Monday, August 28, 2006

لماذا أكتب اسمى


نصحنى كل من سألتهم " ودول كتير أوى " قبل البدأ فى كتابة هذه المدونة باستخدام اسم مستعار ...


" بشكاش مثلا" لكى أبتعد عن السباب و النقد القاسى من أشخاص كثيرين يهمهم فقط الشعور بمتعة الحرية عن طريق ايذاء الآخرين أو الشعور بالراحة عن طريق تفريغ الكبت الذى نعيشه جميعا عن طريق صب اللعنات و الشتائم على من يعارضهم .


ولكننى تسائلت لو أن شخصا اختار أن يسب ما أقول و بالمرة يدينى من الحب جانب " دا يعنى لو حد عبرنى أصلا " و شتم اسمى المستعار هل سيكون شعورى أفضل حالا ؟


يعنى أنا مش حكتأب لو حد شتمنى بس برضه الواحد مش طالباها معاه يتهزأ من الى يعرفه و اللى ميعرفوش " كفاية اللى يعرفه "


الصراحة ان ما أكتبه يعبر بصورة واضحة و صريحة - زى توجيهات الريس كدة - عن ما أشعر به لذلك من يعترض على ما أكتب فهو يعترض على رأيى - متخافوش مش حعلقه من رجله ولاحاجة - و أسلوب ابداؤه لرأيه لو كان مهذبا فهو يضيف لى و اذا كان " لا مؤاخذة " يبقى أقراه و أتعلم معملش زيه


بس sorry يا جماعة مش حنشر تعليقات غبية زى :
" يابن ال.... المفروض تقول كذا "
قريت التعليقات دى ف مدونات كتيرة و مش عايزها هنا يا ريت يعنى


"الطريقة دى بتنرفز أجمل انسانة عرفتها لما أستخدمها ف الشات "---->
سؤال :
هل ما قلته من منع التعليقات ال " ياى " وحشة يتعارض مع مبدأ الحرية الذى أعتبرها أسمى شىء فى الوجود بعد الحب ؟


حغيظكوا ومش حجاوب دلوقت دا موضوع الحلقة الجاية فى عالم سمسم " قصدى المدونة بتاعتى"

كتبها أحمد بدوى في 02:25 مساءً ::

8 comments:

Unknown said...

في27,آب,2006 - 03:01 مساءً, ahmad badawy كتبها :

ايه الحلاوة دى كلها دا مين دا الفيلسوف اللى كاتب الكلام الجامد دا ؟ ياااه دا طلع أنا

===================================

في28,آب,2006 - 10:11 مساءً, احمد كتبها ...

اعلانك عن شخصيتك و باسمك الحقيقى دليل على شجاعتك حتى لو كنت اخترت اسم مستعار و قريت نقد وحش ما هو برضه ليك سواء اللى كتب النقد عرفك ولا لا اما لو لقيت ان النقد وحش لمجرد ان اللى كتبه عارفك و عاوز يضايقك او تسلى باللعب على الانترنت ....... فده برضه شىء كويس يعرفك الانسان الكويس و اللى عاوز يفيدك برأية من الانسان اللى بيحاول يحبطك بدل ما يساعدك او ممكن يكون سلبى لا عاوز يساعدك ولا عاوز يسكت اللى انا اعرفه عن تجربة شخصية ان اى حاجة بتحصل... بمعنى ان كل حدث بيمر عليك فى كل ثانية بيعلمك حاجة جديدة و بيفيدك ربنا يوفقك يا احمد
===================================

في28,آب,2006 - 11:08 مساءً, ahmad badawy كتبها ...

الله يخليك يااستاذ أحمد شجاعة ايه بس يا راجل دا أنا حتى بخاف من خيالى عموما كلامك عن ان كل حدث بيمر على الإنسان بيفيده صحيح و أنا شخصيا مؤمن بيه جدا و يمكن ده اللى مخلينى بحاول اكون متفائل برغم الاحباط اللى أنا عايش فيه أغلب الوقت

Unknown said...

في02,أيلول,2006 - 12:15 صباحاً, gogo_s87 كتبها ... :

ولا يهمك من اى حد لانى اعتقد اللى بينقد بالسب او الشتائم يبقى هو اللى مش عارف حاجة اما يبقى يكتب هو رأية بصراحة يبقى يجى يكتب ويورينا

===================================

في02,أيلول,2006 - 01:16 صباحاً, أحمد بدوى كتبها ... :

تعبتينى معاكى يا ست جوجو انت ضربتى الرقم القياسى فى التعليقات لدرحة انى مش عارف أشكرك ازاى على تعبك فى قراية الكلام ده كلة و انشاء الله أفضل عند حسن ظنك دايما

==================================

في05,أيلول,2006 - 04:56 صباحاً, سهى على كتبها ... :

