لازم حبة جنون

لازم حبة جنون فى عز وقت احتياجنا للعقل و المنطق

لازم حبة أمل فى أشد ساعات اليأس و الوهن

لازم انفجار و هيجان و فلتان و الا ماتبقاش انسان

لازم نتحرك نتغير نتطور نبنى و نكسر و ندور على الحقيقة

لازم نرتوى عطش و نشبع جوع عشان نقدر نرتوى بعد عطش و نشبع بعد جوع

لازم نحب و نكره و نحرق مشاعر و نطفى مشاعر عشان نحس جوانا بأحلاها مشاعر

لازم تقول لأ لما تحب تقول لأ و تقول آه لما تحب تقول آه ... لأ مش لازم ... كسر القواعد .. أنت القواعد ... أنت العقل و الروح و المشاعر

ابتسم وقت حزنك أو أحزن وقت فرحك محدش سلطان عليك الا نفسك

كم تنزف مصر بسبب التكفير ؟

د.نصر حامد أبوزيد

مفكر مصرى ,,, سمعت عنه كتير قبل كدة و للأسف مقريتلوش لحد دلوقتى فأنا ثقافتى مثل الغالبية العظمى من المصريين ثقافة سماعية أكثر منها مقروءة

و لا أعرف تفاصيل وملابسات الحكم عليه بالتكفير و تفريقه عن زوجته

و لكن أعرف أنه زيه زى طه حسين و نجيب محفوظ و فرج فودة و سيد القمنى و مفكرين مصريين كتير تم تكفيره و مطاردته و تشويه صورته بالأكاذيب حتى فقدته مصر بالهجرة مثلما فقدنا من قبل فرج فودة بالاغتيال


ممكن - لأ ده لازم - تشوف لقاء د.نصر مع الأستاذ محمود سعد

http://vimeo.com/5462575

http://vimeo.com/5463005

و ممكن تسمعه و هو بيقول أن الدين مثل الأرض الزراعية الخصبة التى يقلبها المحراث - العقل - لتظل على نضارتها و خصوبتها و يغذيها الطمى - الأفكار الناشئة من خارج الدين - لتظل على خصوبتها

و قد جرفناها و أنهكناها و قتلناها بالسطحية و الجهل و المظاهر الجوفاء

قد ايه مصر خسرت لما مفكر و أستاذ زى ده سابها و عاش براها عشان شوية جهلة منافقين حبوا يشوهوا صورته و يكفروه

قد ايه فيه أجيال من طلبة الجامعة كان لازم يسمعوه و يتتلمذوا عن ايده و اتحرمنا منهم

يا ترى هل واحد زى ده هو اللى يستحق أننا نشوفه فى التلفزيون ولا واحد زى الشيخ فلان ولا الداعية علان اللى ما أفادوش مصر بذرة علم نافع واحدة ؟

لحد امتى يا مصر حتفضلى ضد ولادك و لحد امتى العملة الرديئة حتطرد العملة الجيدة فيكى واحنا عمالين نتفرج و مش فاهمين حاجة ؟

لا اله الا الحق .. لا اله الا العدل .. ولا حق ولا عدل الا بالحرية

http://www.facebook.com/notes.php?id=512682065#/note.php?note_id=104251143033

يا مرشحنا يا مفرفشنا يا مضبطنا

المقال الأصلي والتعليقات على فيس بوك

النهاردة الخميس عيد ميلاد ابليس ولازم نفرفش شوية

أنا الصراحة زهقت من الكلام فى السياسة و من سيرة انتخابات الرئاسة و من مرشحين الرئاسة

لكن نعمل ايه ؟ ,,, الواحد قاعد فاضى مش وراه حاجة غير البلد و قرف البلد .و أهو كله كلام ابن عم حديت .. و على رأى واحد صاحبى كويس انك - أنا - اتجوزتش كانت الحركة الوطنية حتخسر كتير اوى

ههههههههه

أصل أكيد لو اتجوزت حنشغل ... و من هنا أدعو السادة ضباط امن الدولة أنهم يلاقوا لى عروسة كويسة عشان أبعد عن السياسة بالذوق

:)

طيب ايه رأيكم فى فكرة جديدة ؟

تيجوا ما نتكلمش عن مرشحين الرئاسة ؟

تيجوا أحسن و أفيد - لو فيه حاجة مفيدة فى كل ده - نتكلم عن معايير الاختيار للمرشحين بدل ما نتكلم عن مرشحين بعينهم ؟

يعنى تعالوا نتخيل أننا بنتكلم عن عالم خيالى مثالى ملوش دعوة بالواقع السئ بتاعنا و نقول ايه اللى عاوزينه يبقى موجود فى أى مرشح للرئاسة أيا كان بعيد عن الأسماء الموجودة حاليا

أنا شخصيا حعتبر أن أيمن نور رجع السجن تانى و حتخيل أن جمال مبارك فجأة زهق من البلد و قرر أنه يسافر يعيش فى سويسرا .. بفلوسه يا كلاب

و حتخيل أن عمر سليمان طلع هو أدهم صبرى و الموساد قتلوه و حتخيل أنى بحط مواصفات المرشح على مزاجى

خلونا نتخيل سوا أن فيه انتخابات بجد و كل واحد يحط شروطه للمرشح المثالى من وجهة نظره و بس بعيد عن اى اعتبارات واقعية

يكون حليوة و بيعرف بنات كتير ؟ .. يكون مليونير .. يكون - عذراء - عمره ما اشتغل سياسة قبل كدة .. يكون سنه كبير .. يكون سنه صغير ؟ يكون بيصلى ؟ .. يكون سلفى ؟ يكون ملحد ؟ .. يكون عنده خبرة فى التجارة ؟ يكون أبوه رئيس سابق ؟ .. يكون مسك مناصب فى الدولة ؟

كل واحد يكتب المعايير اللى ممكن يختار على أساسها ...... بس و حياة أبوكم فى نقط مرقمة

يعنى كدة :

1- مايكونش أول حرف فى اسمه (أ)

2 - ما يكونش طويل ولا قصير .. بين البينين مايكونش تخين ولا رفيع بين البينين

3 - ما يكونش سافر برة مصر لأن كدة يبقى عميل أجنبى

4 - مايكونش سافر جوة مصر لأن كدة يبقى بيلعب على عواطف الناس

5 - مايكونش تعليم حكومى ولا تعليم أجنبى ولا تعليم عالى ولا تعليم واطى

6 - أعرج - أعمى - أطرش 

يلا يا جماعة .. كل واحد يكتب النقط اللى شايفها مهمة فى المرشح المثالى

و اللى حيقول البرنامج أهم ..... يستنى معانا الحلقة الجاية عشان نسأل فيها عن البرنامج المثالى من وجهة نظركم ........ المرة دى مخصصة للمرشح و مواصفات المرشح

