Wednesday, August 30, 2006

أقوال مأثورة و تعليقات مكسورة

"العين بالعين تجعل العالم أعمى " غاندى
أنا : وهل لدينا عيون لتقرأ هذا الكلام ؟
"من يخشى حفيف الأشجار لا يدخل الغابة " د.أيمن نور
أنا : ومن لا يخاف الظالمين يقهرهم أو يدخل السجن أو الجنة

"لو لم أكن مصريا لوددت أن أكون مصريا " مصطفى كامل
أنا : لو لم اكن مصريا لوددت أن أكون أمريكيا أو أوروبيا أو يابانيا أو ماليزيا أو سنغافوريا

"مفيش فايدة غطينى و صوتى يا صفية " سعد زغلول
أنا : ياااه الراجل ده كان هارش الفولة من زمان أوى كده؟
"فترتين كفاية أوى" الزعيم مبارك
وعد فأوفى

" لقد خلقنا الله أحرارا و لن نورث بعد اليوم " أحمد عرابى
أنا : مظنش
" عاشر عاشر مسيرك تفارق " مثل شعبى
أنا : واضح ان المثل ده مبيتقالش فى المنوفية

"يا بتاع الشباشب هات شبشب بصباع أو شبشب بفيونكة بدل الحبيب اللى ضاع " أغنية عاطفية
أنا : ياريت أعرف أقول كدة .. بس مش قادر

" فكك يابنى من التعقيد طول مبنتنفس فى جديد " M T M
أنا : خدو الحكم من أغانى الراب و أهديها للمثقفين

" ارفع رأسك ياأخى انتهى عهد الإستبداد" جمال عبد الناصر
أنا: هو انتهى بس بنلعب فى الوقت بدل الضايع

" احنا مش حنمشى ورا كلام المواطن العادى " جمال مبارك
أنا : طب اتفضل حضرتك خليك قاعد متمشيش

" حب ايه اللى انت جى تقول عليه " ام كلثوم
أنا : ياه الكلمة دى مش عارف اتقالتلى فين قبل كده ؟

"مش مهم تفهم دلوقت احفظ الأول بعدين افهم " الشيخ اللى كان بيحفظنى قرآن و أنا صغير
أنا : أدينى ولا حفظت ولا فهمت يامولانا عجبك كدة ؟

" حب العقل أقوى و أعمق وأبقى من حب القلب " د.أحمد زويل
أنا : سامعة ياللى فى بالى ؟

" خليك فى مذاكرتك أحسن " القول المأثور المحفوظ لأى حد أكلمه فى السياسة
أنا : ياريتنى كنت سمعت الكلام

3 comments:

Unknown said...

في 01,أيلول,2006 - 11:45 مساءً, gogo_s87 كتبها ...

حقيقى كلامك رائع كل لما اقرألك موضوع احس ان انت من الناس اللى صعب نلاقيهم فى الزمان ده وبجد انت المفروض تكون عمود اساسى فى جريدة محترمة لانك بجد لا تعوض بافكارك وكلامك وكتباتك

==================================

في 01,أيلول,2006 - 11:54 مساءً, أحمد بدوى كتبها ...

ايه يا بنتى الكلام الكبير ده ؟ لأ بلاش تقولى عليا كدة لحسن أتغر فى نفسى و تبقى مشكلة ... ساعتها مش حتعرفوا تكلمونى و لازم قبل ما حد يكتب تعليق ياخد ميعاد من السكرتيرة الأول ... ... ألف ألف شكر على التشجيع الجميل ده

==================================

في 07,أيلول,2006 - 03:27 مساءً, أحمد كتبها ...

"لو لم أكن مصريا لوددت أن أكون مصريا " مصطفى كامل أنا : لو لم اكن مصريا لوددت أن أكون أمريكيا أو أوروبيا أو يابانيا أو ماليزيا أو سنغافوريا ليا رأى تانى و هو ... " لو لم اكن مصريا ، لحمدت الله على ذلك "

===================================

في 07,أيلول,2006 - 04:10 مساءً, أحمد بدوى كتبها ...

الحمد لله على كل يجيبوا ربنا يا عم أحمد شد حيلك ياراجل ... حظنا كدة حنعمل ايه يعنى ؟

Anonymous said...

nice words badawy ..el kalam gamed awy

Anonymous said...

"لو لم أكن مصريا لوددت أن أكون مصريا " مصطفى كامل
ربما, لكن ماذا تريد بعد أن كنت ؟

" ارفع رأسك ياأخى, هات الساطور يا سرور" يا حبيبي عادلي تاني