Monday, September 7, 2009

حدث فى مثل هذا اليوم : انتخابات الرئاسة 2005

اليافطة دى كان مكتوب عليها 70 مليون مصرى يؤيدون مبارك .. و بعد تريقة الاعلام غيرها و خلاها أغلبية المصريين يؤيدون مبارك



النهاردة م.حسام الدين على لقيته بيتكلم عن ذكريات يوم أول انتخابات رئاسية بتاعة 2005 و لقيت ذكريات اليوم ده نورت مرة واحدة فى دماغى

اتفضل معايا و سلى صيامك
مش من عادتى أبدا أحفظ تواريخ الأيام و ساعات كتير بفاجئ أن ذكريات معينة فات عليها سنين و انا مش واخد بالى و بستغرب من الناس اللى مسجلة حدث لكل يوم عدا عليها
2005


===================



أنا كنت واقف في لجنة فى مدرسة في مدينة نصر خاصة بعمال شركة حكومية ( أفتكر عمال النقل ) و كلهم جايين تبع الحزب الوطني .. العمال كلهم حاطين صور مبارك و جايين فى أتوبيسات متعلق عليها شعار الحزب الوطنى
و الريس بتاعهم اللى كلهم بيسمعوا كلامه فضل فى اللجنة طول اليوم كان عضو حزب وطنى

القاضى كان راجل محترم جدا و شاب مش كبير بس كنت مطلع عينه طول اللجنة .. كنت متحمس جدا و مذاكر كويس المخالفات اللى من حقى كمندوب مرشح أرفضها .. مثلا ماينفعش حد يدخل عند الصناديق و هو معاه شعار لأى حزب .. و كان من حقى أشوف علامة الحبر على صوابع الناس بعد التصويت عشان أضمن ما يروحوش يصوتوا تانى فى لجنة تانية .. و هكذا

و كان كل ما حد ييجى يدخل اللجنة و هو معلق صورة مبارك أقول له شيل صورة مبارك و حطها برة

آه نسيت أقول انى كنت مندوب عن د.أيمن نور مرشح حزب الغد و مكنش فيه أى مندوبين تانى لأى حزب غير الغد و الوطنى

الموظفين بتوع اللجنة كان أغلبهم كبار فى السن و كانوا بيبصوا لى باستغراب فى الاول لأنى كان عندى يا دوب واحد و عشرين سنة و عامل عليهم الفا الفصل و رايح جى ألف بين الصناديق و أطلع برة ابص على الناس و ساعات لما ألاقى اللجنة فاضية أطلع الشارع أوزع ورق دعاية لأيمن نور و كل ما أشك فى أى حد فيهم أروح أقف على دماغه و أشوف بيعمل ايه

كنت بتصرف بتلقائية و حماس بقى غريب بالنسبة لى دلوقتى و كان غريب بالنسبة لهم وقتها

شوية و اتصاحبت معاهم و عرفت أن أصغر واحد فيهم عضو فى الحزب الوطنى بس كان شكله غلبان

فى اليوم ده شفت ناس كتير جدا بييجوا مخصوص عشان ينتخبوا لأول مرة و مش عندهم بطايق انتخابية بس التصويت وقتها كان ممكن بالبطاقة الشخصية و برده كانوا مش بيلاقوا أساميهم فى القوايم المتعلقة برة

و فاكر و الله العظيم راجل جه هو و ابنه الصغير و قال لى أنا بقالى ساعة بروح من لجنة للجنة عشان الاقى أسمى و انتخب مش لاقى و مش حسكت غير لما أحط صوتى .. سألته أنت حتنتخب مين ؟.. قال لى دى حاجة ترجع لى بس الأهم ان صوتى مايضيعش

محدش خالص فى العمال اللى جم فى أتوبيسات الوطنى و اللى دخلوا صوتوا كان عارف أيمن نور و الناس اللى كانت بتيجي من أهل المنطقة ينتخبوا مكنوش بيلاقوا أساميهم وكل ده خلانى أنا يائس تماما و محبط فى آخر اليوم
حدث فى مثل هذا اليوم 7 سبتمبر 2009
2005



آخر اليوم خالص القاضي لما جه عد الأصوات فوجئ بأن أيمن نور واخد تلت الأصوات تقريبا فى اللجنة و كان مستغرب جدا و سألنى أنت جبت كل ده منين ؟؟
اذا كان كل الي دخلوا اللجنة كانوا معلقين صور مبارك ؟؟

طبعا أنا مفهمتش السؤال و كان باين عليا الاكتئاب و الارهاق فلقيت الموظفين نفسهم اتلموا حواليا و قالوا يابنى أنت لسة صغير و مش فاهم .... اللجنة دى مفروض أنها متقفلة للريس .. و كون ان أيمن نور ياخد أى أصوات هنا فده شئ غريب فما بالك بتلت الأصوات ؟ ... مبروك .. ده مؤشر حلو اوى لبقية اللجان

من ساعتها عرفت أن المصريين لؤما وأن النتيجة مش بالمظاهر و أن سهل اوى تجبر أى حد أنه يعلق يافطة مش عاجباه لكن لما يبقى لوحده هو و الصندوق ممكن النتيجة تختلف خالص

====================


حدث فى مثل هذا اليوم


يوم ان انتخبت مصر الرئيس 2005 .. حسام الدين على
http://www.facebook.com/notes.php?ref=sb#/note.php?note_id=125871443231

زي النهاردة من أربع سنين .. عمرو عوف
http://www.facebook.com/oke1985#/note.php?note_id=126963713380&ref=mf

ـ 7 سبتمبر يوم غير حياتى .. محمد حسين
http://www.facebook.com/note.php?note_id=125810178033&comments#/note.php?note_id=129558796486

اربع سنوات على انتخابات 2005 .. أحمد سمير مصطفى
http://www.facebook.com/inbox/readmessage.php?t=1082369554280&f=1&e=-12#/note.php?note_id=129347485980&ref=nf
لدرجة أن ريس العمال بتاع الحزب الوطنى قعد يتريق و قال لى أنا حنتخب أيمن نور بس عشان أنت صعبان عليا وقفتك دى
Post a Comment