و لا عنده مؤهلات كفاية
فيبقى سرق حق حد غيره - زميله - أشطر منه أنه يتعين طبيب و يبقى سرق حق الناس أن دكتور حقيقى بمؤهلات حقيقية يعالجهم

يعنى لما لوا شرطة يدخل ابنه الحشاش البلطجى كلية الشرطة عشان لما يتخرج يكمل بلطجة على خلق الله بقوة منصبه اللى أخده بالغصب و بالتوريث

يعنى لما ممثل كبير يدخل ابنه أبو دم تقيل فى مجال الفن فيقوم الواد الابن يخنق الجمهور و يكرههم فى الفن و الفنانين ,,,, فما بالك لما يكون الفنان مش كبير ولا حاجة و يكون بدأ حياته كومبارس و وصل بالصدفة ؟

يعنى ايه جمال مبارك ؟


يعنى غباوة الأمن المركزى لما يضرب الناس و هما بيطالبوا بحقوقهم

يعنى وساخة أمن الدولة لما يبتز حد أو يرشى حد أو يهدد حد عشان يتحكم فيه و يكسر عينه و يخليه مخبر حقير شغال بريموت كنترول

يعنى سادية ضابط مباحث معتوه بيعلق واحدة ست لا حول لها ولا قوة فى القسم و ينزل فيها ضرب عشان تعترف بجريمة ماتعرفش عنها حاجة .. أو عشان تقبل تنتازل عن حاجة لا تملك التنازل عنها

يعنى ايه جمال مبارك ؟


يعنى سطحية و تفاهة الجمهورية

يعنى عفونة و دعارة روزاليوسف

يعنى نفاق الأخبار و خنق ضمير المصرى اليوم

يعنى قتل البديل و الغد و الشعب !!

يعنى ايه جمال مبارك ؟


يعنى اقصاء أهل الثقة - بعد اقصاء و اخصاء أهل الخبرة - ليحل محلهم أهل البيت

يعنى منظر العملة الرديئة و هى بتحاول و تجاهد - مش عشان تكون عملة جيدة .. لأ - عشان تغطى على العملة الجيدة و تطردها من السوق

يعنى ايه جمال مبارك ؟


يعنى الكدب و التلفيق و التشهير بالناس بالباطل
يعنى زرع المرض فى الأبدان و اليأس فى النفوس و الجهل و التطرف فى العقول عشان استمرار البقاء و القلوظة فوق الكرسى
يعنى اللى فيها تجيبه فيك ... تزور أمريكا كل سنة مرتين تلاتة فى السر و تتهم غيرك بأنه بيواليها
يعنى تبيع موارد بلدك - بدون وجه حق - برخص التراب عشان مصلحتك الشخصية
يعنى تقول كلام و تعمل عكسه
يعنى تمارس التزوير و تلفق لغيرك قضايا تزوير


يعنى ايه جمال مبارك ؟


يعنى نشرة أخبار مفيهاش كلمة صدق واحدة

يعنى جرايم من غير عقوبات و عقوبات من غير جرايم

يعنى تبقى قاعد على القهوة عاطل و بتقرا أخبار النجاح الاقتصادى بالبنط العريض و من غير ذرة خجل واحدة


يعنى ايه جمال مبارك ؟


يعنى مصر مستقرة .. فى القاع

يعنى مدرستى نظيفة .. من التعليم

يعنى فريق كورة فاز .. لكن بفضل توجيهات الرئيس


يعنى - ببساطة - ابن الدكتور عمل العملية و نجحت .. لكن المريض مات

 

النوت الأصلي والتعليقات

الحملة المصرية ضد التوريث لحظة بلحظة

اعلان بدأ تعقب مشروع التوريث من باب الشعرية 7 أكتوبر 2009
http://www.youtube.com/watch?v=j1oKnCvpHAY


تغطية قناة مايحكمش للمؤتمر التأسيسى للحملة ضد التوريث 14 أكتوبر 2009
http://www.facebook.com/video/video.php?v=160976212065


تقرير برنامج العاشرة مساء عن المؤتمر التأسيسى للحملة ضد التوريث
http://www.youtube.com/watch?v=GSdjguUeHa8


تصريحات خاصة من المشاركين فى الحملة لقناة مايحكمش
http://www.youtube.com/watch?v=p9GmnxlHnCI


اعلان انضمام حزب الجبهة الديمقراطية للحملة ضد التوريث
http://www.facebook.com/video/video.php?v=164833587065


د.حسن نافعة (منسق اللجنة التحضيرية) يتحدث عن خطوات الحملة و برنامجها خلال السنتين القادمتين
http://www.youtube.com/watch?v=DH8hq5CTAoM