بالنسبة للمدعوق كاتب النوتة دى فهو كان قال رأيه الجد هنا باللون الأسود

http://bad-way.blogspot.com/2009/06/blog-post_20.html

أنا متعصب و ضد المثاليات

متعصب

متعصب ضد أى واحد بيناصر التخلف و العنصرية و الظلم و القمع و الديكتاتورية و بيبررهم بأى تبرير

متعصب ضد الجبنا اللى بيحللوا جبنهم بأنهم يحبطوا غيرهم و يخوفوهم و تلاقى أحلى لحظة بيعيشوها لما محاولة تغيير تفشل أو حد يحبط و يعلن انسحابه من العمل العام ..... تلاقيهم ظهروا من تحت الأرض شمتانين و فرحانين أن بقى فيه واحد تانى صفر زيهم

متعصب ضد السفلة اللى بيتمسحوا فى قيم و مبادئ نبيلة و هما أبعد ما يكونوا عنها ,, زى اللى يقول أنه ليبرالى و يدافع عن التعذيب اللى بيحصل للأخوان .. أو اللى يقول أنه اسلامى و يبقى معندوش ضمير .. أو يعيش فى دور المناضل نصير الفقرا و هو أكتر واحد بيستغل الفقرا لمصالحه الاقتصادية

قرفان من المدعين , من الأرزقية , من دعاة التخلف و العنصرية و الكراهية و القمع و الذكورية

متعصب ضد كل واحد حاول يساهم فى عمل تغيير و لما فشل قلب الناحية التانية و بقى معوق للتغيير و عدو لأى نجاح بيفكره بفشله

متعالى

متعالى ضد الناس اللى بتتكلم بنظريات ملهاش علاقة بالواقع و بيتعالوا على الناس اللى بتحاول تغير الواقع للأفضل

تلاقى الواحد من دول عمره ما مشى فى مظاهرة ولا جرب يقول كلمة حق فى وقت خطر ولا اتبرع بمليم لأى مؤسسة تنوير أو حركة تغيير و بعد كدة يتنطط على دين أم الناس و يقول لازم ترفضوا التمويل الخارجى لازم تبقوا منظمين أكتر من كدة ..... فى ميتين أمك كنت جبت تمويل داخلى عشان تفتح بقك ؟ جربت أنت تنظم شغل بجد عشان تعرف حدود النجاح و الفشل ؟ ولا هو الكلام فى الهوا و خلاص ؟

تلاقيه عمره ما ضيع لحظة واحدة فى أى عمل عام ولا اتعرض لأى ضغط غير مدفوع الأجر و فالح يحط رجل على رجل فى التكييف و يتفنن فى أنه يحبط الناس اللى مضيعة نص عمرها فى محاربة الفساد أو الفقر أو الجهل أو بيحاولوا يساهموا بأى نقطة بيضا فى السواد المهبب اللى احنا فيه

اللى زى ده لازم تكبسه و تزنقه و تسأله أنت قدمت ايه ولا كان ايه دورك ولا تضحيتك عشان تحاكم غيرك و تعمل عليه أبو العريف ؟

***********

ضد المثاليات

ضد المثاليات الزيادة عن اللزوم اللى بتوصل الواحد دايما لليأس و فقدان الأمل

الانسان اللى ما يعرفش يبقى متوازن فى أحلامه و براجماتى فى تحركاته و قابل للتفاوض عمره ما بينجح فى تحقيق أى انتصار لا بعيد ولا قصير

تلاقيه دايما بيبص للنقطة البعيدة اللى هو عارف أنها مش حتتحقق فى الواقع .. و بعد كدة عشان عارف أن النقطة البعيدة أبعد من أنه يوصل لها يمنع نفسه من أنه يخطى أى خطوة فى الطريق و تلاقيه لما يحس أن فيه ناس عندها أمل و بتتحرك مش قادر يبلع لسانه و يسكت .. لكنه طول الوقت بيحاول يقنعهم أن مفيش فايدة عشان يقعدوا جنبه و مايحسش أنه هو اللى معملش اللى عليه

تلاقيه عشان عارف أن الفقر مستحيل ينمحى من حياة البشرية مش عاوز يساهم فى أى منظمة خيرية تخفف شوبة عن الناس الفقرا و يهاجم و يقلل من مجهود أى حد بيحاول يخفف عنهم .. اللى يهمه أن نظريته تنجح و طظ فى الناس ...... الانسانية بالنسبة له نظرية على ورق مش بشر من لحم و دم

بص على الهدف البعيد و احلم بيه(*) ... بس لازم كمان تبقى باصص على أهداف صغيرة فى الطريق عشان تفضل كل خطوة ليها قيمتها و كل نجاح مهما كان صغير له طعمه و فرحته

**********

براجماتى

الحى أبقى من الميت ... و اللى يأس مات .. و اللى عنده أمل لسة عنده حياة .... أنا مع اللى عنده أمل و ضد الميتين لحد ما أموت و لو مت و قلت مفيش فايدة يبقى من حق اللى عايشين يدفنونى و يكملوا الطريق

***********

لا اله الا الحق ,, لا اله الا العدل ,, و لا حق ولا عدل الا بالحرية

***********

مواضيع ذات علاقة

http://www.facebook.com/note.php?note_id=92622658033

http://www.facebook.com/notes.php?id=689080943#/note.php?note_id=109541915811

(*) http://www.facebook.com/note.php?note_id=73049318033

محاولة اعتذار

أنا زى أى انسان بغلط

و كل بنى آدم خطاء

لكن ربنا بلانى بعقلية نقدية بنت كلب بتخلينى أحاسب نفسى طول الوقت على أخطائى

بحاول أطبق مبدأ : حاسبوا أنفسكم قبل أن تحاسبوا

أنا بقالى على الفيس بوك أكتر من سنتين .. كنت كل يوم بدخل فى أكتر من نقاش على أكتر من موضوع و أنا أصلا شخصية انفعالية مش بعمل حاجة غير لو مصدقها اوى عشان كدة فى الكام سنة دول انفعلت على ناس كتير و غلطت فى ناس كتير فيهم ناس فعلا ممكن يكونوا أحسن منى

يمكن فى كل مرة كنت بنفعل كان بيبقى ليا مبرر .. لكن أنا دلوقتى مش بدور على مبررات لأى غلطة عملتها .. أنا بس عاوز الناس اللى غلطت فيها تسامحنى و بس

صحيح مش ناوى أرجع صاحب لحد خسرت صداقته تانى و فيه ناس عارف أن وجهة نظرى فيهم لازالت صحيحة لكن أنا بعتذر عن الأسلوب و التجاوز فى حقهم

