فضفضة انهاردة

انهاردة زى معظم أيام حياتي مليان أحداث وأفكار وآراء عاوز أقولها وملاحظات عاوز أكتبها

عندي شغل كتير اوي لازم يتعمل

لازم أبدأ أتصل بالمتطوعين في مراقبة الانتخابات بس مش معايا رصيد , فلست , لازم أعمل اجتماع قريب جدا في مدينة نصر للشباب والا الموضوع حيموت بس مش لاقي وقت طول الاسبوع ,, ولما بفضى ببقى وقعت من التعب

مع اني مش بعمل مجهود كتير ,, مفيش مقارنة مثلا بين مجهودي ومجهود باسم فتحي أو سلام .. الواد سلام ده جدع جدا بطريقة مدهشة فاكر أول يوم جه المعهد كنت مقلق منه مش عارف ليه

مش بعمل مجهود كبير بس بتعب بسرعة وتعبي متعب يعني

متفائل من اتحاد الشباب برغم اني كنت متشائم جدا في البداية ورافض أدخل فيه وحاسس انه كتلة مشاكل ,, بس محمد حجازي محترم وعاوز يعمل حاجة ,, والشباب اللي موجودين معظمهم بتوع شغل مش خناقات .. حنشوف بعدين

الجميل في حياتي ان معظم اللي حواليا تحف انسانية نادرة بالمعنى العظيم للكلمة ... في المعهد - في الحزب - في 6 ابريل - في التدريب ,,, معظم اللي أعرفهم ناس جميلة ونضيفة من جوة لدرجة اني بشك اني أنا اللي وحش لأني بشك في ناس منهم وبطلع معظم الأحيان غلطان ,,, حتى الناس اللي بتجنبهم بسبب شرهم بلاغي أغلبهم يا اما مكشوفين أوي يا اما معذورين اوي .. ظروفهم وحياتهم شكلتهم على الشكل ده وبدل ما أكرههم أفضل أتجنبهم عشان أريح نفسي

مفروض أعمل بحث كذا ورقة .. بس انا عمري ما عملت ابحاث قبل كدة ومعرفش حتى ببدأ ازاي .. طول عمري واخد الثقافة هواية وبهتم بالأفكار بغض النظر عن صاحبها .. مبيفرقش معايا اللي كاتب الكلام ده اسمه ايه .. لحد قريب مكنتش أعرف الفرق بين جون لوك وجون ستيوارت مل .. أهو كلهم جون .. بس شغل وحدة التدريب فايدني كتير

انهاردة اتكلمنا عن المشكلة اللي مزهقاني من الحزب من فترة .. احنا مش بنتكلم عن برامج وخطط للاسلاح .. شتيمة في الحكومة وبس .. بالرغم من ان عندنا برنامج مظنش موجود زيه في أى حزب تاني .. أكيد محتاج تطوير بعد خمس سنين ركنة .. لكن مش معقولة كل كلامنا يبقى عن نقد النظام والأخوان وبس

شوية تواضع يعلمني ان العواطف ليها أثر كبير في أفكار وقناعات الانسان مهما كان عقلاني

لو الموضوع عقلاني بحت كنت أستقيل من الغد وأبقى مستقل لأن ده حيديني مصداقية وحرية حركة وحرية رأى أكبر .. دلوقتي كل ما أقول حاجة الناس بتفتكر اني بقول كدة بسبب انتمائي للغد وفي نفس الوقت كلام كتير عاوز أقوله ومش بقوله لأني شايف أن عليا مسئولية الناس اللي انتخبوني واللي ساعدوني في دخول الهيئة العليا وما ينفعش أتخلى عن المسئولية دي .. ده غير اني مابقاش عندي وقت كتير ... يمكن يكون ارتباطي العاطفي بالغد مخليني لسة شايف فيه أمل كبير وفرصة أكبر من أى كيان سياسي تاني أنه يبقى له الصدارة لو بقى فيه تيار فكري متناسق .. ليبرالية اجتماعية .. احنا من الاول قايلين احنا بتوع ليبرالية اجتماعية وطريق تالت مش أى حاجة تاني

