لكل المهتمين بمراقبة إنتخابات الشورى

يعلن المعهد المصرى الديمقراطى عن إنشاء غرفة عمليات تتلقى أى انتهاكات أو تجاوزات قد تحدث خلال إنتخابات مجلس الشورى على مستوى جميع دوائر جمهورية مصر العربية

و ذلك عن طريق وسائل الإتصال التالية

e-mail : media@egyda.org
تليفون : 23963957
موبايل :0160062523

كما يعلن المعهد عن عقد إجتماع تنظيمى لكل الراغبين فى المشاركة فى الرقابة الشعبية على الإنتخابات السادسة مساء يوم الإثنين 31 مايو 2010

بمقر المعهد 64 شارع عبد السلام عارف متفرع من ميدان محمد فريد بجوار محطة مترو محمد نجيب

كما يسعد المعهد أن يقوم بتوفير فيديوهات شرح عملية المراقبة لكل من لم يستطيع حضور التدريب بنفسه

شرح مراحل العملية الإنتخابية
http://www.youtube.com/watch?v=YclPaVdmyaA

مرحلة الدعاية
http://www.youtube.com/watch?v=9StZHbmJlbs

مرحلة التصويت
http://www.youtube.com/watch?v=C-s4MxE5Gqs

داخل اللجنة
http://www.youtube.com/watch?v=JHeHNfpBOF8

واجبات المراقب
http://www.youtube.com/watch?v=CZwmWKiYDZM

انتهاء اليوم الانتخابى
http://www.youtube.com/watch?v=EAZmYlWKySI

للحصول على استمارة المتابعة و التقييم
http://www.facebook.com/note.php?note_id=395755373033

ملحوظة : نرجو نشر الفيديوهات على قدر المستطاع لنشر ثقافة الرقابة الشعبية على الانتخابات

استمارة متابعة انتخابات مجلس الشورى

استمارة متابعة و تقييم العملية الإنتخابية لإنتخابات مجلس الشورى
1 يونيو 2006

الدائرة الإنتخابية :
اسم المراقب :
أولا: خارج اللجنة

1- هل لاحظت وجود تواجد أمنى فى محيط اللجنة ؟

لا :
نعم : فى حالة وجوده أذكر ملاحظاتك

2- هل توجد دعاية انتخابية ؟

لا :
نعم :


3- هل لاحظت وجود رشاوى إنتخابية ؟

لا :
نعم : لصالح من :


4- هل توجد موانع للتصويت ؟

لا :
نعم : أذكرها

5- هل توجد أعمال عنف أو شغب ؟

لا :
نعم : لصالح من ؟

6- ماهو حجم الإقبال على التصويت ؟

- ضعيف - متوسط - شديد

ثانيا : داخل اللجنة

1- هل يتم الاقتراع بشكل سري ؟

نعم : لا :


2 – هل الصندوق زجاجى شفاف ؟

نعم : لا :


3- هل يتم استخدام الحبر لمنع تكرار التصويت ؟

نعم : لا :


4 – هل يتم التأكد من شخصية الناخبين ؟

نعم :
لا :
ملاحظات :


هل لاحظت وجود تأثير على الناخبين داخل اللجنة ؟

نعم : أذكر نوعه
لا :


اذكر اى ملاحظات اخرى ؟؟؟

و الناس هتفهمك غلط

الناس هتفهمك غلط...طول عمري وأنا بسمع الجملة دي في اليوم الواحد أكثر من مره وبدأت أسأل نفسي من امتى والحياة بهذا التعقييد؟؟ وامتى اصبحت الناس اللي هتفهمني غلط محور حياتي؟؟
وطبعا اكثر مرحلة من مراحل حياتي سمعت فيها الجملة دي كانت فترة المراهقة وطبعا كانت مصحوبه بمجموعة من الاوامر
1-ماتجريش في الشارع
2-ماتضحكيش كتير
3-ماتمشيش لوحدك
4-ماتلبسيش اللبس دا
5-ماتقعديش القعدة دي
لحسن انتي بنت و الناااااس تفهمك غلط....

وبعد ما تخطيت مرحلة المراهقة بنصائحها المعقده وبقيت شابة تحكمت الجملة دي بردو في شكل حياتي 1-ماتتأخريش كتير في الكلية
2-ماتخرجيش كتير مع اصحابك
3-ماتتكلميش مع الناس عمال على بطال
4-ماتعرفيش حد عنك كل حاجه
5-خلي بالك من تصرفاتك كويس
لحسن النااااس تفهمك غلط....

خلصت الكلية وبدأت الشغل والجملة بردو بتطاردني حتى من اصدقائي
1-ماتقفيش كتير مع الدكاتره في المستشفى
2-ماتتكلميش مع الدكتور فلان عشان هيفهمك غلط بردو
3-خلي علاقاتك شغل وبس
4-ماتلبسيش كده ماتتكلميش كده
واخر كل نصيحة كالعاده ( ايه يا بنتي انتي هبله كده الناس هتفهمك غلط)

حتى في العلاقات العاطفية الناس اللي بتفهمني غلط كان ليها دور كبير جدا..كنت كل ما أقابل شخص وأحس انه ممكن يكون انسان كويس وأحاول اتقرب منه عشان أعرف أفكاره أجد طبعا سيل النصائح العبقريه
1-أوعي تكلميه الا لما يكلمك هو الأول
2-ماترنيش عليه الا لو في موضوع مهم
3-أوعي تحكيله على أي حاجه كده بسهولة
4-حسسيه ان شخصيتك قويه
5-ارسمي عليه التقل
6-لازم هو اللى يعترف بحبه الاول وساعتها قوليله هفكر
يا اما انفذ النصائح الغالية دي ياما هو والناس كلها هتفهمني غلط....