اهلأ احمد حكاية الاسم الظاهر موضوع شاغل مخى ممكن مش اسمك احمد ممكن اسمك اى اسم ممكن تصور بطاقتك الشخصية لا لاان مش موظف حكومى ولا امن انا من حجرانك من القاهرة عاوز نصيحة بلاش سياسة خليك واقعى سيبك من اندفاع الشباب فكر كيف تقول كلمة طيبة خدمة لشخصان بعترف اسمى مستعار تعرف لية بلاش اقول لى معاك لقاء اخر بريدىsweet3@gawab.comارجو الرد

===================================

في05,أيلول,2006 - 09:02 صباحاً, أحمد بدوى كتبها ... :

يا أستاذة ياللى اسمك المستعار سهى شكرا على رأيك حتى لو اختلفت معاه و انشاء الله نكمل اللقاء الآخر

Unknown said...

في11,أيلول,2006 - 08:21 صباحاً, baby Lady كتبها ...

بصراحه ..انا مع رايك استاذ: احمد ... انه الشتم سواء بالاسم المستعار اوالحقيقي لا يغير شئ ..لانه انت تعرف من شتمك قصدك انت اى من كان اسمك ... اما عن من يستخدم الاسماء المستعاره وانا منهم ..فلكلٌ منا له اسبابه .. تحياتي ..لك الحجازيه ...

===================================

في08,تشرين الأول,2006 - 04:12 صباحاً, مجهول كتبها ...:

أنا معاك, لا لإستخدام الأسامي المستعارة
مش م.ج.هول 5(:

Anonymous said...

هو الحقيقة الإسم المستعار له مزاياه, طبعاً غير الكر و الفر, تقدر تنتقض نفسك لأن بالطبيعة الديناميكية لأي عقل الأفكار بتتغير, و لما تغير أفكارك ممكن تخاف من ضغط المجتمع, ففكرة كويسة إنك كل شوية تروح تتكلم بلسان حد تاني هو إنت, لكن في بلوجك الشخصي طبعاً متقدرش, و مجتمع القراء في الغالب ميعرفكش شخصياً فمش فارقة معاه إسمك أو إسم سلف, المهم إنه ثابت
بس ده زي مانتا عارف بيسهل كتير على سلاح مخبري مكافحة الإنترنت التابع لوزارة الداخلية
أنا مش شايف نشر إسمك الحقيقي ضرورة في رأيي, إلا لو كان جزء كبير من قراءك معرفة مسبقة
و مع ذلك, أظني لو هدون هكتب بإسمي, رغم إني أرجوا إن محدش من قرائي (لو بقى فيه) يكون يعرفني

منع التعليقات ال"ياي" تتنافى ولا لأ مع الحرية ؟
هي تتنافى مع حرية التعليق بال"ياي", لكنها مش بتتنافى مع حق القراء في القراءة منغير "ياي", بصفة عامة الحرية واسعة و بتضم متناقضات, اللي أعرفه إنها مش بتتنافى مع الإحترام

مين اللي كاتب "لا للأسامي المستعارة" و ماضي "مش م.ج.هول" ده ؟
هي دي الإزدواجية بعينها ؟

Anonymous said...

واحد أنا معرفوش ولا هو عارف نفسه,
آه
:)

Unknown said...

1 - مش احتمال وارد انى بدور على الشهرة و بمثل انى شجاع و كدة ؟؟ أكيد حد فكر كدة بس مكتبهاش عشان ميزعلنيش

2 - موضوع ضغط المجتمع ده أنا قاصده بالذات ...

أنا حر ... كلمتين مينفعش أشيل منهم أنا و أحط حر ... حيبقى النتيجة أن فيه حد حر و مش معروف هو مين

فاهم قصدى ؟؟ أنا بقول أنا حر فى تفكيرى يبقى لازم أتحمل مسئولية الحرية دى والا ححس انى منافق

و بالنسبة لموضوع تغيير الأفكار ... أنا مقتنع طول الوقت أن ممكن فى أى لحظة أى قناعة ليا ممكن تتغير و تتطور و الا ألغى عقلى بقى :)

أنا كان قصدى بالتعليقات "الياى" دى التعليقات اللى بشوفها عند وائل و مالكوم ... شتيمة من غير فايدة

بس أى تعليق فيه نقد محترم لازم أحترمه حتى لو حرق دمى :)

يا عم م.ج.هول

Anonymous said...

معلش عشان سوء الفهم بس, أنا كنت بجاوب على سؤالك:
"هل ما قلته من منع التعليقات ال " ياى " وحشة يتعارض مع مبدأ الحرية"

أنا بتكلم عن المنع, مش عن التعليق
طبعاً المنع يتنافى مع حرية التيييي
زي ما عدم المنع يتنافى مع حرية المنع
الحرية كلمة ملهاش معنى, بس رؤى

Unknown said...

حرام عليك يابنى اللى بتعمله فيا ده ... أنا دماغى ملخبطة خلقة D: