ذكرى يوم مش حيتكرر تانى

عدت انهاردة الذكرى السنوية ل 6 أبريل

نزلت يوميها - من سنة تمام- على التحرير عشان أقف فى أى مظاهرة ضد حسنى مبارك .. اليوم اللى قبليها - امبارح من سنة - كنت متردد أنزل ولا لأ 

http://www.facebook.com/note.php?note_id=11255328033&id=512682065&index=204

قابلت فتحى فريد بالصدفة .. عمرى ما استريحت للواد ده - غير لما سهرنا مرة فى آخر كام يوم نتكلم أنا وهو بس - و لقيته مش شرير زى ما بيتعمد يبين .. كان هو و قريبه مع بعض .. مشينا لفينا فى الميدان و كل حتة مليانة عساكر على آخرها ... كان فتحى بيكلم حد فى التليفون بيحكى لها كل حاجة بتحصل قبل ما يتقبض عليه .. كل اللى حصل أن الضابط جه لفتحى و قال هل تعالى معايا يا فتحى و فتحى راح له و ادى الكاميرا لقريبه

مشيت انا و قريب فتحى الناحية التانية .. قريبه كان مرعوب عشانه و أنا كنت متأكد أنه حيطلع آخر النهار

كلمت أحمد ماهر و قابلت اسراء و شادى و وليد و نادية و محمد عواد على البورصة و بعدين رحنا قهوة الشباب... ماكنتش بكلم شادى و كنت شتمت عليه جامد قبليها بكام شهر على الفيس بوك من غير ما أعرفه معرفة شخصية و مكنتش أعرف محمد عواد غير بالشكل و كان احساسى ناحيته غلط خالص - كنت فاكره محترف مظاهرات و بلطجى و أكتشفت بعد كدة أنه من أحسن و اجدع الناس اللى كانت معانا

قعدنا على القهوة و مكانش فيه غيرنا - تقريبا كنا عشرين ولد و بنت غير اتنين صحفيين أجانب راجل و ست (فاكر اسمها كان ازميرالدا يعنى زمردة ) قعدت أتكلم معاهم عن اليوم ده و طلعوا فعلا جايين يغطوا المظاهرات و كانوا متضايقين عشان الميعاد المحدد عدا و مفيش حاجة حصلت

حرنكش جه و شافنا قاعدين فسلم و مشى على طول لأنه شاف الأمن محاوطنا من بعيد و الصراحة كنا خايفين نقوم لأن كان واضح أنهم متحفزين يقبضوا على أى حد مننا يتحرك ... و قلنا أن لو فضلنا قاعدين أكيد مش حيقبضوا علينا من على القهوة و خصوصا لما صاحب القهوة طمننا أن ما نتحركش و مفيش حد حيعمل لنا حاجة

فجأة دخل ميكروباص جنب القهوة على طول و هجموا علينا بلطجية الشرطة اللى لابسين مدنى ( اتفضلوا معانا ) الصحفى الأجنبى حاول يكلمهم محدش سمع منه حاجة

مش فاكر بالضبط هل حد مننا زعق معاهم ولا ركبنا على طول .. بس غالبا محمد عواد قال ملكمش دعوة بالبنات و محدش عبره ,,, أنا فى الأوقات دى بسكت عشان بخاف من الاهانة - قبلها فى 2005 جاتلى ازمة قلبية بسبب حاجة مشابهة - ركبنا الميكروباص و فضل يلف بينا و قعدنا نهزر مع أمين الشرطة اللى كان راكب معانا

أفتكر انى أتكلمت فى التليفون أو رنيت لحد بس مش متأكد

نزلونا من الميكروباص و ركبونا عربية ترحيلات كبيرة هنا أنا متأكد أننا كلنا زعقنا عشان البنات ماتركبش عربية الترحيلات و فعلا ما ركبوش معانا

دى كانت أول مرة أركب فيها عربية ترحيلات - ركبتها كتير بعد كدة فى خلال الشهر ده و عيطت من القهر اللى حسيته بعد كدة أكتر من مرة - أتخنقت أوى من الحبسة و الزحمة فى العربية و فاكر كويس الشاب الأسمرانى الرفيع اللى كان بيهوى لى و بعديها لما جيت أشكره قال يعنى هو أنا كنت بهوى لك جدعنة ؟؟ ما أنا مش عاوز جثث فى العربية