مؤخرا قررت اني اتخلى عن سيطرة الناس اللي بتفهمني غلط والدور العظيم اللى بيلعبوه في حياتي وكمية القيود المهوله اللي فرضوها عليا لمجرد اني بنت في مجتمع ذكوري,لانى بعد ما قعدت مع نفسي وفكرت اكتشفت ان اللي مقتنع بالاوامر اللى فاتت دي تبقى ناس مش بتفهم من الاساس عشان تفهم غلط
وقررت انى اركز مع الناس اللي عارفاني كويس وعارفه اني انسانه بسيطة ومش هقدر استحمل كل تعقيدات الحياة دي الناس اللي نيتها حلوة واللي لو صدر مني تصرف غلط تبقى عارفه انه نابع من سلامة نيتي وانى اكيد ماقصدش.....الناس اللي مقرره من الاول انها تفهم صح

اترددت كتير قبل ما انشر الكلام دا وفي الاخر قررت انشره ولو انى عارفه ان في ناس كتير هتفهمني غلط :)))

هند خطاب

30 مايو 2010

من أحلام الفتي الطائر

وجدوا الآتي في مذكراته الشخصية :

"أحتضنها برفق
أداعب خصلات شعرها برفق
انظر في عينيها وأتنفس شذاها بعمق حتي يملئني

ثم أراني بعد رحلة طويلة لا أبرح حضنها كلقاء اول مرة

أداعب شعرها الأبيض بيدي المجعدة وأمتع عيني العجوزة ببريق عينيها الذي لاينطفئ وأتنفس شذاها الذي لايذبل كأكسير الحياة
تملؤني بسمتها الحنون رحمة ورضا حتي ألفظ أنفاسي الأخيرة بين يديها دون ألم أو ندم " ـ
تعجب ضابط الشرطة المكلف بالقضية :"كيف لمثله أن ينتحر في تلك السن الصغيرة؟" ـ
رد وكيل النيابة : "بل كيف لمثله أن يعيش في ذلك العالم الكبير !"ـ

مسودة رد على آخر تصريحات البرادعي

صرح د.البرادعي بأن لا تغيير قبل جيل أو جيلين
وده تعليق سريع لحد ما أفصله

@د.عبدالله

مفيش خلاف علي صحة ومنطقية كلامك
لكن لما أنا وانت نقول ده غير لما يقوله في التوقيت ده شخص الناس عملته أملها في التغيير

البرادعي لما بيتكلم فهو مش بيكلم مثقفين بس

هو بيخاطب ألوف المصريين اللي منهم كتير ميفهموش الكلام ده ومش عاوزين غير حد يشيل العصابة الحاكمة

ومعني كلامه ساعتها انه بيقول لهم مفيش أمل
انسوا
كبروا دماغكم لأن مفيش فايدة

احنا عاوزين حد يدي الناس أمل مش يسدها في وشهم

خواطر ذاتية

هل من الحكمة ان الواحد يعبر عن افكاره و مشاعره علنا بشكل صريح و هو عارف ان تعبيره حيتاخد ضده و حيتفهم بصورة معاكسة أو حيقلل من قدره ؟

المميزات : انك تقول اللى فى نفسك و تحس بحريتك و ان مفيش عليك قيود و انك مش خايف من حد

يعنى لما اجى اقول انا بحب فلان و اكون صادق فى كلامى و ابقى عارف كويس ان فيه حد حيقول عليا انى منافق عشان بقول كدة رغم انى عارف كويس ان رأيى ده مش حيزودنى اى حاجة لا مادية ولا معنوية فهل يبقى الاحسن انى مقولش ؟

طيب مش لما اسكت و متكلمش عشان محدش يقول انى منافق فده يعتبر نوع من النفاق و الخوف ... و الحرية من زمان عندى اساسها انى اقول اللى عاوز اقوله على مستوى المشاعر و ميهمنيش حد ؟

انا حاطط على نفسى قيود انى مقولش اى خبر او انقل حاجة غير لو واثق من صحتها او لو مش واثق بقول ان مصدرى كذا و بقول الظروف اللى عرفت فيها الخبر بالضبط عشان مطلعش كداب قصاد نفسى

و كمان حاطط قيد اهم و هو انى بحاول ابقى موضوعى قدر الامكان و احط نفسى فى مكان الناس عشان اقدر احكم و اكون رأى صحيح

بس الموضوعية زى الحرية ..... سراب محدش يقدر يوصل له

لازم تجربة الواحد و رؤيته و خبرته بتأثر على رأيه مهما كان بيحاول يبقى موضوعى ... اكيد واحد اتخرج فى كلية حربية رأيه فى موقف سياسى ما مش حيبقى زى رأى واحد بواب عمارة مثلا مهما كانوا الاتنين موضوعيين و بيحاولوا يبقوا متجردين عن نفسهم

العيوب : ان ده مش من السياسة .. انا بكره السياسة اللى تخلينى أختار كلامى حسب مزاج الناس مش حسب مزاجى .. بتخنقنى

بحب ادخل فى الحاجة بدماغى و اقول رأيى و بعد كدة أفهم على رواقة ... و دى مشكلة ... ده مش نضج و مش عقل ....... الصح ان الواحد يفهم الاول و يجمع معلومات عن اى موضوع قبل ما يقول رأى فيه

المشكلة انى عندى نقص محتاج يكمل

انا بكره السطحية جدا و بموت لما الاقى حد بيقول كلام سطحى و بعتبره منتهى السخافة ...... زى بتاع الجمعة انهاردة لما الخطبة كلها كانت عن الحياء و كل كلامه عن الحياء فى نقطتين

حياء البنات العذارى و ازاى ان الحياء انتهى عشان البنات بيلبسوا لبس مش محتشم و الاعلام بتاع العرى و الاباحية

و الحياء الواجب تجاه العلماء اللى بيعلمونا الدين

و كأن مفيش حاجة تخدش الحياء فى منظر الزبالة اللى مالى الشوارع ولا حاجة تكسف فى كمية النفاق و الكذب اللى فى الجرايد

منتهى السطحية و السفه

لكن فى نفس الوقت انا نفسى ببقى ساعات كتير جدا سطحى و باخد الامور بظواهرها أو بس باللى اعرفه بشكل غير دقيق ....... بحب ابعد عن المشاكل و وجع الدماغ المطلوب عشان تدقق فى كل معلومة بتوصلك

بستسهل و بصدق بسهولة .... لأن البديل هو الجحيم بعينه ..... البديل ان كل كلمة و معلومة اعرفها افضل ادور على درجة صحتها و دقتها و فى الاخر ممكن تطلع مش مهمة اصلا و مستفيدش حاجة من الوقت اللى بيضيع

انا بحاول فى كل لحظة انى اعرف حاجة جديدة ..... لكن الكسل بيخلى مصادرى محدودة .... بزهق من القراية بالانجليزى ...... و بزهق من الاماكن الثابتة او العادات الثابتة

عشان كدة دنيتى واسعة جدااااا و سطحية جداااااا

اعرف الف واحد لكن اللى فعلا اعرفهم بجد قليلين اوى ... حتى الناس اللى بحبهم و بعزهم اوى بتبقى معلوماتى عنهم قليلة

فيه طريقين ممكن الواحد يمشيهم

الاول انه يسكت و يسمع و يقرا و يركز لحد ما يجمع معلومات كتيرة تكفى انه يقى له رأى

زى ما قال هتلر أن الانسان مينفعش يدخل حزب سياسى غير لما يكون عنده 31 سنة

و ده مشكلته ان التجربة العملية فيه قليلة

و الطريق التانى هو اللى انا ماشى فيه زى العيل الصغير ,,,,, داخل فى كل حاجة بدماغى لحد ما افهم او دماغى تتكسر

حكاية الست السلطانة

أقسمت له بأنها تحبه كما لم تحب رجلا من قبل ،ثم قتلته بعدها مباشرة كي لايشاركها سلطة الحكم ، كانت صادقة في قسمها وحزنت عليه حقا بعد ذلك ، لكن شغفها بالسلطة كان أعظم بمالا يقارن بعشق الرجال

نور وبرادعي برادعى و نور

هو في حقيقته ليس تنافس بين متنافسين - علي منصب غير متاح التنافس عليه أصلا - لكنه صراع بين أسلوبين في قيادة معركة التغيير

القيادة من علي بعد ومن داخل الأرض المحصنة "القيادة بالشوكة و السكينة" و القيادة من وسط أرض المعركة بكل ما فيها من غبار وأخطار و اخطاء من الصعب تفاديها

و رغم أن العدو واحد والهدف واحد

إلا أن كل أسلوب يفرض علي متبعيه التنافر و التشاحن مع متبعين الأسلوب الآخر

فمتبع الأسلوب الأول الأكثر أناقة وبريقا ونخبوية يري في الأسلوب الثاني فشلا وخطرا وسذاجة وإندفاع غير مبرر
بينما يشعر معتنقي الأسلوب الثاني الأكثر اثارة و صخبا وتفاعلا أن الأسلوب الأول هو أسلوب أكثر جبنا و غرورا واستعلاء

يأتى التنافر - رغم وحدة الهدف - من احساس كل منهم بأن الآخر يؤذيه و يقلل من شأنه ولو دون قصد

فيري أنصار "القيادة دون اشتباك" في الأسلوب الآخر جر لهم و توريط فى معارك لا يريدون خوضها ، بينما يري أهل الأسلوب الثاني أن افتنان الناس ببريق الارستقراطية الأولي خصما من رصيدهم الذي شقوا من أجله و بالتالى إفشال لمجهوداتهم التى استغرقت سنين

بالنسبة لي أفضل أن أكون وسط المعركة بجانب روبن هود علي أن أكون في خيمة قيادة الملك لويس ،، علما بأن النصر للتغيير ولا محالة لأنه سنة الحياة

عن الديمقراطية

http://www.facebook.com/notes/ahmad-badawy/n-aldymqratyt/393990508033

لقطة تجمع بين د.أيمن نور مؤسس حزب الغد و م.أحمد ماهر منسق حركة شباب 6 ابريل وقت انتخابات الرئاسة فى 2005

