ميحكمشى و مش حيحكم

مختفى انا بقالى فترة و ناس كتير بتسألنى ايه سبب اختفائى .. السبب هو أنى مشغول جداااا فى كذا موضوع ليهم علاقة بمستقبل مصر السنين الجاية

أهمهم و أخطرهم هو الحملة المصرية ضد التوريث اللى اخترنا ليها اسم مصرى صميم و معبر جدا هو ( ميحكمشى ) و الصراحة اللى أوحى لينا بالاسم ده هو الفنان العظيم أبو كرش اللى كان بيغنى الأغنية الوطنية العظيمة - تقفيل الوطنى يعنى - : ( طيب ليه ميحكمشى ؟ )

http://www.youtube.com/watch?v=B8RRLer9KoI

و احنا بس حبينا نجاوب السؤال الفلسفى العميق ده و نقول له هو ليه مينفعش ولا حينفع ولا أصلا يفكر يحاول أنه يحكم مصر لأن 30 سنة من الخراب و الفشل - المتعمد أحيان كتيرة - على ايد الأب حتمنع الابن من أنه يعرف يقنع أى مواطن بأنه حيطبق أى برنامج اصلاحى يتبناه ( فما بالك و هو أصلا مش عنده أى برامج لا اصلاحية ولا سياسية أساسا ؟)

بدأنا العمل النشط جدا فى حملة (ميحكمشى) لرفض التوريث اللى حيبقى مؤتمرها التأسيسى يوم الأربعاء 14 أكتوبر 2009 فى مقر حزب الغد و حيحضره عدد ضخم جدا من الشخصيات العامة و القوى الوطنية السياسية و غير السياسية

تصميم سارة

الدكتور أيمن نور بقاله أسبوع تقريبا بيلف بنفسه على رموز القوى الوطنية و الأحزاب و النقابات و الشخصيات العامة و الجرايد المستقلة و شبه المستقلة

زار الوفد و الناصرى و الأخوان و الجبهة و الجزيرة و هيكل و د.حسن نافعة و و ابراهيم عيسى و عبد الحليم قنديل و أعتقد الوسط و غيره و غيره عشان يدعيهم للمؤتمر و كل الناس رحبوا و قرروا يشاركوا و على حسب علمى مفيش حد فيهم اعتذر غير السفير ابراهيم يسرى لظروف صحية

أنا معرفهمش كلهم طبعا .. بس بجد بذلنا مجهود كبير جدا فى الاعداد لليوم ده اللى احنا

ــ احنا دول مجموعة من الشباب اللى من انتماءات سياسية و حقوقية و حزبية و غير حزبية و بخبرات مختلفة تماما مش بيجمعنا غير حب مصر ــ

مصممين ننجحه بكل الطرق و أول بشاير النجاح كان هو رعب الحزب الوطنى و تحول أعضاء الحزب الوطنى لأول مرة فى تاريخهم لمقاعد المعارضة ( اللى حيفشلوا فيها زى ما فشلوا فى مقاعد السلطة قبلها لخمسين سنة ) و اعتراضهم على مؤتمرنا بمؤتمر تانى عبارة عن تجميع لقاموس كل الشتايم الأمنية اللى اتربوا عليها فى روزا اليوسف و بقية جرايد امن الدولة بتاعتهم

و أنا عاوزكم تدخلوا تتفرجوا بنفسكم لأن دى أحسن دعاية لمؤتمرنا و لحملتنا

http://www.facebook.com/inbox/?ref=mb#/group.php?gid=175156677993&ref=share

تصميم مينا جورج

احنا مش بس لجأنا للطرق التقليدية القديمة أو المعروفة أو حتى اللى تم استخدامها قبل كدة لنشر الدعوة للحملة و المؤتمر على النت و فى الواقع

لكن كمان و لأول مرة و بفضل مجهود مجموعة من الشباب المصرى الحر الكفؤ ( اللى مش عارف حيحبوا أقول اساميهم ولا لأ ) حنبث قناة تلفزيونية مخصوصة على النت لمدة 6 ساعات يوميا اسمها ميحكمشى تى فى

http://www.did-eltawrees.tv

القناة دى حتعرض كل شغل الحملة و حتبقى متخصصة فى ملاحقة مشروع التوريث و فضحه و حيبقى الموقع ده تجميع لكل جهود الناس الرافضين للتوريث سواء بالكتابة أو بالشغل فى الشارع

مش بس كدة .. دى كمان حيبقى فيها أغانى و مسرحيات و شغل تلفزيون بجد مش هزار

عشان كدة عاوزين من كل الرافضين للتوريث من اى تيار و خصوصا من الشباب الغير منتمين لأى تيارات سياسية و معندهمش دافع غير حب مصر أنهم يساعدونا فى تقييم القناة و امدادها بالبرامج الجديدة و الصور و الفيديوهات و الأفكار من داخل و خارج القاهرة ومن داخل و خارج مصر

حاجة تانية حبقى فخور بيها طول عمرى زى ما أنا فخور أنى من مؤسسين حزب الغد و فخور أنى مؤسس جروب مش عاوزين جمال مبارك .. هى أن شعار الحملة - اللوجو - فكرتى .. تاج ( رمز الملكية ) و عليه علامة ( ممنوع ) و تحته كلمة ميحكمشى و عنوان السايت

شعار الحملة بخط ايدى

معناه واضح و بسيط و هو أن العودة للملكية ممنوعة .. العودة للتوريث ممنوعة .. جمال مبارك لو حيورث يبقى يورث جثثنا أحسن .... الشعار ده ميزته أنه بسيط ممكن يترسم بالايد أو بالفوتوشوب و سهل أوى ينتشر فى كل حتة فى مصر و كل العربيات و بالذات الطلبة فى الكليات يعلقوه مع كلمة ميحكمشى و المدونين يحطوه فى مدوناتهم

حبقى مبسوط جدا جدا من أصحابى اللى كانوا زعلانين انى اختفيت الفترة اللى فاتت لو كلهم خلوه صورة بروفايل و بدأوا ينشروه فى كل الجروبات و المواقع بتاعتهم دعما للحملة سواء قبل او بعد يوم المؤتمر

يا ريت كلنا نشترك فى رسم نفس الشعار بصور مختلفة و متنوعة و نبدأ نوزعه فى كل حتة عشان الناس تعرف أن مصر مش عزبة و مش تركة حيسيبها الفاشل العجوز للفاشل الصغير أو لأى فاشل تانى من شلة الفشلة اللى خاطفة البلد من خمسين سنة

آخر حاجة حبيت أقولها قبل ما أنهى النوتة دى جروب مش عاوزين جمال مبارك هى الجروب الرئيسى للحملة لأن عدد أعضائها قرب من 11 ألف عضو .. لكنها مش الجروب الوحيد .... فيه أكتر من عشرين جروب بآلاف الأعضاء ضد التوريث و ضد الحزب الوطنى و احنا بنرحب بالتنسيق مع الجميع عشان نطلع حملة محصلتش فى تاريخ مصر سواء داخليا أو خارجيا

أحمد بدوى
12 أكتوبر 2009