الشاب ده طلع رامى يحيى واحد من ألسع و ألذ الشخصيات اللى كانت معانا فى السجن بعد كدة

كان معايا ناس ما أعرفش منهم - لحد وقتها - غير شادى و عواد و محمد فؤاد و شاب عبيط كدة كان فرحان أوى أنه اتمسك و كأن الحبس ده أمنية حياته من و هو صغير

فاكر كويس أن كل همى أنى لو اتحبست ممكن أترفد من الشغل اللى لسة مستلمه جديد و قعدنا نقول أن فيه ناس تقول أنها مالهاش دعوة بالاضراب و بتاع و اللى عاوز يتحبس يقول أنا كنت فى الاضراب

محمد فؤاد الأول كان عاوز يعمل فيها بطل و يقول أنه كان فى الاضراب بس أنا أقنعته أن حبسنا مش مفيد فى حاجة و أننا نقول أننا مالناش دعوة عشان نطلع و أن أحسن نساعد الناس من برة

بعت رسالة من الموبايل لكل الناس اللى أعرفها و ليها أى علاقة بالسياسة بأننا محبوسين فى عربية ترحيلات و أنهم يتصلوا بأبويا على نمرته و كتبت النمرة ....... كتبت الستاتس بتاعتى على الفيس بوك أنى مخطوف فى عربية ترحيلات

كان نفسى لما اطلع أشوف تعليقات الناس على الستاتس اللى تخض دى

رحنا معسكر أمن مركزى و قعدونا فى اوضة ... مش فاكر حصل ايه وقتها غير طشاش ..فاكر أنى شفت الأستاذ مجدى حسين هناك و فاكر انى كلمت الأستاذ ايهاب الخولى فى التليفون ( كنت لسة جايب الموبايل جديد من تحويشة الشغل القديم و فرحان بيه )

استجوبونى بعدها و أنا عينيا متعمية .. و سألنى صاحب الصوت أنت أحمد بدوى ؟؟ .. أقول له أيوة .. يقول لى أنت تبع حزب الغد ؟ ... أقول له كنت فى الحزب زمان و سبته ...... يقول لى و أنت ايه اللى نزلك وسط البلد .... أقول له كنت نازل أصور الشوارع و المظاهرات بس مش مشارك فيها .. مع انى كنت كاتب فى كل حتة على النت انى نازل الأضراب

بعدها عملوا فرز للناس ... شوية ركبوا العربية تانى و شوية فضلوا فى المعسكر

محمد فؤاد الفقرى اللى كان عاوز يتحبس طلعوه و أنا اللى كنت عاوز أطلع من غير بطولة ولا يحزنون كملت القصة لمدة شهر

------------------------

و الى اللقاء فى حلقة أخرى من مغامرات معتقل آخر سذاجة

--------------------------

مواضيع ذات علاقة

تحليل ساذج لموقف الاخوان قبل الاضراب

http://www.facebook.com/note.php?note_id=11147038033&id=512682065&index=205

ماكنتش ساعتها لسة عرفت أحمد سميح معرفة شخصية و استغربت أوى دلوقتى لما قريت تعليقه على النوتة

محاولة ساذجة لرد حقوق بعض أصدقائى عليا

http://www.facebook.com/note.php?note_id=14670558033&id=512682065&index=201

جدير بالذكر أن أغلب أصدقائى دول متخانق معاهم دلوقتى

كلام كتبه أصحابى عنى و أنا محبوس

http://www.facebook.com/topic.php?uid=25489247152&topic=4274

الوجه الحقيقى للبطولة المزيفة و الهروب و الاعتزال بعد الخروج من السجن

http://www.facebook.com/note.php?note_id=14776433033&id=512682065&index=200

http://www.facebook.com/note.php?note_id=15472333033&id=512682065&index=194

أربعة و عشرون عاما لم يتذوق قبلة !مأساة أعظم من شهر واحد فى السجن ... و مع ذلك لم يهتم احد .... هل لأننا جميعا نعيشها ؟

http://www.facebook.com/note.php?note_id=16870778033&id=512682065&index=188

ذكريات أخرى من المرج

http://www.facebook.com/note.php?note_id=18675388033&id=512682065&index=179

http://www.facebook.com/note.php?note_id=28447083033&id=512682065&index=139

تحياتى للجميع