عصابة وعاملة نفسها دولة

مايطلق عليه "الدولة" في مصر ماهو إلا شبكة الفساد والنهب المنظم والعائلي للبلاد والتي تضمن افقارها ومص خيراتها لأطول مدة ممكنة دون انهيار لصالح قلة فاشلة متغطرسة خارجة عن القانون

الفارق بين الدولة والغابة أو الخرابة هو وجود القانون ومبادئ الدستور ، ولا قانون في مصر ولا دستور ولا يحزنون ، إنما تُحكم البلاد بأمر الحاكم العسكري ومزاج السادة شركاؤه في السلطة وأقاربهم في شبكات الفساد المسيطرة على البلاد من أقصاها لأقصاها

شبكات فساد تسيطر على طعامك وشرابك وتعليم أبناءك واعلام مجتمعك وتغتني وتراكم الأموال من افقارك وسرقة قوتك وخطف الفرص من أبناءك

عندما تعترف بهذه الحقيقة البسيطة التي صورها نجيب محفوظ في قصصه ووصفها نجيب سرور في أغانيه تكون مؤهلا للتفكير في كيفية التعامل مع تلك "الدولة" ومهرجاناتها الإعلامية التي تستمر للأبد لغرض وحيد هو إلهاؤك عن التفكير

فقط فكر وقرر من هو العدو الإرهابي الحقيقي لوطنك مصر ، من هو المستفيد الحقيقي من تكميم الصحف واخراس الشباب وقطع صلاتنا بالعالم وتخويفنا منه ، من المسئول عن تجهيل وتعجيز ملايين المصريين وتشتيت شملهم وتفريق كلمتهم ،،، فكر فأنت مسئول.

دين المصريين

الرجال قوامون على النساء

بإيه؟

الرجالة عادي تدخن الستات لأ متدخنش

الرجالة لازم تشتغل الستات تقعد في البيت

الرجالة تصاحب وتعط الستات حرام تسلم على حد

الكذب مش مشكلة

مسمهاش رشوة اسمها الشاى

مسموش تحرش طالما هى نزلت من البيت ، ايه اللي نزلها كدة؟

بس حرام تسيب الشبشب مقلوب

زعلان ليه بقى ؟

- بتحاول تنام وانت لسة مصحتش؟

# لإن مفيش حاجة أصحى عشانها ولعلمك مفيش حتى أحلام بنام عشان أحلمها

- مش بتزهق من النوم؟

# النوم حلو لإنه غياب والغياب مريح لإن مفيش حاجة أغيب عنها

- ياجدع انت زعلان ليه بقى؟

ده أنت حتى أحسن من غيرك كتير ، ده الناس بتغرق وهى بتحاول تهرب من هنا وغيرهم بيتعذبوا كل يوم في العلاج من الامراض اللي سببها ليهم تلوث المية والهوا هنا ، و ده غير الناس اللي بتقتل نفسها عشان مش لاقيين لا شغل ولا فلوس ولا مستقبل هنا ،، مكتئب ليه بقى؟

- عشان انا من هنا

ملحوظات مكتئب

عندي كل أعراض وأسباب الإكتئاب وفعلا مش قادر أساعد نفسي ، طول الفترة اللي فاتت كنت مستني أرجع الشغل عشان يساعدني أخرج من حالة التجمد اللي بمر بيها بس جه قرار فصلي عشان يقضي على أهم حاجة كانت بتساعدني أقاوم الإكتئاب وبتشغلني عن التفكير ، دلوقتي بقيت عبء على أهلي ماديًا ونفسيًا واجتماعيًا ومعنديش أى ارادة لمقاومة التدهور

محدش أتعاملت معاه فاهم يعني إيه اكتئاب وطريقة التعامل معاه ، ناس حواليا بيعتبروني بتدلع وناس شايفينني مجنون أو مدعي جنون وناس شايفين اني محسود أو مش طبيعي وكلهم التعامل معاهم بيزود احساسي بالحصار وبأن مفيش فايدة وبأن التقوقع بعيد عن الناس أفضل من التعامل معاهم ، يمكن لو كنت برة مصر كانت حالتي أختلفت كتير لإن البيئة كانت حتختلف كتير ، معنديش ثقة في مؤسسة الصحة في مصر ومعنديش رغبة في بذل مجهود كبير للرجوع بحياتي زى أى فترة سابقة لإني فعلا عمري ماكنت سعيد بحياتي وأطوارها ودايما كان فيه حاجات بتنغص عليا الاحساس بالسعادة وكنت دايما أقصى مابوصل له هو رضا سلبي بحالتي العامة وسعادة وقتية بإنجازات أو أحداث ظرفية مؤقتة