د.علاء الأسوانى - الناس مش مبسوطة و تشعر أنها تستحق ما هو أفضل - مصر مش عزبة
http://www.youtube.com/watch?v=SKrZNzC7edo


أ.جمال عيد - لا ديمقراطية مع التوريث - جمال مبارك أكيد مش اختيار الناس
http://www.youtube.com/watch?v=SV9-NihIGyY


الدكتور ابراهيم زهران - أشارك فى الحملة المصرية ضد التوريث من أجل دولة ديمقراطية
http://www.youtube.com/watch?v=Fxigv8SOHjY


الأستاذ محمد شرف - على جمال مبارك أن يراعى أننا لسنا أرث أو مطية
http://www.facebook.com/video/video.php?v=167524812065


النائب أبو العز الحريرى - وقفنا ضد مبارك من قبل و نرفض توريث سياساته
http://www.facebook.com/video/video.php?v=167613277065

ضياع

فقدت القدرة علي الكتابة والقدرة علي الحب ، فقدت القدرة علي أن أدخل الأشخاص الي حضانات قلبي و أصبحت جافا كورقة الشجر اليابسة تطؤها الأقدام فتحطمها

لم أعد أشعر بالأشياء بل أضعها في توابيت التصنيف الحسابي

لم تعد المشاعر الدافئة تدفئني بل تثير في كل مخالب الحذر و التحفز للقتال

أفقد رويدا رويدا تلك اللمسة السحرية التي طالما ميزتني عمن سواي .. لمسة الانسانية الحقة

أنني أفقد انسانيتي و أسوأ ما في الموضوع أنني أعي ذلك و أتألم له في كل لحظة ألف لحظة

 

لمشاهدة النوت الأصلي والتعليقات

 

ليلة امبارح

محتاج حضن دافي يديني دعم و تأييد من غير حدود ولا أسئلة ولا جدل

تعديلات الفيس بوك الجديدة غبية جدا وضيعت مجهود كبير لناس كتير في الجروبات

مشاعري بدائية جدا في ناحية الشغل ، يا أبيض يا أسود ، ودي مصيبة في ذاتها

 

النوت الأصلي

نعمل ايه عشان مايحكمش ؟

أول حاجة ممكن نعملها هى انجاح مؤتمر القلة المندسة اللى حتعمله حركة 6 أبريل و الموازى لمؤتمر أحمد عز لأن انجاح المؤتمر ده له معانى كتير ايجابية و مؤثرة

ممكن بعد كدة ننشر فكرة الحملة و الشعار فى كل حتة على النت و برة النت .. نطبع اللوجو على بوسترات و نحطها فى كل مكان .. على عربياتنا على مواقعنا و مدوناتنا .. على صور حسنى مبارك فى الشوراع و الميادين و فى الكليات و المعاهد

نبدأ نتكلم مع الناس عن خطورة التوريث و مفاسد الحزب الوطنى و بلاويه فى كل مكان فى مصر و خطورته على مستقبلنا

نذاكر الموضوع كويس و نعرف احنا ليه مش عاوزين التوريث و ايه هى حجج الحزب الوطنى و ايه هى المقولات المأثورة زى "ده سرق وشبع" و "اللى نعرفه أحسن من اللى منعرفوش" لحد مقولة أن الدستور بيشترط فى المرشح أن والده يكون رئيس سابق للجمهورية و نعرف الردود عليها كويس

نعرف "انجازات" الحزب الوطنى فى السنين اللى فاتت .. نعرف أكاذيب الرئيس مبارك و مغالطاته و وعوده اللى لم و لن تتحقق لغياب الارادة و الكفاءة

نكتب مواضيع و مقالات و أشعار و نعمل فيديوهات و أغانى ضد فكرة التوريث و مع فكرة الحرية و الكرامة و نربط بينها و بين موقع الحملة و نختار منها أفضل الحاجات و نطبعها و نوزعها على الناس اللى مش بتدخل على النت و مش بتقرا غير جرايد الحكومة

نعرف الجرايد اللى بتدعى الحياد و هى بتعمل تلميع لجمال مبارك بشكل مباشر زى المصرى اليوم و غيرها و نفضح كذبها و تلاعبها بالأخبار

ممكن نبدا بعمل مجموعات صغيرة تبدأ تلف على القهاوى و النوادى و تشرح الكلام ده للناس و مجموعات تانية تتصل تليفونيا بأرقام عشوائية أو يتم تنظيمها بأى شكل و تفتح الموضوع ده و تتكلم فيه