مبقيتش قادر أتكلم عن مشاعري ناحية الانسانة اللي بحبها لأن ده بيضايقها لكن ده بيديني الفرصة اني أطلع أفكاري على شكل قصص .. عندي المقالات والقصص بتتبني على كلمة أو جملة أو موقف

القصة الأخرانية كانت حلوة بس جديدة لأني كنت بلهي نفسي بسرد أحداث عن أشخاص متتاليين وخلاص .. قصة بلا نهاية ولا مشكلة بعينها وكل واحد يشوفها بوجهة نظر مختلفة

ناس كتير بقوا متأكدين ان انا ملحد .. لكن ده مش صحيح ومش فارق معايا فاكرين ايه لأن التصنيفات أصلا مش فارقة عن بعضها كتير .. الفكرة كلها ان عندي أسئلة محدش عارف يجاوبها وأنا انسان حر .. مفيش حاجة حتمنعني من التساؤل والمشي ورا تساؤلاتي لحد آخر نفس

سألت أسئلة ولقيت الاجابة ان يا اما مفيش اجابة وخلينا نعدي النقطة دي يا اما التبريرات غبية في منتهى السخافة والسذاجة ... أنا مش أذكى واحد في الدنيا ... لكن كمان أنا مش غبي عشان أضحك على نفسي بتبريرات ساذجة ومضحكة

تخيل لو قلت لك أن نيلسون مانديلا قتل كل الرجالة البيض في قرية في جنوب أفريقيا عشان خاف ليتحالفوا ضده ... تبرير ده في حد ذاته جريمة غير مقبولة

ازاي يكون الانسان أقدر على الرحمة والمغفرة من الاله اللي بيعبده؟  اله عاجز عن التسامح مع المخالفين له هو اله عاجز وغير موجود أصلا

الاله الحقيقي يترفع عن الثواب والعقاب من الأساس ولو الدنيا دي لا تساوي شئ بالنسباله ميخليش كل التهديد والوعيد ده لأتفه الأسباب

الاله خارج قدرات العقل البشري .. ده شئ منطقي لأنه هو خالق العقل البشري ..... لكن الخارج ده لا يصح بالمنطق أنه يتدخل فيما هو خارج نطاقه ...

عاوز أهاجر برة مصر .. أكيد مصر حتتغير .. حتعيش أوقات أصعب من دلوقتي بس مسيرها للتغيير ... يمكن بعد عشرين سنة تبقى مصر دولة حرة ,,, لكن بعد عشرين سنة حيكون ضاع عشرين سنة من عمري في حرب مرهقة ومؤذية

طب لو هاجرت حيبقى ايه الهدف من حياتي ؟ .. ححارب حرب تانية بشكل تاني .. حرب فكرية يمكن .. لكن من مكان آمن ووسط ناس متقبلة التفكير وبتحترمه ووسط مكان نضيف بحيث بعد عشرين سنة أكون كبرت عشرين سنة مش خمسين

عندي كتب عاوز اكتبها وكلام عاوز أقوله ... لكن لسة بدري على المجتمع المصري عقبال ما يوافق أنه يسمع كلام زي ده

بس بيني وبينك الحرية لذيذة .. اني أكتب الكلام ده اللي ناس كتير بتخاف تقوله بينها وبين نفسها وبينها وبين أقرب أصحابها أمر ممتع ومغري بالاستمرار ... أفكاري هنا حاجة عادية برة ان لم تكن محافظة زيادة عن اللزوم ,,, بس ليها سحرها وخطرها هنا

تشد الخيط لآخره لحد ما يتقطع وبعد كدة تسيبه وتمشي

الانتحار فكرة مش وحشة كمان .. انك تتخلص من كل متاعبك وأحلامك ومخاوفك في لحظة واحدة .. شئ مغري بالتجربة .. ضياع الوعي أمر جدير بالتجربة ... لكن من العبث استعجاله مادام كدة كدة حيحصل في يوم من الأيام

لكن مين قال ان الحياة مش عبث وان انهائها في وقت مبكر مش جزء من قاع العبث ده ؟

فكك مني