مش مصدق اني بعد السنين دي كلها محتاج أراجع تاني معنى كلمة صداقة وصديق وصاحب ... واضح ان المقاييس عندي كانت هليهلية زيادة عن اللزوم وأى حد كان بيعدي في حياتي وما يبقاش فيه بيني وبينه مشاكل أعتبره صديق
مش عارف ... مظنش أنا كنت بعمل كدة اوى .. ده انا حتى مش بتعرف على الناس بسهولة ... يعني لما حد تكون تعرفه من سنين وبتعتبره أخ وأكتر من أخ بسبب المشاكل اللي اتعرضتولها سوا وتكتشف بعد كدة ان الموضوع بالنسباله ميسواش حاجة ... يبقى أكيد العيب في اختياراتك
خسارة اني أعتبر السنين دي كلها ضاعت فشنك واني محتاج أبدأ أتعرف على ناس كنت فاكر اني أعرفهم ويعرفوني كويس من أول وجديد .... خسارة اني أبدأ أشوف حاجات كتير كنت بتعامى عنها قبل ما تأذيني ومشفتهاش غير بعد ما صابتني
ممكن ميكونش العيب في الصديق لكن الوسط ده كدة .. وسط قذر ومليان أمراض نفسيات على انتفاخات ذاتات ملهاش اى تلاتة لازمة .. مصر كلها كدة .. فيها انتخاب عكسي .. السافل هو اللي بيظهر على السطح .. خسارة
***
الراجل النهاردة اللي وقف الاسانسير أكد لي اني بهلك نفسي في سكة غلط .. سكة خسرانة من كل النواحي ومش واحد زيي اللي حيكسب منها اي حاجة ... لا انا بتاع سياسة - لو بتاع سياسة مكنتش أبقى صريح لدرجة الغباء دي - ولا بتاع فلوس - مكنش مرتبي حيقل من كل مكان اشتغلت فيه أقل من اللي قبله - والكلام بتاع النضال والتضحية طلع واجهة عشان كل واحد يرضي غروره ويظهر نفسه بشكل ما ...... أكيد فيه ناس عبيطة زيي بس انا مليش دعوة بيهم .. يمكن يزهقوا ويمكن ينجحوا في اللي مش حاسس اني نجحت فيه
الخلاصة اني آمنت تماما اني محتاج بداية جديدة خالص بدون صحيفة سوابقي القديمة .. حياة في مكان مختلف مع ناس تانيين وظروف تانية خالص ... بس كله بأوانه
للأسف مش عارف اركز اوي في اللي بقوله عشان منمتش من امبارح بس اهو لازم يتقال وخلاص
No comments:
Post a Comment