اصطادتها من حلقة برنامج دريم اللى كانت معمولة يوم خروج د.أيمن من السجن

و الصورة دى بستدل بيها على فكرة تتابع الأجيال .. مش ضرورى أن أيمن نور كان يوصل للرئاسة فى 2005 عشان يبقى نجح - بالعكس الوصول للسلطة فى بلد شعبها ما اتمنرش على الديمقراطية مكانش حيؤدى الا الى فوضى تكره الناس فى الديمقراطية

لكن كفاية جدا أنه عمل خطوة ايجابية كبيرة فتحت الباب لمجموعة كبيرة من الشباب أنهم ينشطوا سياسيا لأول مرة - أنا كنت واحد من الناس دى - و شجعتهم انهم يبقى ليهم دور فى تغيير شكل الحياة فى مصر

و الشباب دول بعد كدة فتحوا الطريق لأعداد أكبر أنهم يشاركوا فى معركة التغيير و يبقى ليهم رأى و وجهة نظر يتم اختبارها على ارض الواقع

و تستمر المتوالية لحد ما نوصل فى يوم لبلد فيها عدد كافى من السياسيين و دعاة الديمقراطية اللى خرجوا فعليا من وسط الناس عشان مصر تقدر تحكم نفسها بنفسها

الديمقراطية مش جايزة يانصيب بتيجى للى عنده حظ ... الديمقراطية عملية بناء بتاخد وقت طويل و تضحيات عظيمة و تدريبات و اخفاقات و تفاعل عملى عشان فى النهاية نقدر نوصل لدولة بحق وحقيقى

برزخ

أكفر بالحياة ولا أقنع بالموت مستقرا فأظل أسير برزخ البين بين

لا أموت فأرتاح أو أجن فأهرب ولكن أظل مقيدا بقيد الوعي بلا طعم أو معني لما أعيه

يتغلغل سم العجز والوحدة في شرايين قلبي ولكنه يكتفي بإمتصاص حياتي قطرة قطرة دون نهاية أو راحة أبدية أصبحت أشتاق إليها وأتمناها مئات المرات كل ساعة دون راحة

ماالمغزي ؟ ما الهدف ؟
التعادل والسكون هو ما نسعي إليه شئنا أم شاء سوانا

وهم الحرية

ما الحرية إلا سراب ننشغل بالسعي وراؤه ونحن نعلم ان لا وصول إليه ،، نفعل ذلك حتي ننشغل عن عذاباتنا الشخصية اللصيقة

ماالحرية إلا جنة وهمية خلقناها عند أفق صحراء الحياة حتي نرنوا إليها بعيدا بعيدا ولانشعر بمخالب العطش للرحمة والانسانية تنهشنا في تلك الصحراء بلا أمل

ما الحرية إلا سلعة باهظة الثمن لا وجود لها إلا في ذهن مشتريها
ربما هي أغلي سلعة في الوجود لكنها ككل السلع القيمة لا يشتريها إلا أولئك المرهفون الذين قد جربوا كل شئ آخر وملوا

أحمد بدوي

24 مايو 2010

شئ ماقد تحطم

شئ ما قد تحطم ، ولكنه لم يتحطم فجأة بضربة واحدة ، بل إنهار و تفتتت بقاياه عبر عشرات الضربات المتتالية عشوائية الإتجاهات بحيث تستحيل إعادته لأصله من جديد ، لكن من يدري ؟ ربما تكون حالته الجديدة أكثر ملائمة لظروف الطبيعة

أحمد ميلاد والبرادعي

أعلم أن أول من سيغضب مني بسبب هذه النوت هو أحمد ميلاد نفسه ولكنني حقا لا أحتمل المزيد من الصمت والتجاهل والتعالي الزائف من د.البرادعي ومريديه وفي النهاية هذا مجرد رأي شخصي وليس موقف سياسي

ان نضال أحمد ميلاد المحامي المدافع عن حقوق المصريين وصلابته وإصراره لسنوات طويلة علي تحدي النظام وشجاعته في تحمل عواقب هذا التحدي مع قدرته النادرة بين السياسيين المصريين علي تحويل كل ذلك إلي عمل إيجابي بنتائج ملموسة علي الأرض يجعله في نظري أفضل و أشرف من ألف صامت حاصل علي نوبل لم يشارك في تحرير وطنه سوي بزيارته أثناء عطلاته الصيفية

ربما لم يتح لميلاد فرصة التركيز الإعلامي مثلما أتيحت لمناضلين الأشعار و المواقف الوهمية المتذبذبة

لا أوافق بتاتا علي ما يصرخ به المكبوسين والمحبطين من "لا موقف"البرادعي وحديثهم عن أن لا أمل إذا لم يتحرك البرادعي
الحقيقة أن الأمل ليس فيمن لم يتحرك يوما ويرفض أن يتحرك من أجل وطنه إلا في ظروف مهيأة
الأمل فيمن يعقلون ويفهمون ويحبون وطنهم ويتحركون من أجله ويستعدون لدفع ثمن التغيير أمام النظام الغاشم المغتصب لمصر والذي لن يتراجع أو يتزحزح بدون ضغط ومواجهة وتحدي وتضحية

اذا كان الأمل في تحرك الشعب فعلا كما يردد د.البرادعي دائما فإن الشعب كان هو من كان يتحرك في دمنهور ليجمع التوقيعات للجمعية والشعب هو الذي ذهب ليتضامن مع المعتقلين

