Monday, December 7, 2009

أنا إيه ؟ مش مهم

سألت نفسي : هو لازم اللي يقول كلمة الحق الناس تكرهه
جاوبت : بس لو كان دمه تقيل


بصيت علي ايدي لقيتها شبه ايد جدي الله يرحمه
مش فاكر أنا فاكر شكل ايده ازاي ده مات وأنا صغير
كان دايما يحكيلي عن الفيلا اللي عاوز يبنيها في العاشر
دايما بفتكره وهو بيعيط عشان بيدوله أدوية مش عاوزها منظره ده محفور في دماغي
خالي بقي شبهه لما شعره أبيض وأخويا شبه خالي حتي في عشق الكورة

مش عارف ليه مردتش أروح أقابله لما جه مصر آخر مرة ، كنت خايف يقولي ابعد عن السياسة
أنا أصلا مش ليا حياة برة السياسة ،كل صحابي بعرفهم بسببها برغم اني مش سياسي خالص زي ما أسماء كل شوية تقول انها مش سياسية ، هي شبهي في النقطة دي، بقول علي كل الناس أنهم شبهي وباسم وناس كتير ود.منال بتتنقط لما أقول لها فلان شبهي بس هي دايما تقول أن أسماء شبهي وأنا شبه جدي وخالي شبه جدي وأخويا شبه خالي بس أنا وأخويا مش شبه بعض خالص

فاكر لما رحت أول مرة الفيلا قبل ما تتبني ؟ وفاكر حادثة الموتسكل هناك ،مكنتش كبيرة

عاوز أهرب مالسياسة ، مش عاوز أتغير زي بقية الناس

أنا اتغيرت كتير بس لسة فاضل حبة

لما عييت والنت فصل وقعدت ألعب اللعب بتاعة زمان افتكرت قبل 2004 كنت عامل ازاي زي كل الناس
صحيح كنت بقرا كتير أوي لدرجة ان قرايب بابا علقوا لما لاقوني بتابع أخبار الشيشان وأنا صغير
بس كانت كلها قرايات جرايد

أصلا بزهق من كتب السياسة بس بحب كتب التاريخ أوي

أنا ايه ؟
مش فنان ، مش مهندس، مش كاتب ، مش سياسي ، مش عارف ايه مصلحتي عشان أبقي مصلحجي ،مش راضي

أنا ايه ؟ مش مهم
Post a Comment