صحيح مش قادر أجمع شتات نفسي وأغير أسلوب تعاملي مع الدنيا والناس ، كإني بمر بعملية تحلل ، لكن لسة عندي أمل أن فيه شئ حيتغير في يوم من الأيام ويغير منظوري للحياة ويحطني على أول طريق الاستمتاع والنجاح في طريق ما ، طريق مش قادر أحدده من وسط ضباب الماضي المحترق وسراب المستقبل المظلم ، لسبب ما معنديش القدرة على النظر لمستقبلي الشخصي بمعزل عن المستقبل العمومي المخنوق تحت ثقل الخساير اللي بيسببها الفساد وانعدام أخلاق الحرية والانسانية في المجتمع المصري ، ودايما شايف انحداري متداخل مع الانحدار العام وغير قادر على الفصل بينهم

دايمًا بيأكدوا في الأفلام على قدرة الأفراد في التأثير على المجتمع وتطويره ، بينما أنا عايش مأساة التأثير المدمر لمجتمع فاشل ومنحط على الحالة النفسية لأفراده وعلاقاتهم ببعض ورؤيتهم لنفسهم ومستقبلهم ومش شايف اني أحسن من أى فرد انتحر لإنه مشافش لنفسه مستقبل في خرابة زى اللي احنا محبوسين فيها دلوقتي

‫#‏ملحوظات_مكتئب‬

نظرة على احتجاجات أمين الشرطة

أحمد موسى النطع كالعادة طلع ضرب أى أرقام مغلوطة عشان يبين أن أمناء الشرطة مستريحين ماديا وملهمش حق يفتحوا بقهم وانا واحد من الناس صدقت ان أمين الشرطة بيقبض ٧٠٠٠ جنيه في الشهر فعلا ولما عرفت الارقام الصح لقيت نفسي بفكر في اللي صدق اننا متمولين من برة وبقول عنده حق يصدق , الأمناء شتموا أحمد موسى على النت ومسحوا بيه الأرض والواحد بيتفرج وفرحان بالخناقة 

لكن تخيل لو كان فيه كيان ثوري مدني قرر أنه يروح اعتصام الأمناء ويعرف مطالبهم ويعرضها على خبرا يدرسوها ويطلعوا وثيقة برؤيتهم للأزمة وحلها ويتم ضم الرؤية دي لرؤية أشمل عن مستقبل ودور جهاز الشرطة في مصر تبقى جزء من برنامج شامل للإصلاح والتغيير المستقبلي

تخيل خطوة زى دي مع مجموعة خطوات مشابهة في نفس الإتجاه كان تأثيرها التراكمي حيبقى عامل ازاى ، في رأيي كان حينتج عن ده بديل مدني ثوري شعبي عاقل يقدر يوازن المعادلة السياسية في مصر ويقود مرحلة مابعد سقوط السيسي اللي بتقرب أسرع مما أى حد متخيل

ارجع بقى من الخيال للواقع، وفكر معايا ، لما فئة من أهم الفئات اللي بتعتمد عليها عصابة نهب مصر تخرج في مظاهرات واحتجاجات لإنها مش واخدة حقها ، أمال باقي الفئات مفروض تعمل إيه ؟ وحتعمل ايه فعلا لما تشوف ان قانون لامؤاخذة التظاهر بيشتغل على ناس وناس لأ ؟ وأن مفيش وسيلة عشان تاخد حقك غير بالقوة والدراع؟ قبل ماتجاوب على السؤال ده وتقول مفيش فايدة حاول تفتكر كان موقفك ايه قبل ٢٥ يناير ٢٠١١ وهل كنت وقتها برده بتقول مفيش فايدة ولا لأ ،

انهيار الوضع الحالي أصبح وشيك وعدم استعدادنا للي جاى حيرفع جدا من مستوى الخساير والنتايج الجانبية للأحداث ... استقيموا يرحمكم الله.