أكيد الاعتذار مش حيرفع الغلط ... بس أهو أدينى بحاول أريح ضميرى و خلاص

***********

أحمد شوشة ... مش فاكر لو كنت شتمته ولا لأ .. بس عموما أنا آسف لو كان ده حصل

ايمان ايزادورا .. متأسف انى وصفتها وصف غير لائق

مصرى فى فرنسا .. أتمنى يسامحنى على كل الكلام اللى قلته عليه

اسماعيل النجار .. غلطت فيه كتير اوى

وليد كريم .. ليك الحق تماما تختار توجهك زى ما انت عاوز من غير وصاية من أى حد

أحمد حسين المغربى ... صعب عليا أقول كدة بس أنت المثال الحى على نظرية أصغر منك بيوم يعرف عنك بسنة و بكرة تتعلم أكتر و أكتر

محمد زكى الشيمى .. آسف أن العلاقة بيننا اتدهورت بالشكل ده

قصة الكاهن العجوز

أتذكر قصة سمعتها قديما عن كاهن مصرى عجوز قرر أن يحقق حلمه بأن يخرج من بلدته الصغيرة فى الصعيد لأول مرة فى حياته ليجوب العالم ( القرى الفرعونية ) فى رحلة كان يحلم بها منذ كان طفلا ليختم بها عمره المديد الذى كان فيه مثال للشرف و الأمانة و الاحترام

انتقل الرجل من قرية لقرية يحمل على كتفيه القليل من المتاع و الكثير من الدهشة - دهشة الأطفال - فقد ظل الرجل يردد عبارات التعجب كلما وجد تماثيل بنيت خصيصا من أجل عبادة و تقديس القطط و ينبهر أكثر كلما مر على معابد واسعة شيدت فقط من أجل تقديس اله النيل "حابى" و عندما أصابه التعب فى احدى القرى لم ينقذه سوى كاهنا فى مثل سنه و كاد كاهننا يصعق عندما اكتشف أن الكاهن الذى أنقذ حياته كان قد وهب حياته لعبادة التماسيح و التقرب اليها

أكمل بعدها كاهننا رحلته و كانت دهشته المتصاعدة تملأ قلبه فما كان يراه عجيبا و صادما للغاية بالنسبة له ... ماذا يعبد هؤلاء ؟ أى افك هذا ؟ ... كان يردد هذه العبارات بينه و بين نفسه طوال الرحلة و يتعجل الرجوع الى بلدته حفظا لنفسه من فتنة الآلهة

فى نهاية الرحلة عاد الكاهن الى قريته و أخذ يحكى للناس عن خبراته التى استقاها من رحلته و عن العادات و التقاليد العجيبة لدى القرى الأخرى البعيدة فى الشمال و لكنه التزم الصمت المراوغ حيال أسئلتهم عن العبادات و الطقوس الدينية لدى القرى الأخرى

و ظل الكاهن حتى وافته المنية بعدها بأعوام قليلة لا يفهم كيف يقوم انسان عاقل بعبادة النيل و آخر بعبادة القطط و آخر بعبادة التماسيح ... فهو ببساطة ... كان يعبد البقر

أحمد بدوى
25 يونيو 2009

يعنى ايه صوتى مطلبى ؟

صوتى مطلبى

صوتك لقمتك - صوتك كرامتك - صوتك مستقبل عيالك - صوتك حلمك - صوتك حريتك

حملة قومية ضد تزوير الانتخابات يتبناها مجموعة من رواد العمل الوطنى منهم على سبيل المثال لا الحصر د.سمير عليش - أ.جورج اسحاق المنسق العام السابق لحركة كفاية - المستشار محمود الخضيرى - المستشار يحيى الجمل - د.جمال غيطاس صاحب كتاب الديمقراطية الرقمية - أ.نجاد البرعى - د.سعد الكتاتنى رئيس الكتلة البرلمانية للأخوان .. و آخرين

و من الأسماء الشبابية المشاركة أيضا فى ادارة الحملة : اسراء عبد الفتاح - أحمد ماهر - شهاب عبد المجيد - محمد عيد حلمى - باسم فتحى - باسم سمير - أحمد بدوى

و قد اتفق المشاركين فى الحملة على تبنى الحملة شعار (بنعد بالواحد) ويعنى ان كل مشارك انما هو مشارك بصفته الشخصية لا صفته الحزبية أو الرسمية

و الحملة تهدف الى تدشين نظام انتخابى مصرى يمنع التزوير فى مراحل العملية الانتخابية الثلاث ( الجداول الانتخابية - التصويت - الفرز و اعلان النتائج ) فى أى انتخابات سواء برلمانية أو رئاسية أو استفتاءات قادمة فى جمهورية مصر العربية

و ذلك عن طريق ثلاث محاور أساسية هى :

1 - تغيير قانون مباشرة الحقوق السياسية و الغاء الجداول الانتخابية الورقية و انشاء قاعدة بيانات رقمية للجداول الانتخابية معتمدة على قاعدة بيانات الرقم القومى بحيث يكون لكل ناخب رقم واحد لا يتكرر على مستوى الجمهورية

و ذلك يضمن .. منع تكرار الأسماء فى الجداول - لتسهيل حذف أسماء الموتى و المحكومين و العسكريين ممن لا يحق لهم التصويت فى فترات خدمتهم - لسهولة نشر الجداول للجميع مرشحين و جمهور - تسهيل مشاركة المصريين المقيمين بالخارج

2 - الاشراف الدولى على الانتخابات

و هى وسيلة رقابة محايدة أثبتت فاعليتها فى تجارب انتخابات بلدان ديمقراطية عديدة مثل الهند و الولايات المتحدة الأمريكية

3 - اعتماد نظام التصويت و العد و الفرز الالكترونى فى العملية الانتخابية

و قد تم عمل أكثر من دراسة جدوى مصرية لنظم التصويت و العد الالكترونى التى قد تم استخادمها فعليا فى انتخابات العديد من دول العالم و تم حساب تكاليفها و طرق التأمين فيها ضد الاختراق و التزوير

==================

تنقسم الحملة الى شقين

أولا الشق الاجرائى و التنفيذى و يتضمن :

1 - اعداد تعديلات القوانين و اللوائح المنظمة للعملية الانتخابية
2 - اعداد دراسات شاملة عن تكاليف و الوقت المطلوب للتحويل للنظام الالكترونى الجديد
3 - وضع تصور شامل لخطوات سير العملية التصويتية و اجراءات التأمين التى تتفق مع الظروف و الواقع المصرى

ثانيا الشق الدعائى الجماهيرى و يتضمن :

1 - الاتصال بمؤسسات الدولة ذات العلاقة بسير العملية الانتخابية و على رأسها اللجنة العامة للانتخابات لشرح أهداف الحملة

2 - الاتصال بالشخصيات العامة ذات التأثير و الثقل فى الدولة ( رجال القضاء - رجال الأمن - رموز و قيادات الحزب الوطنى الحاكم ... الخ ) و الشعبية ( الكتاب و الفنانين و الدعاة .. الخ ) و القيادات فى المجتمع لاقناعهم بالمشروع و جدواه العملية و اشراكهم فى مناقشته و ادخال تعديلات عليه و الدعوة اليه

