Friday, November 14, 2008

جروب مش عاوزين جمال مبارك



جروب "مش عاوزين جمال مبارك بدأت كفكرة فى دماغى فى شهر سبتمبر 2007 عشان بس أجمع الناس اللى رافضة التوريث و انشر فيها مقالات كنت كاتبها عن جمال مبارك

كان وقتها الفيس بوك لسة جديد و كان مفتوح للابتكارات و أنا فاكر كويس أن اللى أوحى لى بالفكرة دى كان باسم سمير برغم أننا ماكناش نعرف بعض خالص وقتها و كان كل شوية بيعمل جروب جديدة بفكرة جديدة

ناس كتير جدا أنتقدوا أن يبقى الجروب معمول مخصوص عشان الوقوف ضد شخص معين .. بس أنا كان ردى أن الموضوع مش جمال مبارك كشخص .. جمال مبارك مجرد رمز الناس ممكن تتجمع حواليه - رمز للفساد و الاستبداد بالسلطة - و هو ده اللى أنا بدور عليه بالضبط ... رمز الناس العادية كلها تبقى شايفاه و عارفاه و منتبهة له عشان من خلاله أتواصل معاهم و أتعلم منهم الأفكار حوالين حقوقنا و واجباتنا و رؤيتنا لمستقبل البلد

أهم الناس اللى استمتعت و استفدت بمشاركتهم فى ادارة الجروب شهد و نادين أبو شادى ( مكنتش أعرف انهم أخوات لما طلبت حد يبقى مدير فى الجروب و يساعدنى أكبرها ) و هانى الخياط و ياسر لبلاب و حرنكش ( ده بلاغ جماعى أهو عشان أخلص منهم كلهم )ء

كنا بنديرها ادارة جماعية - الى حد ما ديمقراطية برغم أنى ديكتاتور فى أحيان كتير - و قدرنا نبتكر أكتر من فكرة جديدة لجذب الأعضاء و تشجيعهم للتعبير عن رأيهم سواء برفض توريث مصر أو قبوله و اللى كان بيقبله كنا بنتحاور معاه بكل ما أوتينا من منطق عشان نقنعه أن التغيير هو الأمل

عملنا ابتكارات كتير سبقنا بيها كل جروبات الفيس بوك 

زى مثلا أننا نعلن ميعاد أسبوعى لمناقشة موضوع ثابت يوم الجمعة و نبدأ نناقشه مناقشة جماعية فى توبيك و احيانا كان التوبيك بيوصل لأكتر من 150 رد 

أحنا برده اللى ابتكرنا فكرة أننا ننشر موضوع على نتوورك مصر (أعضاء الفيس بوك المخضرمين بس هما اللى ممكن يفتكروا ايه هى نتوورك مصر دى قبل ما الفيس بوك يلغيها ) و كنا بنهجم على النتوورك فى وقت محددينه قبلها و نتكلم عن ازاى نقدر نقاوم التوريث و ايه هى اهمية العصيان المدنى و التظاهر من أجل الحقوق المشروعة للمصريين

وقتها بدأت تجيلى تهديدات فى التليفون و طنشتها كالعادة بطريقة اللى يدخل بيت الرعب فى الملاهى فيقوم يغمض عينيه عشان ما يشفش الصور اللى تخض ( كنت بعمل كدة لما بدخل بيت الرعب فى ملاهى السندباد و أنا فى ابتدائى) .. كان اللى يتصل يهددنى أسيبه على الخط من غير ما أسمع بيقول ايه

لحد اضراب 6 أبريل كانت الجروب مولعة بالدعوة للاضراب فى يوم ستة أبريل 2008 و فى يوم الاضراب اتقبض عليا و اتحبست بعدها شهر احتياطى على ذمة قضية تعطيل المرور و تكدير السلم العام و تعطيل مصالح المواطنين

و أنا فى السجن عمرو أديب قال لوالدتى على الأوربت أنى اتحبست بسبب اللى أنا عامله على النت - طبعا كان قصده جروب مش عاوزين جمال مبارك و المدونة و الضغط اللى حصل بسبب الفيس بوك عموما

ساعتها برغم أنى خفت جدا لأنى أول مرة أحس بجد بمدى تأثير الجروب و الخطر اللى أنا فيه بس فرحت من قلبى أنى عملت حاجة عاملة تأثير بالدرجة دى و حسيت فعلا أن الحبسة دى مش من فراغ و أنى ما دخلتش السجن غلط

و رغم أنى بحب محمد زكى الشيمى صديقى العبقرى لكن زعلت جدا غصب عنى و أنا فى السجن لما قريت فى الدستور أنهم كاتبين أنه هو مؤسس كذا جروب على النت و من ضمنهم جروب مش عاوزين جمال مبارك رغم انه مكانش ساعتها أدمن فيها ... و الصراحة كمان استغبيت صحفيين الدستور اوى ....... يعنى لما يبقى فيه جروب زى دى و مديرها محبوس فى قضية 6 أبريل فده فى حد ذاته خبر صحفى قوى كان ممكن يستغلوه بصورة كويسة

المهم ... لما خرجت من السجن كان عندى لخبطة جامدة جدا فى دماغى .... من ناحية حاسس بالحذر و القلق ناحية تعبير الناس ناحيتى بأنى بطل لأنى عارف أنها حالة مؤقتة و حتروح لحالها و خايف أتعلق بيها و أزعل لما تخلص