ممكن ناس ليهم فى الموسيقى يعملوا أغانى مخصوص تشرح معانى الديمقراطية و حرية الرأى و يبتدوا ينشروها بين الناس

ممكن ناس ليهم فى الفلاش و البرمجة يعملوا ألعاب كمبيوتر بسيطة ضد رموز الحزب الوطنى و ينشروها على المنتديات

لو حد يقدر يجيب أحاديث و آيات من القرآن و الانجيل ضد الظلم و الفساد و الاستبداد يبعتها لموقع الحملة

لو حد يعرف وقائع فساد جوة الحزب الوطنى ينشرها و يبعتها لموقع الحملة و احنا ننشرها

لو حد يعرف لغات ممكن يترجم لنا المقالات المهمة باللغة اللى هو يعرفها عشان ننشرها و العالم يقراها

=========

الخلاصة ...... فيه مليون حاجة ممكن تتعمل و مش محتاجين نستنى لحد ما اللجنة التحضيرية تعلن تقسيم الأدوار و اللجان

أول شكل رسمته بالقلم الجاف

 

المقال الأصلي

أهداف الحملة المصرية ضد التوريث

الهدف الرئيسى للحملة المصرية ضد التوريث هو منع عملية توريث مصر سواء لجمال مبارك أو لغيره من جنرالات الفساد و الاستبداد السياسى المتحكم فى مصر من خمسين سنة

ده الهدف الرئيسى الجامع لكن الأهداف الفرعية كتير منها

أولا : استعجال الحزب الوطنى لاعلان ترشيحه لجمال مبارك و ارباك حساباته و موقفه الغير واضح و اللى بيستخدمه - كالعادة - لكسب الوقت , و الهدف ده ظهر نجاحه فى شراسة الدفاع عن جمال مبارك من الحزب الوطنى على الأقل على الفيس بوك و ظهور الحملات المؤيدة له كرئيس قادم و اللى أعتقد أنها كان مقرر لها البدأ قبل ميعاد الانتخابات بوقت قليل

لأن كان فيه ناس كتير مش قادرة تتأكد - أو بتدعى ذلك - اذا كان جمال مبارك حيرشح نفسه ولا لأ ... و بعد حملة الدفاع المستميتة من الحزب الوطنى أصبح ده أمر لا جدال فيه

و تحقق هدف تانى لم يكن فى الحسبان هو تحويل موقف الحزب الوطنى من الفعل الى رد الفعل كأى حزب معارض صغير فى الساحة لا يملك أى شعبية أو كوادر و اظهار مدى ضحالة و تفاهة المدافعين عنه و لجوءهم لأساليب اعتباطية زى وصف الحملة بأنها ضد الاسلام و أنها تفريق لشمل الأمة الاسلامية و كلام عبيط كدة كتير و ظهر عدم وجود أى وسائل دفاع عندهم غير الوسيلة الأمنية بعد ما لجئوا لتصوير الحملة على أنها تعاون بين أيمن نور و الأخوان رغم وجود قيادات يسارية كبيرة و ليها وزنها فى المؤتمر التأسيسى زى النائب حمدين صباحى و غيره كتير من مختلف أطياف العمل السياسى فى مصر

ثانيا : كشف قيادات الأحزاب المنافقة و المتاجرة بمواقف أحزابها فى قضية حيوية زى دى .. و ده نجح و حينجح أكتر مع استمرار مواقف الأحزاب الرسمية\الحكومية و زيادة سخط أعضاء الأحزاب و رفضهم للتوريث و رفضهم لقبول قياداتهم بيه

و يوم المؤتمر حضرت مجموعة من شباب حزب الوفد تحت اسم وفديون ضد التوريث معارضة لموقف قيادات الحزب فى الموافقة على تمرير التوريث مقابل - كالعادة - مكاسب شخصية ضيقة

ثالثا : و هو الأهم .. اعادة الحياة للوضع السياسى فى مصر لأن بعد 6 أبريل 2009 الناس بتوع السياسة رجعوا ناموا و الشباب النشط انشغلوا فى مشاكلهم الخاصة و سايبين الحكومة فى مواجهة الاحتجاجات الشعبية من غير ما حد يحاول يدير الوضع بشكل سياسى و كان يبدو كما قال د.عمرو حمزاوى فى زيارته الأخيرة لمصر أن الوضع بدا مستتبا للحكومة و لأى مشروع تنوى فرضه على الشعب دون أن تجد أى ممانعة حقيقية

و ده تحقق من كم الاتصالات و الايميلات اللى بتطلب من ادارة الحملة تحديد خطط عمل و تشغيل الناس فيها و من كم المقالات اللى بتيجى للموقع كل يوم و من حماس شباب كتير جدا بيعرض المساعدة بكل ما يقدر عليه