كلمة أخيرة : إن لم تتحرك "الرموز" مع الشعب تصبح رموزا مشفرة عديمة القيمة

http://www.vimeo.com/11937673

لحظة وصول أبطال التغيير لمبنى النيابة بدمنهور

و يظهر فى الصورة - مبتسما و مشيرا بعلامة النصر - الأستاذ أحمد ميلاد رئيس غد البحيرة و أحد المعتقلين الثمانية لجمعهم توقيعات على بيان الجمعية الوطنية للتغيير

عارف أما تعرف ؟ .. الدنيا بتتغير

عارف المولود اول ما يخرج من بطن امه للحياة بيبقى مخضوض ازاى و بيعيط ؟

و الطفل اللى اول مرة يروح المدرسة ؟ و لما يقرا أول كلمة فى حياته او يحل اول مسألة حساب ؟

و الواد اللى اول مرة يحس بقلبه بيدق و هو بيلعب مع بنت الجيران ؟

أو وهو أول مرة يسمع من صحابه فى المدرسة عن الجنس ؟

عارف البنت أول مرة تشوف دم خارج من جسمها من غير جرح ؟

و الطالب اول يوم فى الجامعة ؟

و العريس و العروسة ليلة الفرح ؟

و الممثل فى أول مشهد قصاد الكاميرا ؟ و أول دور بطولة ؟ و أول معجب يبعت له رسالة ؟

و الست اما تعرف انها حامل لأول مرة فى حياتها و جوزها لما يعرف أنه حيبقى أب لأول مرة ؟ و لما يسمعوا كلمة بابا و ماما لأول مرة ؟

عارف أول مظاهرة نزلها المناضل من ورا أهله ؟ و أول مرة يركب عربية الترحيلات ؟ و عارف أول ما يبتدى يفهم السياسة و توازناتها و خلفياتها ؟

و الملحد لما يشوف لأول مرة غلط فى الدين و مايلاقيش اجابات على أسئلته ؟

و الدكتور اللى بيشوف أول حد يموت بين ايديه ؟

و العسكرى اللى بيقتل أول عدو بايديه ؟

و المجرم اللى بيسرق أول محفظة فى حياته ؟ وزميله وهو بيحط رجله أول مرة في بيت داخل يسرقه ؟ و أول يوم بيقضوه سوا فى السجن ؟

و الشيخ اللى اول مرة بيخطب الجمعة و أول مرة يشوف النبى فى المنام ؟

عارف اما اللعيب يلعب اول ماتش رسمى ؟ و لما يمضى اول عقد احتراف ؟ و لما يلعب ماتش الاعتزال ؟

عارف اول ما الموظف يطلع عالمعاش ؟

...

عارف أما تعرف ؟ .... الدنيا بتتغير

دعاة مقاطعة الانتخابات و الغباء السياسى

معلش سامحونى .. بس لفظ "مقاطعة الانتخابات" بقى من الألفاظ اللى بتعصبنى و تحرق دمى أول ما اسمعها

ليه ؟ .. لأنى بعتبر فكرة مقاطعة الانتخابات البرلمانية و الرئاسية فى مصر فى الظروف الحالية فكرة فى منتهى الفشل اللى فى الدنيا و بحس ان من كتر ما هى اد ايه واضحة الفشل ان اللى بيقولها يا اما مش فاهم حاجة عن وضع مصر يا اما مصلحته مع مصلحة النظام الحاكم مباشرة

ليه برده

أولا : ايه الفايدة المطلوبة من حركة مقاطعة الانتخابات ؟؟

الفايدة الوحيدة اللى سمعتها لحد دلوقتى هى احراج النظام

احراج النظام ؟؟

... ياخى **** انت اكيد بتهرج .. صح ؟ ... قول انك بتهرج ... نظام مين اللى حيتحرج لو سعادتك منزلتش الانتخابات قصاده ؟؟

يا راجل ده نظام ما اتحرجش ان الستات تتصور و هى بتنط من على السور عشان تنتخب رغم الحواجز ولا اتحرج أنه يفشل و ياخد 30% من كراسى مجلس الشعب بس و بعد كدة يخلى المستقلين ينضموا له بالترغيب و بالترهيب عشان ياخد الأغلبية بالعافية

ده نظام ما اتحرجش أنه يحبس وصيف الرئيس 4 سنين فى تهمة ساذجة عبيطة بعد الانتخابات مباشرة و بمحاكمة خرقت كل معايير حياد القضاء و نزاهته (رغم مراقبة العالم كله للمحاكمة )

ولا اتحرج أنه يعين رئيس لجنة الانتخابات وزير للعدل بعد الانتخابات ما خلصت على طول ولا اتحرج يحاكم القضاة اللى كشفوا التزوير علنا

فيه ايه يا عم ؟؟ ده نظام معندوش دم أصلا عشان يتحرج لا دوليا ولا داخليا لما سعادتك - أيا ما كنت - تتقمص و تقول مش لاعب عشان القواعد مش عاجبانى