3 - الاتصال بمؤسسات المجتمع المدنى مثل الأحزاب و النقابات و مراكز حقوق الانسان و النوادى الاجتماعية و الثقافية و غيرها للحصول على دعمهم و مشاركتهم فى المشروع بالمجهود و الفكر

4 - الاتصال و المتابعة مع وسائل الاعلام من جرائد و قنوات تليفزيونية و مواقع انترنت للترويج لفكرة المشروع جماهيريا

5 - الاتصال بالجماهير بشكل مباشر ( حملة صوتى مطلبى فى المحافظات ) لرفع الوعى بأهمية الانتخابات بشكل عام و ضرورة المشاركة بها و من ثَمَّ ضرورة منع التزوير فيها و بعد ذلك التعريف بالمشروع و طرق التأمين المتعددة به

و يتضح مما سبق أن أهم عامل يمكن أن يؤثر فى انجاح أو افشال المشروع هو مدى استجابة المصريين أفراداً و حكومة و مؤسسات له و الالتفاف حوله و الضغط من أجل تنفيذه على أرض الواقع بحيث يرفض الشعب المصرى و مؤسساته الاعتراف بشرعية أى انتخابات قادمة بدون تطبيق هذا النظام

صوتى مطلبى
عشان خاطر مصر
************

أحمد بدوى
17-7-2009

==========
مواضيع ذات علاقة

ليه صوتى مطلبى ؟
http://www.facebook.com/note.php?note_id=80302593033

من أوراق صوتى مطلبى - الجداول الانتخابية
http://www.facebook.com/note.php?note_id=92330763033

مصر التى فى خاطرى
http://www.facebook.com/note.php?note_id=73049318033

اسلاميين علينا و فى الحروب نعامة

فى شهر نوفمبر الماضى، كان الشاب ابراهيم حديث بعض الصحف الليبية.. ابراهيم اسقط عصابة دولية فى قبضة السفارة المصرية والامن الليبى.. العصابة ارسل قائدها من لندن مليون يورو.. كانت فى طريقها الى «الغسيل» أو لـ «عملية ارهابية».. الصحف التى نشرت تفاصيل «السقوط» لقبت ابراهيم بـ «الفرعون المصرى الذى اسقط عصابة دولية».. لكن ما حدث بعد ايام من النشر كان قاسيا.. حضر اليه ضابطان من رجال البحث الجنائى فى ليبيا.. عاتباه لأنه أخبر سفارة بلاده بشأن العصابة ولم يخطر الأمن الليبى.. الضابطان اقتاداه الى قسم شرطة هناك..

وحطما عظامه كاملة لمدة يومين متتاليين.. ووضعاه داخل «كيس بلاستيك» من الحجم الكبير.. وألقيا به فى مزرعة وسط مكان خال من المارة والسكان.. ظناً انه مات او سيموت.. وبعد ساعات قادت اليه «المصادفة» صاحب المزرعة ليكتشف الواقعة وينقله إلى المستشفى ليظل به اسبوعا داخل العناية المركزة.

جريمة تعذيب ابراهيم حققت فيها السلطات الليبية والنيابة العامة هناك وأمرت بحبس الضابطين.. لكن السفارة المصرية فى ليبيا التى «طارت» بإبراهيم فرحا عندما أبلغ عن العصابة، تركته هكذا محطما.. لا يقوى على شىء.. وحتى المكافأة التى كان مقررا ان يحصل عليها لم تصله.. ١٠ آلاف يورو كانت كفيلة ان تعيد بعض الكسور فى جسد الضحية الى طبيعتها.. كانت كفيلة ان تعوضه مؤقتا عن «حفلة تعذيب» تعرض لها.. كانت ستمنع دموعا لا تتوقف تغرق وجه الشاب حينما يتحدث

البقية ... http://www.almasry-alyoum.com/article2.aspx?ArticleID=218541


النظام المصرى الحقير ما اتحركش كالعادة عشان يرجع حق الشاب المصرى اللى ضيعته ليبيا ... للأسف ده مش خبر جديد و من كتر تكراره جتتنا نحست و اتعودنا عليه

لكن الجديد فى الموضوع ده أن الأخوة اللى قلبوا الدنيا عشان يستغلوا موت الشهيدة مروة الشربينى شهيدة العنصرية و يخلوها شهيدة الطرحة عشان يروجوا لنفسهم و لعنصريتهم و يحولوا الموضوع من حادث فردى ارتكبه شخص عاطل عنصرى ( ما يختلفش كتير فى صفاته عن صفات العنصريين بدقون عندنا ) لجريمة بيطالبوا بمعاقبة ألمانيا كلها عليها ما فتحوش بقهم فى القصة دى بربع كلمة

الغريبة أن حادث د.مروة حصل بعد ما القضاء الألمانى حكم لها بالفعل بالتعويض ضد الاهانات العنصرية اللى استخدمها ضدها المجرم ... يعنى الدولة الألمانية فعليا كانت رجعت لها حقها بصورة متحضرة و بخطوات قانونية واضحة مفيهاش تحيز للألمانى ضدها كأجنبية و الخطأ الوحيد اللى حصل هو التقصير فى وسائل الأمن داخل قاعة المحكمة

لكن أخواننا الاسلاميين و القومجية لغرض فى نفس يعقوب اعتبروا اللى حصل ده حرب ألمانية على الاسلام و على قيمنا و اذلال للمصريين و اللى قرا مقال الشاعر فاروق جويدة حيلاقيه خلطة عجيبة من كل انواع التناقضات و التهييج و الشتيمة اللى ممكن نبررها بالانفعال مش أكتر

طلعت مظاهرات تشتم المانيا و الألمان و محدش قال أن اللى حصل فى ألمانيا بيحصل عندنا ضد المصريين المسيحيين و البهائيين بصور أبشع و بحماية من الدولة و الأسوأ كمان أنها بحماية من المجتمع نفسه

دلوقتى لما جريمة تعذيب بشعة تحصل عن طريق رجال الأمن الليبى - اللى هما ممثلين الدولة - و فى مكان احتجاز تابع للدولة و لمدة طويلة و يبقى القصد منها الانتقام و القتل و لما الراجل يرجع مصر كومة لحم مفروم و غالبا حيعيش حياته كلها عاجز و بسبب ايييه ؟ .. بسبب أنه منع حدوث جريمة تبييض أموال و أنا أعتقد أن التعذيب ده سببه أن الضباط دول أكيد كان ليهم نصيب فى الفلوس دى ضاع عليهم بسبب بلاغ ابراهيم

لما كل ده يحصل ... هل حتخرج مظاهرات اسلامية بالألوف بتطالب بمعاقبة ليبيا زى ما خرجت مظاهرات بتطالب بمعاقبة ألمانيا ؟
هل حد حيطالب بالاعدام للضباط اللى عذبوا ابراهيم أو حتى حد حيطالب بتسليمه لمصر زى ما طالبنا بتسليم المجرم الألمانى ؟
هل حد من قطيع المليون واحد اللى عملوا جروبات لشهيدة الحجاب حيسمع أصلا عن الموضوع ده ؟
هل حد حيفتح بقه عن الماضى و الحاضر العنصرى ضد المصريين و ضد الأقليات فى الدول العربية ؟