و من ناحية تانية بقيت عصبى جدا جدا و مش بستحمل أى ضغط عصبى من أصحابى بالذات و بقيت انطوائى بصورة غريبة اوى و خسرت ناس كتير من أعز أصحابى بسبب الموضوع ده

و من ناحية تالتة كمان رجعت الشغل و فهمت أن رجوعى معتمد على أنى أبطل سياسة عشان أعرف أركز فى شغلى و ما اخسروش

كل ده أدى لأنى حماسى مات خالص للجروب و ده أثر على شهد و نادين و خلاهم هما كمان يركزوا نشاطهم فى حاجات تانية و فى الآخر حصل سوء تفاهم بينى و بينهم و سابوا الجروب هما كمان

بعد فترة قررت أسيب الجروب عشان بقيت حاسس أنى سبب فشلها و تراجعها و طلبت من الأعضاء أنهم يسامحونى عشان مش عندى حاجة تانى أديها و انى عملت اللى عليا ولازم اسيبها للى يقومها من اول و جديد

لما سبت الجروب أدارتها الصديقة الدكتورة منال فهمى اللى فعلا هى أكتر واحدة وقفت جنبى من ساعة ما خرجت من الحبس و هى اللى أختارت أستاذنا الجميل أحمد ميلاد و هانى و ياسر و زكى الشيمى عشان يديروا معاها الجروب بعد ما أنا سبتها و هى كمان اللى احتفظت بالتصدير اللى كنت كاتبه فى تعريف الجروب و كتبت عليه اسمى عشان حتى لو ما رجعتش الجروب يفضل اسمى مكتوب فيها --- خصوصا انى اكتشفت أن كل المناقشات القديمة على الوول بتتمسح بعد عدد معين و أن كل مناقشاتنا و كلامنا اللى كتبناه من ساعة ما بدات الجروب اتمسح و اتنسى ---

و لفترة قصيرة جدا حسيت أنى فعلا فقدت اهتمامى بالجروب و ما بقيتش أعتبرها ابنى التانى - بعد المدونة- الناجح و ما بقيتش مهتم بأى حاجة تحصل فيها

لكن لما حصل موضوع حريق الغد و احساسى بالغدر اللى حصل و كذب جرايد الحكومة اللى متعودين عليه قررت أرجع تانى مؤقتا عشان أظهر الحقيقة للناس و أنا برده عندى حذر أنى ما أنزلقش تانى للسكة دى لأنها بتستنزفنى بقوة من غير عائد

رجعت للجروب و ساعدت أستاذ أحمد ميلاد فى توصيل الحقيقة اللى أنا متأكد منها و شفت جزء كبير منها بعينى من غير أى وسايط فى موضوع الغد و أدينى من ساعتها لسة موجود فى الجروب

صحيح من غير أى نشاط ملحوظ ... بس أهو بقيت عضو شرفى بتشرف جدا بأنى مؤسس الجروب و أول واحد فكر فى فكرتها حتى لو حماسى قل و أى حد تانى محترم أدارها و كمل نجاحها من غير وجودى خالص

لحد لما الفيس بوك يتقفل خالص و يتمنع من مصر - و يمكن بعدها كمان - فأنا حفضل فخور و سعيد بأن جروب "مش عاوزين جمال مبارك" كانت واحدة من بنات افكارى و بداية نجاحها كان على ايدى و بمجهودى و مجهود شهد و نادين و هانى الخياط و ياسر لبلاب و حرنكش
\\\\\\\\\\\\\\\\\\\\\\\\\
أنا بحكى كل الكلام ده بسبب خبر أتكتب عن الجروب على موقع قناة العربية بعد ما رجعت ليها تانى خلانى حسيت أنى مكنتش بضيع وقتى طول السنة اللى فاتت

و ده لينك الجروب
http://www.facebook.com/group.php?gid=5403452710

و ده لينك الخبر المكتوب عنها فى العربية نت
http://www.alarabiya.net/articles/2008/11/13/60072.html
=====================================================

التصدير ده كتبته فى سبتمبر 2007 بس مش فاكر طبعا يوم كام بالضبط و الدكتورة منال هى اللى كتبت اسمى عليه عشان ماحدش يمسحه بعد ما أخرج من الجروب
============================
============================

ء((("الجروب دى بنحاول بيها نسبق الكابوس قبل ما يبقى واقع و ييجى ناس يقولوا خليكوا واقعيين

أحنا ضد أننا نتورث زى العبيد تحت أى مسمى يخترعه الحزب الوثنى و يتهمنا بعد كدة أننا بنشكك فى المسيرة اللى بتعرج دى

بنحب مصر و بنعيش و نموت فيها و عشانها و مش حنسيبها زى غيرنا و مش بنسوء سمعتها زى ما بيتهمونا كل ما ننشر مصايب حسنى مبارك و شلته .... و عشان بنحب مصر مش موافقين أنها ترجع عزبة تانى من أول و جديد و أنها تتورث لشخص معدوم الكفاءة و الامكانيات السياسية و الحس الأنسانى كل مؤهلاته أنه بالصدفة ابن الرئيس

جمال مبارك ملوش أى صفة بيمثل بيها مصر - لحد دلوقتى - و أظن حتى اللى لسة مقتنعين بأن حسنى مبارك كويس عشان رئيس مصر بيدوروا على حجة تانية عشان يبرروا لنفسهم انهم بيدافعوا عن الفاشل جمال مبارك"))))ء


أحمد بدوى
مؤسس الجروب
سبتمبر 2007
=============================
=============================
Post a Comment