ثانيا : ايه اللى حيحصل لما نقاطع ؟

لا و الله ؟ فاكر يعنى هما حيغلبوا سواء فى الشعب أو الرئاسة ؟؟؟

فى انتخابات الشعب لو كل القوى السياسية - مش نكتة و الله ان عندنا حاجة اسمها القوى السياسية - قاطعت الانتخابات حتلاقى كل دايرة برده نازل فيها عشرميت مرشح مستقل و حتبقى فيه منافسة و مراقبة و صدامات زى اى انتخابات تانية و محدش حيحس ان فيه فرق

ليه ؟ لأن أصلا مفيش قوى سياسية مؤثرة فى مصر لحد دلوقتى لدرجة انها لما ما تبقاش موجودة حد يحس بفراغ

لا مؤاخذة يعنى ... فيه كام ناخب مصرى يعرف ان فيه مؤسسة فى مصر اسمها حزب الجبهة الديمقراطية ؟؟ ولا فيه كام مرشح يقدر حزب الغد يرشحه عشان لما يمنعهم يبقى فيه فراغ فى الساحة ؟؟

أقطع دراعى لو فيه فى مصر 3% سمعوا عن حزب الجبهة او لو فيه كيان سياسى مقاطعته للانتخابات ليها وزن أو تأثير ....... يا مؤمن ده حتى الأخوان بينزلوا مستقلين !!!! ء

انتخابات الرئاسة ليها وضع مختلف و حسابات أعقد بكتير من السخف النخبوى معدوم المعنى و التأثير ده و ليها كلام تانى حقوله فى الآخر


ثالثا : ايه الفايدة من المشاركة ؟

فى انتخابات البرلمان ... الفايدة الأساسية فى المعركة نفسها ... مش حقيقى اللى بيدعيه دعاة المقاطعة ان ادامنا سكتين بس ... يا اما المقاطعة يا اما الدخول فى صفقة مع النظام

ده كلام فارغ - كعادة الكلام النخبوى - و تخوينى غبى

راجع للنظرية الغبية ان كل خيوط اللعبة فى إيد النظام و أن أى نجاح بيتحقق على الأرض بإذن النظام و ارادته

لكن التنكيل بأيمن نور بعد 2005 و منع الأخوان من النجاح فى المرحلة التانية و التالتة فى 2005 و اضراب 6 أبريل 2008 و تصاعد الاحتجاج الاجتماعى من 2005 لحد دلوقتى كلها و غيرها كتير حاجات تظهر للأعمى أن النظام مش بالقوة اللى بيروج لها و أن مش كل حاجة بتحصل بمزاجه و بموافقته و من الغباء الشديد الاعتقاد بقوة وهمية للنظام تضيف له أضعاف قوته الواقعية

انت تقدر انك - سواء حزب أو جماعة وطنية او مؤسسة مجتمع مدنى - تدخل فى معركة فى كل دايرة انتخابية فى مصر و تخرج لك كوادر سياسية شبابية اشتغلت فى الشارع بجد و عرفت ازاى تراقب انتخابات و ازاى توصل للناس و ازاى تدعو للتغيير فى موسم مسموح لك فيه بالتعبير الكامل عن رأيك و بشكل قانونى مش بيبقى موجود غير بس وقت الانتخابات

تقدر أنك تجبر النظام على التزوير و تفضح تزويره ده

لكن قل لى يا عبقرى .. لو انت مدخلتش المعركة أساسا ... هل فيه اى حاجة حتجبر النظام على التزوير ؟؟ أبدا ... بالعكس ... حتبقى أنت بالمقاطعة اديت النظام الحاجة اللى كنت بتسعى لحرمانه منها

الشرعية .....

الانتخابات مش حتتزور ولا حيتلعب فيها و حتبقى انتخابات خاضعة لكل المعايير العالمية - لأن المنافسة فيها حتبقى بين أبناء النظام و بعضهم - و حتبقى انتخابات شرعية نزيهة بكل المقاييس


تعالى لى بقى فى انتخابات الرئاسة

أنت متخيل المجال مفتوح قد ايه قصادك للشغل على التغيير فى انتخابات الرئاسة ؟؟

أيمن نور محدش كان يعرفه قبل 2005 و كان عنده 40 سنة بس و عامل حزب مكملش كام شهر و كانت اصلا مصر مفيهاش أى وسائل اعلام محايدة ولا مستقلة (غير جريدة جديدة وقتها اسمها المصرى اليوم) و النت وقتها ماكانش بواحد على 100 من قوته و سلطته دلوقتى و مكانش فى مصر أى وعى بأهمية التغيير ولا كانت فيه أزمات بتطحن المصريين و بيلوموا عليها النظام بشكل علنى زى دلوقتى

و مع ذلك - رسميا- أخد أيمن نور 540000 صوت

الراجل بمجهوده الشخصى مع شوية ناس قليلين ملتفين حواليه فى 28 يوم قصاد كل الآلة الاعلامية و البوليسية الجبارة للنظام خلى نص مليون مواطن مصرى - برده بأكد أنها حسب احصاءات الحكومة المضروبة أصلا - ينزلوا من بيوتهم عشان ينتخبوه قصاد رئيس كان ساعتها بقاله ربع قرن فى السلطة و لسة فى صحته

متخيل معايا النص مليون دول ممكن يتضاعفوا قد ايه فى الوقت الحالى و احنا عندنا :

- قنوات اعلامية مستقلة جرايد - فضائيات على قفا مين يشيل
- وسائل اتصال و نت مفتوح ليل و نهار و تحت سيطرة الشباب المعارضين للنظام
- أزمات كرهت الناس فى عيشتها و حركات احتجاجية بتطلع كل دقيقة ضد فساد الحكومة
- منظمات مجتمع مدنى مالية البلد و عندها كوادر بالعبيط
- رئيس بيموت فعليا

حط عليهم مرشح معروف و قادر على التواصل مع الناس زى ايمن نور أو مرشح عنده ثقل دولى و زخم اعلامى و شبابى مهول زى البرادعى

متخيل النص مليون اللى راحوا لأيمن نور فى 2005 ممكن يبقوا كام فى 2011 ؟؟

متخيل حجم الخسارة اللى مصر حتخسرها لو البرادعى قرر أنه يضبيع الفرصة و ميشاركش فى اللعبة عشان قواعدها مش نزيهة ولا عادلة و ادى الفرصة للنظام أنه يستحمل شوية حرج بسيط بدل ما يدخل معاه معركة نهاية ؟

أنا بقى متخيل ساعتها النظام و هو بيسمح لأيمن نور بدخول الانتخابات عشان شوية النخبوين المدعين بتوع المقاطعة يوصموه بأنه كسر الاجماع الوطنى و يبقى ساعتها الحكومة ضربت عصفورين بحجر واحد ... ركنت البرادعى برة المعادلة و دمرت كل شغل أيمن نور فى السنين اللى فاتت

و ابقى قابلونى فى انتخابات 2015 و عليكو خير

واحدة بنى آدمة منتقبة قاعدة قدام الكاميرا عشان تخاطب الملايين

ماهو ده من الخبل الذى نعيشه الآن

و ماذا عند هذه المرأة من العلم حتى تقدمه ؟

العلم ده بتاع الرجالة و بس ... مع احترامى يعنى

أى امرأة مهما صعدت فهى مقلدة و عامية

مفيش واحدة تعرف العلم على أصوله

ممكن تقعد تعمل درس خاص .. ليه ؟ .. لأن الجهل فاشى فى النساء .. معروفة

كل واحدة قرت كلمتين ولا تلاتة ولا أربعة ما ينفعش ربنا يهدى بيها الناس

و الأصل عندنا فى القرآن و السنة أن المرأة تقر فى بيتها ولا تخاطب الرجال الا لضرورة و أنها تعتزل الرجال

و ده الأصل الاصيل اللى مش عاوز ننطح فى بعض فيه

يكفينى آية واحدة قال الله تعالى .. و اذا سألتومهن متاعا فاسألوهن من وراء حجاب

الحجاب عندنا نوعان .. حجاب البيوت و حجاب البروز

حجاب البروز لما الست دى تخرج من بيتها فتتجلبب جلبابا كاملا

ربنا بيقول للصحابة - اللى هما أطهر الناس قلوبا - لما تكلموا امهاتكم كلمها من ورا ستارة

طب دى أمى !!؟؟ ... اكلم أمى من ورا ستارة ازاى ؟

امهات المؤمنين زيها زى أى امرأة .. لا يحل لأحد ان يسافر بها أو يختلى بها
000000000

دى منظرة .. المرأة بتعملها دى دى منظرة لا أكثر ولا أقل و الفضائيات فيها عك كثير

النساء اللى بتتصل عشان تقرأ قرآن فى التليفون .. ما تروح مقرأة فيها أخت و لا حاجة

نتلقى اتصال .. هه .. ايوة يا ستى عاوزة تقرأى ؟ اتفضلى اقرأى

اسمك ايه ؟ وردة .. الله ريحتك حلوة

اسمك ايه ؟ فتكات ؟ .. طيب اقرى لنا حاجة من سورة القتال ... ما هى فتكات بقى

ده دين ده ؟؟ . ده ممكن نسميه دين ؟؟

======

و عندنا علماء فى مسح الجيوب ... بتوع تفسير الاحلام

ايوة يا ستى شفتى ايه ؟ كنتى لابسة أخضر فى أخضر؟ و كنتى طايرة ؟ لأ ؟ الحمد لله لو كنتى طايرة كانت حتبقى مشكلة
كنتى طايرة ؟ الحمد لله لو كنتى على الأرض كانت حتبقى مشكلة

و 100% من اللى بيتصلوا فى البرامج دى من النساء

مفيش راجل فى الدنيا بيشتغل و يعرق عشان يبرجع يكع 40 جنيه عشان يقول حلمت و ما حلمتش

اللى بيعمل كدة النساء الفارغات

عندنا زخم .. ماهى دى كلها مخالفات و هذا خروج عن قانون الشريعة

و حتى فى المجتمع اللى احنا بنؤمل أنه يقف على حدود الله عمال يخطى هو كمان

و اذا اصابته مصيبة قال ... أنى هذا ؟؟

ما هى دى كلها من المخالفات

أحكيلكم اللى عارفينه من قصة بدر

  

مفيش تعليق أبلغ ولا أوضح من الصورة دى

http://www.youtube.com/watch?v=BpSHALk1htI

Let me tell you what Passion is

Let me tell you what Passion is

the passion is something higher than friendship , sweeter than love , hotter than sex , more distructive than anger and more strong than magnetics

the passion is to fully think of someone more than anything else ,, even more than if u love him/er ,, the passion is to be completely surrounded by him/er in your senses ,,, 