أقتل ولا تهتم

فلتقتل جميع معارضيك ولا تهتم ، فسيخرج غيرهم لقتالك لا معارضتك

فلتسقط شرف جميع المحاكم ولا تهتم فما أنشأت محاكمك العدل ولا هى بقادرة على اسقاطه

فلتفعل ماتشاء ولتسرف في القتل كما تشاء ، فما تخربه يد شيطان لم يكن لله في اعماره مشيئة

احنا والمنفى

احنا ان شاء الله خلال الأربعين سنة وست شهور الجايين حنكون قضينا عالإرهاب

اشمعنى؟

حيكون الإرهابيين عجزوا بقى وحندخلهم دار مسنين

طب يعني حنقعد طول الوقت تحت تهديد الإرهاب؟

لأ , أنا رأيي نعمل حركة "الوطن لنا والمنفى للخونة" ونطالب السيسي أنه يصدر قانون لنفى أى خاين أو عميل

وأول مايوافق عليه نعلن اننا كلنا عملا وخونة

ونغني واحنا ماشيين

يابلااادي يا بلااادي حهج منك يابلادي

يابلادي يابلااادي زهقت منك يابلادي

قولوا لأمي ماتبكيش خرجت منها عشان أعيش

مع السلامة يابلادي

المحاكمة في فيزيكس أكاديمي

انهاردة "أتفصلت" من شغلي عشان صورة حطيتها على حسابي على انستجرام ، أتعمل معايا امبارح تحقيق من خمس مديرين وانهاردة أتبلغت بقرار الفصل على جروب على الواتس أب

"المحاكمة" اللي أتعملتلي مكنتش على الصورة بس وإنما على رأيي اللي كتبته تحتها ومجمل آرائي في "الرجل المصري" أنه مكبوت جنسيًا وبيفكر بأعضاؤه التناسلية وأتقال بصراحة طالما أنت شايف أن الرجالة المصريين مكبوتين يبقى أنت مكبوت وتبقى خطر على "زميلاتك" و"الطالبات" في الأكاديمية مع أني أتحدى تكون فيه شكوى لأى زميلة أو طالبة مني في أى موضوع أصلا

معرفش هل هى صدفة أن أكتر اتنين كانوا واخدين الموضوع بشكل شخصي وبعصبية واحد كان عضو ناشط في الحزب الوطني لحد الثورة وواحد تاني كان مرة بيقول أن الثورة بوظت مستقبله ولا لأ ،، هى غالبا صدفة بس أهى ملحوظة حتخليني أبتسم لما أرجع أقرا الكلام ده بعد كام سنة وأحاول أفتكر أساميهم وأقول ياريتني كتبتها عشان منسهاش

"المحاكمة" جرت كالتالي

س: أنت شايف ان الراجل المصري بيفكر ببتاعه؟

ج: أيوة

س: أنت شايفنا كدة؟

ج: دي ثقافة عامة كلنا متأثرين بيها

س: حتى أنت؟

ج: حتى أنا

س: انت كدة بتسئ لسمعة المكان ولسمعة البلد

ج: المكان ملوش علاقة بآرائي الشخصية ومصر الأولى على العالم في التحرش أصلا (يعني سمعتها بطالة لوحدها)

س: باكستان هى الأولى على العالم في التحرش

ج: طيب ، مصر التانية ياسيدي

س: أنت بتتعامل معانا ليه لما أنت شايفنا كدة؟ مفروض ماتتعاملش مع ناس بتفكر كدة

ج: أنا قلت دي ثقافة عامة عند كل المصريين ، اسيب البلد وامشي يعني؟

س: أيوة، انا ندمان اني عرفتك الفترة دي كلها

ج: طيب ، رأيك وأنت حر

س: يبقى أنت كمان عندك كبت جنسي؟

ج: كلنا متأثرين بنفس الثقافة وبنفس التربية بس مش بنفس الدرجة

س: أيوة بس أنت قلت ده "الراجل المصري" يعني عممت علينا كلنا

ج: يعني لو قلت "بعض" الرجالة المصريين كانت حتفرق

س: آه

ج: طيب

س: طب ليه ماقلتش انا مريض بالكبت الجنسي وخلاص

ج: المريض من الكبت بجد مش هو اللي بيقول ولا كان حيحط صورة زى دي

س(بنرفزة): يعني أنت شايف نفسك العاقل اللي فينا واحنا كلنا مرضى؟

ج: ماقلتش كدة ومقصدتش حد بعينه ، انا بتكلم عن الثقافة العامة

س: طالما أنت عندك كبت جنسي يبقى ماينفعش تتعامل مع زميلاتك في الشغل ولا الطالبات وحتشوه سمعة المكان

ج: (مش فاكر الرد بس فيما معناه لو حتفصلوا اللي عندهم كبت جنسي يبقى محدش حيفضل شغال فيها)

س: لو أختك شافت صورة زى كدة انت حتعمل إيه؟

ج: انا مبقعدش اراقب أختي بتشوف ايه ومابتشوفش ايه ،، احنا سنة ٢٠١٥ مش القرن الخمستاشر ، كل حاجة متاحة وموجودة على النت

