Wednesday, March 23, 2011

تقريبا كويس , مش كدة؟

علي فكرة أنا بكتب كويس جدا وأحسن وقت بكتب فيه هو قبل ما أنام علي طول
زي مافيه ناس مش بتبدع غير لما تشرب حشيش أنا ببدع أوي لما يكون جسمي مهدود وفي نص وعيي وبروح في النوم
أنا عامة انسان كويس ، طيب ، حنين ، بحب أساعد الناس ، بفكر بشكل منطقي ومش بخاف من حاجة تقريبا

لكن أزمة حياتي ان معنديش طموح ، مش بطمع في أي تغيير للأحسن ، كسول بشكل وحش أوي وكسلي نابع من ان مفيش حاجة بسعي إليها
الحاجة الوحيدة إللي بحس ان ليها معني وبحس اني محتاجها هي الحب

لما بحس ان حد بيحبني - حب ست وراجل مش حب صحاب وأخوات والهبل ده - شخصيتي بتتغير ، ببقي مبسوط ، بيبقي عندي أمل وراحة نفسية وبيبقي باين عليا ، بشتغل كتير من غير تعب ولا زهق

لما بيغيب احساس الحب من قلبي وبحس ان محدش بيحبني بحس بالوحدة واللامبالاة وعدم الاهتمام بأي شئ
قلبي بيفضي وروحي بتدبل ، ببقي ساكت لأن الكلام كله بيحصل بعضه
يمكن مش بتمني الموت ، لكن بعيش كأني مت

عمري مابستمتع بالحياة وأنا لوحدي ، وأنا مش محبوب مش كشخصية لذيذة أو كصاحب وإنما بشكل خاص ، لو أنا مش رقم واحد في حياة حد ، أي حد ، فأنا رقم صفر في حياتي وبعيشها كعقوبة سجن جوة نفسي بنفذها
Post a Comment