Tuesday, January 24, 2012

متناثرات من وحى برلمان الثورة


مش ملاحظين ان كل دولة بتعمل ثورة بيبقى حظها اوحش من اللي قبلها؟
تونس أنجح واحدة . بعدها مصر اتعثرت شوية . بعدها ليبيا اتدمرت . بعد كدة اليمن ادت حصانة لصالح وسوريا مش باينلها خلصان والبحرين واقفة مكانها

السنة اللي فاتت قبل التنحي كانت ناس كتير خايفة أن القوى السياسية تتفاوض مع عمر سليمان وتبيع القضية والقوى السياسية كانت عاوزة تخلص الموضوع مع عمر سليمان فعلا، ساعتها قلت المزايدة هي الحل،، اللي حيضعف حنزايد عليه لحد مايطلع ميتينه اللي يبيع القضية من القوى السياسية حيلاقي مزايدات تخليه غصب عنه ياخد مواقف أقوى

الدب أو التنين أو الفيل أو أى حاجة ضخمة بتعبر عن حجم مصر وثقلها أتحركت ومش حترجع تاني لورا ،، الموضوع أكبر مني ومنك ومن المشير والمرشد
مصر أتحركت ، ببطأ صحيح لكن بطئ متناسب مع ثقلها وكم الجرايم اللي أرتكبت في حقها طول نص قرن

إذا كان الثوار فشلوا طول سنة كاملة في تكوين مجموعة تتكلم بإسمهم فغير مقبول تضييع فرصة وجود برلمان منتخب يحقق مطالب الثورة بالضغط الشعبي

حسني نفس حروف حسين ومرشد تلات أربع مشير

حد بقى يقول لي أن مجلس الشعب بيسحب شرعية التحرير عشان أقول له بمنتهى الأدب : أنت حمار يا حمار؟

كلام أبو العز الحريري وأكرم الشاعر عن الشهداء بيوصل لملايين المصريين وبيصدقوه ،،، عرفتوا ليه البرلمان مهم؟

البرلمان مهم عشان ألف حملة زى كاذبون مش حتوصل لنص العدد اللي بيوصله كلام نواب الشعب ومش بربع المصداقية كمان

سقطت في مصر للأبد أسطورة تقديس السلطة ،،‏ النواب ماهم إلا موظفين عند الشعب بياخدوا أجرهم من الشعب

فخور بمجلس الشعب ومفوضه يتكلم بإسمي، لكن لو لقيته جاب ورا ومش حينفذ أهداف الثورة حنزل ضده ومفيش حد فوق الشعب
نازل يوم ٢٥ عشان عارف أن لو الشعب نام في بيته مجلس الشعب حيبقى زى قلته،، ضغطنا هو اللي بيحدد سلطة نوابنا

Post a Comment