س:لو أنت قاعد جنب أختك بالصدفة وفتحت اكونت مدرس عندها ولقت فيه صورة زى دي حتعمل إيه ؟

ج: لو صورة حسيتها مسيئة حقوللها تعمل له أنفولو ، بس مش حكبر الموضوع لإنها آراء وأذواق في الآخر ، وأظن حضرتك تسمع عن "موسم الحصاد" وعارف أن فيه ناس من اللي شغالين هنا من اللي سنهم صغير بيستغلوا شغلهم عشان يتعرفوا على طالبات ويخرجوا معاهم في الأجازة رغم صرامة الإدارة في مواجهة الموضوع ده ، وأنا لو حقلق على أختي الأولى أقلق من حاجة زى كدة مش من صورة منشورة على النت

س: مش شايفها صورة خادشة للحياء؟

ج: السؤال ده الوحيد اللي عجبني ، أظن انها خادشة للحياء فعلا بس اللي عاوزين يتحرشوا حتلاقيهم أكتر ناس تظهر التدين والأخلاق مش اللي حيعبروا عن رأيهم بشكل صادم زى كدة

س: انت موقوف لحد مانبلغك بقرار صاحب الشركة

ج: شكرا

+++++++++++++++

بعيدًا عن "الفصل" والمحاكمة التي جرت وبعيد عن حالتي المادية التي أصبحت في الحضيض فجأة بعد شهرين مقبضتش فيهم في انتظار بداية السنة الدراسية ، انا حزين لإضطراري للبعد عن عمل حبيته وناس زاملتهم وصادقتهم وكلت معاهم عيش وملح ويمكن لو كنت أعرف من البداية أن رأيي والصورة حيكونوا سبب في فصلي مكنتش نشرتهم

لكن هذا لا ينفي أن هذه المحاكمة التي جرت - على سخافتها وهزليتها - أشعلت بريقًا خافتًا في روحي من لذة مقاومة ومناهضة التسلط والإستبداد والتي طالما حركتني وحمستني لسنوات ضد نظام مبارك

شكرًا لكل زملائي السابقين بفيزكس أكاديمي على الوقت الرائع اللي قضيته معاكم وبعتذر لكل حد أسأت إليه بدون قصد وأتمنى لكم التوفيق في مسيرتكم المهنية والانسانية

وتقولي اتجننت ليه؟!

بتبسط أوي لما بشوف ماتش مصارعة فيه الأبطال اللي بحبهم من أول جون سينا وبيج شو لحد شيموس ورينز وكين وغيرهم كتير فشخ ، مش بتضايق إني بتفرج على تمثيلية ولا بزعل عشان الضربات والحركات اللي بيستخدموها مش حقيقية

فاهم أن ده استعراض ، شو ، وفاهم أن محدش فيهم بيتأذي من الضربات اللي بياخدوها ، لإن البديل كان أنهم يتخرشموا من أول ماتشين تلاتة ويموت منهم إللي يموت ويتشل إللي يتشل ، لكن مش ده الأسلوب الصح في مجتمع حى بيحمي حياة أفراده وبيضمن لهم فرصة حياة كريمة

مصريين كتير بيعتبروا ان لاعبين المصارعة معندهمش كرامة لإنهم بيمثلوا ، لكن هما في الحقيقة ناس بتشقى وتتعب وتبذل مجهود خرافي عشان تعمل استعراض يستمر لسنين طويلة وبأكبر مكاسب مادية ممكنة توفر حياة كريمة بجد ليهم ولأهاليهم

لما بشوف الإستاد مليان كل مباراة بالآلاف من الناس العادية زينا اللي بيستمتعوا بماتش مصارعة ويتفاعلوا معاه ويشجعوا اللعيبة ويشغلوا آلاف الناس في صناعة الاستعراضات المتوالية بفرح

كون البشرية توصلت لطرق لذيذة وبسيطة زى دي عشان يخلقوا حياة فده معناه أننا حنوصل للي وصلوا له في يوم من الأيام ، صحيح احنا كل حاجة عندنا مشوهة وبايظة لكن غصب عن كل فسادنا واستسلامنا ويأسنا بتحرك لقدام لإن البشرية بتتطور وبسرعة بل وبعجلة تسارع أكبر من قدرتي وقدرة أى بشري على تصورها

احنا في لحظة ما حق من حقوق الانسان بيتاح بالقانون بحكم محكمة لفئة محجوبة من أغلب حقوقها في معظم دول العالم كنا بنناقش الطرحة سنة ولافرض ، اللي هو نفس قضية النخب من السبعينات

