Wednesday, June 23, 2010

.....اعتراف.....

في الفتره الأخيره ناس كتير اتهمتني اني مريضه نفسيا!!!!!! تصوروا أنا !!!!!! سألتهم عن السبب اللي خلاهم يقولوا كده قالولي اسباب كتير منها:

*اني مش عارفه أنا عايزه ايه
*واني بفكر أغير مجال شغلي بعد 7 سنين دراسه
*و بتسرع في الحكم على الناس ومعظم احكامي بتبقى غلط
*وفي اغلب الوقت اما بيسألوني سؤال برد باجابه ملهاش اي علاقه بالسؤال


وأسباب تانيه كتير من الأسباب الواهيه دي......بقى دي أسباب!!!!!!!! وبعدين هل دا معناه اني مريضه نفسيا؟؟ ابدا..
الحكايه بدأت اني ماجتش الدنيا باختياري ولا أخترت الزمان ولا المكان ........
وكانوا على طول بيقولولي انى كنت طفله ذكيه وعندهم قصص كتير ونوادر عن عبقريتي وانا طفله........... "الله امال الذكاء راح فين يا يا جماعه"............... قالولي اول ما دخلتي المدرسه طااار

واما كبرت شويه ورحت الاعدادي كنت بدرس كلام والواقع كلام تاني,,وكانوا بيعلمونا اننا بلد القيم والاخلاق وتطلع الشارع تلاقيه مليان ناس معدومه الاخلاق

وبعدين دخلت وهم كبييير اسمه التانوي العام واتكفيت على الكتب واتعزلت عن العالم لحد ما جالي تخلف عقلي عشان اجيب مجموع
وجبت المجموع ودخلت الطب....يا سلام كلمه كبيره اوي"الطب".....اول محاضره لينا الدكتور بتاعنا قالنا انتوا لازم تبقوا واقعيين زمن الدكاتره الاغنياء اللى عايشين في فيلات لمجرد انهم دكاتره دا خلص بس كفايه عليكوا البرستيج

ومع مرور الوقت اكتشفت ان حقوقنا كادكاتره ضايعه خالص في البلد دي... يعني حتى البرستيج اللي كملنا عشانه في الكليه ملهوش وجود

وبعد ما اتخرجت قلت بس هبقى مركز وليا وضع,,اكتشفت اني بالمرتب اللي بقبضه مينفعش اصنف بني ادمه اساسا عشان يبقى ليا وضع ومركز...........قلت لنفسي مش مهم الفلوس مش كل حاجه احنا مهنتنا مهنه انسانيه...بس المشكله ان المستشفى اللى المفروض امارس فيها مهنتى الانسانيه وانقذ حياة المرضى لا فيها اجهزه ولا امكانيات ولا دكاتره ولا ممرضات ولا اي حاجه.......

حتى اتجاهاتي وميولي اللي ملهاش علاقه بالطب مش قادره احقق فيها اي حاجه..........يعني لما يبقى ليا ميول سياسيه الاقي نفسي في بلد فيها قمة الركود السياسي دا الرئيس ماسك من قبل ما اتولد وانا قربت اموت وهو لسه في مكانه

حتى القضايا الاجتماعيه لما اجي أتناقش فيها وأواجه المجتمع بمشاكله يقولوا عليا اني بشوه صوره مجتمعنا العظيم...........على اعتبار اننا في مجتمع مثالي
ومن دا كتير........

لما درست الكلام دا كله اكتشفت انه شئ طبيعي جداااا اني ابقى مريضه نفسيا!!!!!!!!!..........طب بذمتكوا في ظل كل الازدواجيه والتناقضات والاحباطات والانحطاط الاخلاقي والركود السياسي اللي احنا فيه دا ينفع ابقى مش مريضه

عشان كده يا ساده انا أقر وأعترف اني مريضه نفسيا ويمكن اعترافي دا يكون معناه ان في أمل مني لاني لو عشت كل دا وكابرت وقلت اني انسانه عاقله يبقى هو دا المرض بعينه.................


 
هند خطاب
23 يونيو 2010
Post a Comment