Monday, February 28, 2011

خواطر تغريدية

تويتر مش شغال وعشان كدة حرجع لعادتي القديمة في كتابة مقال كبير من نقط ملهاش علاقة ببعض

أختي في تانية اعدادي ، بتاخد قصة حياة النبي محمد في الدراسات الإجتماعية وقصة "كفاح طيبة" في العربي .. ياريت بس متكونش بتاخد جرامر في الحساب

الشتيمة الزيادة في رشيد محمد رشيد علي صفحات الأهرام بتأكدلي فكرة إن ناس كتير بيستغلوا الموضوع في تصفية الحسابات مش أكتر ، خصوصا لما تكون إللي بتناقش قضايا الأحزاب السياسية صحفية إسمها نهال شكري كانت لسان جمال مبارك والحزب الواطي في الأهرام من كذا سنة

ياتري أحمد موسي الصحفي المخبر راح فين؟ مش ناوي يعمل حوار مع العادلي من الزنزانة

الناس كلها حالها اتغير بعد الثورة ، إللي مكانش بيتكلم في السياسة مبقاش بيتكلم غير في السياسة ، وإللي كان بيتكلم في السياسة بقي بيتكلم في التلفزيون ، أنا بقي مش عارف إيه اتغير فيا ، يمكن أنا لسة معملتش الثورة بتاعتي

بعض أخواتنا أنصار البرادعي بيقولوا أن لولا البرادعي مكانتش الثورة قامت ، يعني نقدر نعتبره صاحب الضربة الجوية التانية بما ان أكبر حاجة عملها أنهم استقبلوه في المطار

حد حكالي -حكاية حصلت فعلا- إن سواقين الميكروباص في منطقة ما عملوا مظاهرة فنزلوا يهتفوا "سلمية سلمية" وكل واحد ماسك مطواة قرن غزال أوسيف في إيده ، بعد كدة واحد خد باله ونبههم وكملوا من غير أسلحة

صدر قرار من النيابة بمنع مبارك وعيلته من السفر . أقطع دراعي لو محدش طلع يقول ده جزء من الثورة المضادة عشان مبارك يفضل يحكمنا من شرم الشيخ
Post a Comment