عرفتوا فين الازدواجية ولا لسة ؟
عرفتوا مين اللى بيكيل يميت مكيال و بيتهم غيره بكدة عشان يبرأ نفسه ؟
عرفتوا مين العنصرى اللى نفسه كل يوم تحصل حادثة عنصرية ضده عشان يلاقيها مبرر لاستمراره فى عنصريته و اضطهاده للأقليات الضعيفة فى بلده ؟
عرفتوا مين المجتمع صاحب التفكير القطيعى اللى يقبل الظلم الفاضح من واحد و بيتلكك للتانى على أى حاجة عشان يلاقى فرصة يمارس عنصريته لأنه ميعرفش معنى كلمة عدل أصلا ؟
عرفتوا مين بيحركه الغل و الكراهية مش العدل و الانصاف و طلب الحرية ؟

فى انتظار مظاهرات اسلامية فيها عُشر اللى خرجوا عشان الطرحة .. و فى انتظار مقالات قومجية بتشير الى الحادث حتى من بعيد

و عارف أنى حنتظر كتييير أوى و لعل المانع مش بترول

ربنا يخليه لليبيا و للقومجية

مواضيع ذات علاقة
*************

مصرى تتكسر عظامة فى ليبيا ....انا اسفة...اتفووووووووة - سمر طارق
http://www.facebook.com/notes.php?id=1204691713#/note.php?note_id=101980959769

عن العنصرية المهلبية هنا و هناك
http://www.facebook.com/note.php?note_id=98115068033

الكيل بميت مكيال - ابراهيم عيسى
http://www.facebook.com/notifications.php#/note.php?note_id=123297175129

مروة الشربينى ضحية العنصرية - د.محمد العباسى
http://www.facebook.com/notes.php?id=731296427#/note.php?note_id=122710332232

ما بين ندا الايرانية و مروة المصرية - آسر مطر
http://www.facebook.com/assermattar#/note.php?note_id=232930220098

بيانى عن جريمة قتل د.مروة الشربينى
http://www.facebook.com/note.php?note_id=95678033033

قصة مختلفة عن ضحية الحجاب
http://www.facebook.com/note.php?note_id=97452393033

الصلح خير

المقال الأصلي على فيس بوك والتعليقات

النوتة دى انا عاملها لأصدقائى و أساتذتى أعضاء حزب الغد خصوصا بتوع اسكندرية

أنا عارف ان الجو جو انتخابات و الدنيا مشحونة على الآخر بين الناس

و عارف أن فيه ناس كانت حبايب و أخوات من أسبوعين تلاتة بس و بسبب حاجات صغيرة غلطوا فى بعض و قاطعوا بعض

و عارف أن نوتة على الفيس بوك ولا حيبقى ليها أى تأثير لو الناس ما قعدتش مع بعض عشان تحل مشاكلها بالحوار بينها و بين بعض وجها لوجه

أنا مش حقول أن كل الناس اللى فى الغد أصحابى أو كلهم يعرفونى .. بس اللى يعرفنى منهم حيعرف انى آخر واحد ممكن يبقى له غرض شخصى من اللى بكتبه و كلكم عارفين أن هدفى الوحيد هو المصلحة الكبيرة لينا كلنا لما تبقى مصر بلد ديمقراطية

و الهدف من فتح الكلام هنا مش اننا نفتح مواضيع قديمة لبعض و نفتش عن أخطاء حصلت لأن بصراحة كل الأطراف تتحمل جزء من الغلط

من أول أحمد نصار اللى هو من أكتر الناس اللى بعزها هو و شباب الحزب فى اسكندرية لحد د.أيمن و م.وائل وأ.ايهاب و بقية قيادات الحزب اللى سكتوا فى الأول و هما شايفين المشاكل و الخلافات بتتفاقم خارج اطار الديمقراطية

أى حد غلط فى حد غلطان مهما كان المبرر ... أى حد كذب لأى سبب فهو غلطان .. أى حد كان فى ايده أنه يحل خلاف و فضل أنه يفضل بعيد عن الصورة برده غلطان

المهم دلوقتى نفتح صفحة جديدة و نسامح بعض خصوصا أن زى ما فيه مننا مجانين زيى أنا و أحمد نصار فيه عاقلين زى أحمد ميلاد و زى محمد مجدى و أحمد شعلان و كتييييييير اوى .... و الصراحة أن هى دى تركيبة الغد مش حنجيبها من برة

Alex May 2008

شوية ناس مجانين قرروا أنهم يقفوا ضد حسنى مبارك بحاله و محتاله و يقولوا احنا خلاص مش حنمشى جنب الحيط و من دلوقتى و رايح حنفضح الكذب و النفاق بتاع الحكومة و مش بس كدة ... ده احنا قلنا عندنا البديل المدنى الديمقراطى اللى مصر محتاجاه فعلا رغم كل العقبات و الافتراءات و التهديدات بتاعة الحكومة و ذيولها

اللى حصل فى الأيام اللى فاتت فى اسكندرية خلانى فقدت الأمل و اعتبرت أن الغد مشروع و انتهى ... الموضوع مكنش موضوع ناس اعتصمت فى المقر ... من قبل كدة لما قعدت مع الطرفين و لقيت الناس اللى كانوا بيناضلوا سوا و بيتبهدلوا سوا و بيتحبسوا سوا نسيوا هدفهم الكبير و بيتخانقوا على حاجات صغيرة قلت يبقى الهدف الكبير نفسه عليه العوض و منه العوض و يبقى الواحد يشوف حتة تانية يشتغل عن طريقها و كنت فعلا بحضر استقالتى من الحزب

ليبراليين عشان أحرار

لكن دلوقتى جاتلى أخبار أن أخيرا فيه بوادر انفراج للأزمة و أن الناس اللى كانت راكبة دماغها بدأت تحس أن الموضوع لازم يتلم و لازم يبقى فيه صلح ولازم يبقى فيه لم شمل من أول و جديد

أنا مش بكتب بترتيب معين و بكتب على طول اللى ييجى فى بالى لأن الموضوع مهم فهل ممكن أطلب من كل واحد من أعضاء الغد كان له أو ماكنش له دور فى المشكلة فى الأيام اللى فاتت أنه يعتبر أن دى بداية جديدة على مياة بيضا ؟ ممكن كل حد غلط يعتذر عن غلطه و كل واحد يحاسب نفسه قبل ما يحاسب غيره ؟

ممكن فعلا أننا نعمل نموذج ديمقراطى محترم بجد لأنتخابات نزيهة مفيهاش تدخل من فوق ؟ انتخابات ندخلها و احنا أصدقاء و نخرج منها و احنا برده أصدقاء و كلنا نتعاون مع بعض من غير مشاكل ولا احساس بالمرارة ؟

