Sunday, October 4, 2009

طلبى الوحيد .. حبس انفرادى المرة دى

بوضب الاوضة زى الشطور لقيت شطة مليانة جرايد , المصرى اليوم على الدستور على الاهرام

طلعت الجرايد اللى طلعت و انا محبوس و كانوا شايلنها عندى فى البيت عشان لما أخرج أقراها و لحد دلوقتى ماقريتهاش برغم انى بحب القراية يعنى

بعد شوية بدأت أوضب الدولاب فخرجت كل الهدوم برة عشان اضبطه على رواقة - دى حاجة محصلتش من السبعينات - فلقيت هدوم السجن كلها و الطقية البيضا اللى كنت بحبها اوى و دورت عليها بعد السجن ملقتهاش

المشكلة انى من يومين كنت بحكى للدكتور أيمن أنى خرجت من السجن و حالتى النفسية زى الزفت و احتجت فترة علاج طويلة - مع دكتورة منال - عشان ارجع لطبيعتى و خسرت فيها كل صحابى اللى عرفتهم قبل السجن تقريبا و هو قاللى يابنى انت اتحبست شهر .. انا - هو يعنى - كان بيعدى عليا الشهر ده بسرعة

قلت له يا دكتور أصل أنت متعرفش الناس اللى كنت محبوس معاهم عاملين ازاى
احنا كنا 25 حالة كل حالة فريدة من نوعها تماما

اللى شاذ جنسيا و مضطرب نفسيا و كان بيتحرش بينا بجد
و اللى كان مسجل خطر اتمسك بالغلط لأنه شاف زحمة و بوليس يوم الاضراب فطلع فوق بوكس كهربا و قعد يشتم عشان كان شارب حاجة
و اللى كان عسكرى طالع من الخدمة جديد و جى من قريته و عمره ما سمع كلام سياسة فى حياته
و اللى شيخ تبع الجماعات الاسلامية لما اتمنع عنه السلاح بقى امين حزب اشتراكى اسلامى و كان بيقول لنا التغيير مش حييجى غير بالسلاح
و اللى اشترى عربية و ركنها تحت بيته عشان لما تمن البنزين يغلى يحس أنه وفر تمنه
و اللى بيقول أنا اشتراكى شيوعى ديانتى ماركسى و مؤمن بالدولة الاستالينية و عضو فى كفاية من سنة 2000
و اللى كان مبلغ عن نفسه عشان الحبس حيدى له شهرة و الشهرة حيترجمها بعدين لفلوس
و اللى كان مسيحى شيوعى فى حزب اشتراكى اسلامى
و اللى قعد مكتئب 30 يوم مفرحش مرة واحدة على سبيل الخطأ
و اللى ملحد و بيألف قرآن جديد
و اللى اخوان و مخبى عشان بتوع حزب العمل ما يقلبوش عليه و يضطهدوه

يا لهوى .. ده احنا كل واحد فينا ممكن يتكتب عنه كتب مش سطر فى مذكرات

أنا نفسى اللى عامل الدوشة دى كلها دلوقتى كنت من أهدا الناس وقتها

فتخيل بقى المنظر كان عامل ازاى .. هو احنا كنا مسميينه عنبر العقلاء من فراغ ؟

أمانة عليكو يا جدعان لو اتحبست تانى طالبوا بأنه يكون حبس انفرادى و النبى و النبى

Post a Comment