وتحقق أيضا من بدأ تأسيس حركات جديدة - بخبرات قديمة مكتسبة - زى شباب ضد التوريث و شعراء ضد التوريث

رابعا : و ده هدف جانبى و هو التدريب العملى لمجموعة العمل الأساسية فى الحملة - حتى الآن - على شن حملة انتخابية حقيقية بطرق غير تقليدية لمرشح معارضة قوى فى مواجهة جمال مبارك و تدريب على العمل المشترك بين فصايل و أشكال المعارضة المختلفة من يمين و يسار و شباب و كبار لمواجهة المشروع الحكومى\الأمنى للسيطرة على مستقبلنا

خامسا : بناء كوادر شبابية سياسية جديدة طازة قادرة على استخدام وسائل الاتصال الحديثة لبناء شبكة اتصال و تواصل قوية و ده جارى العمل فيه

من الأهداف دى نقدر نطلع بطرق العمل و الآليات اللى متناسبة معاها و تحققها بشكل ناجح

تابعونا فى الجزء التانى - طرق العمل المقترحة

 

 المقال الأصلي والتعليقات

ساعات ساعات

ساعات بحس اني طور وساعات تانية دكتاتور

ساعات حويط ساعات عبيط

ساعات شجاع ساعات ضياع

ساعات شديد زي الحديد و ساعات وحيد و مش مفيد و لا مستفيد

ساعات ظلوم ساعات غشوم ساعات رجيم و ساعات رحيم

ساعات ساعات بحب عمري وأعشق الحاجات و ساعات ساعات بكره حياتي و ألعن الي فات

ساعات ساعات ، تضيع الساعات و ساعات ساعات بتمني الممات

ميحكمشى و مش حيحكم

مختفى انا بقالى فترة و ناس كتير بتسألنى ايه سبب اختفائى .. السبب هو أنى مشغول جداااا فى كذا موضوع ليهم علاقة بمستقبل مصر السنين الجاية

أهمهم و أخطرهم هو الحملة المصرية ضد التوريث اللى اخترنا ليها اسم مصرى صميم و معبر جدا هو ( ميحكمشى ) و الصراحة اللى أوحى لينا بالاسم ده هو الفنان العظيم أبو كرش اللى كان بيغنى الأغنية الوطنية العظيمة - تقفيل الوطنى يعنى - : ( طيب ليه ميحكمشى ؟ )

http://www.youtube.com/watch?v=B8RRLer9KoI

و احنا بس حبينا نجاوب السؤال الفلسفى العميق ده و نقول له هو ليه مينفعش ولا حينفع ولا أصلا يفكر يحاول أنه يحكم مصر لأن 30 سنة من الخراب و الفشل - المتعمد أحيان كتيرة - على ايد الأب حتمنع الابن من أنه يعرف يقنع أى مواطن بأنه حيطبق أى برنامج اصلاحى يتبناه ( فما بالك و هو أصلا مش عنده أى برامج لا اصلاحية ولا سياسية أساسا ؟)

بدأنا العمل النشط جدا فى حملة (ميحكمشى) لرفض التوريث اللى حيبقى مؤتمرها التأسيسى يوم الأربعاء 14 أكتوبر 2009 فى مقر حزب الغد و حيحضره عدد ضخم جدا من الشخصيات العامة و القوى الوطنية السياسية و غير السياسية

تصميم سارة

الدكتور أيمن نور بقاله أسبوع تقريبا بيلف بنفسه على رموز القوى الوطنية و الأحزاب و النقابات و الشخصيات العامة و الجرايد المستقلة و شبه المستقلة

زار الوفد و الناصرى و الأخوان و الجبهة و الجزيرة و هيكل و د.حسن نافعة و و ابراهيم عيسى و عبد الحليم قنديل و أعتقد الوسط و غيره و غيره عشان يدعيهم للمؤتمر و كل الناس رحبوا و قرروا يشاركوا و على حسب علمى مفيش حد فيهم اعتذر غير السفير ابراهيم يسرى لظروف صحية

أنا معرفهمش كلهم طبعا .. بس بجد بذلنا مجهود كبير جدا فى الاعداد لليوم ده اللى احنا

ــ احنا دول مجموعة من الشباب اللى من انتماءات سياسية و حقوقية و حزبية و غير حزبية و بخبرات مختلفة تماما مش بيجمعنا غير حب مصر ــ

