تعدى من شط لشط و ترجع من شط لشط و تعوم و تطفو على وش المية و تغرق و تقفل عينك و تفتحها
هى دى رحلة الحياة
تكسر قيود و تبنى سدود و تعمل سلاسل و تفك سلاسل ... هى دى رحلة العقل
يتهمك كل واحد بأنك مختلف عنه و كأنها تهمة شنيعة و يشتمك كل واحد مش عارف يعرف حدودك و يسيطر عليها
يحبك ناس و يخاف منك ناس و تلاقى حيوانات أحسن بكتير من ناس كتير
عقلك يطير عاااالى أوى و ينزل فى الأعمااااق أوى و يلف يمين و شمال و يفهم الدنيا زى ما هو عاوز و زى ما باينة قصاده
و غيرك بيحاول يستخبى خايف لعقله يتلوث بهوا طازة جديد
احلم و ماتخليش للحلم حدود و سيب المحدودين وراك وسط التراب و العفرة
غير مجالك الحيوى كذا مرة و ما تهتمش بأنك بتخسر أو بتكسب ... المهم أنك تعيش فى المجال اللى تختاره و تدفع تمن اختيارك
غيرك مش أنت و مش وصى عليك ... غيرك أقل منك لأنه ما يعرفش عنك اللى أنت تعرفه عن نفسك ,,, يمكن يعرف عن جسمك ... يمكن يتوهم أنه يعرف أكتر منك عن حدود احتمالك .... لكن فى النهاية أنت نفسك و هو غيرك قاصر عن الاحاطة بيك
الموت مش نهاية الرحلة ... الموت بكل المعانى مجرد بداية الحياة الحقيقية ... حياة من غير حدود زى كل الأحلام التانية اللى بتحلمها
No comments:
Post a Comment