وفي لحظة ما المصالح ما بتتصالح فعلا والدولة الأم للعالم الحديث بتفتح صفحات جديدة من التعاون والانفتاح والاستثمار مع دول طالما أعتبرتها عدوة زى كوبا الشيوعية وإيران الإسلامية كنا احنا بنحتفل بإستيراد شوية طيارات غالية وبنكروز بيها في السما فوق شعب ممكن تمن الطيارات دي لوحدها ينقذ أرواح آلاف بيموتوا بدون علاج وبيموتوا حواليهم ملايين من المرتبطين بيهم وهما أحياء

اسرائيل عملت أسورة إلكترونية طبية تحفظ تاريخ اللي لابسها الطبي وتضمن أنه يحصل على رعاية صحية متناسبة تماما مع تاريخه الطبي واحتياجاته الصحية في أى مكان فيه أطقم طبية مؤهلة واحنا وزعنا دهب وعلقنا اعلانات بملايين عشان نمثل أن ‫#‏مصر_بتفرح‬ ، آل يعني العالم حوالينا أهبل مش شايف خيبتنا ووكساتنا ومش فاهم أننا شعب مخطوف تحت حكم أقلية فئوية مسلحة ، ياخي أحمس

في الوقت اللي جون سينا فرح آلاف الأطفال في العالم وأداهم ذكريات طفولة لذيذة كنا احنا بنقتل أطفالنا في سينا وبنحتفل بشراء طيارات عشان تهد بيوتهم كمان وكمان

في الوقت اللي بشار السفاح بيبيد شعبه ابادة جماعية للحفاظ على النفوذ الإيراني ، وبيخسر ، احنا بننسخ التجربة السورية والليبية وكل تجارب الفاشية الغبية الغشيمة بس بشكل أهبل وأكثر فقعًا وبنكذب على نفسنا ونقول أننا أحسن من سوريا والعراق والنصف الشمالي المحتل من كوريا .

في الوقت اللي كان فيه طفل بيجيله احباط بسبب انفجار المكوك اللي طالع المحطة الفضائية الدولية عشان على المكوك ده كانت أدوات مشروعه العلمي في المدرسة ، كان عندنا أطفال بيفرحوا أنهم جابوا أرقام خيالية في المسخرة الوطنية اللي اسمها الثانوية عامة وطلبة منايفة سايرين على درب اللوا الكفتة في اختراع نصبايات للشهرة ولفت الأنظار والحصول على اهتمام الإعلام

في الوقت اللي الدول الاسكندنافية وصلت لمستويات خيالية من تدوير الطاقة والمخلفات وصناعة الموارد النظيفة لدرجة ان مياه الشرب الدنماركية - أو السويدية مش فاكر بالضبط - كلها بيتم اعادة تدويرها من مية المجاري وبتعتبر من أنقى مياه الشرب في العالم ، احنا عندنا واحد مضى على اتفاق ببيع حقوقنا في النيل عشان ياخد شوية اعتراف دولي بسيادته ، وعندنا ناس بيحتفلوا بيه وناس - مفروض انهم مسئولين عن الآثار في مصر مش متطرفين تبع داعش - بيدمروا عمود أثري المفترض أنه لا يقدر بثمن

وتقولولي انت اتجننت ليه ؟

عشان ببساطة لما بتسلق في الحر وأفكر ازاى أن كل الحر ده طاقة ممكن نستفيد منها ونشغلها ونصدرها كمان بتشل ، عشان لما بشوف طفلة ضعيفة بتتعذب في السجن وبيتمنع عنها العلاج لإنها بتحب بلدها ومؤمنة بالحرية وأنا أقصى حاجة أقدر أعملهالها اني أعمل شير لأخبارها عالفيسبوك وأعيط عليها ، لأ ومش بس كدة ، ده أنا مستني في أى لحظة أني أو أى حد قريب مني يحصَّلها ويحصل صحابي المخطوفين اللي أقسم بحياتي على شرفهم الوطني واخلاصهم لمصر ، عشان لما بشوف مجرم بيحتفل بإجرامه وبيرقص عالدم ومجرم تاني بيمسح جرايمه بتمثيليات هابطة وعبيطة ومجرم تالت بيدعي الحيادية والعقلانية وهو عارف ان الحياد في شهادة الحق خيانة ، فأنت مع الحق أو ضده ، أشعر بالعجز ، والعجز يولد اللامبالاة ، لست مجنونا كما يخيل للكثيرين أنا فقط لا أكترث لما تضعونه من حدود بين العقل والجنون ، فما هذا الجمع برشيد.