مصممين ننجحه بكل الطرق و أول بشاير النجاح كان هو رعب الحزب الوطنى و تحول أعضاء الحزب الوطنى لأول مرة فى تاريخهم لمقاعد المعارضة ( اللى حيفشلوا فيها زى ما فشلوا فى مقاعد السلطة قبلها لخمسين سنة ) و اعتراضهم على مؤتمرنا بمؤتمر تانى عبارة عن تجميع لقاموس كل الشتايم الأمنية اللى اتربوا عليها فى روزا اليوسف و بقية جرايد امن الدولة بتاعتهم

و أنا عاوزكم تدخلوا تتفرجوا بنفسكم لأن دى أحسن دعاية لمؤتمرنا و لحملتنا

http://www.facebook.com/inbox/?ref=mb#/group.php?gid=175156677993&ref=share

تصميم مينا جورج

احنا مش بس لجأنا للطرق التقليدية القديمة أو المعروفة أو حتى اللى تم استخدامها قبل كدة لنشر الدعوة للحملة و المؤتمر على النت و فى الواقع

لكن كمان و لأول مرة و بفضل مجهود مجموعة من الشباب المصرى الحر الكفؤ ( اللى مش عارف حيحبوا أقول اساميهم ولا لأ ) حنبث قناة تلفزيونية مخصوصة على النت لمدة 6 ساعات يوميا اسمها ميحكمشى تى فى

http://www.did-eltawrees.tv

القناة دى حتعرض كل شغل الحملة و حتبقى متخصصة فى ملاحقة مشروع التوريث و فضحه و حيبقى الموقع ده تجميع لكل جهود الناس الرافضين للتوريث سواء بالكتابة أو بالشغل فى الشارع

مش بس كدة .. دى كمان حيبقى فيها أغانى و مسرحيات و شغل تلفزيون بجد مش هزار

عشان كدة عاوزين من كل الرافضين للتوريث من اى تيار و خصوصا من الشباب الغير منتمين لأى تيارات سياسية و معندهمش دافع غير حب مصر أنهم يساعدونا فى تقييم القناة و امدادها بالبرامج الجديدة و الصور و الفيديوهات و الأفكار من داخل و خارج القاهرة ومن داخل و خارج مصر

حاجة تانية حبقى فخور بيها طول عمرى زى ما أنا فخور أنى من مؤسسين حزب الغد و فخور أنى مؤسس جروب مش عاوزين جمال مبارك .. هى أن شعار الحملة - اللوجو - فكرتى .. تاج ( رمز الملكية ) و عليه علامة ( ممنوع ) و تحته كلمة ميحكمشى و عنوان السايت

شعار الحملة بخط ايدى

معناه واضح و بسيط و هو أن العودة للملكية ممنوعة .. العودة للتوريث ممنوعة .. جمال مبارك لو حيورث يبقى يورث جثثنا أحسن .... الشعار ده ميزته أنه بسيط ممكن يترسم بالايد أو بالفوتوشوب و سهل أوى ينتشر فى كل حتة فى مصر و كل العربيات و بالذات الطلبة فى الكليات يعلقوه مع كلمة ميحكمشى و المدونين يحطوه فى مدوناتهم

حبقى مبسوط جدا جدا من أصحابى اللى كانوا زعلانين انى اختفيت الفترة اللى فاتت لو كلهم خلوه صورة بروفايل و بدأوا ينشروه فى كل الجروبات و المواقع بتاعتهم دعما للحملة سواء قبل او بعد يوم المؤتمر

يا ريت كلنا نشترك فى رسم نفس الشعار بصور مختلفة و متنوعة و نبدأ نوزعه فى كل حتة عشان الناس تعرف أن مصر مش عزبة و مش تركة حيسيبها الفاشل العجوز للفاشل الصغير أو لأى فاشل تانى من شلة الفشلة اللى خاطفة البلد من خمسين سنة

آخر حاجة حبيت أقولها قبل ما أنهى النوتة دى جروب مش عاوزين جمال مبارك هى الجروب الرئيسى للحملة لأن عدد أعضائها قرب من 11 ألف عضو .. لكنها مش الجروب الوحيد .... فيه أكتر من عشرين جروب بآلاف الأعضاء ضد التوريث و ضد الحزب الوطنى و احنا بنرحب بالتنسيق مع الجميع عشان نطلع حملة محصلتش فى تاريخ مصر سواء داخليا أو خارجيا

أحمد بدوى
12 أكتوبر 2009

الفاشل أبو الفاشل حيعطشنا

حضرت امبارح ندوة للدكتور ابراهيم زهران في باب الشعرية عن أزمة مياه النيل

الندوة كانت مليانة بلاوي ومعلومات مفزعة عن مستقبل مصر

بس أنا باختصار حتكلم عن الخساير اللي خسرناها بسبب الاهمال و اللي كان في امكاننا تجنبها لو عندنا حاكم قابل للمسائلة و التغيير!

