Tuesday, November 16, 2010

جيل مخضرم

زمان قالوا لنا في المدرسة إن الشاعر المخضرم هوالشاعر اللي عاش عصرين مختلفين, جيل التمانينات برده جيل مخضرم

أنا عشت طفولتي في وقت مفيش فيه وسيلة اتصال غير التليفون الأرضي التقيل أبو قرص وشفت أبويا وهو جايب الإختراع اللي اسمه أنسر ماشين بشرايط زي شرايط الكاسيت من إيطاليا وعشت بعدها مراهقتي في وقت كباين ميناتل والكروت والاتصال ببيت البنت اللي بتحبها من الشارع عشان تسمع صوتها من غير ما حد يعرفك بس أنا مكنتش بعمل كدة عشان مكنتش مصاحب

لما كبرنا عشنا مدة مع هاي فايف وبعده الفيس بوك ودلوقتي معايا التويتر والبامبوزر كمان

عشت وأناصغير أوي زمن مسدس المياه والمسدس اللي بيطرقع والعساكر البلاستيك وبعد كدة صرفت مصروفي كله علي الفيديوجيم ولعبة ميتال سلاج بالذات وبعد كدة لعبت الفيديو جيم اتحول لسايبر بنلعب فيه طول اليوم إمباير إيرث ورد ألرت وميدال أف أونور

بعد كدة بطلت لعب عشان مبقاش فيه وقت فراغ وبقي لازم الوقت يكون فيه حاجة جديدة بتعملها أو بتتعلمها وإلا حتقع من السباق
Post a Comment