ممكن بدل قعدات الصراع و التآمر يبقى فيه قعدات صلح و اتفاق ؟

ممكن ؟

ليبراليين عشان بنحب بعض

عن العنصرية الطائفية المهلبية هنا وهناك

الأول شوفوا الفيديو ده

http://www.facebook.com/notifications.php#/video/video.php?v=1179958016318&ref=share

عن سوء معاملة المسلمين فى أمريكا

و جرب تشغل دماغك و أعكس الوضع و تخيل لو ده برنامج مصرى و دى بنت مصرية بهائية أو يهودية أو حتى شيعية فى محل التوحيد و النور و احكى لى ايه الأحداث اللى حتشوفها

ملاحظات :

1 - الفيديو - اللى عامله الغرب الصليبى الكافر - بيلوم الناس اللى وقفت ساكتة و مادافعتش عن البنت المسلمة ... و احنا أصلا لما البهائيين بيوتهم اتحرقت و اتشردوا مجلس الشعب كان عاوز يطلع قانون يجرم اعتناق البهائية ... هآآآآو

2 - عدد اللى دافعوا عن البنت و هددوا المحل بالمقاطعة و هما أصلا ما يعرفوهاش كان أكبر من عدد اللى شجعوا البياع العنصرى .......... تخيل لو كان الموقف ده حصل عندنا و قول لى كام عدد الزباين اللى كانوا حيزيدوا للمحل ده

و كام حملة (ساندوا اخوانكم ضد البهائيين الكفرة) على الفيس بوك حتطلع للدفاع عن الراجل ده .. ده فى حالة لو حد جرؤ و حاول يحاسبه

3 - الغريب أنى لقيت ناس بتتكلم عن حسن معاملة غير المحجبات فى مصر !!!! يعنى كأنهم بيتكلموا عن حاجة تانية خالص ملهاش أى علاقة بالفيديو من الأصل .. مش عارف هل ده خلط غير مقصود ولا مؤامرة اسلامية سنية كونية لتمييع المواضيع ؟

سؤال بسيط عبيط ... هو احنا ليه مش عاوزين نعترف أن عندنا مشكلة عنصرية ؟ ... و ليه بنحاول دايما نبرر الموضوع ده بأن غيرنا برده عنده نفس المشكلة ؟ .. طيب ما احنا مش حنخسر حاجة لو اعترفنا بأن احنا عندنا المشكلة و نحاول نحلها مع بعض ... العالم كله عنصرى بن جزمة يا سيدى بس احنا خلينا أحسن منهم

طيب يعنى انت يبقى عندك انفلونزا كلاب و آجى أعالجك تقول لى لأ ماهو فيه ناس تانية برده عندهم نفس المرض ؟ و تتهمنى أنى بتآمر عليك و عاوز أسرق أعز ما تملك عشان بقول نحاول نعالج المرض ؟

================

اقروا مقال ابراهيم عيسى

http://www.facebook.com/notifications.php#/note.php?note_id=123297175129

هو كمان بالمناسبة عضو فى المنظمة العلمانية الالحادية اليهودية الماسونية الأمبريالية الهمبكية اللى أنا عضو فيها على رأى واحدة دخلت تعلق تقول أنا كل ما أناقش حد على الفيس بوك يطلع يهودى

و اللى لسة ما قراش كلامى فى الموضوع يقراه

http://www.facebook.com/note.php?note_id=95678033033

http://www.facebook.com/note.php?note_id=97452393033

يخرب بيت عيشتكم يا بشر جننتو الواحد

من وحى خطبة الجمعة

الملك النمرود لم يستحق أبدا أن يكون الها معبودا .. فهو لم يعرف قوة التلاعب بالألفاظ

فى رأيك ..... ماذا كان سيحدث لو أنه كان قد رد على نبى الله ابراهيم و قال له "اذا كان الهك يأتى بالشمس من المشرق فهل تستطيع أن تجعله يأت بها من المغرب أيضا" ؟

اسكندرية يوليو 2009

قصة مختلفة عن قضية الحجاب

هبة الحسينى طبيبة مصرية فى الثلاثينيات من عمرها محجبة منذ سن الثالثة عشر تعيش فى أسرة متوسطة الحال مع أمها و أخين أكبر و أصغر منها

قررت هبة فى سن معينة و بعد قراءات متعددة أنها لم تعد مقتنعة بأن الحجاب فرضا دينيا .. بل ربما قررت فى نفسها أن الدين نفسه لم يعد مناسبا لها كأسلوب حياة و قررت التحرر مما جعله المجتمع الرمز الدينى الأكبر - غطاء الرأس - لكننا لم نجد الوقت لنعرف تلك التفاصيل

عند اعلان قرارها النهائى بعدم ارتداء الطرحة مرة أخرى حاولت أمها أن تثنيها عن قرارها و ثار أخويها و أهلها عليها ثورة عارمة و حاول البعض اقناعها بالرجوع للحجاب بالحسنى و حاول البعض الآخر اجبارها على ارتداء الحجاب بالقوة دون فائدة .. فهى عنيدة لا تفعل سوى ما تؤمن بأنه الصواب بغض النظر عن كلام الناس مثلما علمها والدها الراحل التى كانت نسخة منه

ترك أخوها الأكبر المنزل غاضبا احتجاجا على قرارها و توعدها أخوها الأصغر العاطل بالعذاب و الحبس فى المنزل لكنها لم تكترث لكلامه كثيرا فهى تعرف تمام اليقين أنه أبعد ما يكون عن التدين ولا يملك من أمرها شيئا

فى احدى الليالى الكئيبة عاد أخوها الصغير للمنزل من الخارج صارخا متوعدا بعد ما عايره أحد أصدقاؤه أن أخته - ماشية على حل شعرها لأنها بتمشى فى الشارع فعليا "بشعرها مكشوف" ... حدثت بينها و بين اخيها مشادة كبيرة أصرت فيها أنه لا يحق لأحد أن يوجه حياتها و انتهت تلك المشادة بأن قام أخيها - الذى أظهرت التحقيقات بعد ذلك أنه كان غائبا عن الوعى بفعل المخدرات تماما - بطعنها عدة طعنات نافذة أنهت حياتها فى لحظات

================

قصة مأساوية هى و لكن فلنتابع معا ردود الأفعال على مثل هذا الخبر فى الجرائد المصرية

"مقتل طبيبة على يد أخيها العاطل بسبب خلعها للحجاب"

================

التنويريين دعاة حرية خلع الحجاب الذين ترفعوا من قبل عن ابداء أى قدر من التعاطف مع د.مروة الشربينى لم يصمتوا هذه المرة صمتا سخيفا و انما ملئوا الجرائد و مواقع الانترنت و البرامج التلفزيونية بالصراخ و العويل و المقالات النارية عن حرية المرأة المقهورة فى بلادنا و عن مساوئ الحجاب و التطرف الكامن وراؤه