مبارك الي زار ايطاليا أربع خمس مرات في شهر واحد مازارش أثيوبيا - منبع النيل- ولا مرة من ساعة محاولة اغتياله الفاشلة

مصر اللي رفضت مد النيل لاسرائيل أيام السادات هي اللي حتطلب من اسرائيل تفتح لنا المياة بعد ما اسرائيل اتصرفت طبيعي جدا و عملت علاقات دبلوماسية واقتصادية مع أثيوبيا

مبارك الي سافر الكويت كذا مرة عشان يعزي في واحد مات من العيلة المالكة وابنه الي بيسافر أمريكا علي حسابنا عشان يقدم فروض الغباء والطاعة مفكروش يخطفوا رجلهم لشريان حياة المصريين ! يعني هو كان المصريين من بقية أهلهم ؟

مبارك الي بيستغل مشاكل الفلسطينيين عشان يساوم علي استمراره في الحكم مضيعش نص الوقت الي ضيعه في اجتماعاته مع أبو مازن وأبو حزقة في اجتماعه مع رؤساء أفريقيا


استدراك هام :

السيد وزير الري بيطمنكم أن المياه حتكفي مصر لمدة 6 سنين جاية

طلبى الوحيد .. حبس انفرادى المرة دى

بوضب الاوضة زى الشطور لقيت شطة مليانة جرايد , المصرى اليوم على الدستور على الاهرام

طلعت الجرايد اللى طلعت و انا محبوس و كانوا شايلنها عندى فى البيت عشان لما أخرج أقراها و لحد دلوقتى ماقريتهاش برغم انى بحب القراية يعنى

بعد شوية بدأت أوضب الدولاب فخرجت كل الهدوم برة عشان اضبطه على رواقة - دى حاجة محصلتش من السبعينات - فلقيت هدوم السجن كلها و الطقية البيضا اللى كنت بحبها اوى و دورت عليها بعد السجن ملقتهاش

المشكلة انى من يومين كنت بحكى للدكتور أيمن أنى خرجت من السجن و حالتى النفسية زى الزفت و احتجت فترة علاج طويلة - مع دكتورة منال - عشان ارجع لطبيعتى و خسرت فيها كل صحابى اللى عرفتهم قبل السجن تقريبا و هو قاللى يابنى انت اتحبست شهر .. انا - هو يعنى - كان بيعدى عليا الشهر ده بسرعة

قلت له يا دكتور أصل أنت متعرفش الناس اللى كنت محبوس معاهم عاملين ازاى
احنا كنا 25 حالة كل حالة فريدة من نوعها تماما

اللى شاذ جنسيا و مضطرب نفسيا و كان بيتحرش بينا بجد
و اللى كان مسجل خطر اتمسك بالغلط لأنه شاف زحمة و بوليس يوم الاضراب فطلع فوق بوكس كهربا و قعد يشتم عشان كان شارب حاجة
و اللى كان عسكرى طالع من الخدمة جديد و جى من قريته و عمره ما سمع كلام سياسة فى حياته
و اللى شيخ تبع الجماعات الاسلامية لما اتمنع عنه السلاح بقى امين حزب اشتراكى اسلامى و كان بيقول لنا التغيير مش حييجى غير بالسلاح
و اللى اشترى عربية و ركنها تحت بيته عشان لما تمن البنزين يغلى يحس أنه وفر تمنه
و اللى بيقول أنا اشتراكى شيوعى ديانتى ماركسى و مؤمن بالدولة الاستالينية و عضو فى كفاية من سنة 2000
و اللى كان مبلغ عن نفسه عشان الحبس حيدى له شهرة و الشهرة حيترجمها بعدين لفلوس
و اللى كان مسيحى شيوعى فى حزب اشتراكى اسلامى
و اللى قعد مكتئب 30 يوم مفرحش مرة واحدة على سبيل الخطأ
و اللى ملحد و بيألف قرآن جديد
و اللى اخوان و مخبى عشان بتوع حزب العمل ما يقلبوش عليه و يضطهدوه