Ahmad Badawy

13 May 2010

شلل

أصيب بالشلل فتركته زوجته وطلبت الطلاق لتتزوج من آخر فلعنها اللاعنون
فتذكر أثناء إحدي محاولات انتحاره عندما مرضت زوجته الأولي فطلقها ليتزوج أخري ولم يلمه أحد

الفرعون الفصيح

مبتسما استمع فرعون مصر إلي شكاوي الفلاح الفصيح ، مبتسما أثني علي صبره وذكائه وقوة حجته ، مبتسما أمر بإعدامه علي الملأ حتي يكون عبرة لغيره من الفلاحين

خيانة مشروعة

ضبطت زوجها مع أخري زوجة لآخر مهم ، ثارت لكنه هدأها وهددها إن فضحت أمره وأقنعها ان تجاربه مع الأخريات تزيده قربا منها ، وافقت علي السكوت ولكنها هددته بأن تعامله بالمثل وتخونه مع آخرين ، لم يعترض أو يتذمر و عاشا سويا - مع آخرين - حتي نهاية حياتهما

اعتزال

كانت تجعل من جسده العريض وسادة لها تفترشه وتعتليه وتستند علي صدره بيدها بخفة لتمشط شعره الأبيض الناعم باليد الأخري

سألته وهي تنظر إلي عينيه ، لماذا إعتزلت ؟

داعب ثديها البارز في وجهه بلطف براحة يده و هو يسألها لماذا تصرين علي هذا السؤال دائما وكأنني سأجيبه حقا ؟

ردت بإبتسامة لعوب أسألك منذ سنوات فربما تخبرني الحقيقة ذات مرة وأفهم

نظر إلي عينيها العسلية العميقة وهو يرد بإبتسامة بها الكثير من الإستخفاف

قتل الفضول القط
اعتزلت عندما لم يكن هناك جديدا أقدمه
قمت بكل مايمكن القيام به حتي صرت الأشهر في مجالي علي الإطلاق

انتصرت علي جميع الآخرين وحصلت علي كل ألقابهم بلا استثناء ومددت سلطاني وجبروتي في كل إتجاه ثم أصابتني تخمة الملل

صدقني الجميع في كل ما أقوله فلم يعد للصدق هدف ولا للكذب من شهوة

صارت بيدي كل ما أشتهي من سلطة حت قبض الأرواح وإطلاقها

ابتعدت عنهم شهورا علي أجد من يأخذ مكاني لأصارعه فلم أجد عند رجوعي إلا المزيد من الولاء والرضا
ظلمت وبطشت فكان الأمر أمري دون أي تحفظات
في النهاية قررت التوقف عن أن أكون موجودا في تلك اللعبة واعتزلت ومن يومها لم أعرف شيئا عن ذلك العالم الذي رحلت عنه بلا حنين

عالم افتراضي

بقالى فترة بعيد عن العالم الافتراضى الموجود على النت بسبب انشغالى بالعالم الحقيقى

لكن من ناحية تانية ... يعنى ايه عالم افتراضى ؟

لما انا فى العالم اللى مفروض انه حقيقى مفروض ان عندى شغل بشتغله و بيت المفروض انى عايش فيه و علاقة حب المفروض انى عايشها و طموح سياسى محترم بحققه

ده المفروض ... لكن الحقيقة ان مفيش شغل معين بشتغله بقالى ييجى شهرين و مش محدد لا مرتب ولا ساعات عمل ولا اهداف ولا اى حاجة و البيت اللى عايش فيه - برده بدخله كل فترة مرة - مش بيتى ده بيت ابويا اللى مفروض واحد فى سنى يبقى له بيته الخاص بيه من سنين و علاقة الحب اللى مفروض انى عايشها علاقة خيالية ملهاش وجود ولا تأثير فى الواقع و الطموح السياسى اللى مفروض انى بسعى له طموح لمنصب فى حزب الغد اللى هو شبه موجود و شبه مجمد و شبه منقسم

يعنى انا حياتى برة النت اصلا و أساسا كلها خيالية خايبة ملهاش تصنيف ولا تعريف و مع ذلك بقول دى الحياة الحقيقية و بقول على حياتى على النت الحياة التخيلية

ياخى طظ

بفكر فى الاعتزال

أيوة ... فكرت فيه امبارح و انهاردة

قرار نهائى آخده و أنفذه فى ساعتها ... أقدم على شغل فى الهندسة تانى انشالله حتى فى دولة خليج و اكسب فلوس قد كدة و اركز انى ابقى غنى و استقيل من كل ماله علاقة بالسياسة

ليه لأ ؟ ... حخسر ايه ؟ ما انا كدة كدة خلاص فقدت القدرة على الكتابة من مدة و الانتخابات دى ورتنى الويل لأنها أجبرتنى على مساومات كتير جدا مكنش مفروض انى اواجهها اصلا لأنى من الأول مش هدفى الوصول لمنصب سياسى غير عشان اقدر أعمل بيه تغيير ... بس السؤال اللى اكيد واجه كل سياسى دخل لعبة السياسة بنية للاصلاح ... هل الغاية تبرر الوسيلة ؟ و لأى مدى ؟ و بأى قدر من التنازلات ؟ و ايه الحلول اذا كان اللى بتواجهه مش حينفع معاه الطرق الشفافة الخيالية ولازم تواجهه بالمكر و لازم تدخل فى صراع مرهق و مذل احيانا ؟