و فجأة أصبحت صورة الضحية هى الصورة الأشهر على المنتديات و المواقع العلمانية الليبرالية اليسارية بصفتها رمزا للاضطهاد الدينى الذكورى و التعصب و التطرف فى مصر

و كون الفتى عاطلا و مخدرا وقت ارتكاب الجريمة لم يكن له معنى عندهم سوى أنه ربط بين صريح التدين و بين المخدرات و أن المتدينين لا أخلاق لهم

على الضفة الأخرى

نجد تعتيما تاما على كل المواقع الاسلامية التى قد أبرزت و أوضحت و كتبت عن حادث مماثل حدث فى ألمانيا على أنه عداء و اضطهاد للمسلمين ... كان الصمت و التقليل من شأن الحادث كأنه لم يحدث من نصيبهم هذه المرة

فقط تبدلت الأدوار لأن الضحية هذه المرة لم تكن "منا" و انما كانت "منهم" و الغى من عقلك أى معنى للانسانية و الحرية اللى مفروض تبقى مكفولة للجميع

على الانترنت و مواقع الجرائد كانت ردود الأفعال العامة متشفية فى الفتاة و متعاطفة تماما مع أخيها القاتل لأنه كان بيحمى شرفه و لأنها استحقت القتل نتيجة لتركها الحجاب فرض ربنا بل و اتهمها البعض بأنها هى الجانية و أن أخوها كان ضحية انحلالها الأخلاقى

على الفيس بوك خرجت جروبات عن شهيدة حرية العقيدة "هبة الحسينى" عدد اعضاؤها بالمئات و خرجت جروبات أخرى تتضامن مع القاتل و تصفه بالبطل و تطالب بالعفو عنه عدد أعضاءها بالآلاف

لم يستطع التنويريين المزيفين أن يدَّعوا أن انفعالهم كان صادقا هذه المرة من أجل الحرية لأنهم ببساطة لم يبدوا اى قدر من الانفعال فى الجريمة العنصرية فى ألمانيا تماما كما لم يستطع التكفيريين دعاة التعصب و رافعين لواء الجهاد ضد العالم أن يدعوا وقت جريمة مروة الشربينى أنهم يدافعون عن حرية العقيدة

و بين هذا و ذاك يظل التعصب الأحمق كامنا فى القلوب معميا للأبصار محطما للمعايير و المصداقية و الرحمة

======================

توضيح
* الفيس بوك مسح النوتة الأصلية و كل التعليقات السابقة بسبب الصورة
* القصة المذكورة مستوحاة من الواقع ومن أحداث كثيرة مشابهة مع اختلاف التفاصيل

مواضيع ذات علاقة
بيانى عن جريمة قتل د.مروة الشربينى
http://www.facebook.com/notes.php?id=512682065#/note.php?note_id=95678033033

الرجاء الاشتراك فى جروب بدوى الأول عشر لسهولة التواصل
http://www.facebook.com/groups.php?id=512682065&gv=12#/group.php?gid=19793548417

بيانى عن جريمة قتل مروة الشربينى

باختصار غير مخل ... اللى حصل فى ألمانيا جريمة عنصرية حقيرة ضد انسانة مارست حقها فى الحياة بكرامة و بحرية و أصرت على الحفاظ على كرامتها و ناضلت بصورة سلمية من أجل حريتها فى اختيار عقيدتها داخل الاطار القانونى الشرعى للدولة

و برغم أنها أخدت حقها عن طريق القضاء الألمانى لكن الكراهية و التعصب و الغباء البشرى للأسف تغلب على كل احتياطات العدالة و قرر المجرم العنصرى أنه يغتال حلمها فى الحياة بكرامة و يقضى على وجودها نفسه لأنه زى أى ارهابى مقدرش يتقبل أن عنصريته و غطرسته و وهمه الزائف بالتفوق على الآخرين ملوش مكان و ملوش معنى

ملاحظاتى الشخصية كالآتى :

أولا : جريمة قتل السيدة المصرية مروة الشربينى مش جريمة قتل عادية .. لأ دى جريمة وحشية مؤلمة دافعها عنصرى بحت و سببه كراهية الآخر و رفضه و محاولة الغاؤه ... لكن تصادف فيها أن الآخر ده هو حد مننا .. حد مسلم و مصرى .. سيدة فاضلة بجد كان عندها عزة نفس أعطاها اصرار على التعامل مع مجرم عنصرى بتحضر و بالوسائل القانونية الشرعية

ثانيا : مروة أصبحت شهيدة الدفاع عن كرامتها الانسانية و حريتها فى اختيار عقيدتها و مظهرها و سلوكها فى مجتمع مغاير لقيمها و الجريمة اللى ارتكبت ضدها لا تقل بشاعة عن جريمة اغتيال فرج فودة أو قتل السياح الأجانب فى مصر على يد الجماعات الارهابية

مروة فى رأيى أصبحت رمز من رموز النضال المستمر ضد التمييز و التحقير الدينى و العنصرى و رمز لأهمية نشر ثقافة قبول الآخر و التمسك بيها بكل ما أوتينا من قوة و عقل و منطق و حس انسانى

ثالثا : تشابه الجريمة دى مع جريمة القتل العشوائى للمسيحيين المصريين فى الاسكندرية فى 2006 أو جريمة الاعتداء على بيوت البهائيين و حرقها فى 2008 تشابه مذهل و ملفت لأى صاحب ضمير

كل الجرايم دى جمعها أن دافعها الأساسى هو التعصب و العنصرية و الغل المتستر فى شكل التفوق العنصرى مرة و التفوق الدينى المذهبى مرة تانية و كل الجرايم دى نتج عنهم مآسى انسانية بشعة مؤلمة لأى انسان ذو احساس أو بيدعى الانسانية بغض النظر عن جنسه أو دينه

رابعا : الفرق الأساسى و الملفت و المحزن فى الحالتين أن بينما أعلن المجتمع الألمانى لأستنكاره و صدمته و رفضه اللى حصل و اعتباره أن ده عار من بقايا زمن انتهى و ملوش مكان فى الحاضر ولا المستقبل .. كان المجتمع المصرى الشعبى المسلم فى أغلبه ساكت و مبرر و متضامن فى الحوادث المشابهة اللى جرت عندنا ضد أى مخالفين للأغلبية سواء ضد المسيحيين أو البهائيين أو الشيعة أو غيرهم .. بل بالعكس كان فيه نسبة لا يستهان بها من المصريين مبسوطين و مشجعين للجرايم دى طالما بتحصل ضد بشر غير مسلمين من غير أى اعتبار لأنسانيتهم و حقوقهم كبشر