يا لهوى .. ده احنا كل واحد فينا ممكن يتكتب عنه كتب مش سطر فى مذكرات

أنا نفسى اللى عامل الدوشة دى كلها دلوقتى كنت من أهدا الناس وقتها

فتخيل بقى المنظر كان عامل ازاى .. هو احنا كنا مسميينه عنبر العقلاء من فراغ ؟

أمانة عليكو يا جدعان لو اتحبست تانى طالبوا بأنه يكون حبس انفرادى و النبى و النبى

المقال الأصلي والتعليقات على الفيس بوك

عن القيادة

وجود انسان كامل هو أمر خارج حدود المنطق ، ليس فقط لأن المميزات العظيمة في النفس البشرية دائما ما يقابلها عيوب عجيبة في ذات النفس ، و لكن أيضا لأنه لا وجود لتعريف محدد للكمال فما تراه أنت أمرا في قمة العظمة يراه أخاك أمرا عاديا مستهلكا

لذلك فأن وجود قائد كامل الصفات أمر غير متاح ولكن في نفس الوقت وجود قائد عظيم هو أمر طبيعي و ضروري لدفع عجلة الحياة للأمام لأننا أبعد ما نكون عن ذلك الزمان الذي يصير فيه الجميع مؤهلين لادارة الشئون العامة بقدر متساوي
يتبع

المقال الأصلي على الفيس بوك

حق 7 مليون معاق و 80 مليون مُغتَصَب

حركة 7 مليون حركة حقوقية للمطالبة بحقوق المعاقين بكافة و مختلف أنواع اعاقتهم فى مصر

http://www.facebook.com/posted.php?id=512682065&share_id=145790996541&comments=1#/group.php?gid=133171907438

الاحتفالية كانت فى يوم الجمعة 2 أكتوبر بدأت ب"دش" بارتى للتعارف و عرض المطالب و بعد كدة مسيرة صامتة على كوبرى قصر النيل

كالعادة المسيرة كانت حضارية و فى شدة الاحترام و العيال المكفوفين أحمد و شادى و محمد على كانوا ماسكين ايدى و مقضيينها أغانى قديمة جميلة معرفش جابوها منين ...

لكن الأمن "المصرى" مكانش له أى علاقة بالتحضر ولا بأى صفة محترمة لأنه بيتصرف على أساس ثابت و هو أن المواطن المصرى مجرم خطير - او حقير - لازم تقييد حريته و كسر ارادته و اذلال كرامته حتى لو كان جزء من حريته أصلا مفقود بسبب اعاقة ما سواء سمعية أو بصرية أو حركية

الناس مشاكلهم سهلة الحل لو كنا فى دولة بتحترم مواطنيها .. بس لأننا دولة الفساد و الاستبداد واكلها من فوقها لتحتها و على كل المستويات بقت عيشتهم - زى عيشة أغلب المصريين - قطعة من الجحيم المستمر المتوالى

- اللى طالع الرابع على دفعته و مش لاقى شغل بسبب اعاقته .. مع أن اعاقته ملهاش علاقة بنوع شغله ولا دراسته تماما و مع ان القانون بيكفل له نسبة فى التعيين

- و اللى مطلوب منه رشاوى بالألوفات عشان ياخد حقه القانونى و الشرعى - اللى هو مش منة من حد - فى عربية أو سكن ملاءم لظروفه

- و اللى أخد ميدالية ذهبية لمصر فى أوليمبياد المعاقين و لما رجع اشتغل سايس فى جراج

- و اللى مش بيقدر يتفسح فى الشارع يوم عيد - فضلا عن الخروج من بيته فى بقية أيام السنة - عشان مفيش مطلع عجل على الأرصفة ( يا ترى ده يكلف الدولة كام مليار من المليارات اللى بتتصرف على تجميل السيد جمال زفت و رحلاته لأمريكا ؟ )

و اللى و اللى و اللى

كلها حاجات مش بتقطع قلبى لأن الناس دى مش محتاجين لا شفقة ولا احسان .. الناس دى عندهم ارادة و كرامة و عزة نفس أكبر من كل اللى معتقدين نفسهم غير معاقين و هما فى الحقيقة خرس فى مواجهة الظلم و عمى عن الحق و مشلولين فى مواجهة الاستبداد و الفساد اللى بينخر فى حياتهم

المعاقين محتاجين ياخدوا حقوقهم القانونية و الشرعية زى ما بقية المصريين ما محتاجين ياخدوا حقوقهم القانونية و الشرعية

المواقف والمشاكل اللى اتحكت لى دى كلها بتحسسنى بغضب و كره و قرف زيادة ضد النظام الحاكم الحرامى الكذاب الفاشل فى مصر اللى ناجح بس فى حبس الناس و تجييش الأمن الغبى ضدهم

