Wednesday, June 16, 2010

اللى سرق و شبع - اهداء لشباب 6 أبريل

دايما أسمع الناس تقول احنا موافقين على جمال مبارك .. أصله سرق و شبع و اللى حييجى بعده حيسرق من أول و جديد

واحدة واحدة : اللى سرق و شبع


أولا .. لما هو سرق .. مش مفروض يتحاسب ؟


ولا احنا لو سرق الكبير نسيبه و لو سرق الصغير نحاسبه ؟ مش النبى حذرنا من كدة تحذير مباشر ؟


ازاى مش عاوزيننا نحاسبه على اللى سرقه ؟ يا عالم حسوا شوية .. بتتسرقوا و مبسوطين ؟


ثانيا .. هل هو شبع فعلا ؟ .. يعنى هل اللى يصرف فلوسنا على القصور والعربيات و الشاليهات و الرقاصات و تزوير الانتخابات و تلميع القنوات و تضبيط الحراسات ممكن يشبع فى يوم من الأيام ؟


الحقيقة لأ لأن نص الفلوس اللى بيسرقها بيصرفها عشان بس يفضل على الكرسى .. و طول ما هو على الكرسى حيفضل يسرق عشان بس يفضل على الكرسى و السرقة مش حتنتهى


وحتي لو هو شبع ،هل اللي تحته حيشبع ؟ طب واللي تحت اللي تحته ؟ واللي تحت تحت اللي تحته ؟


ثالثا .. هل لازم لو حد جديد جه يسرق من أول و جديد ؟؟


الحقيقة ده حيحصل فى حالة ان احنا مش اللى جايبينه و منقدرش نحاسبه


لكن لو احنا اللى جايبين و مختارين اللى بيحكمنا من غير تزوير ولا ارهاب ساعتها حنقدر نحاسبه و نراقبه و نسقطه فى الانتخابات و نجيب غيره من غير ما نخاف لا من مخبر ولا من مزور يغير ارادتنا


ايا كان اللى حييجى بعده مش حيقدر يسرق لو لقانا واعيين و فاهمين و مفتحين و عارفين حقوقنا كويس


لو لقى فى مجلس الشعب نواب بيتكلموا باسمنا بحق و حقيق

لو لقى احزاب تقدر تاخد مكانه لو غلط او سرق
لو لقى اعلام حر بيفضح كل الفساد و مش بيتستر عليه

و كوووول ده بإيدينا احنا مش بإيد حد تانى


أرفض السلبية و اوعى تقول كلمة ده سرق و شبع دى تانى ابدا
Post a Comment