Thursday, October 29, 2009

يعنى ايه جمال مبارك ؟

السؤال ده سألته البنت اللى بألف راجل اللى اسمها أسماء محفوظ

خضنى شوية لأنه بسيط جدا و عميق جدا فى نفس الوقت و يحتمل مليون اجابة
بس أنا حاولت أجاوب على قد فهمى

جمال مبارك مش كشخص قد نحترمه - أو لأ - على المستوى الشخصى .. لكن جمال مبارك كرمز لعصر و طريقة تفكير و لأسلوب حياة

يعنى ايه جمال مبارك ؟


يعنى الواسطة و المحسوبية فى أنقى - عفوا أقذر - صورها

يعنى لما ابن طبيب يتعين طبيب من غير ما يكون مجتهد ولا شاطر و لا عنده مؤهلات كفاية
فيبقى سرق حق حد غيره - زميله - أشطر منه أنه يتعين طبيب و يبقى سرق حق الناس أن دكتور حقيقى بمؤهلات حقيقية يعالجهم

يعنى لما لوا شرطة يدخل ابنه الحشاش البلطجى كلية الشرطة عشان لما يتخرج يكمل بلطجة على خلق الله بقوة منصبه اللى أخده بالغصب و بالتوريث

يعنى لما ممثل كبير يدخل ابنه أبو دم تقيل فى مجال الفن فيقوم الواد الابن يخنق الجمهور و يكرههم فى الفن و الفنانين ,,,, فما بالك لما يكون الفنان مش كبير ولا حاجة و يكون بدأ حياته كومبارس و وصل بالصدفة ؟

يعنى ايه جمال مبارك ؟


يعنى غباوة الأمن المركزى لما يضرب الناس و هما بيطالبوا بحقوقهم

يعنى وساخة أمن الدولة لما يبتز حد أو يرشى حد أو يهدد حد عشان يتحكم فيه و يكسر عينه و يخليه مخبر حقير شغال بريموت كنترول

يعنى سادية ضابط مباحث معتوه بيعلق واحدة ست لا حول لها ولا قوة فى القسم و ينزل فيها ضرب عشان تعترف بجريمة ماتعرفش عنها حاجة .. أو عشان تقبل تنتازل عن حاجة لا تملك التنازل عنها

يعنى ايه جمال مبارك ؟


يعنى سطحية و تفاهة الجمهورية

يعنى عفونة و دعارة روزاليوسف

يعنى نفاق الأخبار و خنق ضمير المصرى اليوم

يعنى قتل البديل و الغد و الشعب !!

يعنى ايه جمال مبارك ؟


يعنى اقصاء أهل الثقة - بعد اقصاء و اخصاء أهل الخبرة - ليحل محلهم أهل البيت

يعنى منظر العملة الرديئة و هى بتحاول و تجاهد - مش عشان تكون عملة جيدة .. لأ - عشان تغطى على العملة الجيدة و تطردها من السوق

يعنى ايه جمال مبارك ؟


يعنى الكدب و التلفيق و التشهير بالناس بالباطل
يعنى زرع المرض فى الأبدان و اليأس فى النفوس و الجهل و التطرف فى العقول عشان استمرار البقاء و القلوظة فوق الكرسى
يعنى اللى فيها تجيبه فيك ... تزور أمريكا كل سنة مرتين تلاتة فى السر و تتهم غيرك بأنه بيواليها
يعنى تبيع موارد بلدك - بدون وجه حق - برخص التراب عشان مصلحتك الشخصية
يعنى تقول كلام و تعمل عكسه
يعنى تمارس التزوير و تلفق لغيرك قضايا تزوير


يعنى ايه جمال مبارك ؟


يعنى نشرة أخبار مفيهاش كلمة صدق واحدة

يعنى جرايم من غير عقوبات و عقوبات من غير جرايم

يعنى تبقى قاعد على القهوة عاطل و بتقرا أخبار النجاح الاقتصادى بالبنط العريض و من غير ذرة خجل واحدة


يعنى ايه جمال مبارك ؟


يعنى مصر مستقرة .. فى القاع

يعنى مدرستى نظيفة .. من التعليم

يعنى فريق كورة فاز .. لكن بفضل توجيهات الرئيس


يعنى - ببساطة - ابن الدكتور عمل العملية و نجحت .. لكن المريض مات

Post a Comment