بعينك يا حيوان
محاولة فاشلة من ضابط فاشل و تافه أنه يخطف الموبايل من ايدى و أنا بصوره و هو بيعمل حملة ارهاب على مسيرة صامتة لحركة 7 مليون
بس ربنا بقى شاء أن الضابط بحركته العبيطة دى ادانى احلى لقطة ممكن أصورها لضابط شرطة عبيط

a failure trial from a stupid police officer to kidnap my mobile from my hand while i was taking pictures of him when he was terrorizing a silent march for 7 million movement
but he actually gave me the best shot ever

http://www.facebook.com/photos/?ref=sb#/album.php?aid=124457&id=512682065
http://www.facebook.com/notes.php?ref=sb#/note.php?note_id=141473428033
http://www.facebook.com/group.php?gid=133171907438

وللأسف بقيت كل يوم بزداد اقتناعا أن اسقاط النظام ده و استبداله بنظام ديمقراطى حر فرض واجب لا يمكن التهاون فيه ولا تأجيله بأى حجة .. بقول للأسف لأنى حاسس بحجم المسئولية اللى مفروضة عليا و حاسس قد ايه أنا أقل منها بكتير

بس برده .. بوعد نفسى أن كل يوم حفضل فيه حى حقاوم فيه الاستبداد و الظلم بكل الطرق المتاحة

المقال الأصلي على الفيس بوك والتعليقات

اللي سرق وشبع

اللى سرق و شبع

أول حجة دامغة يسوقها مؤيدى خلافة السيد جمال مبارك أمين السياسات فى الحزب الوطنى لوالده السيد الرئيس محمد حسنى مبارك هى أن ده سرق و شبع و اللى حييجى بعده حيسرق من أول و جديد

و هنا لابد من توضيح عدة توضيحات واضحة لكل بنى آدم واضح مع نفسه

أولا .. لما هو سرق .. مش مفروض يتحاسب ؟
ولا احنا بنطبق بالضبط اللى حذر منه النبى بأن اللى لو سرق كبير القوم نسيبه و لو سرق الضعيف نحاسبه ؟

يعنى أنتم معترفين أنه حرامى كبير .. طيب ازاى مش عاوزيننا نحاسبه على السرقات اللى سرقها ؟ يا عالم يا باردة حسوا على دمكوا شوية .. بتتسرقوا و مبسوطين اوى ؟

ثانيا .. هل هو شبع فعلا ؟ .. يعنى هل مبارك بطل سرقة و استنزاف موارد البلد لمصلحته و لمصلحة عيلته و لمصلحة المؤسسات اللى بيقوم عليها ملكه ؟

الداخلية بتاخد كام مليار فى الميزانية ؟ ,, أكبر من التعليم ,, ليه ان شاء الله ؟ أكيد الأمن مستتب و مفيش جرايم طائفية ولا هروب بالمليارات برة البلد ولا تجارة آثار على ودنه ولا دعارة ولا سفاحين ولا تحرشات

المشكلة أن كل ده موجود !! .. طيب يبقى فلوسنا بتروح فين ؟
مرتبات و بدلات السادة الضباط كام ؟

هل هو شبع فعلا ؟ .. هل عصابة الحزب الوطنى شبعت ؟ .. هل عصابة اللاأمن شبعت ؟ طيب فين بقى أنه شبع دى ؟

ثالثا : اللى حييجى بعده حيسرق من أول و جديد !! .. أنا موافق على كدة طبعا
بس ده فى حالة أن اللى حييجى بعده هو امتداد لنفس نظام اللصوص لأنه حيعرف كويس أوى أن ده شعب من العبيد يقدر يسرقه و يغتصبه فى ميدان عام و محدش يعترض

لكن لو اللى جه بعده جه عن طريق الشعب - مهما كان عيوب الشعب ده - مش حيعرف يسرق .. ليييه ؟
لأنه حيكون متراقب من الشعب اللى عينه

لأن ببساطة أنا لما أعين واحد فى وظيفة أقدر أحاسبه .. لكن لما يبقى واحد متعين بقرار مش قرارى مقدرش أحاسبه مهما كنت متضرر منه

و أدينا شايفين المحافظين و الوزرا اللى محدش عارف على أى اساس بيتم اختيارهم لما بيفسدوا الأوضاع المعيشية محدش بيعرف يلاقى طريقة يحاسبهم بيها غير أنه يخبط راسه فى الحيط

تانى حاجة أنه حيكون متراقب من المنافسين بتوعه
يعنى لو جه رئيس جمهورية بالانتخاب و سرق فالمنافسين بتوعه و القوى السياسية اللى بتحاول تقنع الناس انها أفضل منه مش حتسكت .. حتراقبه و تفضحه و تكشف أخطاؤه و مش حيقدر يمنعها من كدة لأنه فى الآخر واحد زى غيره مش متسلط على اللى حواليه

أحمد بدوي

1 أكتوبر 2009