خامسا : لا يجوز شرعا ولا عقلا لدعاة التعصب و العنصرية و التخلف و كراهية الآخر أنهم يحاولوا استغلال جريمة بشعة زى دى - هما أصلا بيدعوا لارتكابها ضد الآخرين ليل و نهار - علشان يحاولوا يعوضوا بعض من الأرضية و التواجد اللى خسروهم فى الفترة الماضية على كل الأصعدة و بعد انكشافهم و ضياع حججهم فى أكتر من مكان

مش معقولة أبدا أن اللى بيدعو ليل و نهار لتدمير و نسف و قتل و حرق الآخر المخالف له فى الدين و المذهب و المعتقد ييجى دلوقتى و يركب الموجة و يستغل الحدث البشع ده فى نفخ نار التعصب و الحقد و كراهية الآخر

ده أمر سافل و انتهازى تماما و بيوضح مدى حقارة الفكر الاقصائى الارهابى اللى بيدعو للجريمة ثم يستغلها لما تحصل فى المزيد من الدعاية ليها و بيمشينا فى دايرة مغلقة لا خروج منها ولا مفر غير الموت و الكره المتبادل

سادسا : مش مقبول اطلاقا من أدعياء الليبرالية و متنطعى الحريات و مشوهى فكرة الانسانية بتطفلهم عليها و مفرغى قيمة التسامح من معناها بأنهم يحاولوا يبرروا اللى حصل أو حتى يسكتوا و يغضوا الطرف عنه و لو للحظة بأى شكل كان

مش مقبول من أى كائن بيدعى أنه ينتمى لجنس البشر أنه يعتبر كون مروة اتقلت عشان اصرارها على حقها فى ارتداء الحجاب سبب فى عدم التضامن معاها و مع أسرتها أو المرور على الموضوع مرور الكرام

الشئ - و ليس الانسان - اللى مايشوفش أن دى جريمة ضد قيمة الحرية و التسامح و تقبل الآخر اللى بيصدعنا بالكلام عنهم ليل و نهار يبقى أعمى و يبقى منافق و عنصرى زيه زى المجرم اللى ارتكب الجريمة نفسه و زيه زى كل دعاة التعصب و الموت المنتشرين فى كل مكان

سابعا : أى حد يهمه مستقبل مصر و مستقبل البشرية كلها لازم ينظر للمأساة اللى نتجت عن التطرف و التعصب بعين التأمل و التعلم ..

أى انسان عنده ذرة من الكرامة الانسانية لازم يحط نفسه مكان الآخر اللى بيدعو لاقصاؤه و تدمير حياته و يشوف حيحس بايه لو الأماكن اتبدلت زى ما حصل فى الجريمة دى

آخر و أهم نقطة لازم أذكرها أن مش لازم أبدا أن الساحة تفضى لدعاة الكراهية و الموت و القتل و التمييز عشان يبثوا فيها سمومهم و ينشروا سفههم و حقدهم و تجارتهم بالمشاعر على حساب أرواح الناس و حريتهم فى الاختيار

لازم لما تعلى أصوات الموت و الهدم و الكراهية من كل مكان يعلى أكتر صوت الحياة و الحرية و المستقبل و لازم ينتصر فى النهاية


أنا متضامن تماما مع الشهيدة مروة الشربينى و مع أسرتها و مع كل انسان بيدافع عن حقه فى الوجود و الحرية و الكرامة و الاختيار و التميز و الترقى بدون تفرقة عنصرية أو دينية أو جنسية

أنا متضامن تماما مع كل شهيد دفع حياته تمن لاصراره على حقه فى حرية الاختيار و اصراره على تطبيق حقه على أرض الواقع

و أرجو من كل المتضامنين مع الشهيدة مروة شهيدة الحرية ضحية التعصب و الكراهية أنه يضم توقيعه معايا هنا

أحمد ميلاد - أحمد بدوى - عبد الله بيارى
محمد فؤاد - اسراء عبد الفتاح - آسر مطر - ساندرا أحمد
عادل اسكندر - باسم سمير - آية
مشيرة محسب - محمود منير متناوى
شريف السقا - هبة الله - شريف صابر
خالد خليل - رغدة سليط - ماجد ماهر
محمد الهنداوى - نهال كمال - رفيق ابادير
كريم مصطفى مرزوق - مروة رخا
مها الأسود - أحمد بدراوى - هند خيرة
سمر طارق - مشيرة صالح - أحمد أبو راس
بيتر جميل - مينا رياض - ناجى حسن
أحمد منسى - نشوى ناجى
ابراهيم عبدالله - هانى سمير صمويل
أنس عبد العظيم - شهير شاهى
أمير بولس استاورو - هانى جورج
محمد حسن مرسى- كريم جمال صالح
طارق المحلاوى - أحمد حسن
أمانى - جوزفين بطرس الياس
أحمد العربى - أندرو فانوس
دعاء أحمد مصيلحى - هبة الشلقانى - عمر صفا
أحمد جاد - أمنية محمد فؤاد
فؤاد فخرالدين - جومانة فرحات
ايمان أحمد - أحمد سامى
نور أيمن نور - أحمد كامل - انجى رمزى صديق
أمانى خليل - مريم محمد - آية صقر
اسلام على - ريهام أشرف أحمد
مها عبد الوهاب - هبة سمير - سامح الحصرى
أمنية أمين - وليد شريف الشريف
دعاء يونس - هالة دياب - ايمان أحمد
هبة صلاح الزينى - وائل فاروق حنفى
نهى فوزى - مارى مراد شنودة
سارة يحيى - دنيا عبد المنعم
عبدالله رجب - مى صلاح
محمد أبو الغيط - عمرو محمد نبيل
محمد عمر - بيتر بيتر
شريف سامى - لينا الجيزاوى
رامى صبرى كيرياكس

الستارة السودا

الستارة السودا مخوفانا كلنا ... واحد فاكر وراها عفريت و واحد فاكر وراها مدفع و واحد تانى خايف ليكون وراها أسد مسعور

هما طول الوقت بيهددونا بأنهم حيرفعوا الستارة السودا .. و احنا دايما بنقول لبعض (( أوعى لحسن تروح ورا الشمس .. خلى بالك الحيطان لها ودان .. خلينا ماشيين جنب الحيط أحسن ))

لحد ما أول واحد يقرر أنه لازم يعرف ايه اللى ورا الستارة .. و فى لحظة معينة يجرب بقلق أنه يوارب الستارة و يبص وراها من غير استئذان

يقوم كل اللى يلاقيه ........... مجرد صرصار

مجرد صرصار عامل رعب للناس كلها ؟ ... لأ ده مش الصرصار .. دى الستارة ... ستارة الجهل

=============

قصة منقولة من كلمة قالها د.أيمن نور فى مؤتمر سياسى حضرته فى 2004 أول ماكنت لسة بحاول أعرف يعنى ايه سياسة و أحزاب و ليه دايما الناس بتخاف من السياسة

و من ساعتها بقى مزاج عندى أبص ورا الستارة قبل ما أبدأ أخاف