انهاردة "أتفصلت" من شغلي عشان صورة حطيتها على حسابي على انستجرام ، أتعمل معايا امبارح تحقيق من خمس مديرين وانهاردة أتبلغت بقرار الفصل على جروب على الواتس أب
"المحاكمة" اللي أتعملتلي مكنتش على الصورة بس وإنما على رأيي اللي كتبته تحتها ومجمل آرائي في "الرجل المصري" أنه مكبوت جنسيًا وبيفكر بأعضاؤه التناسلية وأتقال بصراحة طالما أنت شايف أن الرجالة المصريين مكبوتين يبقى أنت مكبوت وتبقى خطر على "زميلاتك" و"الطالبات" في الأكاديمية مع أني أتحدى تكون فيه شكوى لأى زميلة أو طالبة مني في أى موضوع أصلا
معرفش هل هى صدفة أن أكتر اتنين كانوا واخدين الموضوع بشكل شخصي وبعصبية واحد كان عضو ناشط في الحزب الوطني لحد الثورة وواحد تاني كان مرة بيقول أن الثورة بوظت مستقبله ولا لأ ،، هى غالبا صدفة بس أهى ملحوظة حتخليني أبتسم لما أرجع أقرا الكلام ده بعد كام سنة وأحاول أفتكر أساميهم وأقول ياريتني كتبتها عشان منسهاش
"المحاكمة" جرت كالتالي
س: أنت شايف ان الراجل المصري بيفكر ببتاعه؟
ج: أيوة
س: أنت شايفنا كدة؟
ج: دي ثقافة عامة كلنا متأثرين بيها
س: حتى أنت؟
ج: حتى أنا
س: انت كدة بتسئ لسمعة المكان ولسمعة البلد
ج: المكان ملوش علاقة بآرائي الشخصية ومصر الأولى على العالم في التحرش أصلا (يعني سمعتها بطالة لوحدها)
س: باكستان هى الأولى على العالم في التحرش
ج: طيب ، مصر التانية ياسيدي
س: أنت بتتعامل معانا ليه لما أنت شايفنا كدة؟ مفروض ماتتعاملش مع ناس بتفكر كدة
ج: أنا قلت دي ثقافة عامة عند كل المصريين ، اسيب البلد وامشي يعني؟
س: أيوة، انا ندمان اني عرفتك الفترة دي كلها
ج: طيب ، رأيك وأنت حر
س: يبقى أنت كمان عندك كبت جنسي؟
ج: كلنا متأثرين بنفس الثقافة وبنفس التربية بس مش بنفس الدرجة
س: أيوة بس أنت قلت ده "الراجل المصري" يعني عممت علينا كلنا
ج: يعني لو قلت "بعض" الرجالة المصريين كانت حتفرق
س: آه
ج: طيب
س: طب ليه ماقلتش انا مريض بالكبت الجنسي وخلاص
ج: المريض من الكبت بجد مش هو اللي بيقول ولا كان حيحط صورة زى دي
س(بنرفزة): يعني أنت شايف نفسك العاقل اللي فينا واحنا كلنا مرضى؟
ج: ماقلتش كدة ومقصدتش حد بعينه ، انا بتكلم عن الثقافة العامة
س: طالما أنت عندك كبت جنسي يبقى ماينفعش تتعامل مع زميلاتك في الشغل ولا الطالبات وحتشوه سمعة المكان
ج: (مش فاكر الرد بس فيما معناه لو حتفصلوا اللي عندهم كبت جنسي يبقى محدش حيفضل شغال فيها)
س: لو أختك شافت صورة زى كدة انت حتعمل إيه؟
ج: انا مبقعدش اراقب أختي بتشوف ايه ومابتشوفش ايه ،، احنا سنة ٢٠١٥ مش القرن الخمستاشر ، كل حاجة متاحة وموجودة على النت
س:لو أنت قاعد جنب أختك بالصدفة وفتحت اكونت مدرس عندها ولقت فيه صورة زى دي حتعمل إيه ؟
ج: لو صورة حسيتها مسيئة حقوللها تعمل له أنفولو ، بس مش حكبر الموضوع لإنها آراء وأذواق في الآخر ، وأظن حضرتك تسمع عن "موسم الحصاد" وعارف أن فيه ناس من اللي شغالين هنا من اللي سنهم صغير بيستغلوا شغلهم عشان يتعرفوا على طالبات ويخرجوا معاهم في الأجازة رغم صرامة الإدارة في مواجهة الموضوع ده ، وأنا لو حقلق على أختي الأولى أقلق من حاجة زى كدة مش من صورة منشورة على النت
س: مش شايفها صورة خادشة للحياء؟
ج: السؤال ده الوحيد اللي عجبني ، أظن انها خادشة للحياء فعلا بس اللي عاوزين يتحرشوا حتلاقيهم أكتر ناس تظهر التدين والأخلاق مش اللي حيعبروا عن رأيهم بشكل صادم زى كدة
س: انت موقوف لحد مانبلغك بقرار صاحب الشركة
ج: شكرا
+++++++++++++++
بعيدًا عن "الفصل" والمحاكمة التي جرت وبعيد عن حالتي المادية التي أصبحت في الحضيض فجأة بعد شهرين مقبضتش فيهم في انتظار بداية السنة الدراسية ، انا حزين لإضطراري للبعد عن عمل حبيته وناس زاملتهم وصادقتهم وكلت معاهم عيش وملح ويمكن لو كنت أعرف من البداية أن رأيي والصورة حيكونوا سبب في فصلي مكنتش نشرتهم
لكن هذا لا ينفي أن هذه المحاكمة التي جرت - على سخافتها وهزليتها - أشعلت بريقًا خافتًا في روحي من لذة مقاومة ومناهضة التسلط والإستبداد والتي طالما حركتني وحمستني لسنوات ضد نظام مبارك
شكرًا لكل زملائي السابقين بفيزكس أكاديمي على الوقت الرائع اللي قضيته معاكم وبعتذر لكل حد أسأت إليه بدون قصد وأتمنى لكم التوفيق في مسيرتكم المهنية والانسانية
No comments:
Post a Comment